般若心傳講座合集（下冊）

208.孔雀明王（一）

惡業嘅衆生，一時間唔能夠用說話降伏，係要用武力去降伏，用力量去降伏。“明王”嘅意思呢就係，“明”就“光明”個“明”啦，就光明之王，“明”者亦都代表智慧也，亦都係智慧之王，“明”者亦都代表真言，大家唸誦個真言，亦都係真言神咒之王，所以由修持真言神咒而開悟而得到智慧，就謂之“明王”，“明”者係光明。當你修持明王嘅咒嘅時候，你心中嘅煩惱污染去除，你本心自心自性嘅心光發露嘅時候，呢一個心光發露嘅智慧呢，就係光明，呢個光明嘅本體就係你嘅本性。所以“王”者就“至尊至大”咁解，所以佛菩薩，佛陀所化嘅身體，其中有一類就叫做“明王”，就係呢一類。

除咗孔雀明王之外，其他還有好多明王嘅，但我相信法輪會裏便所聽嘅師兄嚟講呢，對於嗰啲明王呢，唔係太多認識，因爲呢個屬於，比較屬於密法、密部吖，密部比較多啲吔，亦都係比較少人，少人講嘅，關於孔雀明王。明唔明吖？咩叫“明王”吖？真言、神咒、智慧之王，光明之王，謂之“明王”，而呢個明王呢，呢個明王呢，騎住一隻孔雀，就謂之“孔雀明王”，以佢騎住嗰個座駕去定義佢個名稱。

點，咁繼續講落去啦，點解佢騎孔雀呢？佢又唔騎獅子呢？譬如文殊師利，文殊師利就騎獅子了，獅子代表勇猛、代表精進、代表我哋修行嘅六道法裏便嘅勇猛同精進。每一個佛菩薩有佢唔同嘅座騎，外在嘅座騎其實喺內，喺內，內在裏便有個象徵嘅意思。文殊師利呢，就騎獅子代表勇猛與精進。咁孔雀王騎孔雀係代表咩，咩，代表咩呢？我哋要了解呢，孔雀有一個特性嘅，孔雀嘅特性係咩吔？我哋有冇，應該澳門見過孔雀唔係太多，二龍喉有冇孔雀吖？好似有喎，吓嘛？但雖然你見到孔雀，但係孔雀唔係成日開屏㗎，吓嘛？孔雀開屏嘅時候會點呢？會學似出便咁落雨了，孔雀一開屏就會落雨，所以孔雀係同雨好有關係。另外孔雀嘅特質係咩呢？孔雀所食嘅嘢，專係食啲毒蟲同埋毒草嘅，但對佢自身呢，係冇任何嘅傷害性，佢能夠將啲毒蟲同毒草食咗入去之後呢，而能夠化成甘露，將呢啲咁吖毒物嘅營養呢，長養佢羽毛嘅生長，所以見到孔雀嘅羽毛點解咁艷麗呢？咁七彩咧？而印度嗰啲孔雀呢，嗰啲羽毛呢，帶有金光吖，好金嘅，而我哋中國嗰啲羽毛呢，係彩色，比較綠綠哋色，個羽毛，羽毛，一條羽毛呢，中間嗰個圓，嘅圓，嗰個圓環嚟講呢，係比較彩色啲嘅，中國嗰啲，但冇咁金，但印度嗰啲就比較金色。

所以呢個孔雀明王係釋迦佛響當時二千多年前將呢個密法教俾佢弟子而講孔雀王嘅故事，因爲孔雀王嘅故事啲孔雀係出自印度，所以“佛母大孔雀明王”，簡稱“孔雀明王”，亦都叫“佛母金曜大孔雀明王”，金曜，金曜，佛母金曜，金光照曜同閃曜，金曜，金色嘅光明。佢啲，印度嗰啲孔雀啲羽毛呢，一條啲孔雀嗰啲尾毛啦，譬如咁吖，一條一條啲孔雀尾毛，呢度有個環嘅，係彩色綠色嘅，呢度好金嘅，一條條線好金好金嘅，但係我哋中國嗰啲呢，你買到嗰啲羽毛嚟睇呢，喺街市有時見到呢，冇咁金，但好金，所以叫做“金曜孔雀王”。當佢一，個尾部一豎開開屏嘅時候咧，搖搖下、搖搖下喐嘅時候呢，啲金光就慢慢散發出嚟，好曜眼，所以叫做“金曜孔雀王”，就以呢個孔雀爲象徵，所以你修呢個孔雀王法嘅時候呢，呢個孔雀王個座駕，嗰個羽毛後便呢，就會發出金光去加持修法嘅，嘅衆生嘞，修法嘅行者，令佢消除業障。

咁講番孔雀嗰度，點解佢要騎孔雀頭先講就係，孔雀嘅特質就係食一切毒，化一切毒，所以響佛教嘅象徵猶如我哋本身嘅貪、瞋、痴、慢、疑。響上一次已經講過，我哋人類世界衆生嘅五毒嘅煩惱，我哋修孔雀王法，就猶如用個鳥嘅德行，孔雀德行，呢個象徵嚟嘅，啖食我哋衆生嘅一切煩惱，我哋嘅貪心啦、我哋瞋恨心啦、我哋愚痴心啦、我哋輕慢心、我哋嘅疑惑心，呢個五種根本煩惱，所以你修孔雀法就能夠將你五根本嘅煩惱淨化，五根本嘅煩惱淨化就點吖？慢慢慢慢你心開意解，明心見性，你就解脫生，生死，甚至與佛無二，所以呢個孔雀嘅象徵就係咁嘅意思嘞，食一切毒而自己唔會中毒，所以你當你修呢個孔雀法嘅時候呢，有化一切毒嘅功能，當你修孔雀法，如果人哋真係能夠修到有道行嘞，人哋俾一碟食物你吔，如果裏便落咗毒你係唔知，如果你修孔雀法，一食落去不但無毒，而且孔雀王嘅功德法力將呢啲毒全部化解，猶如你修大佛頂首楞嚴神咒一樣，所以孔雀能夠具有化毒嘅功能。外在嘅毒既能夠化，咁你內心嘅毒呢？就係頭先我所講個煩惱嘅毒，以至於你無明嘅毒，無始以來解脫唔到生死嘅毒，流轉響生死嘅毒，都係一種毒，將佢能夠化解，破無明顯佛性，孔雀王個法術就有咁嘅功能，所以點解要騎孔雀就係一個原因，象徵，象徵孔雀王嘅法力能夠將我哋嘅人嘅內心嘅種種嘅毒能夠化解。

我哋點解唔能夠解脫生死呢？我哋仲坐喺度你聽佛法，我哋而家開始修行緊，就因爲我哋內便嘅五根本煩惱啦。我哋知道小乘嘅聖者吔，就算你今生唔走大乘嘅菩薩道，你要，唔救渡衆生，你基本上如果你想解脫生死，要修持成就，聲聞嘅四果羅漢嘅果位，最基本你要破咗呢個五根本嘅煩惱──唔好講破，係壓伏佢。菩薩就將佢斷除，羅漢將佢壓伏，猶如一條草咁飆出嚟，攞嚿石壓住佢唔好飆到咁犀利，到最後菩薩嘅果位，佛嘅果位將呢條草吖，根都掹埋，根都掹埋，斷咗根嘞，但羅漢最基本要伏惑，將個煩惱，將個惑障伏住佢。咁所以貪、瞋、痴、慢、疑呢五毒嚟講呢，孔雀王嘅法術響內在嚟講就有機會，你日日修持，特別我自己個人嘅經驗，呢個孔雀法係我最鐘愛嘅法術嚟嘅，日日修持嘅時候就能夠將你無明嘅毒化解，好短嘅時間你修持你就會體會到個經驗就係，你嘅脾氣就會慢慢慢慢，譬如你唔修持嘅時候你好暴躁嘅，一開始修持個多月你已經容易將你個內在嘅脾氣吔，你內在嘅心情起伏吖，好容易降伏得到。所以呢個鳥德，呢個孔雀王嘅雀仔吔，呢個鳥吖，呢個孔雀嘅德行呢，就有呢個功德響呢度，所以佢就騎孔雀。

同埋另外一個問題呢，大家唔知道吖，當你，而家我哋一般都係修持淨土宗，西方極樂世界嘅法門嘅，如果阿彌陀佛我哋通常見到，誒，西方極樂世界嘅教主就係阿彌陀佛啦，阿彌陀佛嘅造像係點吖？你一般見到？都係直立嘅，有啲吔，手托住蓮花響胸前啦，有啲吔，垂手作接引狀啦，同施無畏嘅手印啦，通常係企喺度，如果打坐嚟講呢，就兩隻手喺度結個定印盤喺度，但係你有冇見阿彌陀佛坐座駕㗎？冇咧？少見了。其實五方五佛都有座駕嘅，阿彌陀佛屬於西方個方向，西方極樂世界嘅法主，西方極樂世界嘅法主嘅座駕就係孔雀嚟吖，今晚講俾你聽，就係孔雀嚟。阿彌陀佛嘅法門同埋咒法能夠將我哋衆生嘅貪瞋痴三毒亦都能夠淨化，亦都能夠清淨，極樂世界就係一笪清淨嘅國土啦，將我哋內在嘅煩惱無明同愚痴淨化啦，所以阿彌陀佛騎孔雀嘅座駕正好同孔雀王嘅所騎嘅孔雀嘅性質，內在嘅德吖，相吻合，所以，你修極樂世，修孔雀王嘅法門呢，同極樂世界嘅法門相通嘅，你回向極樂世界嚟講呢，可以令你進一步解脫生死，所以同阿彌陀佛係共通，同阿彌陀佛係共通吖，呢個法門。

如果阿彌陀佛嘅座駕你好少聽咧？今晚就話俾你聽阿彌陀佛嘅座駕，佢係通常唔坐蓮花之外，如果係騎動物嘅座駕，係騎孔雀。咁你會諗一諗，我再提示一樣嘢俾你，令你諗一諗，諗一諗咩呢？點解啲明王吖，或者佛或者菩薩要騎畜生？三惡道嘅衆生。無論你孔雀又好，咩其他動物又好，地下裏便走嘅、空中飛、海中游，都係屬於三惡道嘅衆生啦，或者叫做“旁生”，佢做咗破咗五戒十善，亦都分開三品嘅，分別墮入旁生、餓鬼、地獄三個法界。咁就算孔雀吖，都係攝入於畜生道，點解一個貴爲佛之尊會騎畜生道嘅孔雀？唔騎蓮花，坐蓮花會尊敬啲呢？嗱，我再提示呢一樣嘢，你要諗下呢個問題，就係由於呢啲畜生嚟講呢，唔係我哋三惡道嘅衆生，我哋好簡單答到呢個問題。阿彌陀佛嘅極樂世界，我哋頭先唸《阿彌陀佛經》嚟講呢，係唔係有共命之鳥吔？有迦陵頻伽吔？有其他鸚鵡吖，亦都有孔雀啦，講到好清楚，係佛嘅神力，功德神力變化出嚟嘅，唔係三惡道輪迴出嚟，所以明王所騎嘅孔雀係佢本身內在嘅德行化現出嚟嘅，明唔明吖？猶如地藏王菩薩所騎呢隻瑞獸吖，呢隻善聽吖，佢唔係狗嚟嘅。當時金喬覺所帶嚟嘅係一隻犬，犬嘅形狀，其實唔係犬嚟，係一隻瑞獸嚟，瑞獸嚟，似犬非犬嘅瑞獸嚟嘅，所以變咗而家我哋地藏王菩薩嘅畫像畫嗰隻瑞獸呢，似犬非犬啦，但真正嘅相吖，當然唔係咁啦，係一種象徵，呢個就係佢德嚟嘅，代表佢德，一個瑞獸代表吉祥。所以，佛菩薩外在，你見下孔雀王呢個蔓陀羅呢幅相，呢個當然唔係佢蔓陀羅，佢蔓陀羅另外一個壇城，將孔雀畫爲中心，其他五方五佛、二十八天同埋其他嘅明王集中喺個壇城嘅佈置去，去修，修個孔雀王個法，而呢個孔雀王嚟講係獨立響個壇城抽出嚟嘅呢個，喺儀軌裏便。如果我哋修習孔雀法，修孔雀明王嘅法門呢，一定要以呢幅相作爲準則，呢幅相就係孔雀王嘅修法嘅法照嚟嘅，規定咗係用呢個法照嚟嘅，因爲佢手持有各式各樣個法器，吓。“孔雀”呢度明白啦，解釋咗俾你聽，“明王”亦都解釋咗俾你聽，“金曜”亦都解釋俾你聽。

點解叫“佛母”呢？再推番上去嘞，佛母，佛母金曜大孔雀明王。佛母就係出生一切諸佛之母，個“母”字，你唔好諗係一定代表女性喎——媽媽，係解釋爲“源頭”咁解，總源頭，係出生一切諸佛同佛法嘅源頭，並不一是，並不一定係代表女性、女身。准提佛母啦，或者其他尊勝佛母啦，有好多都號稱佛母，由於響過去無盡嘅時空世界裏便呢，有好多修行者都係受持呢個孔雀王法而成道嘅，解脫生死或者成就菩薩吖、羅漢吖、辟支迦佛吖、佛陀嘅果位，所以以呢個法能夠出生其他嘅佛，所以謂之“母”，“母”就係mother啦，mother就能夠生啦，生，有“生產”嘅意思嘞，源頭，一個總源頭，並不代表母性。但我哋而家見到孔雀王所現呢個身相呢，其實呢，係男嘅唔係女，不過佛菩薩嘅相畫到中性，其實你睇下佢，有兩條鬚嘅，孔雀王呢一度，係男相，不過呢個相唔係咁清楚，係男相，猶如千手觀音一樣，係男相，你睇下，千手觀音係唔係有鬚㗎？睇唔睇到吖？呢幅千手觀音嘅法照，如果我哋唔睇佢嘅鬚呢，好似女相。因爲點解唐朝以後，觀世音要畫做女相呢？我已經解過呢個道理俾大家聽就係，觀音爲咗女性嘅痛苦太多，所以現女相。唐朝以前通常就係以男相多，所以經典裏便都講過“勇猛丈夫觀自在”，“丈夫”，“大丈夫”嘅意思，就係以男身，以丈夫身得道而現丈夫身啦。點解畫到中性呢？另外有個意思就係佛菩薩嘅修持境界已經係非男亦非女，係無性別，以衆生嘅隨類現身幻現出嚟，名之爲“等流身”，“等流身”嘅意思就係隨住唔同衆生嘅根基，隨住衆生喺唔同空間嘅形態，佢就番你，相應現番呢個身出嚟謂之“等流身”，而孔雀王係邊位佛菩薩嘅等流身呢？就密宗裏便所講嘅大日如來嘅等流身，亦都係釋迦如來嘅等流身，亦都係我哋本師釋迦牟尼佛嘅化身。嗱，我哋知道佛有法身、報身同化身，而等流身係化身嘅一種嚟吔，化身嘅一種嚟吔，即是意思話隨住唔同嘅空間同埋道路而化現嘅身體，“等”者平等也，“流”者呢？就係嗰個空間同道路，“流水”個“流”，唔同個空間、唔同個道路，依據呢個空間你係咩形態去現唔同嘅身，猶如觀音普門嘅三十二應就解釋咗等流身。

孔雀王就係大日如來，密宗裏便嘅原始嘅佛啦，毘盧遮那如來，“Maha Vairocana Buddha”，“Maha Vairocana Buddha”解釋爲“毘盧遮那”或者譯做“高顯藏廣眼如來”，呢，呢個係譯音唔同，但係我哋一般都稱爲“大日遍照如來”，或者“大日如來”。大日如來嘅光輝猶如天上嘅太陽無物不照，無物不庇蔭吖，如果我哋冇咗陽光，世界上好多嘢都唔能夠再運作，大日如來就猶如陽光一樣庇蔭福蔭一切衆生，亦都有破暗嘅意思，顯光明嘅意思，所以孔雀王亦都有“金曜”兩個字，亦都有大日如來嘅德行，就金光、金曜之光。佛菩薩最高修持嘅境界嘅光芒呢，就係金色嘅光明，修到純，純一而最高嘅境界就係金色嘅光明。所以頭先講到，孔雀王就係大日如來嘅等流身，毘盧遮那如來、大日遍照如來等流身，亦都係釋迦佛嘅等流身，釋迦牟尼如來亦都有化現出孔雀王，亦都有化現出孔雀王。

而家我哋響孔雀王嘅修法裏便嘅流派呢，主要分開兩大個流派，因爲孔雀王個法術響西藏嘅藏密裏便亦都有傳授，但係猶以東密喺日本嗰便嘅密宗嚟講呢，當時我哋唐朝，日本嘅僧人將啲密法由唐朝而帶返，由唐朝嘅時候帶返去日本，而日本開枝散葉就謂之日本嘅密宗啦，簡稱就係“東密”啦，東邊嘅密宗啦，東寺嘅密宗。以主，東密日本嘅密宗呢，最重呢個法，係其中一個大法嚟嘅，孔雀王係其中一個大法嚟，但係藏密，西藏嚟講呢，就唔算視爲咩大法，但係西藏亦都有一個傳承，呢個就係流派同觀點嘅問題。

而家孔雀王嘅法嚟講，修個流派一共有兩，兩個流派，一個流派呢，就係“”字（註：“”字嘅羅馬拼音係Yu）嘅流派，一個流派就係“”字（註：“”字嘅羅馬拼音係Vam）嘅流派，有冇睇過呢個字吔？好，好難寫嘅呢個，呢個“”字嚟嘅，“”字嚟嘅，梵語“”字嚟。“Vam”“Yu”。孔雀王嘅梵號吖、密號吖，Maha Mayuri Vidya-rajni，呢個梵語嘅密號嚟講，Maha Mayuri，“Maha”就係“大”，“Mayuri”呢，就“孔雀”，“Vidya-rajni”就“王”，孔雀王。而孔雀王以一個梵號，一個，一個梵號化成一個字代表佢就係呢個“”字，“yu”，Maha Mayuri，中文呢，佢哋寫個“瑜”字嘅。另外就係個“”字，“”，“”。

而家修孔雀王法響東密裏便呢，有呢兩個流派，第一個“”字，“”字嘅意思就係話孔雀王，頭先已經講過孔雀嘅德行能夠化一切毒而不被其他毒所中害嘅，就係“”字嘅流派。呢個“”字嘅流派嘅觀點呢，就係孔雀王嘅等流身，頭先講過就係釋迦佛嘅化身，就等流身。釋迦佛嘅化身爲孔雀王，變成孔雀王嘅等流身就係“”字嘅流派。而“”字嘅流派呢，就認爲“”，呢個“”字喺梵語點解呢？“”字解釋爲“綁”嘅意思，束綁吖，束綁吖，或者“縛”，但係呢個“”字呢，呢個流派寫法加咗個點上去，一個圓圈，呢個就“空點”（註：《佛學大詞典》中解釋“空點”指附於梵字上之圓點，即“·”），“空點”嘅意思呢，解釋爲“解綁、除綁”。“”字，“”字係咩意思呢？大日如來嘅種子字嚟嘅，呢個“”字。呢個“”加咗一個“空點”呢，白色嘅點喺上便吖，解除一切繫縛，所以修“”字嘅流派，呢個意思就係解除一切繫縛，認爲孔雀王個等流身呢，就係大日如來嘅化身，就“”字嘅流派，兩個流派嘅修法。而呢個“”字嘅流派屬於一般密法嘅傳承，係基礎孔雀王嘅修法，而但呢個“”字，呢個“”字，“”字流呢，呢個流派就孔雀王嘅秘密法術，高級嘅修法嘞，又再更進一籌。

