佛指甲
天時暑熱，有時食碗凍腐竹白果糖水，或者用腐竹白果煲粥食潤潤肺，都幾唔錯。腐竹冇問題呀，但白果就唔得食多，因為白果有毒性，最好唔好生食。何謂食多呢？大人食十粒八粒應該冇問題，但細路有時只食十粒當口果，可能亦會中毒。 若中毒則可大可小，因為白果中毒會損害中樞神經系統，輕者發燒嘔吐及肚瀉，重者則會導致延髓麻痺，因呼吸中樞麻痺而致命，都咪話唔驚！ 點解食白果會中毒呢？因為白果的化學成份裡面含有白果酸、酚類及內脂，這些都是帶有毒性的化學物質。若在實驗室中替兔仔靜注每公斤 0.2克的白果毒，兔仔的血壓會慢慢上升又下降，最後呼吸困難而死；這些無辜辜為人類犧牲貢獻的小動物，好可憐呀！點解我會無端端講白果？因為白果呢位兄弟同我佛有緣，素菜烹調上時時有用，兼夾佛門古寺亦時有栽種。 有味浙江菜，叫做「佛手珠子」，嘩！個名幾好聽，都用白果來做主菜；材料分別有佛手瓜、白果、栗子、紅白蘿葡、香菇、黃瓜等等。 將瓜同蘿葡挖成球形，再同白果、栗子一齊炒，最後加入素上湯就可以上菜，顏色靚、口感爽，唔錯㗎！ 有人唔鐘意叫佢做「白果」，因為粵語講「食白果」，就弊啦！如果讀書、考試食白果，即係「零雞蛋」嘅意思，所以做任何嘢都千祈唔好食白果。 其實白果原名叫做「銀杏」，銀杏多數人都知係白果原名。李時珍在《本草綱目》一早就講咗，白果形小似杏仔但核白，所以叫銀杏。如果要完全詳細了解銀杏歷史，就一定要有宿命通至得。因為銀杏存在於地球最少都有三億年歷史以上，所以銀杏呢個家族，可以話見證佛法興亡，佢哋過去值遇過啲古佛，可能仲比你同我多。 銀杏由成長到結果，差不多都要九十年時間，真利害！我哋一世都衹食佢一棵樹果實一次咋！唔信？有詩為證：「五峰高峙瑞雲深，秦寺雲昌歷宋金；代出名僧存梵塔，名殊常寺號禪林。巖稱虎嘯馴何跡，石出雞鳴叩有音；古柏高枝銀杏實，幾千年物到而今。」 聽唔聽到最後兩句：「古柏高枝銀杏實，幾千年物到而今。」呢首詩係清朝遵化進士史樸去河北遵化縣禪林寺巡視時所寫。因為遵化縣禪林古寺前人一共種咗十三棵大銀杏樹，差不多有二千幾年歷史。 仲有兩首詩都寫得幾好，喺清朝順治時一位宮守陳全國為山東莒縣浮來山定林寺一棵銀杏立碑所寫：「大樹龍盤會魯侯，煙去如蓋籠浮丘；形分瓣瓣蓮花座，質比層層螺髻頭。史載皇王已廿代，人經仙釋幾分流；看來今古皆成幻，獨子長生伴客游。」 「驀看銀杏樹參天，閱盡滄桑不計年；漢柏秦松皆後輩，根蟠古佛未生前。」 好一句「人經仙釋幾分流」呀！虛雲禪師偈云：「坐閱五帝四朝不覺滄桑幾度，經歷九磨十難了知世事無常。」呢棵銀杏樹，又何只坐閱五帝四朝呢，真係可謂閱盡人世滄桑，有成三千幾年咁耐。嘩！咪佛教正法時期！漢朝柏、秦朝松都冇得揮，都唔夠佢老。 為銀杏寫詩，仲有好多名家，好似王維呀，歐陽修呀，蘇東坡呀，李清照呀，梅堯臣呀，乾隆皇帝都有，要講，有排都講唔晒。 