若中毒則可大可小，因為白果中毒會損害中樞神經系統，輕者發燒嘔吐及肚瀉，重者則會導致延髓麻痺，因呼吸中樞麻痺而致命，都咪話唔驚！
點解食白果會中毒呢？因為白果的化學成份裡面含有白果酸、酚類及內脂，這些都是帶有毒性的化學物質。若在實驗室中替兔仔靜注每公斤 0.2克的白果毒，兔仔的血壓會慢慢上升又下降，最後呼吸困難而死；這些無辜辜為人類犧牲貢獻的小動物，好可憐呀！點解我會無端端講白果？因為白果呢位兄弟同我佛有緣，素菜烹調上時時有用，兼夾佛門古寺亦時有栽種。
有味浙江菜，叫做「佛手珠子」，嘩！個名幾好聽，都用白果來做主菜；材料分別有佛手瓜、白果、栗子、紅白蘿葡、香菇、黃瓜等等。
將瓜同蘿葡挖成球形，再同白果、栗子一齊炒，最後加入素上湯就可以上菜，顏色靚、口感爽，唔錯㗎！
有人唔鐘意叫佢做「白果」，因為粵語講「食白果」，就弊啦！如果讀書、考試食白果，即係「零雞蛋」嘅意思，所以做任何嘢都千祈唔好食白果。