呢個就東密所修孔雀王法嘅流派，呢兩個字都係代表，可以代表孔雀王嘅梵字嚟。“yu”，Maha Mayuri Vidya-rajni，呢個“”同埋“”，梵語“”，代表佢嘅流派。但係響藏密就唔係咁分嘞，又唔同嘅觀點啦，藏密就冇咁嘅分法。呢個係日本嘅分法嚟，日本所修東密嘅密宗嘅修法嚟吖。所以大日如來化現孔雀王，釋迦佛亦都可以化現孔雀王去幫助衆生，其實係一樣，唔同嘅祖師有唔同嘅流派，創造出唔同嘅法，都係修番呢個孔雀王個法，其實係相同，不過只不過同大家解釋下呢個流派上嘅意思咁解。

孔雀王點樣嚟㗎？有咩故事吔？孔雀王點樣嚟㗎？來源，我哋點知吔？當然就釋迦佛講啦，我哋人間導師大雄世尊釋迦牟尼佛講啦。釋迦牟，記載孔雀王嘅經典，每一樣嘅，嘅法理都有一部經典嘅，記載阿彌陀佛嘅經典係咪《阿彌陀佛經》啦、《無量壽經》啦、《觀無量壽經》啦、《清淨平等覺經》啦，或者《往生論》吖，嗰啲，記載阿彌陀佛嘅資料。記載孔雀王嘅經典就係《佛母金曜大孔雀明王經》吖，或者簡稱叫做《孔雀王咒經》。其實呢個經典呢，響唐朝好耐以前吖，東晉嘅，響東晉嘅時候吖，已經傳到嚟到我哋中國，《孔雀王咒經》。個法師當時有個法師呢，帛尸梨蜜多羅法師呢，係最早將《孔雀王經》帶嚟我哋中，中國。響呢個譯經嘅傳承嗰個分法嚟講係屬於雜經吖，雜咒吖經，但呢個思想呢，比其他經典嚟到我哋中國更早吖，比中，我哋中國更早，比我哋認識好多大乘經典早出咗千幾年㗎，呢部經典，所以孔雀王法根本就係好多人已經係熟習嘅，響中國裏便係一個好早嘅密咒，係一個好早嘅密法嚟，好古嘅密法嚟嘅。咁喺根據《佛母大孔雀明王經》記載，孔雀明王係點嚟嘅呢？孔雀明王，釋迦佛當時就講番呢段因緣，同阿難尊者講。

有一次呢，釋迦佛嘅弟子呢，有一個新出家嘅出家人，新出家嘅比丘，啱啱出家冇幾耐，佢嘅法號咧，叫做Svatir。Svatir呢，我哋叫做“莎底”吔，譯做我哋廣，廣東話叫“莎底”吔，Svatir。Svatir比丘咧，Svatir比丘咧，佢啱啱新出家受完具足戒冇幾耐呢，受完具足戒冇幾耐呢，因爲響僧團裏便有分科，由一間寺廟，香燈師呢，或者香積廚呢，香積廚就負責煮菜嗰個啦，香燈師吖負責，香燈吖、香油吖，嗰啲吔，吓。每寺廟裏便有好多分工，猶如當時釋迦佛嘅僧團，各人做番各人嘅嘢，分工。當時呢，Svatir比丘係負責，誒，啲出家人呢，洗，啲出家人呢嘅沐浴吖、洗澡吖，或者清潔，清潔吖呢一部分去做。咁有一日佢正當攞，喺山上收咗好多柴返嚟吔，預備，收咗好多柴，有啲柴乾枯咗吖，係冇俾蟲，冇俾，冇俾蛀到嘅，冇俾蟲蛀到，有啲係好，有啲係壞，咁佢係破柴，喺度破柴。但係正當佢破到一條朽木，呢條，啫有一條腐爛咗個柴呢，一破嘅時候突然間一條大黑蛇喺個柴走出嚟，一走出嚟呢，“伏”一聲好快，你知蛇幾敏捷，好迅捷咁，將個Svatir，呢個，bhik，bhiksuh吖，呢個Svatir呢個比丘嘅右腳嘅腳趾公咬咗一啖，“伏”一聲咬咗佢一啖，嗰條黑蛇。黑，啫“黑”嘅意思啫好毒㗎喇，我諗就係，吓，根據嗰經典嘅形容。咁咬咗佢一啖呢，嘅毒，嘅毒呢，即時佢就躂低落地嘞，中吖毒，嘔晒白泡，隻眼吖，翻咗去上便。咁吖，啲，咁吖自然其他人見到，吖，癱咗喺地下，嘔緊白泡。咁有咩方法救佢呢？咁阿難尊者呢，就走去佛陀嘅面前：“佛陀吖，Svatir比丘而家跌咗落地下，俾條毒蛇咬親，中咗毒，有咩方法救佢吔？”佛陀話：“唔怕，我而家教你一個真言，呢個真言呢，係我以前亦都學習返嚟嘅，亦都係我前生所修習嘅真言，呢個真言能夠擁護修行呢個真言嘅人呢，晝夜三時都能夠作爲擁護，而且能夠解一切毒、破一切毒。”於是佢將呢個真言，就係今日所講嘅佛母大孔雀明王嘅真言教授咗俾阿難，阿難於是學咗之後就即刻去嗰個澡浴嘅埞方，個斬柴嘅埞方呢，唸咒加持，加持呢Svatir比丘，於是佢嘅毒就化解咗，醒番，甦醒番，就將呢個毒蛇嘅毒破解咗，破解咗，亦都係呢個經嘅因緣啦。

每樣動物響呢個生物界裏便都相生相剋，另外我想講多一樣嘢就係呢個經典亦都有密意吔，孔雀嘅天敵，蛇嘅，嘅天敵就係孔雀嚟吖，蛇最怕孔雀，孔雀專食毒蛇嘅，所以啲毒蛇嘅毒，特別今次藉助呢部經嘅因緣呢，就話俾你聽有呢個密意喺裏便嘞。呢個孔雀王個法術嘅力量呢，就能夠將所有蛇類嘅毒，蛇類嘅法術能夠破解吔，所以蛇，蛇類吔，蟒蛇吔，總之長形身體嗰啲呢，有毒素，或者幻化成精靈吖、出嚟害人吖，或者係擾亂衆生嘅修行呢啲魔類、妖類呢，用孔雀王法就可以將啲魔同呢啲咁嘅類型嘅魔同埋妖將佢全部收服，因爲萬事萬物都有相生相剋嘅本性。咁呢，Svatir比丘就甦醒咗啦，呢個就係釋迦佛所傳授孔雀王法吖，教，教授孔雀王咒嘅因緣，簡單講咗呢個咒。

咁後來呢，阿難尊者呢，就返番去釋迦佛嘅身邊，釋，釋迦佛問佢得唔得吖？解決咗呢件事未吔？於是解決咗，釋迦佛就開始再娓娓道來咁講出呢個孔雀王法嘅因緣。佢話：“我頭先咪講過嘅？我前生都有修習孔雀王法，而家阿難，我就講俾你聽，呢個孔雀王法嘅因緣。喺好耐好耐嘅時候，響喜馬拉雅山大雪山嘅南面嘅山麓，有一個孔雀王，有一個孔雀王，呢一個孔雀王呢，呢個孔雀王唔係孔雀明王喎，係孔雀王，係直程一隻孔雀，孔雀群之王，孔雀群中帶領好多孔雀，啫孔雀群之中個王帶領好多孔雀一齊生活嘅。咁呢，呢一隻孔雀，呢隻孔雀王呢，早，晝夜都，晝夜都持念呢，孔雀明王嘅真言，都持念孔雀明王個真言。”釋迦佛話：“呢個孔雀王帶領一班孔雀群，有男有女嘅孔雀，帶領孔雀群晝夜都持念呢個孔雀明王嘅真言呢，所以能夠令到佢響山林度穿梭，能夠非常生活得好快樂，而唔被一切獵人所束縛佢吖，將佢擊縛佢。但係正當有一次呢，呢個孔雀王呢，同一班女性嘅孔雀群呢，喺山林度玩耍嘅時候，一時忘記咗，有一次忘記咗憶念佛母金曜大孔雀明王嘅真言，就俾獵人“伏”一聲個網捉住咗嘞，正當個網一冚冚住個孔雀王，捉住咗佢嘅時候呢，孔雀王就憶念番持念孔雀明王嘅真言，一持念個網即刻消退咗，即刻個網彈開，將，將佢同埋孔雀群救渡番出嚟，救渡番出嚟，所以孔雀王就持念金曜孔雀明王個真言呢，得以解脫咗呢個險厄。”咁釋迦佛就繼續講落去話：“阿難吖，當時被綁孔雀王係我個前身嚟㗎，當時我喺森林度就係一隻孔雀王，化度啲孔雀群，但係一時間忘記稱念佛母大孔雀明王真言呢，所以俾啲獵人吖，所束縛咗啦。咁所以釋迦佛話：“我得，得免於難吖，嗰一次咧，就係憑住持念呢個佛母金曜大孔雀明王真言。”釋迦佛就講咗呢段因，因緣出嚟，講咗呢段因緣。

佛母大孔雀明王呢個因緣呢，就頭先我所講嘅出，出自《孔雀王咒經》，《孔雀王咒經》裏便就有解釋呢一段因緣同故事，我就講番出嚟，演繹番俾大家聽啫。其實孔雀呢類鳥類呢，非常之奇怪吔，非常之獨特，孔雀有個特性，雖然雌雄鴛，鴛鴦交配能夠成孕吖，能夠產生下一代，但係孔雀除咗呢個生殖方法之……（註：接下文）

209.孔雀明王（二）

（註：接上文）……雌性就會成孕，唔須要經過雄性嘅交合而能夠成孕。另外孔雀有一個成孕嘅方法就係只要佢聽到男性孔雀嘅，孔雀嘅叫聲，或者佢嘅身影能夠，雌性嘅身影踏到雄性嘅身影都會成孕㗎，都會成孕嘅，都會成孕嘅，所以孔雀喺濁之中呢會有清嘅，因爲點解呢？我哋人類世界或者其他動物都係雌雄鴛鴦交配，父精母血所交配出嚟都係污濁嘅，但係孔雀呢種成孕來講呢，濁中亦有清，聞雷擊或者聽到雌性（註：根據上文，呢度“雌性”疑爲“雄性”）嘅聲音，或者踏到佢影子都會成孕，呢樣嘢比較神奇少少嘞，可能大家會唔知吖，呢一樣嘢。

咁所以釋迦佛呢，話佢前生：“我就孔雀王嚟，由於我憶念呢個金曜孔雀王嘅力量，所以就得以解脫咗呢個獵人嘅繫縛。”咁響呢個《孔雀王咒經》裏便呢，釋迦佛亦都講過孔雀王嘅咒術，但係一般以孔雀王嘅咒術嚟講呢，個篇幅係非常之長嘅，唔係咁容易唸誦，你唸啲梵，特別你唸啲梵文嘅音，你個，你就容易唔係咁易掌握嘞。吓，如果你淨係識中文嘅，如果冇啲拉丁文，冇啲英文嘅根底呢，就唔係咁容易發得到梵語嘅音，因爲英文、拉丁文啫係拼佢個音相似吔，譬如孔雀王嘅密號，Maha Mayuri，“Maha Mayuri Vidya-rajni”，孔雀明王。你就，咁你如果唔能夠唸誦孔雀明王依個密號嚟講呢，梵語呢，你可以用中文，用我哋漢文唸誦“摩訶摩瑜利”，或者“瑪哈瑪瑜利”。點解我叫你唸誦呢？因爲釋迦佛響呢個經典佢繼續講落去啦，除咗能夠化一切毒，化外毒同埋化我哋心嘅毒之外，另外能夠護持我哋，特別明王嘅法術，唔俾一切邪魔、妖怪、天魔去侵擾我哋嘅修行啦，令到我哋求一切願望都圓滿。

頭先我又講番個特性就係孔雀係喜雨嘅，所以每當你見到天雨嘅時候呢，你見到啲孔雀就容易開屏，一開屏呢，有機會會落雨啦，係咪吖？點解今晚會落雨呢？可能都奇怪吔！講孔雀王法，我都覺得，吖！點解會落雨吔？頭先唦一聲，行、行嚟，唦一聲灑咗一陣雨，跟住又收番啲雨，又唔會令到個身濕嘅，所以孔雀係喜雨嘅。同埋孔雀王嘅法術有一樣特性，喺歷朝嘅高僧懂得孔雀王嘅修法嚟講呢，都有幫過朝廷或者國家啦。天旱嘅時候修孔雀法呢，令到，令到能夠旱災嘅地方遍地甘霖吖，遍地嘅甘霖全部能夠落雨，但係亦都有同類相反嘅性質喎，水浸洪水嘅時候呢，孔雀王個法術亦都能夠止雨個喎，將啲洪水消退個喎，好特別個喎！所以孔雀個法同水吔，好有關係。所以頭先我寫吔，呢個大日如來嘅種子字，呢個“”（註：“”字嘅羅馬拼音係Vam），呢個“”字吔，就係水嘅意思吔，代表，呢個“”字嘅性質同水有關係，呢個“”字亦都叫做“一字水輪咒”。喺施食、變食俾其他空間嘅靈界嘅時候呢，會用到呢個“”字，猶如啲甘露不斷流出嚟吔，響呢個“”字裏便，所以孔雀王同呢個字好有關係。由於佢係大日如來嘅等流化身，所以可以通用大日如來嘅種子字，亦都同水有關。頭先講過，亦都代表甘露，所以呢個“”字，就係一字，亦都，真言裏便可以俾一個稱呼佢，叫做“一字水輪咒”。所以呢個孔雀嘅性質係好特別，既能夠止雨，亦能夠求雨，所以歷朝嘅高僧大德都用呢個方法去幫助衆生吖，求雨同埋止雨係特別有效驗！特別有效驗！非常之有效驗！

咁頭先講開，你唸呢個“Maha Mayuri”，呢個就係梵語“Maha Mayuri”，如果你唔識唸呢，“Maha”，“Maha”解釋爲“大”，“Mayuri”就“孔雀”。“瑪哈”，“瑪”，寫咗個“摩”字，“瑪哈”，你可以“瑪-哈-瑪-瑜”，“瑪哈瑪瑜利”，或者唸“摩訶摩瑜利”，你可以咁唸。梵語就“Maha Mayuri”，中文就“瑪哈瑪瑜利”或者“摩訶摩瑜利”，一樣嘅啫，係個譯音嚟。你如果朝頭早唸或者夜晚唸，不斷稱念呢個孔雀王呢個佛號嚟講，釋迦佛一早已經講過，你淨係稱念呢個孔雀王個佛號，如果你唔識佢個咒術，而家我哋城市人太繁忙唔可以修咁多法㗎喇，唔可以修咁多法，唔可以修咁長嘅咒啦，你咁大嘅發心先能夠有勇猛嘅心，學習佛法先能夠精進，學到呢啲大法。但係我哋城市嘅人啱啱學習冇咁多時間，又想修孔雀王個法，又想今晚聽聞利益嘅時候，你要點做呢？當然你唔好走寶吖，就係你返去持念呢個“Maha Mayuri”，“摩訶摩瑜利”或者“瑪哈瑪瑜利”，早、午、晚或者早、晚，憶念呢個佛號嘅時候，一切嘅毒物不能夠傷害你，孔雀王個法力就會護念於你個身上吖，護念於你個身上將你業障消除，將你嘅身體內在同外在嘅毒素俾呢隻孔雀食咗你啲毒素吖，啖除你啲毒素，慢慢慢慢你修行就有進步吖。

你唔好簡單吖，睇小呢個名號吖！呢個名號就係佢修孔雀王修持嘅心髓結晶，亦都出自釋迦佛金口所宣，喺呢個《孔雀明王經》裏便，除咗孔雀王嘅根本嘅咒術之外呢，亦都有講過，過去七佛，過去七佛，釋迦佛以前嘅七佛，亦都有講過呢個孔雀王咒，過去七佛亦都說孔雀王咒去護持修孔雀法嘅人㗎，所以呢個法術係過去諸佛所護念、現，現在諸佛會講、將來彌勒佛以致彌勒佛以後嘅佛亦都會不斷去講孔雀王法，會講孔雀王法，有緣嘅衆生自然就能夠聽聞。但響當今世界之上能夠講孔雀王法、聽到孔雀王法嘅人甚少，非常之少！呢個傳承，亦都，一般嘅顯宗嘅人亦都唔了解咩叫“孔雀王”，亦都唔明點解有個人，有個菩薩會騎喺孔雀上便，究竟係乜嚟㗎？其實孔雀王法猶如所講，以前所講嘅准提法，准提法，Cunde，准提法，或者四臂觀音，四臂觀音，呢啲，呢啲法，呢啲法嚟講，係好古好古遠佛陀所傳落嘅法嚟㗎，呢啲古法嚟，亦都我哋中國好早已經傳入咗，好多高僧大德經過修持過而成就吖，所以呢，呢個，呢個法，呢個法嘅功德力係不可思議嘅，不可思議嘅，呢個力量。

咁你可以實際修持就持念“瑪哈瑪瑜利”或者“摩訶摩瑜利”“Maha Mayuri”呢個名號，呢個名號而去護唸於你，或者護唸去其他人，護唸去其他人。假如你發現，譬如當你同人交談嘅時候，你好多時候會同人交談吖，響生活上啦，或者傾生意啦，或者傾偈或者其他時間啦，同人交談嘅時候，你發現個人隻眼有邪光啦，點樣邪光吖？個隻眼呢，當你講說話嘅時候呢，通常正常人講嘢個頭望去呢邊就咁啦、咁啦、咁啦、咁啦，會跟住頭郁㗎嘛，有邪光嘅人就唔係嘞，講啲嘢個，啫有少少微笑喎，陰陰陰陰笑或者唔微笑，講嘢嘅時候你留意下佢嘅眼神，啲眼向上向下，唔會郁個頭嘅，呢個個人呢，嘅機心，心裏便呢，深謀遠慮吔，好多計劃，亦都可能係一個，如果佛法裏便或者其他宗教裏便有機會係一個邪師嚟嘅。心術，你可以留意下，如果你發覺佢對佢，對你有傷害性呢，你就喺心中裏便憶念“瑪哈瑪瑜利”，喺個心裏便：瑪哈瑪瑜利、瑪哈瑪瑜利……個心念誦，而後就能夠，孔雀王個法力就將呢啲邪力擊縛吖可以，所以你心中憶念唔須要同對方講吖，自然就將佢呢啲力量去化解，嗱，你留意下吖。我教個實際嘅方法去用啦，咁又能夠同你生活好貼切，唔會覺得“摩訶摩瑜利”同你遠離嘅，呢個法門就好適合、好適合大家。

