常觀世音的博客

整包素即食麵，落包麻油，好多師兄仍在吃，貪麻油香噴噴，好平常一件事；整碟素腸粉，洒滿芝麻同麻醬，夠香夠滑好味道；再來個素炒飯，放撮芫茜，吃素修行者覺得幾香，都已經習以為常。

芝麻麻油同芫茜三件事有點灰色地帶，佛教中都有兩派意見；一派贊成可以食，一派就反對。咁究竟食唔食得呢？

唔食，就當然最好，比較著數，對自己修行更有保障；總之過香過濃的東西，比如香草一類，少食不食就最化算，身體內氣脈輪的震動頻率就穩定、雜念就少，有益身心修行。

假使你食芝麻麻油又食芫茜，咁又犯邊條戒呀？

如果按事相上的戒條來講，冇戒犯，冇一條戒唔准人食芝麻麻油同芫茜。

葷，即是有臭味的東西，聞起來好大味；辛，即是有刺激性同辣的食物，食起來令味覺好興奮。麻油當然不屬於葷也不屬於辛，咁芫茜呢？

芫茜聞起來有種特別的味，所以又叫做香菜，但炒起來又冇蔥同蒜頭味道咁厲害咁霸道，芫茜應該唔屬於五種辛之一，但以前曾經有法師研究過話芫茜是蔥蒜的遠房親戚。咁芫茜是否葷呀？有人食落覺得香，有人從來都唔敢碰，話奇臭，見仁見智，咁你覺得呢？

回歸菩薩道修行，《入楞伽經》佛陀講到壓榨芝麻油多蟲，菩薩發心出於慈悲護生，所以唔食麻油，好有道理；佛陀在《首楞嚴經》又講到五辛一定唔可以食，而且易招餓鬼天魔等聞到辛葷氣味就來舔你的口或從口中盜取精氣了，這點在修行上都好重要。

芝麻麻油多蟲，芫茜同蔥寄生蟲都唔少，而且都有特別的香味，長食對身心或多或少都存在刺激性；菩薩道修行講求身心清淨的平衡及還原，所以在修行上還是唔食最好最理想。

「現在芝麻冇蟲，唔同印度古代刻意令芝麻生蟲使榨出來的油更香更肥更滑更甜。」

邊個講話現在芝麻冇蟲榨麻油冇蟲？

你問人借隻天眼睇睇！