銀杏，又叫做「佛指甲」，似唔似呀？又未見過真正佛指，點知呀！經過現代各種成熟技術的培育，銀杏有四十幾種良品，而且好多品種名稱仲同佛有關，如：「大佛指」、「尖頂佛手」、「洞庭佛手」、「大佛手」、「長柄佛手」、「金果佛手」等等。 若以現在銀杏在中國的水平分布情形講，從南到北跨出了二十一個緯度區；若從東至西就仲犀利，越過成二十八個經度區，即係話已經遍佈二十一個省、自治區同直轄市。 公元六世紀，銀杏隨佛教傳到日本，所以現在可以見到日本好多神社同遊覽境點都有銀杏樹種植。各位去日本料理時有冇食過串燒銀杏呀？ 中國一年出產銀杏種核約九百至一千萬公斤。嘩！咁樣睇，可能銀杏樹真係有機會成為中國國樹都唔定。據我密探，中國現有百幾歲以上銀杏樹二十萬棵以上，如果五百年以上嘅，就應該有成差不多近一百八十棵。五百年以上嘅高齡，哈哈！最少輪迴成五世回來，仲同棵樹淋水，真辛苦！ 有冇銀杏樹成精？我話比你聽實有都得。成精都唔一定壞嘅，都有好嘅，唔化人形攪人咪得囉，繼續修行落去，多積善功咁話，仲有機會受上界策封成神添。 宇宙間萬事萬物，都係一正一反，其實銀杏太爺爺對人類都有好多貢獻及益處。 以中醫四氣五味講，銀杏葉及果性味為甘、苦、澀、平；葉的藥性歸入心肺二經；果的藥性則歸肺經。銀杏藥的功能有止痛、平喘、斂肺及化瘀之功，可用於治療冠心病疼痛、肺虛喘咳、血脂過高等症；而果實的功能則可治療尿頻、遺尿、痰多咳喘及帶下白濁等症。 如果以西藥藥物化學角度講，從銀杏葉中就可提取多達一百六十多種化學成份，主要的有黃酮類、生物碱、奎寧酸、亞酒酸、酚類、萜類等等。銀杏花粉仲有人體需要嘅氨基酸、不飽和脂肪酸、維他命Ｅ同其它礦物質。這些化學成分經現代醫學臨床已證實具有防止心血管疾病及腫廇、延緩皮膚老化等等功效。我覺得銀杏最好嘅功能之一就係當身體內的自由基對細胞不利時，銀杏可以清除自由基，令細胞生長得肥肥白白，不受傷害。 在西藥學方面，銀杏主要用作延遲老人痴呆症、改善身體血液循環不良及醫治耳鳴等等。坊間藥房當然可以買到經提純後合成的「銀杏素」、「銀杏片劑」等保健製成品；至於女仕們最關心嘅，當然有好多美容同化粧用品，都加入咗銀杏精華啦。 各位，有人真係好鐘意喫白果㗎！記住，免得過最好唔好生喫，特別細路仔仲要小心，而且煲粥煲糖水時最好去芯（果中的綠色幼胚），咁應該萬無一失啦，一次過喫十零粒應該冇問題，因為中毒多只因生喫同過量。 萬一真係不慎中毒，如果情況唔嚴重，只有少少作嘔肚痛，又或者喺某些情況未及就醫，可以用甘草十五到三十克煮水飲，或者可以飲綠豆湯來化解，用白果殼煮水飲都可以，要飲多啲，盡量將體內毒素排出。 煮好之後，最少加念《孔雀明王心咒》或《大白傘蓋佛母咒》任何一咒（堅甲真言篇幅最短），四十九遍，最好一百零八遍，然後飲用。 如果見有呼吸急促困難、心跳好快、頭昏眼花無力，就千祈唔好等，快快去醫院啦！記得！