比如你身體上呢，有任何嘅病症，記住孔雀王嘅法術係化毒嘅，身體上咩病係有毒吖？最大嘅病症都能夠醫到啦，最大嘅病症都能夠醫到啦，就係癌症啦——cancer，癌症啦，癌症就係啲毒嚟嘅。我哋心有毒，想害人，有瞋心，瞋，瞋恨心呢，就能夠起啲毒，起啲毒嚟講咧，我哋再加上食肉呢，就會凝聚響唔同嘅器官，呢啲能量，呢啲有形同無形嘅毒素就會凝聚喺某一個器官，經過太長時間呢，就會發生啲細胞嘅病變，就係癌症。而“摩訶摩瑜利”依隻孔雀就專係啖食啲毒嘅，所以修“摩訶摩瑜利”嘅法術能夠將一切癌症擊縛，能夠化一切嘅癌症，將癌症嘅業力擊縛，而你再加以醫藥嘅輔導，你嘅癌就會好嘞，唔係唔叫你睇醫生吓。“摩訶摩瑜利”嘅法力能夠將癌嘅過去惡業擊縛，除非你係一定要受、必定要報你，報應響你身上嘅定業，否則“摩訶摩瑜利”嘅法力能夠對付癌症嘅，將癌症嘅法力擊縛，癌症嘅魔力擊縛。所以你修“摩訶摩瑜利”嘅法，有機會你遇到人有癌症，你不妨介紹下，可能你唔記得我頭先講嘅，太多嘢，你只係記住“摩訶摩瑜利”呢句佛號能夠憶念持念就能夠將一切嘅癌症化於無形。你可以教授佢持念呢個佛號，叫佢跪喺個壇前嗰度，當然最好有一幅“摩訶摩瑜利”嘅法照啦，送俾佢啦，如果冇都唔緊要㗎，話俾佢聽有一個佛母騎住一隻孔雀，你只要每日誠心唸誦佢名號“摩訶摩瑜利”，就能夠將你嘅癌症化於無形，化於無形。如果再配合你食素啦，唔吸，啫外在唔再吸入啲毒素入個身體度，個心亦都唔起瞋恨心而配合去修“摩訶摩瑜利”，你嘅癌症喺短時期一定能夠好，我保證！除非你唔依呢啲條件去做。但有冇人知道呢個孔雀王法可以化癌吖？知道就唔使咁多人死啦，就係定業啦，就係佢嘅業導致佢死亡，而冇福份能夠聽到佛陀教你解決人生病苦嘅法術，嘅法門。呢個孔雀王法其中一個好獨到嘅地方就係化一切毒，大小嘅毒物都唔能夠傷害到修持呢個孔雀王法嘅人，病呢，病症呢，就係其中之一類啦，係嘛？講到病症就係其中之一類啦。

咁我哋睇番呢個孔雀王嘅像吖，呢個孔雀王嘅像，我哋正面去睇佢，如果以依一邊，呢一邊你哋而家向住正面，呢一邊計數爲右，嗰邊計數就爲左嘞，吓。如果呢邊計數爲右嘅，依邊計數就爲左啦，係咪吖？右、左。我哋睇下孔雀王嘅右邊，佢嘅，佢手持，頭先解釋咗隻孔雀嘞，再解釋埋佢手持嘅法器。佢手持嘅法器都好重要，手持嘅法器，點解佛菩薩要現啲法器出嚟吖？就係希望你明白佢嘅意思，佢透示出一個咩道理？佢揸呢個法器係幫到衆生一啲乜嘢呢？否則佢使咩樹立咁多形象，嗰個形象就話俾你聽，佢要講出一啲咩道理，我哋密宗裏便含有咩秘密嘅意思呢？啫“秘密”者就內在深層嘅意思，就唔係話唔可以講俾人聽，內在深層意思呢，佢所揸住個法器。我哋睇下，呢邊係右邊吖，佢前面嗰隻手呢，就揸住一朵蓮花升上去㗎，睇唔睇到吖？一朵開敷嘅蓮花，一朵蓮花升上去。呢一度呢，隻手呢，就揸住一個俱緣果，係一種印度嘅果實嚟㗎，“俱-緣-果”，或者叫“具緣果”，咁寫都得㗎，“具緣”，緣份俱足，亦都能夠具足，而令到你具足一切功德，令到你果位圓滿，就謂之“俱緣嘅果”，呢個“俱緣嘅果”，“俱緣嘅果”。而佢左手邊呢，所揸住另外一個，亦都係揸住一個，另外一個果呢，擺喺胸前上便，紅紅地色，好似木瓜咁嘅形，佢畫咗，呢個叫“吉祥果”，“吉祥”唔使寫啦，你知啦吓，一切，“一切二六時中行吉祥”，吉祥果，令到你每時每刻修呢個孔雀王法，任何嘅時空都能夠吉祥㗎，呢個象徵嘅意思。而嗰隻手所揸住呢就係三條至五條嘅孔雀羽毛，呢個就係孔雀王個法器，法術所釋放出嚟嘅法器，主要就係揸住個孔雀毛嘞，孔雀毛。咁講番嘞，呢便爲左，呢便爲右，左邊呢個蓮花係代表咩意思呢？蓮花代表敬愛咁解，敬愛。如果你修持孔雀王法嚟講呢，佢呢個蓮花嘅法力就能夠令你俱足，賦予咗俾你，令一切人敬愛你，“恆得他人恭敬扶接”，好似佛經裏便呢句說話。一切人敬愛你，你亦都同一切人呢，好容易和睦，和洽相處，可以話俱有人緣，所以亦都方便你傳授佛法，能夠別人敬愛你。如果你認爲對方唔敬愛你呢，你可以修呢個孔雀王法，藉助呢個蓮花嘅法力就可以將唔敬愛你嘅人調攝，令到佢得以加以敬愛你、親近你，但係佢對你敬愛不係爲咗，爲咗你啲名利喎，對你敬愛尊敬你係爲咗調攝佢、降伏佢，令佢得到佛法嘅好處。“俱緣果”係咩意思呢？俱緣果呢，所具足嘅法力就最厲害嘞，俱緣果就代表降伏，降伏法、降魔法嚟㗎，俱緣果係，“降-伏”，頭先呢個就係“敬愛”，或者愛敬，敬愛法，呢個屬於“降伏”。俱緣果嘅法力呢，佢嘅光芒放射出嚟呢，能夠將所有唔能夠調伏嘅衆生，包括人界、非人界一切空間嘅衆生能夠將佢法力收攝擊縛，將佢魔，如果係魔界嚟講，能夠將佢魔心摧毀，而達到恢復番佢善良心嘅境界，亦都有法力能夠將一切魔法嘅兵器全部制綁吖，呢個就係“俱緣果”。

跟住我哋再講下右邊嘞，右邊右手所托住嘅吉祥果，吉祥果，吉祥果呢，頭先呢個代表敬愛、降伏，呢個吉，吉祥果呢，同埋個羽毛呢，另外有兩種意思嘅，但係呢個羽毛就最特別。每一個佛菩薩手持一樣法器呢，都有佢嘅象徵，譬如有啲，有啲明王有好多隻手㗎，個個都有個法器，但其中梗有一件法器係代表佢嘅。文殊師利，頭先，我吖成日用文殊師利舉例啦，文殊師利嘅法器係揸住寶劍嘅，係咪吖？佢嘅法器就寶劍，寶劍，或者呢，蓮花上有本般若嘅經書吔，呢個就係佢法器，代表智慧吔嘛！寶劍就能夠斷除我哋嘅煩惱，開顯我哋一切智慧吖嘛。所以孔雀王嘅羽毛就係佢最重要嘅法器嚟嘅，所以修孔雀王法嘅時候，必須具備有三五支孔雀王嘅羽毛去幫助衆生，當你唸咒拂拭響衆生嘅身上，就可以將佢嘅邪惡嘅妖氣同埋佢業障能夠清除，譬如佢發燒能夠令佢退燒啦，將佢，如果佢身體上有咩嘢唔好嘅嘢能夠將佢拂拭，將佢能夠祛除嘞。咁呢個，誒，吉祥果，呢個“敬愛”啦，“敬愛”啦，就係蓮花啦，“降伏”呢，就係俱緣果啦，吉祥果代表咩吔？“息災”。“息災”嘅意思呢，凡係你有任何嘅災難，包括地、水、火、風、空五種嘅災難，地嘅災難、火嘅災難、水嘅災難、空中嘅災難，以致你人界所有嘅業難啦，吉祥果嘅光芒能夠將一切災殃化爲塵吖，吉祥果嘅功德嘅法力能夠將一切災殃化爲塵，所以佢捧住呢個紅色嘅吉祥果就係咁嘅意思，有代表，象徵嘅意思，所以你修呢個孔雀王法，孔雀王法呢，就有能夠將一切唔吉祥嘅嘢變成吉祥嘞，吓。

咁佢羽毛係咩意思呢？孔雀嘅羽毛，孔雀嘅羽毛呢，代表“增益法”，“增益法”嘅意思呢，能夠將佢本身我哋，點講吖？我哋譬如唔能夠得到嘅功德，我哋希望想得到或者希望我哋想進一步修持嘅境界吔，增加我哋嘅益處，代表增益，啫係將我哋嘅果位一級級咁增上，將我哋所修持嘅世間同出世間嘅一切嘅功德、一切嘅福報能夠增益、增上。其實，你話呢啲法器係咪淨係咁簡單咁嘅意思？唔係，只不過我而家簡單將佢拆解，令你容易明白，其實一樣亦有含攝四樣嘅意思，四即一，一即四，但係本身獨立嚟講呢，就有咁嘅，咁嘅意思啦，咁嘅意思啦。但係有啲人嘅講法呢，係將孔雀羽同吉祥果呢，調轉嘅，呢一度。吉祥果代表“增益”，孔雀羽代表“息災”。但係呢，如果將孔雀羽呢，代表“息災”嚟講呢，就比較貼切啲，因爲頭先我講好似個塵拂咁吖，將你一切災，災殃，一切災殃化爲塵，將佢全部拂拭，拂拭而去。吉祥果呢，代表“增益”，將你一切冇嘅功德，世與出世間嘅功德同埋法力，或者你所求嘅善緣，一級一級增上，就謂之增益嘞，所以孔雀王，佢所有嘅法器嚟講啦，就有啲咁嘅意思，咁樣咁特別嘅意思，所以你修孔雀法嚟講啦，響密宗裏便就具足“息、增、懷、降”四個方法——“息災”啦、“增益”啦、“懷愛”啦、“降伏”（或者“降魔”）啦，降魔嘅法力，具有呢種，四，四種攝法嘅功能。呢個“四攝法”同我哋顯宗所講嘅大乘嘅“四攝”呢——“布施”“愛語”“利他”“同事”呢，係唔相同，呢個“四攝”就係施與衆生直接得到嘅利益，而大乘所講嘅“四攝”就係同佢同流，用四種方法去將佢嘅心去轉化而近於佛道咁解嘞，又唔同。

仲有一樣嘢我哋要注意到啦，孔雀王騎乘孔雀上便係有蓮花座㗎，呢個蓮花座亦都有好特別嘅意思㗎，暗示，呢個蓮花座可能係紅蓮花，可能係白蓮花，可能係青蓮花。紅蓮花就一般佛菩薩所坐㗎喇，通常都現出紅蓮啦，紅蓮就係火裏生蓮法，喺逆境裏便能夠磨練你不動嘅心。孔雀王喺個蓮花上便所透析出嚟嘅意思吔，紅色嘅蓮花，俾啲火越燒越燦爛，點解紅色呢？呢啲火就係代表我哋喺逆境裏便修行嘅磨練，你喺而家世界上所遇到一切磨練，你所遇到一切壓力，你嘅疾病吖、你嘅事業吖、你嘅家庭吖、你嘅金錢吖、你身邊嘅朋友嘅親眷，全部都有壓力俾緊你嘅，呢啲壓力就係火啦，燒緊你啦，而家你學佛法唔係坐喺度唸經咁簡單喎，呢啲火就燒緊你啦。你如果修呢個孔雀王嘅法術，就係呢個蓮花嘅意思就係令到你火裏生蓮，遇到呢啲逆境呢，能夠一一降伏，一一降伏，猶如佢呢個俱緣果一樣將所有嘅唔好嘅法力、唔好嘅明咒擊縛，一樣嘅意思，所以你修孔雀王個密法有呢度密意啦，呢個蓮花所透出。如果佢坐喺白蓮花係咩意思呢？白色嘅蓮花，“白”者就清淨無染嘅本性，所以就代表慈悲，代表佛菩薩拔除一切衆生嘅苦難，給予衆生一切快樂，就係慈悲嘞，代表白色慈悲嘅本性。呢個白色呢，亦都係《妙法蓮華經》（Saddharmapundarika），妙法蓮花係白色嘅蓮花，能夠出於污泥而不染，代表我哋每一個凡夫都具足佛陀清淨嘅本性，當我哋修呢個孔雀王法嘅時候亦都有成佛嘅果位，慢慢呢，就能夠一步一步被呢隻孔雀將我哋毒吖，身體嘅毒、內在嘅心嘅毒全部啖食，你就會恢復番你嘅本性，就“白蓮花”嘅意思。仲有一度，呢幅相呢，冇畫出嚟嘅，仲有一度呢，孔雀王會坐青蓮花，青色嘅蓮花。青色嘅蓮花通常降魔時候用，代表調伏法、降伏法。青色嘅蓮花就孔雀王施展佢法力出嚟呢，個蓮花就會現青色㗎啦，將一切惡魔去降伏，佢就佢座駕孔雀之上就座青蓮。吖，所以佢坐個蓮花都有幾層嘅密，密法嘅意思響裏便，代表透示出嚟孔雀王法嘅功德同埋我哋所修持吔，呢個孔雀王密法裏便嘅精神同埋心要吖。響佢個，嗰個，誒，蔓陀羅吖，個法相上便，依啲就孔雀尾啦，呢個就係日輪啦，太陽嘅輪光，日輪上有月輪啦。呢啲係孔雀，孔雀尾羽咪係一個金色嘅孔雀開屏，圍住佢，坐喺座駕，其他身上呢，種種嘅莊嚴，有髻冠嘅，有瓔珞吖，有啲手吖同臂吖，嗰啲鐲吖，莊嚴，吓，莊嚴喺佢身上，所以呢個就係孔雀王法嘅法像，我已經解釋得好清楚，都比較詳細咗少少。當然你再深入修持呢個法門嘅精髓呢，還有好多意思嘅，呢個就係最初步嘅基礎孔雀王法，我同大家講，佢所透示出嚟呢個像吖，嘅意思呢，係咩功用。而頭先所解釋嘅功用呢，你只要持念孔雀王嘅咒術，或者“Maha Mayuri”，“摩訶摩瑜利”呢，只要單憶念呢個佛號啦，孔雀王個法力，頭先我所講個法器嘅力量呢，就會加被於你嘅身上啦，有呢個功德，晝夜都憶持呢個佛號啦，對你嘅人生啦，有非常之大嘅幫助。頭先息災、增益、敬愛、調伏，喺你人生裏便都會遇到呢啲問題嘅，你都可以用呢四種法器呢，嘅性質能夠響你嘅人生裏便呢，化解你所遇到嘅問題，咁你修法咪有進步囉？

所以孔雀王其實同我哋息息相關，不過少人去弘傳，依個就係密法裏便基本上孔雀王法嘅解釋嘅基礎，但係一般顯宗啲大寺廟嘅法師呢，當然冇，冇一個極端啦，有一啲法師可能都有專修孔雀王嘅法門嘅，響中國嘅內地啦，或者響臺灣都有一啲法師，不過極爲少數。佢哋所修持呢個孔雀王法門呢，通常就唔係修持個咒術同修持個密法㗎喇，就喺唸經，將成本孔雀王嘅經由頭唸一次，唸經唸經唸經，去求一個心願，譬如當，頭先講嘅天旱或者天雨嘅時候，就將整本經唸誦修持，去祈求唔好水浸啦，或者唔好天旱啦，孔雀王法亦都能夠令到世界和平、人民康樂、五穀豐登吖，響《孔雀王經》記載。因爲孔雀王嘅護法實響太多太多啦，你翻閱《孔雀王經》，除咗天龍八部之外，宇宙之間吖，你數得出嘅護法吖，都係孔雀王嘅護持者。哎？所以我咪講過點解叫做“佛母”呢？因爲好多人都得到孔雀王嘅利益，亦都由孔雀王法修持而證果，證到果位，就所以叫做“佛母”咁解。好多好多護法，天、龍、夜叉、乾闥婆、阿修羅、迦樓羅、緊那羅、摩睺羅伽、人界、非人界，呢啲空間嘅衆生，好多都係護持孔雀王法，希望呢個孔雀王法能夠流傳世間，所以今日我哋聽到孔雀王法，亦都係《孔雀王經》嘅流傳。不過你哋會好少見到呢個法門嘅，我諗你喺澳門都第一次聽啩，應該，所以呢個孔雀王法嚟講有好特別嘅深厚嘅因緣吖，同澳門都有好特別嘅深厚嘅因緣。當然我哋澳門唔會見到咩大水災吔，或者大旱災吔，吓，唔好，將來都唔好有吖，大吉利是！係咪！但係當我哋有小嘅水浸嘅時候，唔退啦，啲水渠塞啦，你係咪住喺新橋吖？有邊個住喺新橋吖？啲水塞吖，水渠唔去吖，或者，吓，你間鋪頭吖，備受水浸之餘吔，你都可以修持憶念呢個“瑪哈瑪瑜利”吖，就能夠將呢啲關於水嘅嘢吖，擊縛一切水啦，將啲水嘅嘢，水嘅難吖，能夠化解，化解有水難嘅地方，所以無論顯密嚟講啦，都係尊崇呢個法㗎，不過係比較少啲去修持呢個孔雀，孔雀王法咁解吔。

嘩！啲時間咁快嘅？又講咗成個鐘啦已經。

臺灣呢，臺灣呢，有一位法師呢，嗰位法師呢叫見如法師，嗰個見如法師呢，專修呢，孔雀王法嘅，喺臺灣，全臺灣都出名吖，咁佢臺灣好多地方吖，都請嗰位法師呢，臺灣係有時有啲地方真係旱嘅，天旱嘅，天旱多就水浸少嘅，通常。天旱都請呢個見如法師呢，去唸誦呢個《孔雀王咒經》吖，佢專係唸誦《孔雀王咒經》，就好多，有好多神奇嘅感應嘅。但係孔雀王法呢，古來到現代所修法嘅傳承呢，通常都係唸經嘅方法都係修七日嘅，以七日爲一壇，仲加要通宵唸誦唔可以停吖，通宵唸誦，七日以內通宵唸誦，一班接一班，咁通宵唸誦呢，去修持呢孔雀王法，咁以你至誠感格呢，將呢個業力能夠調控下呢，天上就會有雨降落嚟啦，如果你旱災嘅時候，所以呢個見如法師喺臺灣裏便就修呢個孔雀王法啦，出名嘅，好多人都識得，喺臺灣。但係大陸裏便呢就唔係太，未，我都未，未聽聞過修孔雀王法嘅人，當然有啦，我未聽聞唔代表冇啦，係咪？但係藏密裏便亦都有修孔雀王法嘅人嘅，西藏裏便，但係圍數呢，就極少嘞，應該就係。但係響日本嘅密宗裏便呢，呢個孔雀王法嚟講屬於一個大法嚟嘅，甚至唔係佛法嚟講呢，日本其他嘅宗教吖，或者啲忍者吔，日本佢叫修驗道山伏，修驗道山伏派吖，嗰啲忍者吖，“山伏”嘅意思呢，佢就係，中意匿埋喺山吖，山度修行，深……（註：此處錄音中斷）

210.雪域紅蓮調御師（一）

Om ah hum vajra guru padma siddhi hum

蓮花生大士係西藏密宗嘅開山祖師，佢係合阿彌陀佛嘅身、觀世音菩薩嘅口，同釋迦佛一切佛嘅心而成，係諸佛菩薩身口意嘅三密金剛應化身。釋迦佛早有懸記，亦都係阿彌陀佛嘅法身佛，觀音菩薩就係報身佛，蓮花生大士就係應身佛嘞。西藏人尊稱蓮花大士做“Guru rin po che”，意思就係珍貴嘅上師。蓮花生大士係第二佛，法、報、化三身總集嘅自性導師，具有無比嘅法力，所以佢嘅神異事蹟流傳廣泛。

響佢入西藏之前，曾經響印度、尼泊爾等地宏法，後來應西藏王赤松德真邀請去西藏宏揚佛法，沿途佢一路調伏惡鬼吔、羅剎啦、無數嘅毒龍，仲以善巧去扭轉藏人佢個原始信仰——苯教，令佢哋改信無上密乘。首先歸依蓮花生大士嘅，有國王啦、大臣啦，同埋以後所謂跟隨佢嘅二十五個弟子，而奠定咗西藏密教嘅基礎。蓮花生大士就係寧瑪派嘅始祖，啫紅教嘅最初嘅祖師嘞。修蓮花生大士法有無量無邊不可思議嘅功德，簡單嚟講，能夠具足息、增、懷、誅，普渡一切衆生嘅大威德，而且能夠了知世出世間嘅一切諸法，顯密圓通、堅固戒律、頓開智慧、辯才無礙，其餘譬如除病啦、免難啦、長壽、衣食具足、熄滅一切地水火風空所生嘅災難、摧滅妖魔，亦都能夠令到一切鬼神無不恭敬聽命，命終之後往生去蓮花生大士嘅鄔金淨土。每個月農曆嘅初十係蓮師普渡衆生嘅紀念日，響呢個日子去修蓮花生大士法功德更加大，即使平日修法吖，亦都有無量無邊嘅功德。

Om ah hum vajra guru padma siddhi hum

跟住我哋講到蓮花生大士身體上嘅坐姿同埋佢嘅手印，同所持法器嘅種種意思，希望各位師兄能夠對蓮花生大士能夠有一個深入嘅了解。

蓮花生大士嘅坐姿呢，係國王遊戲嘅姿態，呢個姿態其實係有意思嘅，表示蓮花生大士，佢已經徹證一切輪迴、涅槃法性嘅本質而遊戲於三界。佢解脫自在，任運度化衆生，已經係究竟圓滿嘞。密教之中嘅三密相應，意思就係話以修持本尊嘅咒語、手結本尊嘅印契同埋觀想本尊嘅本相而令到我哋行者速證我哋嘅悉地。咒語種子字呢，就係語密，結印呢，就係身密，而觀想本尊嘅相好吖、法器同埋身相嘅莊嚴就係意密。又咒語呢啲字種呢，有兩種意思，就係“升”同埋“菩提心”嘅意思，印契吔，亦都有“有形”同埋“無形”之別，本尊嘅形相亦都有“清淨”同埋“非清淨”嘅分別。所謂“升”同埋“菩提心”嘅意思，“升”係“菩提心”嘅名詞文字，“菩提心”呢，就係“升”字嘅實體，意思係諸法實相所含攝嘅另外一個名稱同埋異相。“有形嘅印契”係本尊所結嘅手印，或者佢所揸嘅法器嘅三昧耶形貌相狀，“三昧耶”嘅意思就係本尊嘅本誓，就係佢利益衆生嘅誓願嘞。“無形印契”嘅意思係各種本尊同埋真言行者嘅本誓念願。“有形”同“無形”嘅印契，都係以具體同抽象個方式去詮釋諸法實相嘅面貌，一體兩面，同埋本尊嘅特色同特質。“清淨”嘅意思呢，係指無相嘅形象，而“非清淨”嘅意思呢，就係有相嘅形象嘞。

我哋修行人，修行純熟精進，而進入本尊究竟嘅三昧，所謂寂然無相，本尊同埋行者嘅自身合爲不二一體而入於實相、無相嘅三昧，所謂“入我我入”而證入法性不可思議嘅解脫門，先至叫做修行究竟。密法以有相入無相，空有圓融雙超而不壞真俗二諦。所謂本尊“不了義”嘅意思，就係所謂各種本尊吖，外在所現出嚟嘅形相；所謂“了義”說，啫係了義嘅本尊，就係指我哋人人本具嘅尊貴自性。有相而唔著相，有形而唔著形，就係內觀自性，令到我哋悟入諸法實相，咁樣去了解，先係真正金剛乘嘅正確嘅意思。而諸尊相好莊嚴嘅身相，除咗各種佛菩薩係累劫熏修萬德所積聚嘅殊勝果報，同埋爲有緣衆生所示現嘅幻相之外，無非係以呢啲幻相去攝受導引衆生悟入法性實相之門。其實依啲都係善巧方便，無非係源自諸佛菩薩本尊內證，佢哋嘅無盡大悲心同埋本誓願力，由不了義法而悟解了義法，先能夠一探諸尊嘅本懷。所謂《大日經》講過：“菩提心爲因，大悲爲根本，方便爲究竟。”正係呢個意思。

講完蓮花生大士坐姿所蘊含嘅甚深密意之外，跟住我哋講下蓮花生大士嘅法王冠呢、衣服、佢嘅眼神，甚至佢嘅束髮或者佢嘅鬍鬚，所介紹嘅意義嘞。

首先我哋講下法王冠，佢所戴呢頂法王冠，響世間法上係表示蓮花生大士就係當時西藏嘅國王，愛民如子，堪爲君主仁王，所以能夠戴住王冠。但係在於出世法嚟講呢，就係表示蓮花生大士係集十方三世三寶同三根本響身嘅無上法王，亦都係代表十方三世諸佛去教化衆生嘅密宗教主，能夠賜予一切衆生世間法、出世間法嘅畢竟安樂同埋解脫嘅。

講到蓮師嘅眼神，蓮師係怒目直視嘅眼神，意思係調伏一切剛強難伏嘅邪魔外道衆生而示現嘅忿怒相，但係蓮師內心係極具圓滿嘅智慧同埋慈悲，響了義嘅角度嚟講，蓮師睜眼直視，亦都象徵咗修行嘅人都應該由內觀直視衆生原來本具，無造作嘅心性而去證得佛果。大部分嘅顯教佛像都係慈眉善目，呢個爲咗就係接引善根嘅衆生，但係對於一啲惡性嘅衆生，比如啲大力妖魔、惡鬼、羅剎等等嘅衆生，密宗嘅本尊呢，通常都會示現一啲忿怒相去度化同埋調伏佢哋。蓮師其實佢嘅相係寂靜同埋忿怒悉皆圓滿嘅相。

蓮花生大士同時身著白、紅、藍嘅法服，國王嘅法服同埋袈裟服。蓮花生大士，佢身體具有國王同埋法王嘅身份，表示佢響顯密嘅教法得到圓滿總持而任運自在，亦都表示世間法同出世間法不二、輪迴涅槃不二、明空不二、空樂不二、悲智不二、空悲不二，一切嘅相對性、絕對性嘅法性緣起現象嘅圓融整合同埋圓滿具足。而法服係表示蓮花生大士善能以法去治伏，亦都能夠用法去服人嘅勝義。五種法服呢，係表示蓮師嘅身口意功德，事業吉祥圓滿成就，具足五部如來嘅最上心要同埋成就，亦都具足四部瑜伽（所謂作密、修密、瑜伽密同無上瑜伽密）同埋三種密續（所謂父續、母續同無義續）嘅命根同成就，具足五根五力，轉五蘊五毒成爲五智（五智就係成所作智、妙觀察智、平等性智、大圓鏡智同埋法界體性智）而成就佢五種身（五種身就係法身、報身、化身、大樂智慧身同埋法界體性身）嘅境界。

至於講到蓮師束髮同埋束鬍嘅意思，就係表示修持密法嘅行者，如果如法精進，其實無論佢出家或者在家，都可以成就而證得無上佛果。蓮師所示現嘅無二身份嘅大成就者之中，其實有好多呢，都係示現在家相嘅修行人。

跟住我哋嚟講，蓮花生大士佢所揸嘅法器。首先我哋講下左手，蓮花生大士左手揸住一個“嘎巴拉”，“嘎巴拉”意思就係甘露瓶咁解，裏便盛有長壽寶瓶嘅甘露，長壽寶瓶當然盛有長壽嘅甘露啦，就表示修行人如果能夠虔修蓮師嘅法，可以得到健康、無病、長壽，唔會有橫夭，更可以進一步去證得無死虹光嘅大成就，呢個成就係一切成就之中最高嘅成就嘞，蓮師就係修成虹光身嘅代表。“嘎巴拉”其實真正嘅意思呢，就係人頭嘅蓋骨，意思就係人嘅天靈蓋骨，響西藏，大成就嘅高僧圓寂之後，通常以頭蓋骨做法器去裝住甘露，而“嘎巴拉”法器嘅意思係表徵法性奧秘嘅真髓同清淨無染自性嘅究竟義理。蓮師左手所揸住嘅嘎巴拉裏便盛有諸佛嘅紅白菩提甘露，修行人如果得到灌頂加持，能夠飲咗之後，可以得到無上嘅悉地。蓮師左手亦都揸住一枝三叉杖，蓮師嘅左臂之上呢，放住一枝三叉杖，呢枝杖係由上至下，局部嘅細節就係燃燒住智慧嘅火焰嘅三叉箭嚟嘅，其實係表示蓮師圓滿具足咗聞、思、修、戒、定、慧嘅大智慧，能夠迴轉同埋消滅三界衆生嘅三毒同煩惱。枝杖下便串住三顆人頭，係表示蓮師具足過去、現在、未來嘅三世智慧，完證法、報、化三身，亦都令到三界嘅人天完全皈仰蓮師嘅無盡佛德。下便呢，係一枝十字嘅五股杵，表示蓮師係十方諸佛嘅總集體，亦都係五方佛最極嘅心子，具有十力自在等等嘅功德。再下便就係蓮花，表示清淨無染嘅自性，而再下便，就係隨風飄蕩嘅吉祥寶鬘，而之上亦都有一對靈鼓，其實係表示蓮師具足智慧同方便，亦都表示蓮師嘅法音宣流將會化度十方嘅衆生，能夠大擊法鼓而威震三界。簡單嚟講，依枝法杖係表示蓮花生大士擁有十方三世一切諸佛清淨無染嘅智慧同埋功德，呢枝法杖亦都能夠代表蓮師善於能夠迴遮一切不善、邪惡嘅勢力加害而賜予衆生安穩同埋吉祥。

Om ah hum vajra guru padma siddhi hum

Om ah hum vajra guru padma siddhi hum

Om ah hum vajra guru padma siddhi hum

跟住我哋講下蓮花生大士右手所揸嘅法器，蓮師右手所揸住嘅九股杵。一般嘅蓮師像，右手係以祈克印，所謂“祈克印”係密宗嘅，嘅一個手印，意思就係降魔印咁解，係揸住五股杵，而表示蓮師具足五佛五智，能夠轉五毒成爲五智，而蓮師像如果揸住以祈克印去揸住九股杵，係因爲藏密紅教判教者將顯密嘅教法判爲九乘次第，九股杵係表示蓮師九乘次第嘅圓滿成就同埋傳承法教嘅持有者，同時九股杵亦都代表蓮師對四生九有一律度化同埋調伏嘅慈悲心同行願力嘅圓滿具足。

至於蓮花生大士頂法冠上嘅帽翎，啫頂帽上便有條羽毛狀嘅物體，係由於蓮師響西藏一度身兼國王同法王，蓮師法冠上嘅帽翎喺世間法上係表示國王獨具嘅威權，教化臣民，一歸人王統治，響出世法之上就表示一真法界之中嘅法性一味、一佛乘、一即一切，同埋同密宗本初原始佛普賢王如來無二無別嘅意思。喺帽翎之下有一枝一半嘅五股金剛杵，係表示蓮師傳承自密宗本初佛普賢王如來，同埋以五方五佛嘅傳承持有者同埋御大者。五方五佛係中央大日如來、東方阿閦如來、南方寶生如來、西方阿彌陀如來同埋北方不空成就如來。

烏境西北隅，

蓮莖花胚上，

得勝妙成就，

聖名蓮華生，

空行衆圍繞，

隨尊我修持，

加持祈降臨。

Om ah hum vajra guru padma siddhi hum

Om ah hum vajra guru padma siddhi hum

Om ah hum vajra guru padma siddhi hum

響每個月去修持蓮花生大士嘅法，特別喺初十日呢，係具有強大同埋無盡嘅加持，同埋與蓮花生大士本尊，係得到好高嘅相應。

響十二月初十，呢個月嘅初十日去修持蓮花生大士法呢，能夠得到大威權，一切天魔嘅神鬼、人同非人都會畏服聽命，而且能夠除去地、水、火、風、空五大所生嘅諸病，凡有所求都無不如願成就。

而響一月初十去修持蓮花生大士法呢，能夠令到事業繁盛、衣食豐足，亦都得到大福利，一切衆生亦都能夠聽命，而且因爲佛力加被，夜夢吉祥，能夠響夢中預知未來嘅吉凶，一切所求，無不如願成就。

響二月初十修持蓮花生大士法，一切嘅風鬼、無常鬼、地獄鬼、八方嘅神道都唔會侵害修行人，亦都能夠了知世出世間一切諸法，而且顯密圓通，唔會破戒，得到大智慧，成就金剛身。

響三月嘅初十，如果想避免星宿嘅不祥，喪嫁葬娶，月日不吉，而且旅行平安，喺呢日修法就最好，一切希求都能夠如願嘅。

喺四月初十修持蓮師法，能夠降伏龍王同一切外道，同天魔神鬼都能夠聽命於行者嘅功德。

響五月初十修持蓮師法，能夠有消災延壽、除疾病苦厄，而且威權熾盛、辯才無礙，外道唔能夠加害，一切衆生凡有所求亦都能夠如願。

響七月初十修持蓮師法，能夠免除年月日時運氣嘅不祥，消除噩夢同埋家事嘅不順遂，凡係求成佛都易於得到成佛嘅功德。

喺八月初十去修持蓮師法，能夠使到一切病魔、鬼魔、外道嘅邪法唔能夠加害，而且鬼神等等嘅衆生亦都聽命，同埋求證金剛亦都能夠得到大金剛嘅功德。

響十月初十修持蓮師法，能夠滅除破戒、謗佛、謗法、妄語、惡口等等嘅罪過。

響十一月初十修持蓮師法，能夠令到壽數未盡嘅人免除危病，而壽數能夠盡呢，而即將死亡咧，就能夠往生去極樂世界或者往生去大士嘅國土，究竟成就無上正等嘅正覺。

所以喺呢啲日子裏便，特別係初十日，我哋最好能夠特別去唸蓮花生大士嘅真言同埋修持蓮花生大士嘅法。響每月嘅初十，佢無數嘅化身可能就喺你面前出現，佢喺特定嘅神聖日子，可能你哋亦都會見到佢，呢個時候，佢就會俾你普通同埋殊勝嘅成就。

Om ah hum vajra guru padma siddhi hum

Om ah hum vajra guru padma siddhi hum

Om ah hum vajra guru padma siddhi hum

跟住落嚟我哋講下念珠、鈴杵響密宗裏便嘅運用同埋代表嘅意思。密宗之中嘅法器其實種類繁多，有好多唔同嘅應用，以念珠嘅材料同埋質地嚟講呢，分別有菩提子呢、金剛子、蓮花子、金、銀、銅、鐵、水晶吖、檀木吖、石頭吖、珍珠吖、珊瑚吖、象牙、琥珀、琉璃、綠松石、蜜蠟、人骨等等唔同嘅雜寶所製成，其實好多質地都有嘅，但響市面上我哋亦可以買到依啲念珠。一般通俗常用嘅呢，就係所謂顯密教都通用嘅星月菩提珠，無論係修邊一類嘅密法，其實都可以使用嘅星月菩提珠。不過呢，響密宗之中，喺修咩法、用咩念珠，其實都係有分別，響經典上都有記載，尤其是係修息災吖、增益、懷愛同埋誅法，各種方，各種密法，唔同嘅密法所運用嘅念珠其實都係有唔同嘅。譬如舉例啦，修息災法，以觀音，誒，以觀音部修觀音法息災法爲例，適宜用水晶念珠啦；修增益法，啫增福慧嘅法，適用琥珀念珠啦；修財神法呢，就適宜用龍鳳眼嘅念珠；如果修懷法，懷愛法，譬如長壽佛法吖、咕嚕咕咧佛母法吖，一定就要用珊瑚念珠了，因爲懷愛法係事業成就，所以適宜用珊瑚；如果修誅法或者降魔法，啫金剛法啦，同埋空行母吖、忿怒尊護法等等嘅密法，就要用人骨念珠嘞。咁你會話，如果修持息、增、懷、誅四種法，但係有時我係搵唔到啲念珠，或者我係唔喜歡用呢類嘅念珠，譬如你冇水晶吖、琥珀、珊瑚、人骨等等嘅念珠，就可以用鳳眼菩提子念珠呢，去做爲總代表，修四種法都係得嘅，除此之外呢，就最好啦，修唔同法就用唔同性質嘅念珠。至於講到念珠數目嘅意思呢，念珠有啲係一零八顆，啫一零八粒嘞，響西藏係代表一百零八三昧，用以去對治一百零八種煩惱。另外有二十七顆嘅念珠，它嘅意思係代表十八有學同埋九無學。二十一顆嘅念珠嘅寓意呢，亦都有係十地十波羅密加上佛果，一共就係二十一嘅密數嘞。呢個係念珠嘅數目所表示嘅密意。

講到金剛鈴杵嘞，響修法之上，密宗嘅修行人時常用金剛杵、金剛鈴。其實金剛杵有好多種類，有獨股嘅金剛杵啦、三股嘅金剛杵啦、五股嘅金剛杵、七股嘅金剛杵同九股金剛杵嘅分別，一般運用之上呢就可以分成以上數種。咁一股金剛杵就代表一真法界，三股金剛杵呢，就表示三界真空，修行人嘅自性三界有必要內空、自性空同心空，使到一切清淨，一切內在嘅自性空而無掛礙，同時亦都表示身口意嘅，而五股嘅金剛杵就代表五智同五佛嘞，七股嘅金剛杵呢，就表示打盡七識，九股金剛杵就代表淨除我哋嘅第九嘅庵摩羅識。金剛鈴呢，而金剛鈴，我哋敲金剛鈴裏便呢，有一條金屬，呢條金屬條叫做“具”，呢個“具”呢，其實係表達真空方便，意思就必須真實去證悟先能夠知道，何以稱爲“真空”呢？何以稱爲“方便”呢？譬如舉例嚟講，“鈴”一定要響，就一定要靠“具”去敲，一響，明明聽到有聲音，但係空無一物，就用以代表真空之中就有妙理，雖然係空，但係意思就係好微妙，真空裏便亦都有妙有，妙有之中亦都包含喺真空裏便，佛陀所講嘅一切方便法，看似“有”，其實又係“無”，所以稱爲方便門，響方便之中教導好多弟子修持。響佛陀方便演化嘅時，嘅時候呢，明明見到喺度表演、演說，亦都有教化結果，但係又好似空花幻影，剎那間消失。“鈴”嘅比喻就喺呢度，但係其他呢，其實仲有好豐富嘅深密義理，各人修法嘅時候自然就會領會。而嗰金剛杵同埋金剛鈴兩者一齊去解釋，鈴代表“智慧”，杵代表“方便”，一切法相之中，亦都以男相就代表“方便”，女相就代表“智慧”，所以金剛乘之中，佛父同佛母相抱嘅雙身像，其實係表示不離“方便”“智慧”嘅密意。其實本來就唔需要有呢個雙身相，只要知道“方便”就係知道佛父，知道“智慧”就係代表佛母嘞，啫係認識佛父同埋佛母、方便同智慧相合嘅意思。另外，所有法器，一般人可能認爲係純銅所造成，其實唔係嘅，如果用純銅鑄造呢，有時係發出唔到咁響亮清脆嘅聲音，通常好嘅法器都係由金、銀、銅、鐵、石五種合金所鑄成嘅。

講到鈴杵嘅重要嘅作用呢，響西藏嚟講呢，就非常之重要，因爲修密宗嘅人唔能夠離開金剛鈴，亦都唔能夠離開金剛杵，西藏嘅修行者呢，無論行腳去邊笪地方，佢可以唔帶錢，但係佢身上，身上呢，一定會攜帶金剛鈴同金剛杵。有啲人話我不用金剛鈴同金剛杵，淨係用個口唸，唸經得唔得呢？尤其話我住嘅地方不適合用金剛鈴、金剛杵。咁當然可以啦，響顯宗嘅修行，又邊有用密宗嘅金剛鈴、金剛杵吔？不過仍然都會用顯宗嘅法器，但係運用金剛鈴同金剛杵呢，其實嘅效果可能係唔同。所謂“工欲善其事，必先利其器”，有冇鋒利方便嘅利器，對於能夠善成其事吔，係好重要，譬如想食水果嘅時候，如果缺少一把刀，就會因爲無法批去啲皮而變得十分唔方便。如果淨係食水果就需要刀器，何況保護我哋慧命嘅安全，增福息災，點能夠有時喺某啲情況之下唔須要用法器呢？其實金剛鈴同金剛杵，同埋各種法器，響密宗修持之中呢，可以發揮佢哋各種嘅功用，佢運用嘅方法，慢慢慢慢當我哋修行人喺修法去運用佢，就會體驗到佢嘅奧妙嘅地方就響邊度嘞。其次，如果用金剛鈴同金剛杵去修法，可以解除我哋嘅愚痴、化解我哋嘅妄想，而且可以降伏魔障、消除災害，去迎請佛菩薩本尊護法嘅光臨，去增加我哋福慧，亦都可以開展顯明我哋自性同智慧嘅光明，尤其金剛杵可以摧毀諸魔外道、降怪除妖，它嘅作用有各種各樣，所以又名“降魔杵”。身懷金剛杵，可以得到金剛智焰，發出金剛嘅智慧火焰呢，以金剛智祛除愚痴妄想同內魔而顯出我哋清淨同埋光明嘅智慧本光。

釋迦世尊普渡衆生，佢演說法義，八萬四千法門，而分開顯宗同埋密宗。顯教歸依三寶，密宗就歸依四寶，響顯教歸依三寶之前呢，加入“歸依上師”，“Namo Gurubhyah”就係歸依上師嘅意思。所以密宗就歸依四寶係入佛門嘅第一步，亦都係四加行嘅第一加行，而第二加行就係供曼達，第三加行就係大叩頭，亦都叫做大禮拜，第四加行就係唸誦百字明咒，係金剛薩埵嘅咒。以上各個加行都應該做最少十萬遍，先能夠慢慢慢慢進入修持正行。加行就係修持正行嘅基礎，如果你嘅根器……（註：接下文）

211.雪域紅蓮調御師（二）

（註：接上文）……內密灌頂啦，密宗……（註：此處錄音中斷）頂呢，就唔好去接受，而要接受內密嘅灌頂，一定要修持四加行，打好堅固嘅基礎，就能夠受用密宗裏便所講嘅內密灌頂了。密宗一定要依師承，師承就係法統嘅源流，上師就係三寶嘅表率，所以首先，密宗歸依呢，就係歸依上師嘅。師父係代表佛法僧三寶，係三寶嘅總相，而三寶就係別相。上師嘅意思就係代表佛寶，而上師嘅語就係代表法寶，上師嘅身呢，就代表僧寶，所以佛法係由上師嘅三門所授，所以喺密宗裏便好尊重師父，師父就係第一嘅勝義。

學密宗嘅修行人如果想求得一個法，首先要經過上師灌頂，因爲由法流相連嘅關係，一定要通過呢個程序，唔可以錯誤，而傳法係一件好嚴肅嘅事，禮儀響密宗裏便亦都十分隆重。修行嘅人如果首先要求一個法，應該先三次呈遞哈達，向上師請求，而經上師認可之後，就擇吉日去設壇，然後由上師入本尊嘅壇城（所謂蔓陀羅）修法加持。喺嗰個時候，如果係呼圖克圖，或者仁波切地位嘅上師去主壇呢，就首先佢會施展內密灌頂嘅法義，先行抉擇定奪，而具足加持師資嘅人呢，至少要具有大悲感召嘅加持威神力，聚集衆人去修持，令到各個弟子得到感應爲應驗嘅。如果係法王，大達登巴嘅地位呢，就要具有四部內密定義嘅灌頂之相，缺少其一都係唔可以嘅。如果將神通幻化、穿牆入壁、騰空飛行等等呢啲受用功夫而去作爲代替內密灌頂嘅程式，就唔係合乎密乘合法嘅灌頂，因爲神通容易成爲外形所惑嘅障礙而唔明白密宗嘅真相，所以有好多邪魔外道都具有呢類神通或者特異功能嘅功夫，所以係修學密宗嘅人呢，嘅行者呢，一定要小心！小心跟隨咗假上師，被佢哋冒充，呢點係好重要嘅。

講到內密灌頂，係嘎丹赤巴或者係大達登巴地位嘅上師先可以能夠做，唔係呼畢勒罕所能夠做嘅。響加持灌頂之中，由佛菩薩嘅光明，即係他力而循法耳，“法耳”嘅意思就係法界力而融入上師嘅身口意三門。響呢個時候，上師就入本尊嘅三昧，“本尊”嘅意思就係修持某一法你依恃嘅聖尊，譬如你修持觀世音菩薩嘅法，觀世音菩薩就係本尊嘞。而上師喺當時灌頂就進入本尊三昧，由佢嘅身，自身，成爲本尊嘅體性，就可以同弟子灌頂，施與法力。法力嘅意思係包含加持力同埋定力，呢個係由上師所修持出嚟嘅。至於弟子方面，如果弟子能夠誠信接受呢，呢個灌頂嘅力量自然進入弟子嘅心田而得到開發弟子嘅淨菩提心嘅種子，啫自心力量嘅種子，響呢個時候，作爲弟子嘅心識，其實已經同吖，本尊嘅光明嘅三智，啫身口意契合嘞，而結而成爲本尊嘅金剛種子。所以由他力、法界力、上師嘅加持力、定力同埋修行人自心嘅觀照力，各種力量統一圓融而無分，金剛種子就可以結成，而響嗰陣時候呢，應該去唸誦咒語，依咒力去灌溉呢個金剛種子，令到佢生長，相持不斷。所以呢，持上師或者本尊嘅根本咒呢，就可以令到力量不散。

修行人承上師嘅法統，傳承嘅時候，其實應該注意上師係咪通達佛菩薩、護法聖神嘅允諾，咁響內密甚深嘅灌頂裏便呢，就可以徹見無遺了。如果獲得灌頂，就要從此依法修持，加以灌溉，相繼不斷，久久修持，身口意三業相應，自然就同本尊一體，即得成就而得到本尊嘅三密。如果凡係去傳授內密灌頂或者接受內密灌頂而能夠依法不二，就可以得到即身成佛。得到內密灌頂嘅修行人，譬如生於皇帝嘅家庭，一生出嚟已經具有太子嘅資格，只係等待成人，就可以繼位，不過中間呢，當然要得到教養嘅功夫啦，教養嘅功，功夫呢，就依止上師嘅教導。

響西藏嘅行者，修行嚟講，成就係好多，但係佢哋呢，全部都係遵照佛誡同埋上師嘅訓誨，所以當今世界凡係有成就嘅人吖，一定要依止《上師五十頌》，響康藏裏便嘅修行人呢，視爲日常重要嘅課本，而康藏地方嘅弟子呢，當然呢，係要嚴格去揀師父啦，而上師亦要揀弟子，如果弟子唔係法器呢，就唔可以傳授佢大法，但係如果一經師徒建立咗關係，弟子就一定要對上師恭敬終生，凡係上師所教一定要信受，如果上師所教呢，能夠信受咧，弟子修法就能夠成就了，呢個係密宗裏便修法好重要嘅一點心法。考證過去諸佛都係咁講，如是修，如是成，而且西藏嘅宗喀巴大師呢，同埋諸經論呢，都係咁講，如果唔係咁，縱然自己吔，去修學經法，博通經論，唔依止上師嘅教誨都唔容易成就嘅。所以學密嘅修行人，再講一次，如果要成就，一定要完全倚靠你鑒別過值得依止嘅真正嘅上師，唔係假上師，所以上師同弟子嘅關係，呢一點係非常之重要。

西藏嘅大成就者多傑覺拔尊者曾經講過，修法嘅重要，首先要觀想上師能夠開發弟子嘅根本，對於上師要至心歸依，上師就係道嘅根本。“道”唔係世間道，而係佛道，所以自下而上，應該有次第，三業恭敬，一步一步去修，上師能夠同十萬諸佛相等，倘若供養十萬諸佛，不如供養上師一毛孔，所以佛法必須響恭敬之中求。恭敬上師嘅次第有三種：第一，就對上師盡力奉侍；第二，上師開示教法，就要一心信仰；第三，對於上師等於佛一樣，無二無別，如說修行，呢個就係恭敬之中嘅最上嘞。

多傑覺拔尊者又講，修上師法，十萬嘅諸佛都會嚟右繞上師三匝，向上師作禮而歡喜讚歎嘅，因爲上師講法嘅時候，修呢個法，其實已經同佛一樣嘞。供養上師一口嘅食物，佢嘅功德比一切功德更大，因爲上師係衆生功德無量，所以施與上師嘅功德亦都係無量嘅。上師嘅開示，對於敬師之道，以上已經講咗一啲。西藏同埋西康蒙古地方嘅大德，亦都好多成就，佢哋亦都捨棄一切家財去供養上師，其實一啲都唔出奇，隨處可以見到，所以修學人去求法，如果唔盡三業去供養，就唔可以修起法用。但係你供養嘅，一定要係真正嘅上師，唔係假上師，所以對上師，一定要須以加以真正嘅鑒別。

佛陀佢講說顯密嘅經論，唔經過上師嘅口授，係得唔到讀誦，如果依密法嘅規矩同埋儀軌呢，各種法門同口訣係唔同嘅，特別係觀想種子字同埋手印。如果唔經上師響法壇之中傳授，係口授甚深法義，直程係唔可以筆錄，譬如內密嘅灌頂啦，唔可以係俾外人知，修到相當嘅程度，因爲可能出現各種唔同嘅境界，必須要搵上師去鑒別。響呢個情況之下，如果修到高深，佛魔難分，就要上師去加以抉擇疑問嘞，如果唔係就會危險，容易入魔。

所以上師有根本嘅上師同結緣嘅師父嘅分別。凡係問一法一偈，乃至問一字之師，同埋隨時親近嘅大善知識，都可以叫做“結緣師”，如果經過傳法灌頂呢，就係根本嘅上師，但係如果經過內密灌頂，響護法神力示現嘅時候，而係傳法嘅人，就係金剛嘅根本上師嘞。對於上師嘅相，必須要供奉於壇城嘅中央，唔可以違法，隨時觀想上師同佛係無二無別。

凡係修持密法嘅人都知道密宗係以《大日經》同《金剛頂經》爲依歸，立十種心去統攝各種法數，建立蔓陀羅，身口意三密相應，積凡成聖，唯佛先能夠知道呢個道理。密法亦都以大圓滿係無上瑜伽部嘅最高法，寧瑪派嘅大圓滿確實係超越咗無修瑜伽嘅境界，但係修學嘅人一般只知其一，不知其二，一聽見某一個活佛傳授大圓滿，就隨即以爲呢個活佛就係佛陀嘅轉世，當下虔誠依止去苦修，其實響當中有好多誤會同埋錯謬。

響法義嚟講，固然有階梯之分，但係唔能夠作爲成就果位大小嘅定義，因爲無論響四部瑜伽嘅密法邊一部法裏便，最關鍵，佢係屬於顯嘅密法還係屬於內密灌頂，去分高下。如果以顯密灌頂去修學大圓滿，實質就係“灌顯”，顯宗嘅“頂”，啫顯灌顯修，雖然可以取得一些成就，但係受用無法達到快捷同埋無上之境。但係如果以內密灌頂去修學大圓滿呢，就能夠速捷無比，神通智慧無礙而即身成佛，所以學密法嘅高低唔在於法義嘅大小，而係在於是否係內密嘅灌頂所傳授嘅佛法，三業相應嘅法器。

由上述嘅因緣，我哋修學嘅人可以知道，一定呢，要查明師資，而可，唔可以盲目去依從嘅。寧瑪派嘅教理係甚深精微嘅，以阿底瑜伽大圓滿最尊勝嘅法門爲最高，所以呢個大圓滿教法嘅創立就係蓮花生大士嘅傳承，而修持蓮花生大士嘅法，最後亦都可以證得大虹光身而能夠往生去蓮花生大士嘅佛土或者任運去其他任何一切佛土，所以各位修持西藏密宗嘅人，請多唸“Guru rinpoche padmasambhava”，啫係蓮花生根本上師嘅咒，希望得到加持，日後能夠證得虹光嘅化身。

“Om ah hum vajra guru padma siddhi hum”，以上唸誦嘅咒係蓮師嘅根本咒，係梵語嘅發音，而西藏文唸誦，係“Om ah hung benza guru pema siddhi hung”。其中不同嘅呢，就係“vajra”同“benza”，或者佢哋西藏文會唸誦“besa”，其實都係“金剛”嘅意思，但係梵語嘅唸法就係“vajra”，西藏就係“benza”，或者“besa”。咁你唸西藏文可以唸成“Om ah hung benza guru pema siddhi hung”都係一樣，具足傳承嘅加持力，所以請各位修行西藏密宗嘅人，多多唸誦蓮花生大士嘅咒，以得到無上傳承嘅加持。

Om ah hung benza guru pema siddhi hung

Om ah hum vajra guru padma siddhi hum

Om ah hung benza guru pema siddhi hung

Om ah hum vajra guru padma siddhi hum

212.慈悲再現人間世（一）

各位，今晚我要同大家講一個好偉大嘅故事——《慈悲再現人間世》，係我哋嘅本師釋迦牟尼佛嘅一生。

響喜馬拉雅山嘅南麓，靠近羅希尼河一帶嘅地方，有一個好富裕嘅國家，叫做迦毗羅衛國。國王淨飯，姓瞿曇，係釋迦族嘅後裔，佢繼承咗綿延世代嘅純正血統，佢勤政愛民、英勇能幹，所以深爲全國百姓嘅愛戴。國王嘅王后摩耶夫人呢，係屬於釋迦族另外一個分支，拘利族嘅公主，亦都係天臂城城主善覺王嘅妹妹，計起上嚟呢，就係淨飯王遠房嘅親戚。

淨飯王同摩耶夫人結咗婚好多年了，都冇生下一男半女，直到二十多年後嘅一個六月十五嘅晚上，摩耶夫人就發夢，見到被四大天王連埋臥鋪一齊抬到叫做雪山嘅地方。響潔淨沐浴之後呢，一隻六牙嘅白象就響臥鋪旁邊向摩耶夫人繞咗三個圈，然後由摩耶夫人嘅右脅進入咗摩耶夫人嘅身體，然後摩耶夫人就懷咗孕了，之後全國上上下下都盼望摩耶夫人能夠誕下新嘅王子。響接近生產嗰個月呢，王后依照當時印度嘅習俗，返去天臂城娘家去待產，咁響返娘家嘅途中，經過一個花園叫做藍毗尼園休息。藍毗尼園係位於迦毗羅衛城同天臂城交界嘅地方，園中遍植娑羅樹，響嗰個時候呢係正值初夏，娑羅樹盛住開晒花，開得好茂盛，花葉之間有五色蜜蜂和各種禽鳥飛翔，而且時時發出美妙嘅聲音，整個花園就靚到好似帝釋天王嘅遊園一樣，王后因此就決定響第二個清晨前往娑羅樹林之中去觀賞。

響日出嘅時分，王后漫步到一顆鬱鬱蔥蔥嘅娑羅樹之下，見到一支滿綴花朵嘅樹枝，竟然情不自禁就舉起佢右手想去觸摸，不料樹枝呢，就好似蘆葦遇到熱氣一樣，自動垂入王后嘅手中，就喺呢一剎那，王子就從王后右邊嘅脅出生咗啦。王子出生咗之後，突然有兩股清泉，一股係溫嘅，一股係涼嘅，由空中灑落下嚟，使到王子同摩耶夫人增加咗不少嘅氣力。之後王子又從婢女嘅手中落落，落咗地上面，觀望四方，然後向四方各行七步，以莊嚴嘅聲音就作獅子吼話：“一切嘅天、人之中，以我最尊最勝，呢個係我喺人間嘅最後一生，我要度盡一切衆生遠離生死苦海。”

呢件事係西元前五百六十五年嘅四月十五日嘅事情，或者可以話係四月初八。當時有一位仙人叫做阿斯陀，正在響雪山上面修行，佢已經得到四禪八定，能夠知道過去四十劫同未來四十劫之間嘅一切事。四月十五日嗰一日，佢發現迦毗羅衛城嘅空中有吉祥嘅瑞相，於是佢就嚟到城裏便，要求去見太子。阿斯陀仙人以神通觀察之後，不禁露出歡喜嘅微笑，但係隨後佢又喊起嚟，阿斯陀仙人話：“太子具有三十二相八十隨形好嘅大丈夫相，再過三十五年就一定能夠成佛，成爲人天嘅教主，但係我將喺佢未成佛之前就死亡了，我會轉生響無色界天，任憑百佛千佛出世，我都無緣見得到，所以我就喊！呢個係我嘅莫大損失了！”仙人講完呢段說話之後就俯低身對王子禮拜了。

王子出生後嘅第五日，淨飯王爲王子舉行命名嘅儀式，響會中請咗一百零八位精通三吠陀嘅學者，最後由大家共同選定“悉達多”做王子嘅名字，“悉達多”嘅意思呢，就係一切願望能都夠圓滿達成嘅意思。學者之中有八位精通六分吠陀，《吠陀》呢，係當時印度婆羅門教嘅聖典，猶如我哋學習佛經一樣。當時有八位精通六分吠陀擅長觀相嘅人，呢一次見到王子嘅德相呢，有七個人一致伸出兩隻手指而作出兩種預言，呢個預言就係話：“有呢種大人相嘅人呢，（即是話王子），假使繼承王位吖，將來一定能夠統治四大部州嘅轉輪聖王。假使如果出家修道，一定會成爲無上正等正覺嘅佛陀。”但係其中有一位青年嘅學者叫做憍陳如，只係伸出一個手指作堅定嘅預言話：“王子長大咗之後絕對係唔會留喺屋企嘅，佢將來一定係一個破除煩惱蓋障嘅佛陀。”淨飯王聽咗呢啲預言非常之高興，但係後嚟呢，就越諗越擔心，因爲佢驚王子長大咗之後呢，就離家遠去，於是淨飯王問學者話：“究竟我個仔會見到一啲咩嘢徵兆，而後佢想出家呢？”啲學者就回答淨飯王話：“王子會見到四種徵兆而引發佢出家。”淨飯王就話：“係邊四種徵兆吖？”啲學者就話：“一個係老人，一個係病人，一個係死人，同一個係出家人。”淨飯王聽咗之後立刻下令就話：“從今以後唔准呢四種人喺王子面前出現，我嘅王子唔需要成佛，佢應該好似其他人一樣娶妻生子、組織家庭，我要親眼見到佢繼承我嘅王位，統治我嘅國家。”

王子出生之後嘅第七日，好不幸，摩耶夫人，佢媽媽就去世了，然後王子就交由淨飯王嘅另一位王妃摩訶波闍波提撫養。王子由七歲開始就接受文武雙全嘅教育，國王爲佢聘請各種名師入宮殿去教佢讀書、作文、算術、射箭同埋一啲技藝。

咁有一年春天，耕耘祭祀嘅時候，王子跟住父王去各度地方田園去巡視，見到農夫響田園揸個耙係咁鋤土，有一隻雀仔啄走咗呢個鋤頭尖所掘出嚟嘅蟲，王子於是喃喃自語就話：“真係可憐吖，呢啲生物點解會互相殘殺嘅呢？”於是王子就偷偷離開人群，獨自坐喺樹底沉思起嚟。王子誕生之後不久就失去咗母親，現在又見到生物互相殘殺嘅情形，響佢幼小嘅心靈之上早已經刻下咗人生苦惱嘅傷痕，呢個傷痕就好似刻喺細樹一樣，隨住細樹嘅成長而日益擴大，王子亦都因爲呢一年，年，一年同埋一年呢，更加慢慢進入沉思嘅冥想而厭棄世事。淨飯王知道王子有咗修道嘅思想，好憂慮，呢個時候就諗起從前仙人同學者嘅預言，更加惶恐不安，於是想盡咗各種辦法要使到王子快樂起嚟，但係都冇效果。

響王子十九歲嗰年，淨飯王終於接受群臣嘅建議，決定迎娶佢嘅舅父天臂城主善覺國王嘅女耶輸陀羅俾王子做妃嬪，之後十年嘅時間，王子流連響春、秋、雨等等唔同嘅宮殿裏便，享受住歌樂弦管嘅生活。淨飯王爲咗使到王子唔生起出家嘅念頭，特別下咗一道命令，唔准任何人響王子面前提到生、老、病、死等等人生憂、悲、苦、惱嘅事。服侍王子嘅人呢，亦都要日以繼夜表演各種清歌曼舞，亦都唔准現出辛苦疲倦個樣。此外呢，亦都喺宮殿四面建造一啲圍牆，裏便除咗青春美貌嘅女性之外，其他嘅人一概唔准進入，即使裏便有人無意受咗一啲傷，亦都要立刻抬走，唔等到佢復原呢，都唔俾佢再返入嚟。淨飯王雖然將世間所有痛苦嘅情形都阻隔響王子嘅生活圈之外，但係王子並唔快樂，即使響作樂之中，佢都不時喺度沉思冥想，苦心去探討人生嘅真諦。

有一日，王子忽然向淨飯王提出想出城遊園嘅要求，淨飯王雖然心懷憂慮，但係由於愛子心切，仲係好快咁答應咗。於是皇帝立刻下令，響王子出城嗰一日，凡係所要經過嘅街道吖，每一家都要清洗打掃，街道呢，要散滿鮮花，窗門要結滿彩縵，務必使到人呢，見到係覺得新鮮同埋美麗，又禁止工人吖，響路旁工作，窮人、盲人、病人、老人嗰一日都唔准外出，直到王子呢，過咗呢個街道爲止。咁響一切都準備就緒之後，王子就乘住華麗嘅吉祥嘅車由宮門開始出發嘞。呢個時候淨居天嘅天帝知道王子出家嘅時候就快到，爲咗讓呢個機緣快啲成熟，於是淨居天帝幻化成爲一個白髮蒼蒼嘅老人，彎住駝背嘅腰，隻手揸住拐杖，響馬路上便顫抖，一便顫抖一便行。老人忽然出現驚動咗好多人，大家雖然想趕走佢吔，但係已經來不及了，王子見到咁怪異嘅老人，於是問揸車嘅車夫車匿話，王子話：“車匿，呢個人點呢？點解佢嘅頭髮咁白嘅？同我哋唔一樣嘅？點解佢嘅背脊咁彎曲唔能夠伸直嘅呢？佢嘅身體點解不停咁顫抖？啲牙又響度打震？車匿，佢係咪生，一出生就係咁嘅樣嘅呢？”車夫車匿於是回答王子話：“王子吔，呢個老人佢唔係出生就係咁㗎，佢同所有嘅人一樣，都係曾經有個強壯結實嘅身體、烏黑嘅頭髮、明亮嘅眼睛、整齊嘅牙齒，但係響世界上生存耐咗就會慢慢變成咁樣㗎喇！”於是王子又問：“車匿，你話全世界嘅人，只要生存耐咗就會變成呢個樣，咁我呢？我嘅父王呢？我嘅太太呢？係咪一樣都會衰老、會駝背、會顫抖、會白髮、會落牙嘅呢？”車匿就話：“王子吔，的確好似你講嘅一樣，老係冇辦法避免嘅，無論係富人、窮人、有權力嘅人、冇權力嘅人、尊貴嘅人、卑賤嘅人，都係一樣會老㗎，人一出生就註定要老㗎喇。”悉達多王子聽咗非常傷心，於是立刻叫車匿就揸番架車返去王宮了。王子返到王宮之後，淨飯王馬上召見車匿，問下今日王子嘅心情係咪好快樂？但係當國王知道響街道上所發生嘅一切，佢就非常擔憂，國王心中就諗：千祈唔可以俾王子捨棄王位嘅，唔能夠俾佢離家出走嘅，唔能夠俾占相嘅學者預言成爲真實嘅。於是國王就更緊張，命令屬下嘅人去訪求各種增集五欲嘅方法，去俾王子儘量享樂，而令佢忘記愁苦。

過咗冇幾耐，王子又再度駕住一架吉祥車出去宮殿再遊園林嘞。淨居天子真係好有心，佢知道王子又出去遊園，於是立刻又化成病人，瞓喺王子經過嘅路旁裏便呻吟，而且一再以極微弱嘅聲音去哀求其他人幫助佢。病人嘅身體已經被，被病魔折得不可磨折嘅形狀，又因爲痛苦扭成一團，掙扎不息。王子見到，於是立刻落車扶住佢，問車匿話：“車匿，呢個人點解會咁嘅呢？佢嘅眼神點解同一般人唔係一樣嘅呢？佢嘅呼吸點解咁微弱呢？皮膚點解又黑又紫呢？”

“王子吔，呢個係病人吖，你快啲離開佢啦，佢現在全身佈滿咗病毒，內臟開始腐敗，到咗最後連佢呼吸都會停止㗎，如果你太接近佢，佢嘅病毒係會傳染俾你㗎，到時你亦都會跟佢一樣㗎。”

“車匿，世上除咗呢種病之外，仲有冇其他病嘅呢？”

“有吖，病有好多種㗎，但係無論係邊一種病，都係痛苦嘅㗎。”

“車匿，難道冇人能夠解救佢咩？難道世人就咁樣被病魔任意摧殘咩？”

“王子吔，世人生病係好平常㗎，雖然有好多醫生努力搵克服病菌嘅方法，但係都冇辦法能夠搵到真正壓止病嘅發生嘅原因。就算呢個病醫得好，咩時候再會發生另外一啲病，冇人能夠預料，冇人能夠知道㗎，因爲世人隨時隨地都會生病。”

“你講嘅係咪都係真㗎？車匿？包括我父王，仲有我在內？”

“王子吔，有我哋呢個身體就有病吖，生病係不分貴賤、男女、老少㗎。”

王子聽咗車匿嘅說話之後就非常唔開心，佢就咁諗：如果係咁，咁樣人生活響世界之上咪只有痛苦同恐怖？因爲冇人知道我今晚瞓咗覺之後，聽日係會唔會變成好似呢個病人一樣。於是王子嘅心中對於世間嘅眷戀就頓然捨棄了。

此後又有一日，悉達多王子又響遊園嘅園林路上見到天人幻化出嚟嘅死人，死人就瞓喺擔架之上，前後有雜色嘅繒幡導引，後面又跟住一群人悲號哭泣，出咗城之後，死人就被放喺一堆木柴之上，啲火紅紅咁點著咗燒起嚟。王子見到好驚訝，以好震顫嘅聲音問：“車匿，點解嗰個人咁靜咁瞓喺度嘅呢？啲人係咪燒緊佢吔？點解旁邊嘅人喺度喊呢？佢哋係咪搶救緊佢吔？”

“王子吔，嗰個人已經死咗㗎喇！佢雖然有腳，但係唔能夠再走路㗎喇，雖然有眼，但係唔能夠再睇嘢㗎喇，佢對一切事物已經唔會再有知覺㗎，無論係熱、係冷、係火、係雪，佢完全失去咗知覺，佢已經死咗㗎喇！你睇下啲屍蟲幾多？漫佈響佢身上，食緊佢嘅肉體。王子吔，如果你唔再燒佢嘅身體呢，臭味就會散佈響整個空氣之中，佢從此，呢個人死就唔會再返嚟㗎喇。佢嘅親朋戚友，你睇下，成班人正爲佢傷心吖！”

“車匿，難道咁樣就叫做‘死’咩？我係國王嘅兒子，好似呢個人一樣要死？我嘅父王、耶輸陀羅同埋我所認識嘅人，總有一日係咪都會被放喺呢啲木柴上便燒呢？”

“王子吔，人既然有生就一定會有死，任何人都冇辦法防備同埋逃避㗎！”

王子聽咗之後非常傷心，默默唔再講嘢。佢就諗：真係太可怕！世上嘅人除咗會老、會病之外，原來有一日係仲要死，唔通冇方法可以防備呢啲老、病、死嘅問題？唔得，我一定要諗出解決依啲問題嘅方法，只要我搵到方法，我嘅父王、我嘅太太耶輸陀羅以至於全世界嘅人就唔須要籠罩響老病死嘅恐怖之中了。

又有一次，王子響園林之中散步，忽然見到天人幻化出嘅出家人，披住黃色嘅袈裟，捧住鉢，正安詳由前便走過。由佢寂靜嘅外表，王子猜想內心必定充滿咗快樂同埋寧靜，於是王子又問車夫車匿話：“車匿，正話行過嘅係咩人呢？”

“王子吔，呢位係出家人吖。”

王子一聽到“出家人”呢三個字，響佢心中自然升起咗既恭敬又歡喜嘅微妙感受，於是就立刻吩咐車匿，追，開車去追呢個出家人。於是王子揸車追到呢個出家人，於是佢就下車合掌向出家人問了：“仁者，你剃除鬚髮，著住袈裟，毅然捨棄家庭，係咩目的呢？”

“王子，我所以出家，目的係捨離世間嘅恩愛，而且收攝六根，唔受五欲，慈心去對待一切衆生，以求解脫世間嘅痛苦吖。”

悉達多王子聽到好高興咁讚歎話：“善哉善哉，響世界上原來有咁殊勝嘅嘢！”

悉達多王子自從見到出家人之後，每一日都好快樂咁靜坐響園林裏便，佢心中但係始終纏住一啲出家嘅念頭。響嗰個時候，淨飯王就派人話俾佢聽，話佢嘅太太已經生咗一個可愛嘅細伩仔，但係佢聽咗並，並冇表示好喜歡嘅樣，反而話：“羅睺羅。”羅睺羅就係“障礙”或者“繫縛”嘅意思。因爲王子當時咁樣講，淨飯王就爲佢嘅孫取名叫做“羅睺羅”。

悉達多王子二十九歲嗰年嘅六月十五，占相學者又向國王預言話：“王子如果唔出家呢，再過七日就成爲轉輪聖王了。屆時，七寶就自然會顯現，釋迦族姓亦都因此而大盛了。”淨飯王聽咗好高興，爲咗盡最後一次嘅努力，於是呢，通令全國，找尋出最聰明又最美麗嘅女子，響今日起長期住喺王子嘅寢宮裏便，日夜爲王子表演各種美妙嘅歌舞，希望再能夠博得王子嘅歡悅。就喺嗰一晚，有好多天女一樣嘅美女，打扮得花枝招展，手執各種樂器，圍繞住王子歌舞，但係呢個時候王子嘅心一早已經脫離咗五欲嘅煩惱，對於歌舞根本感唔到興趣，冇幾耐就瞓著咗。呢啲唱歌同跳舞嘅女子見到王子瞓著咗，亦都紛紛放下手中嘅樂器，各自亦都躺喺地板上便休息。過咗一陣，王子就醒咗，佢盤坐，坐喺床上便，見到呢啲女子因爲瞓著而露出嘅種種醜態，有啲個口裏便流住口水沾污咗肢體，有啲就咬牙，發出好似瞋恨嘅鬼魅聲，有啲好大嘅鼻鼾聲，有啲喺度發夢講夢話，有啲張大咗個口，有啲衣服就打開，現出令人討厭作嘔嘅樣。王子好驚訝，點解呢啲平日美如天仙嘅女子，點解今日會變得咁討厭可怕呢？突然間，佢覺得呢座華麗嘅寢宮，好似一座縱橫狼藉、攤住死屍嘅墓地，三界就好似煉獄一樣，冇一笪安樂嘅地方，於是就叫咗一聲：“世間真係禍患吖！”於是王子就決定喺呢個夜晚離開宮殿而去出家了。

響夜深嘅時分，悉達多王子騎住有靈知嘅馬，叫做“犍陟”，佢騎住馬，帶著車夫車匿，悄悄咁樣離開宮城。響呢個時候，破壞佛法嘅魔王波旬早已經趁機會要嚟糾纏王子，所以波旬就響空中話：“王子，你返去宮殿啦！再過七日，就有輪寶出現了，冇幾耐，呢個世界上所有嘢都係屬於你㗎！”王子於是鬧魔王話：“魔王吖，你亦都返去啦，我當然知道輪寶會出現，但係我唔要王位，亦都唔要塵世上嘅一切，我要成佛，我要救渡一切衆生，我要俾十方世界都知道我成佛，而爲我震動！”魔王於是個心裏諗：我唔相信你能夠逃得出我嘅手掌，今日，只要你一生起貪欲，或者邪惡嘅不善心，我仲可以捉住你㗎！從此之後，魔王就如影隨形一樣一直跟喺王子嘅身後便，每時每刻都想搵出王子嘅過失去破壞佢嘅修道。響嗰個時候，正係六月十五嘅月圓之夜，皎白嘅月光傾瀉住大地，王子好想回頭對故，對故鄉作出最後一望，但佢生起呢個念頭，大地忽然間裂開，好似有把聲音話俾王子聽話：“大士吔！你要堅定信心，千祈唔好番轉頭吖！”於是悉達多王子就騎住犍陟馬，一夜之間通過三個王國，到咗黎明時分就到達阿羅摩，意思係尊勝、常滿意思。呢個阿羅摩係一條河，王子到達河嘅岸邊，王子企喺銀光一片嘅沙灘之上，問車匿呢個車夫話：“車匿吖，呢條河叫咩名呢？”“王子吔，呢條係阿羅摩河吖。”王子心諗，呢個係出家嘅好緣起，於是佢隻右手執住一把刀，左手拉起自己嘅頭巾同埋髮髻毫不猶豫咁一刀割斷，於是就換咗貴重嘅衣服，著起僧衣，手掌捧住鉢，沿途乞食，就到咗南方去了。

王子出家之後，響當地一個叫做阿奴夷庵嘅波樹林（註：根據《本生經》卷一、《南傳小部經典》《佛學大辭典》，釋尊響阿奴夷嘅菴婆/奄波樹林裏便過咗七日，然後進入王舍城。“阿奴夷”，又作“阿奴波村”，梵名Anupriya，巴利名Anupiya）裏便住咗七日，享受住離塵絕慾嘅快樂，之後就繼續向南行，到咗摩羯陀國嘅國王，王舍城。第二日早晨，王子響近城嘅小河裏便沐浴，忽然呢，入城一家挨一家咁托鉢，王舍城嘅人民見到王子具足種種嘅相好同埋高貴嘅威儀，都紛紛將最好嘅美食去供養佢。自從王子入城托鉢之後，呢個消息就被傳開，呢個消息係話有一位莊嚴無比、儀態高貴嘅出家人嚟到王舍城。後嚟國王知道呢個消息呢，亦都派人跟蹤王子，而且調查佢嘅來歷，最後得知呢個出家人就係迦毗羅衛國嘅太子，佢爲咗解脫世間嘅種種痛苦，冇幾耐之前捨棄咗王位，出家修梵行。頻婆娑羅王係非常欽佩王子偉大嘅行爲，於是請求王子響王舍城裏便留下嚟，以便長期供養王子珍貴嘅食物，但係王子婉拒咗國王嘅要求，就咁講：“大王，我對於物質已經無所希求，我係爲咗最上嘅菩提而出家，所以響我未達到目的之前，我係唔能夠長住響一個地方㗎。”頻婆娑羅王最後同王子相約，請求王子成佛之後首先降臨到佢嘅國家，教化佢同埋佢嘅人民。

悉達多王子離開咗王舍城之後，遇到咗當時印度最有名嘅阿羅南（註：阿羅邏·迦羅摩alara Kalama）同埋優頭南迦（註：郁頭迦·羅摩弗Uddaka Ramaputta）兩位仙人，王子先後跟佢哋學習解脫生死嘅方法。經過兩位仙人嘅指點，王子嘅學識雖然好快就達到同兩個仙人相等嘅地步，而且能夠進入無所有處嘅禪定同非想非非想處嘅禪定，如果以非想非非想處禪定嚟講呢，係世間裏便最高層次嘅禪定，係無色界，三界嘅無色界最高嘅禪定嘞，但響王子心中嘅生死問題仍然係冇辦法解決，因爲佢知道一味修習禪定係冇真實嘅意義，亦都產生唔到智慧，絕對唔係菩提嘅大道。於是王子就唔再去各度地方去求知，佢只想單獨運用自己嘅智慧做大精進，以尋求脫離生死嘅真理。

響二千多年前嘅印度，其實同現在一樣，有好多外道嘅出家人，認爲只要以種種嘅方法使到身體受苦，死咗之後就會升天同得到永久嘅快樂，所以響山林曠野之間呢，到處都係充滿住修呢種苦行嘅出家人，好似有人以一隻腳企喺度，有啲人以雙腳倒掛響樹上便，有啲人將個頭埋喺個地裏便，有啲人就瞓喺插滿刺嘅釘床木板上，有啲人呢，幾乎呢，係唔食任何嘅嘢，以爲呢啲咁嘅方法去修苦行能夠得升天界解脫，悉達多王子亦都試驗過以上嘅種種苦行嘅方法，佢希望藉此得到開悟。有一日佢嚟到一個名叫優樓頻羅嘅地方，見到一片好幽靜嘅樹林，地方好平坦，林木好茂盛，又靠近河流，認爲呢笪地方係好適合佢作修道大精進嘅地方，於是佢就喺呢笪地方留低了。曾經預言悉達多王子如果出家將成爲佛果嘅八位學者，除咗憍陳如之外，都已經隨業報往生咗，佢哋生前都曾經各自告誡自己嘅兒子，一定要隨王子出家，歸依佢嘅教法。王子出家之後，憍陳如就帶領其中四個人嘅兒子出家，亦都一樣沿門托鉢向南方去，最後響優樓頻羅嘅樹林之中同王子相會。跟住嘅六年呢，佢哋五個人都跟喺王子身邊充當侍者，擔任掃除……（註：接下文）

213.慈悲再現人間世（二）

（註：接上文）

當王子覺悟咗之後，自然就會將覺悟嘅真理教導佢哋呢啲做弟子嘅人。王子決定以極端嘅苦行作大精進，所以就開始減食，直到每一日只係食一粒胡麻或者一粒米爲止，有一啲時候甚至完全斷食添，咁樣經過咗六年，王子嘅身體開始變得好瘦了，本來金色嘅身體逐漸變爲黑色，三十二種大人相亦都慢慢失去咗。有一日，王子作無色嘅禪觀嘅時候，因爲身體太虛弱而暈低咗，完全失去咗知覺。響呢個時候，剛好有一位牧童經過，知道王子絕食而暈低，於是佢立刻擠出羊奶幫助王子甦醒過嚟。王子醒咗之後，又繼續坐喺樹下便用功，冇幾耐，忽然聽到一班女孩子嘅歌聲，佢哋唱道：“琴嘅琴弦如果太緊，啲絲係會斷嘅，琴嘅琴弦如果太鬆呢，又奏唔到悅耳嘅音樂。不鬆不緊，恰到好處，妙音就響天邊了。”當王子聽到“不鬆不緊，恰到好處，妙音響天邊”呢對歌詞嘅時候，佢嘅心自然生起咗無比光明嘅覺受，佢就心諗：苦行絕對唔係導致覺悟嘅途徑，世人如果堅持苦行而將生命嘅弦拉嘅太緊呢，咁樣不但無法使到心力集中，而且仲會將證道嘅寶貴人身白白浪費咗添。王子回想六年來所做嘅苦行係過去嘅人所冇做過，相信將來亦都唔會有人能夠出其左右，而呢種嚴行嘅苦行就好似虛空打結一樣，並冇將佢獲得想要嘅東西，所以王子決定放棄呢種毫無意義嘅修行方法。

悉達多王子響天光之後，又重新到附近嘅村落托鉢乞食，攝取滋養。不久之後，三十二種大人相又逐漸出現，皮膚亦都恢復番金色了，但係以憍陳如爲首嘅五比丘呢，就不以爲然，佢哋仍然堅持，佢哋覺得只有透過苦行先係獲取無上正等正覺嘅唯一方法，所以當王子放棄苦行呢，佢哋認爲王子求道嘅心已經退轉，所以貪舒服而墮落。呢個時候呢，佢哋期望王子有所成就呢，就等於諗積咗露水嚟洗臉一樣係唔可能嘅，所以佢哋各自攜帶自己嘅衣鉢遠離王子，到幾百里路外嘅鹿野苑去了。

優樓頻羅附近，有一個叫做將軍村嘅村落，村裏便嘅長者有一個女叫做善生，佢曾經向大榕樹許過願，話佢如果得到好嘅歸宿，而且第一胎係生男嘅，佢就會獻上價值十萬枚錢幣嘅供品，後來佢嘅願望果然達成，於是佢就決定響四月十五日嗰一日帶備一啲供品去還願了。善生希望以轉乳嘅方法取得味甘而營養豐富嘅乳粥作爲供品，所以預先將一千頭母牛放喺一個樹林裏便，然後將呢一千頭母牛所擠出嚟嘅奶餵五百頭母牛，然後再將五百頭母牛擠出嚟嘅奶去餵二百五十頭母牛，如是次第減半，直到二十六頭嘅母牛擠出嚟嘅乳餵八頭母牛。響四月十五日嘅清晨，善生取得呢八頭母牛所擠出嚟嘅乳，放喺鍋裏便加埋蜂蜜變成乳粥，然後裝喺價值十萬枚錢幣嘅金鉢裏便，頂喺頭上便，帶住一個侍俾一齊嚟到大榕樹下便。響呢個時候善生所準備嘅供品呢，正吖，應咗一切諸佛成道之日必須接受一個價值十萬枚錢幣金鉢嘅瑞應。善生走近榕樹嘅時候，見到悉達多王子坐喺樹下便，身光遍照整樖樹，又具有種種相好，所以就好歡喜。佢將王子當作樹神，以最虔誠嘅心俯身前進，獻上金鉢同埋以花熏過嘅香水，並且對王子禮拜話：“祝您早日達成您嘅心願，就好似我已經達成我嘅心願一樣。”善生起咗身之後就隨即離開，將價值十萬枚嘅錢幣金鉢視同柳葉，望都唔望一眼。

悉達多王子響凌晨嘅時候發咗五個大夢，佢個心諗：今日一定要成佛。於是就攜帶住鉢到尼連禪河邊，響一個名叫善住嘅浴場去洗澡。洗完澡之後，就響河岸邊將善生所供嘅乳粥搓成四十九個好似小湯圓嘅一粒粒嘅細粒，然後全部食咗，王子食咗之後，氣力就充沛，身體煥發出光輝，就如同百千金燈光聚一樣，所以呢，以呢個善生嘅福報係好大嘅。王子繼而將金鉢投入尼連禪河裏便就話：“如果今日我可以成佛，金鉢我就希望你逆流而上，停喺中途，否則你就順流順住流水去啦。”王子嘅話一講完，金鉢就開始移動，先係橫截水面到達河嘅中央，然後就好似一匹快馬逆流而上，到咗相距八十隻手肘嘅地方就停止咗，然後再順住一道漩渦，沉到龍王嘅宮殿裏便，同過去賢劫三個佛所用嘅金鉢並排響同一行列嘅最尾嘅地方。龍王聽到金鉢叮咚嘅響聲，就以偈去讚：“昨日有一個佛出世，估唔到今日又有一個佛出世。”龍王講，講完之後，就現出高大嘅身矗立響空中，原來每遇一個佛出世，龍王就涌出地面，以佢現身地面嘅時間嚟講呢，佛出佛沒，其實在於佢呢個時間嚟講，就好似琴日同今日咁短嘅啫。

王子響岸邊嘅娑羅樹林過咗一日，到咗日落嘅時候，佢就走去菩提道場。響呢個時候正好有一位叫做吉祥嘅除草嘅農夫，身上背住一啲草迎面而嚟，佢見到王子俱足種種嘅相好，知道王子係一位聖者，因而請求王子接受佢八束青草嘅供養，王子接受青草供養之後，於是呢，就去咗菩提場了。菩提道場係賢劫之初，同大地同時出現，佢位於世界嘅中心，下至金輪，上至地面，完全係由金剛所造，因爲賢劫一千尊佛咧，都喺呢度呢，入金剛定去成就無上菩提，所以呢個地方就叫做菩提道場，或者叫做金剛座。

王子首先響道場嘅一個方向站立，剎那之間前方大地突然上升，彷彿到咗有頂天，背後嘅大地亦都急速下降，彷彿沉到響無間地獄一樣，王子知道呢個唔係成就無上菩提嘅地方，於是又向右繞轉咗去另外一個位置，但係情形仍然一樣，無論佢企喺邊度，大地都係向一個方向傾轉，咁樣換咗幾個地方呢，直到佢企喺菩提樹下便嘅時候，就覺得大地異常嘅平穩，王子嘅心就咁諗：呢個大概就係三世諸佛成就無上菩提嘅位置。於是佢將八束柔軟嘅青草向地上一震，立刻自行咁鋪成寬十四個手踭位嘅獅子法座，王子就喺法座之上，面向東方嘅座下，就喺座前佢發出好似金剛嘅誓言話：“我如果唔能夠證得無上菩提嘅大道，我寧可響呢個座位上便粉身碎骨，係絕對不會離開呢個座嘅。”

咁喺嗰夜，日嘅夜晚，王子就入咗降魔定，放大光明。啲魔見到光明就生起畏懼，魔王波旬派遣三個女到達王子面前，以種種嘅媚態去誘惑王子，希望破壞王子嘅道心，但係王子嘅心就好似湛然不動嘅清水一樣，絲毫不爲所動。魔王波旬看見王子嘅道心咁堅固，於是更加害怕，就率領八十億魔軍前嚟干擾。魔王到咗菩提樹下就向王子呵啦：“悉達多！呢個位係我嘅，你快啲起身，唔係我就將你捉住，將你掟入海裏便！”王子就回答：“魔王，你嘅惡願係永遠唔會實現嘅，你嘅福力遠遠唔及我，點能夠令我放棄成佛嘅願望呢？你喺過去世之中，因爲造咗一座佛寺，受持一日八關齋戒，供養辟支佛一鉢嘅食物而享受到今天嘅福報，成爲第六天嘅天王，但係僅僅以呢啲福力，其實係冇辦法郁動我一絲一毫嘅信念。魔王，我響三大阿僧祇劫之中，供養過無量無數嘅佛，同難以估計嘅菩薩、辟支佛、阿羅漢，而且發出無量嘅清淨願，如果今日嘅智慧、福德、因緣其實已經圓滿了，今晚嘅夜晚就係我示現成佛嘅時候，所以金剛寶座係屬於我嘅。”魔王聽完非常生氣，就話：“悉達多！我過去做過布施而身爲六欲天嘅天王，呢個係實情，但係有你爲證。你稱話作過無量布施，你自己做無量布施，又邊個替你證明呢？”王子於是右手指喺地嚟話：“大地就可以爲我作爲證明嘞！”王子嘅話啱啱講完，大地吖出現六種震動，地神於是隻手執住個地，由地下走出嚟就話：“有呢個大地以來呢，我一直就喺呢度，所以我可以爲王子作證明。一切嘅大地如果碎爲微塵，我都能夠數到，但係王子嘅廣大功德我就根本計算唔到。王子成佛嘅時節因緣已經到了。”地神講完依啲說話就唔見咗嘞，魔王響呢個時候亦都忍唔住佢嘅狂怒，於是立刻麾動啲魔軍將王子團團包圍，前方啦、左方、右方啦，所有嘅部隊長達十二由旬，後方嘅部隊一直延伸到世界嘅盡頭，吶喊嘅聲隆隆不絕，幾乎可以使到大地震裂。呢個時候，王子嘅心早已遠離煩惱，對於大敵當前呢，佢都不驚不怖，佢好寂然咁進入咗慈心三昧。魔王見到咁嘅狀況，於是就颳起一陣狂風，呢個風勢吔，可以足以將一座大山吹出一條路，四方大小村莊化爲微塵。但係因爲王子具有無比功德嘅威力，佢風勢呢，大爲減弱，當吹到王子身邊嘅時候，竟然連法衣嘅邊緣吖，都唔能夠觸動佢一啲。魔王跟住又使出降大雨、下巖石、噴火吖、吐煙吖、飛沙走石、雷雨交加、天昏地暗，喺個天上便落出唔同嘅各種兵器，呢啲猛烈嘅攻勢去襲擊王子，但係都唔能夠將王子趕走。呢個時候啲兵器接近王子身邊嘅時候呢，反而變成一朵朵嘅鮮花飄落王子嘅身上，所有兇惡詛咒嘅聲音亦都頓時化爲讚頌嘅歌。魔王呢個時候急得就要癲了，於是佢將身邊帶住嘅輪一擲飛向王子，而且口中仲大叫：“我要你由呢個座位立刻離開！”呢個輪盤平日具有無比嘅威力，就係鋼鐵嘅大柱吔，都被擊得粉碎，但係呢個輪盤到達王子嘅頭頂上便，反而化爲一朵無比莊嚴嘅寶蓋停住響空中。魔王同魔軍見咗，傲慢嘅心一時都被摧毀，紛紛驚到向四方逃走。

王子降伏咗魔軍之後，內心就更加澄淨，就好似冇風浪嘅池水一樣，寂然進入咗四禪定，王子響定中一心思惟真實義。到咗夜晚嘅中段，就得到能夠了知過去世同埋一切生嘅宿命神通，之後又得到能夠了知一切衆生生死來去嘅天眼神通。到咗夜晚嘅後半夜，王子就將十二因緣依住順逆嘅次序加以觀察，立時一萬個大世界起咗十二種震動，得到漏盡嘅通。於是東方發白，黎明拂曉，就證得殊勝智慧而成佛了，於是王子喺嗰個時候就被尊稱爲如來、應供、正遍知、明行足、善逝、世間解、無上士、調御丈夫、天人師、佛、世尊嘞，呢個就係如來嘅十號。

以上就係佛陀本師釋迦牟尼佛出家成道嘅經過。衆生無始以來皆由一念不覺，沉淪於生死苦海，做咗五欲“財色名食睡”嘅奴隸，留戀三界而流連忘返，因此，具有圓滿智慧嘅大覺者佛陀發起咗大慈大悲嘅誓願，永遠不斷化身響有情世界，救拔同開導有緣嘅衆生，使到佢哋能夠消除一切苦惱，得到絕對真正嘅快樂，踏上修行嘅道路而證得同大覺者一樣嘅圓滿智慧。

“佛陀”呢兩個字係梵語“Buddha”嘅音譯，佢意思係“覺者”，“覺”即係不迷惑，“覺”呢，有“覺察”同“覺悟”嘅兩種意義。我哋平常嘅身體，大多數嘅時候都係受住唔正確心態嘅支配而去做惡事，習以爲常而唔，自己唔知道。呢啲不正確嘅心態主要有貪心、憎恨心、愚痴心、輕慢心同疑惑心等等，具有智慧嘅修行者就能夠時時刻刻覺察出自己依啲不正確心態而極力加以修正，唔俾佢哋支配自己嘅身體而去做惡事，依個就係所謂“修行”，亦都係“覺察”嘅意思。

除咗不正確嘅心態之外，我哋仲有好多唔正確嘅見解，比如執著呢個身體係實有而不變呢，其實呢個身體如果用化學嘅方法去分析，只係衆多嘅元素——氫、氧、鈣、鐵、磷、鋅等等嘅元素聚集響一起嘅組合，呢啲組成身體嘅元素每時每刻都響度生滅變化，呢個道理就係所謂“無常”嘞，無常係萬事萬物冇不變嘅常態，但係點解我哋唔能夠察覺出嚟呢？反而偏要執著呢個肉體當作係“我”，儘量響自己有生之年爲呢個“我”而去爭取應該或者唔應該得到嘅嘢，爲呢個“我”嘅享樂而沉醉響“財色名食睡”五欲之中，呢個道理就所謂“無明”，“無明”係唔能夠真正徹底明白萬事萬物嘅真實相，所以就好容易對各種事物妄加判斷而產生邪見，再加上種種唔正確心態嘅支配之下就會做出好多惡事，結果就會招致未來嘅苦報，輪迴響六道之中而循環不息。

所謂覺悟就係一個修行嘅人能夠真真正正徹底體會同明白宇宙同人生嘅真實相，唔會再被世間幻有嘅假象迷惑，亦都唔會好似以前再受呢啲唔正確心態同見解嘅支配而去做惡業。當修行者嘅心完全被淨化，好似一面一塵不染嘅巨大光明鏡，無物不照，無事不鑒，但係光明嘅心鏡冇因爲外界嘅物象嘅動而去動，只係物來影現，事去境亡，唔會存有絲毫嘅執著，意思係對一切事物嘅執著叫做“法執”。連自己係鏡嘅觀念亦都唔存在，對自己嘅執著呢，就稱爲“我執”，呢個就係覺悟者嘅境界了。真正解脫生死嘅覺悟者其實分開三個層次，就係阿羅漢、辟支迦佛、菩薩同佛陀。

阿羅漢同辟支迦佛係小覺，因爲佢哋雖然去除咗“我”嘅執著，但係對於宇宙之間嘅萬事萬物仍然有好多唔明白，仲有法嘅執著存在，仍然須要努力修行去開啓智慧，破除迷惑。菩薩係中級嘅覺者，智慧呢，已經比阿羅漢同埋辟支迦佛已經高好多，但係對於宇宙人生嘅真實相仍然仲未能完全了解透徹，仍然係存有部份嘅法執。至於佛陀係真真正正嘅大覺者，完全徹底明白宇宙係從何而嚟，人生從何而有，具有分析同解決一切世間同埋出世間事事物物嘅大智慧，如果用科學嘅觀點去解釋佛陀，佛陀就係一股唔受時間同空間控制，過去冇開始，未來亦都冇終結，而且具有大慈悲同大智慧嘅超時空力量，呢股力量響宇宙未生之前已經存在，亦都可以話同宇宙同體，遍覆宇宙之中嘅每點時間同空間，譬如空氣同埋電一樣，係冇一定嘅形體同埋相貌嘅，呢一股力量就係所謂佛陀嘅“法身”。“法身”嘅意思係從證悟宇宙人生一切嘅法而生嘅身，與萬事萬物平等同體嘅身，呢股力量能夠任意轉化成爲物質，亦都可以由物質轉化番能量，達到質能互變。響二千五百多年前降生響印度嘅釋迦牟尼佛陀就係呢股力量嘅其中一個化現。

釋迦牟尼佛係慈悲同智慧嘅化身，佢垂跡響娑婆世界，降生響穢土成佛，就係佢大慈大悲精神嘅表現。響《央掘魔羅經》第四卷有講過：“如來成就如是無量功德，云何當有若無常、若疾病？如來常住無邊之身，我今當復廣說有根本，有因有緣，一切佛一切因，悉皆不樂生此世界，以此衆生不可治故。以是義故，我於此世界治不可治衆生，數數捨身故不生身。”（註：根據CBETA，“數數捨身故不生身”疑爲“數數捨身故生不生身”）

《地藏菩薩本願經》第八品亦都講過：“佛告閻羅天子：‘南閻浮提衆生，其性剛彊，難調難伏。是大菩薩，於百千劫，頭頭救拔如是衆生，早令解脫……自是閻浮衆生，結惡習重，旋出旋入。勞斯菩薩，久經劫數，而作度脫。’”呢個經文裏便講“閻浮嘅衆生”呢，其實就喺指我哋呢個世界嘅有情生命，由於我哋嘅惡習特別重，亦都容易迷失，所以佛陀同埋菩薩先化身示現種種嘅事蹟，藉以誘導同教化我哋，使到我哋能夠歸於正道。

響《妙法蓮華經》嘅《方便品》亦都講過：“諸佛世尊唯以一大事因緣故出現於世……諸佛世尊，欲令衆生開佛知見，使得清淨故，出現於世；欲示衆生佛之知見，出現於世；欲令衆生悟佛知見故，出現於世；欲令衆生入佛知見道故，出現於世。”

諸佛菩薩，佢具足慈悲、智慧、福德同埋無邊嘅神通法力，佢能夠作爲一切衆生嘅大依怙、大福田。響《無量義經》嘅《德行品》亦都講過：“菩薩是諸衆生真善知識，是諸衆生大良福田，是諸衆生不請之師，是諸衆生安隱樂處，救處、護處、大依止處，處處爲衆作大導師；能爲生盲而作眼目，聾劓啞者作耳鼻舌，諸根毀缺能令具足，顛狂荒亂作大正念；船師、大船師，運載群生，渡生死河，置涅槃岸；醫王、大醫王，分別病相，曉了藥性，隨病授藥，令衆樂服；調御、大調御……師子勇猛威伏衆獸，難可沮壞。”

釋迦牟尼佛陀，其實響過去久遠劫前，早已經成就佛道，證得無上正等嘅正真智慧，只因爲佢唔捨棄惡濁嘅世界衆生，盼望一切流連響三界六道嘅有情，希望早日能夠踏上菩提大道，精進修持，解脫生死苦惱，同證同佢無異嘅圓滿智慧，所以先不辭勞苦，千方百計以種種嘅方法攝受有情去歸於正道。釋迦牟尼發心修行佛道呢，已經係好久遠嘅事，根據《大智度論》第四卷、《俱舍論》第十八等等記載，響三大阿僧祇劫之前，有另外一尊佛亦都叫做釋迦牟尼，呢個時候我哋呢個世界嘅世尊釋迦牟尼正係修行緊菩薩嘅果位，佢遇到古釋迦牟尼佛而發心，而且希望同古釋迦牟尼佛嘅願一樣，呢個就係我哋今日呢個釋迦牟尼佛世尊最初嘅發心嘞。

響《妙法蓮華經·化城喻品》記載，過去久遠劫前呢，有一個佛叫做大通智勝如來，響未出家之前有十六個王子，然後呢，都發心出家做沙彌，佢哋聽咗《法華經》就成佛，其中第十個王子呢，就係釋迦如來嘞。又根據《大乘慈悲白蓮華經》卷二同卷三亦都記載，響過去嘅刪提嵐國有一個國王叫做無諍念王嘅時候，寶海梵志呢，呢個梵志係修行離慾清淨嘅道行嘅，佢叫做寶海。呢個寶海梵志有一個仔，佢出家成道，後來個佛號叫做寶藏如來。響呢個時候，寶海梵志就勸請王同埋王嘅一千個仔同其他嘅衆多弟子發心。呢個王國王呢，就隨從呢個願呢，去求一個清淨嘅佛國，於是佢一千個弟子同五位侍者呢，都希望呢，去求生響濁惡嘅世界，梵志最後亦都發五百個大願，希望求生響濁惡世界去化度衆生，呢個，呢個呢，梵志呢，就係釋迦牟尼佛嘅前身，釋迦如來之後呢，就響我哋呢個娑婆世界成佛，就係賢劫千佛之中嘅第四尊佛。

釋迦如來願力無邊，響娑婆世界同其他各度嘅空間，佢分身百千萬億，佢一音說法各得其解，隨類現身靡不周遍。響《大方廣佛華嚴經·如來名號品》亦都講過：“諸佛子！如來於此娑婆世界諸四天下，種種身、種種名、種種色相、種種修短、種種壽量、種種處所、種種諸根、種種生處、種種語業、種種觀察，令諸衆生各別知見。諸佛子！如來於此四天下中，或名：一切義成，或名：圓滿月，或名：師子吼，或名：釋迦牟尼，或名：第七仙，或名：毘盧遮那，或名：瞿曇氏，或名：大沙門，或名：最勝，或名：導師……如是等，其數十千，令諸衆生各別知見。”

佛菩薩嘅無緣大慈、同體大悲，真係唔能夠再用我哋人間嘅語言文字去形容佢哋，佢哋好多所發嘅大願呢，其實都同地藏王大菩薩一樣——“地獄未空，誓不成佛；衆生度盡，方證菩提”嘅，但係亦都有好多佛陀呢，都係倒駕慈航嘅，譬如觀世音菩薩，過去就係古佛“正法明如來”嘅化身，文殊師利菩薩，過去叫做“龍種上尊王如來”，佢哋都係古佛之中嘅古佛。其他好似須菩提尊者呢，係“青龍陀佛”嘅化身，舍利弗尊者，係“金龍陀佛”嘅再來，仲有維摩詰居士係“金粟如來”嘅應世，央掘摩羅居士係“一切世間樂見上大精進如來”嘅化現。《藥師琉璃光如來本願功德經》曾經講過：“阿難白言：‘大德世尊！我於如來所說契經，不生疑惑；所以者何？一切如來身語意業，無不清淨。世尊！此日月輪，可令墮落；妙高山王，可使傾動，諸佛所言，無有異也。’”其實，我哋要堅信諸佛菩薩嘅說話絕對唔係虛妄，佢哋所說嘅一句一偈就係我哋解脫生死嘅津樑，渡過生死河岸嘅寶筏，我哋如果能夠依住修行，將來一定能夠得到大自在。

方便至爲燈，照見心境界，欲究真實法，一切無所見，合掌以爲花，身爲供養具，善心真實香，讚歎香雲報，諸佛聞此香，沉升內相倒，衆等勤精進，終不相貽誤。

214.舍利子之研究（一）

舍利子之研究

各位，我哋信仰佛教嘅人，個個都知道舍利子係有道行嘅佛教徒去世之後由佢身體之上燒出嚟嘅，舍利子係一種七彩或者五色嘅堅固子，不但會放光，而且來去無蹤，係一種好神奇嘅聖物。由於舍利子嘅存在，使到好多信仰佛教嘅人士解除咗生老病死嘅痛苦，但係亦都有啲佛教徒就對舍利子譭謗，話佢係人體上嘅膽結石。假如話舍利子係人體之上嘅膽結石，佛祖圓寂嘅時候燒出舍利子一共有八斛四斗，唔通釋迦牟尼佛全身都係膽結石咩？

另外有一啲動物，譬如鸚鵡、鷯哥，佢都能夠燒出舍利子，唔通動物亦都有膽結石？有時我哋響佛壇前便點燈供佛嘅油燈，響古代嘅時候，往往響點燈上便嘅燈花都能夠結出舍利子，唔通燈花上便嘅舍利子又係膽結石？響民國嘅時候，嚟中土傳法嘅西藏密宗大成就上師諾那上師，當佢在生嘅時候，響個頸上便都能夠攞出舍利子。如果話係膽結石，膽結石會唔會放光同埋來去無蹤？同埋膽結石亦都有五彩同七彩嘅光芒咩？人體死咗之後經過火化，係咪個個人都能夠燒出舍利子吔？答案一定唔係，相反，有膽結石嘅人呢，實在係好多。

世界上嘅宗教，不只係佛教，其他修道嘅人士，都往往亦都有聽過有少量嘅舍利子燒出，但係真正嘅舍利子同埋大量嘅舍利子，只係限於佛教徒先有，並冇聽過其他嘅宗教徒能夠燒出五彩斑斕嘅舍利子，而且仲會放光、來去無蹤。

退一步講，假如釋迦牟尼佛生前，佢嘅舍利子八斛四斗喺身上全部都係膽結石，咁樣佢嘅身體一早就已經硬化到唔能夠再喐，但係相反我哋見到佛祖響佢滅度之前嘅前一日，仲講咗一部四十卷嘅《大般涅槃經》，然後仲問佢弟子話：“有冇疑難嘅地方吖？你哋趕快提出問題，我就要滅度了。”弟子就回答：“並冇其他疑難嘅地方。”然後佛祖先安詳咁樣圓寂。咁高修行嘅聖者，去得輕鬆自在，又點係好似一個患有八十四斗膽結石響身上嘅人所能做得到嘅呢？

章嘉活佛圓寂咗之後燒出七、八千顆舍利子，但係佢生前曾經照過Ｘ光，並冇膽結石嘅症狀。同埋最近響今年圓寂嘅宣化上人亦都有四、五千顆舍利子，所以，舍利子係膽結石嘅論調自然不攻自破。

各位，稍稍讀過佛經嘅人都會知道，響《般若波羅密多心經》同《佛說阿彌陀經》之中，時常都發現有“舍利子”同“舍利弗”呢個名稱，但係各位要明白，現在所講嘅舍利子係唔同經上便所講嘅“舍利子”或者“舍利弗”。“舍利子”同“舍利弗”係一個人嘅名稱，係一位大阿羅漢，係釋迦牟尼佛座下十大弟子之中智慧第一嘅“舍利弗”或者“舍利子”尊者。但係現在我哋講嘅舍利子係一種物質，係人體體質道行嘅結晶。人嘅“舍利子”同物質嘅“舍利子”自然唔同，呢一點首先要搞清楚嘅。

“舍利子”係梵語，亦都譯作“設利羅”或者“馱都”，響我哋漢文嘅翻譯係叫做“遺身”或者“靈骨”，意思係堅固子，講得通俗一啲，就係指身後火化留低嘅灰之後所剩下嚟嘅結晶品。如果想明白舍利子嘅來源呢，我哋首先要知道印度民族嘅風俗。印度嘅俗例，人死咗之後大概有四種嘅埋葬方式：第一種係水葬，人死咗之後拋入河海，任由魚蝦啖食；第二種係土葬，土葬呢，係喺路旁用泥土去掩埋；第三種係林葬，林葬呢，就係將屍體放喺山林曠野去餵食俾一啲鳥獸，呢啲係印度風俗嘅一種孝嘅表示，譬如棄屍山林而無鳥獸去啖食呢，反而認爲唔係吉祥，因爲屍嘅身體生平無福德，因爲呢，如果冇鳥獸啖食證明呢，係同衆生無緣，呢個觀點呢，係同我哋中國人啱啱相反，我哋中國人呢，就喜歡風光大葬；第四點係火葬，積一啲柴枝去焚化，就係稱爲火葬。呢四種葬法之中，以火葬呢，最爲盛行、最清潔，所以佛教出於印度，佛教徒亦都採取咗火葬嘅方法，因爲火化不但清潔，仲能夠留下骨灰或者舍利，裝入金屬器皿或者陶器之中去供奉，以爲孝敬父母或者親屬嘅精神對象，好似我哋中國人奉祀祖先以牌位爲對象一樣。

佛嘅舍利亦都叫做“舍利子”，呢個名詞大概係從佛嘅全身舍利同碎身舍利而嚟嘅，因爲全身稱爲“舍利”，所以碎身恐怕就係稱爲“舍利子”而得名啦。“舍利”如果譯做“遺身”或者“遺骨”，照普通人嘅見解，不外係火化之後血肉精髓凝固嘅碎粒，唔值得有咩珍貴同重視，但係佛同佢弟子嘅舍利，亦都被後世人稱做“靈骨”，可見，雖然同係遺骨，已經同普通人嘅遺體有唔同嘅地方嘞。印度雖然有火化嘅民俗，但係我哋好少見到響印度一般族人嘅遺體之上發現有舍利子，或者係我哋對印度嘅書籍讀得少嘅關係嘞。因爲舍利子被稱爲靈骨，係由佛身火化之後先被傳播出嚟。

相傳佛陀滅度火化之後得到碎身舍利一共有八斛四斗之多，引起八國嘅國王爭相競爭，幾乎動武戰鬥。譬如《處胎經》曾經講過：“爾時八大國王：優填王、頂生王、惡生王、阿闍世王、最豪兵馬王、容顏兵馬王、熾盛兵馬王、金剛兵馬王，此八大國王共爭舍利，各領兵衆列住一面，各言佛舍利我應獨得。大臣優波吉諫言：‘諸王莫諍，舍利應分，普皆供養。’”亦都講過八王分得舍利，各還本國起塔供養。

響印度尼泊爾嘅地方，尼泊爾嘅首都就係加德滿都，響一個山叫做瑞蔭蕪山上便，山上呢，響五個佛塔旁邊所供養嘅舍利，據說就係佛滅度之後迦毗羅衛國（啫係現在嘅尼泊爾）王所分得嘅一份，保留到現在。響嗰度拜舍利嘅人亦都講過，塔上呢，亦都時常有舍利跌下可以執到嘅，咁樣講明呢，佛身嘅舍利對於佛教徒嚟講係具有靈異嘅感覺，唔係由普通人一般人嘅遺身之上所能夠得到嘅。

舍利大概可以分爲兩種，第一係全身舍利，第二係碎身舍利。全身舍利又分爲法身舍利，法身舍利係指如來嘅法身慧命，體遍一切時處、無相不壞、究竟堅固嘅意思，因爲舍利又叫做“堅固子”。第二種係色身舍利，係指有形相嘅色身，因爲戒、定、慧等等嘅功德所熏修，道行成功，呢個有形嘅色身已經變成金剛不壞嘅固體，不但佛有，佛嘅弟子亦都有，譬如世尊座下嘅一位大弟子迦葉尊者，佢金剛不壞嘅肉身舍利，現在仲入定隱身響靈鷲山之中，等待彌勒佛降生，現在，現身法會，影響大衆得利，然後先取入滅。

中國九華山嘅地藏菩薩，唐朝曹溪嘅六祖惠能大師，明朝嘅憨山大師等等，佢哋嘅肉身舍利仍然留喺人間俾人瞻禮供養。六祖、憨山兩位大師嘅肉身，現在仍然供養響廣東韶關嘅南華寺裏便，凡係到過南華寺嘅人都見得到嘅。響泰國亦都能夠見到一個中國僧人只係四十幾歲圓寂咗之後修成金剛不壞之身，成爲舍利，被泰國僧王封號爲“琥珀禪師”，因爲佢顏色如生，好似琥珀一樣，現在佢嘅全身舍利仍然坐喺泰國一笪叫做“呈娘”嘅地方，呢個地方特地爲佢建咗一間小廟，佢嘅頭髮比佢圓寂嘅時候長高咗半寸，呢個係近十幾年來嘅事實，去泰國嘅人呢都可以瞻禮得到嘅。

至於碎身舍利就有多種，有赤色嘅肉舍利、白色嘅骨舍利、黑色嘅髮舍利，亦都有黃紫等等五色斑斕嘅舍利，不一而足，可以隨各人過去嘅善根功德、現前嘅至誠感格，所見到嘅顏色係唔同嘅。響《金光明經佛舍利品》曾經講過：“此之舍利乃是無量戒定慧之所熏馥，甚難可得最上福田。”（註：根據CBETA，“此之舍利乃是無量戒定慧之所熏馥”疑爲“此舍利者是戒定慧之所熏修”）《般若經》亦都講過：“佛身及設利羅……皆由如是甚深般若波羅密多功德所熏修，故爲一切世間天、人……供養恭敬，尊重讚歎。”

由呢個觀點嚟睇，供養佛嘅舍利可以作爲福田種種福報，係同普通人奉祀祖先嘅骨灰，更勝一籌嘅，因爲舍利係住持三寶之一。佛在世嘅時候，以釋迦牟尼佛丈六老比丘相爲佛寶，佛所講嘅說法係法寶，諸大菩薩同阿羅漢嘅出家比丘係僧寶。佛滅度之後，以佛像同舍利係住持佛寶，三藏經典係住持法寶，剃髮染衣嘅出家比丘係住持僧寶。有呢三寶在世，令佛法住持不失，所以叫做“住持三寶”。

舍利既然係住持三寶之一，假使我哋能夠至誠供養，自然能夠獲福無量。響學佛嘅過程之中，其實求福係好緊要嘅一課，經上便講過：“歸依佛，兩足尊。”福慧兩足具足自然就可以成佛，二者缺一不可嘅。大家誦經聽經，聞法不倦，呢個係修慧嘅善緣；供養三寶、廣行布施、打掃佛殿、做諸功德，呢啲都係修福嘅勝因。但係植福呢，要植得其所，猶如種田去肥田一樣，否則，得福係好微，或者徒勞無功。

講到求福嘅田，可以有三處。第一係孝順父母，叫做“恩田”，生我者父母，教我者師長，父母對於我恩深如海，詩經上曾經講過：“哀哀父母，生我劬勞，欲報之恩，昊天罔極。”父母對我既然有如此嘅深恩，爲人子女應該恭敬孝順，所以要“晨昏定省”，呢種孝道不但中國人係咁，譬如西方嘅人，早晚亦都有向父母請安嘅習俗，所以孝順父母嘅道理呢，係天經地義，古今中外都係一樣，對父母孝順嘅人，自然得福無量，反而呢，相反逆害父母嘅人呢，就會得到無邊嘅罪過。第二種所講嘅田係供養三寶嘅“敬田”，佛法僧三寶係苦海之中嘅舟航、長夜裏便嘅明燈，恭敬自然可以獲福，舍利係住持三寶之一，虔誠供養禮敬，自然能夠亦能夠得福。成就衆生係“悲田”，呢樣係第三種嘞。衆生受住無量嘅痛苦，我哋應該對佢有一種同情嘅悲憫心，隨力隨分去幫助他人，佛經上便講過：“一切男子是我父，一切女人是我母，我生生世世無不從之受生，故六道衆生皆是我父母。”一切衆生，以往將來，既然都有做我父母嘅可能，咁樣自然能夠應該悲憫同情予以援助，亦都係自己求福嘅工作。學佛嘅人要得福，適宜於以上三種所講嘅福田種植，而最緊要嘅呢，就係至誠心，俗語話：“誠之所至吔，金石爲開。”心自虔誠，得福至大。

佛陀在世嘅時候，有一個乞婦，身上只係得兩個錢，就係佢一生嘅積蓄。有一日佢聽見人講布施嘅功德，佢自己諗自己好窮，由於前生未種勝因，今生如果再唔作福呢，來生恐怕就更會貧窮，所以將辛勤積返嚟嗰兩個錢呢，去買油點燈供佛。但係當佢點燈嗰日呢，適值遇到狂風大雨，唔能夠出門行乞，佢雖然餓住肚皮，但係冇絲毫嘅之後悔。因爲佢誠心所至，油燈雖小，竟然明亮非常，入夜都不滅。舍利弗係佛陀座下十大弟子之一，神通智慧有過人之處，但係以舍利弗嘅神通亦都冇辦法吹熄呢個貧婦所點嘅呢盞小油燈，呢個故事係證明誠心嘅感應同力量，所以學佛嘅人，如果想種福而得到大利，必須要發至誠嘅之心，先能夠得到廣大嘅福報。

舍利，不但佛祖釋迦牟尼佛有，佛弟子之中嘅聖僧羅漢都有舍利子嘅記載。譬如舍利弗、目犍連兩位尊者嘅舍利，現在仲供奉響印度阿輸迦王嘅故都，仙支地方嘅一個圓塔裏便。呢啲舍利子響十多年前曾經失落響倫敦博物館之中，後來被印度嘅留學英國嘅學生發現，集體要求歸還印度。響歸途之中曾經運到泰國兩笪地方，同埋錫蘭啦，俾人去瞻禮，現在依然供養響仙支嗰笪地方裏便。印度政府發起修築佛教八大聖地，而家已經改建一新，因爲佢係八大聖地之一。

近代譬如我國嘅印光、太虛二個大師，同埋去世嘅章嘉大師、南洋嘅演本大師，亦都有好多舍利留低，但係佢同佛身嘅舍利係有唔同嘅地方，就係據說佛身舍利堅固不壞，而聖僧舍利係可以用錘去擊碎嘅。關於舍利嘅靈異，可以由至誠而感得，呢個就係舍利子受到佛教徒普遍崇敬嘅因素。

響我國，舍利子最早得到感應係響東吳嘅孫權時代，響孫權時代嘅時候，有個大臣叫做孫皓，因爲聽見印度嘅僧人康僧鎧法師演說供養舍利嘅功德，佢亦都希望得到舍利去供養，於是康僧鎧法師就教佢結壇虔誠祈求，經過四十九日，空瓶裏便嗝嗝有聲，發現舍利子得到十餘顆。吳王呢，於是呢，令到大力士將啲舍利擺喺一個砧板之上，用鐵錘去擊佢，果然，不斷去將鐵錘揮舞，去打呢個舍利子呢，仍然擊佢唔碎，反而呢個砧板陷入數寸，舍利依然無損。

其次響一千七百年之前嘅西晉時代，有一個叫做劉薩河嘅人（後嚟出家叫做慧達法師），響四明茅縣嘅地方禮拜祈求，舍利呢，由塔響地下涌出。現在寧波阿育王寺所供養住嘅呢，就係當時佢禮拜出土嘅嗰一顆舍利。

上面有關舍利靈驗嘅兩件事，好似係時代太遲，唔容易令人啓發信心，但係譬如近二三十年前，有一位朱子橋將軍，佢響西安興教寺嘅玄奘大師塔院虔誠禮拜，塔上便忽然跌落一塊磚頭，有兩顆舍利呢，附喺磚頭上便，所以將軍就發起重修塔院，具有一段微妙嘅因緣。響印度菩提伽耶嘅地方，亦都有一位老修行叫做廣清法師，佢響菩提伽耶大塔禮拜舍利已經有三年，亦都親見有舍利子由個塔跌落嚟。呢啲舍利子嘅靈驗，證明可以至誠感格，係能夠隨時生長嘅，由少粒可以增至多粒。亦都譬如緬甸嘅大金塔，相傳最初供養嘅舍利子係緬甸商人達普陀同波利迦兄弟用盒裝返嚟佛嘅頭髮，一共有八條，啫係佛身嘅髮舍利。佢哋響歸途之中兩次被強盜截劫，一共失去咗四條，但係返到緬甸嘅時候，得到王帝烏伽羅巴迎供去建塔供養，將盒打開一睇，仍然係八條，所以佛陀嘅舍利可以作出種種嘅神變。又譬如我國明朝，西藏黃教嘅宗主宗喀巴大師晚年甩咗一隻牙，弟子將佢當作舍利去禮敬，竟然響牙根下便生咗好多舍利子出嚟，後嚟大家分開供養，都時常會增出好多微粒出嚟，一直供養到現在。

講到牙齒能夠長出舍利，其實一啲都唔出奇，自從佛陀入滅之後留下咗四顆聖牙，呢個世界上有兩顆，其中一顆供奉響中國北京裏便嘅廣濟寺，另外一顆供奉響錫蘭嘅康提地方嘅佛牙寺，第三顆就供奉響我哋欲界嘅忉利天三十三天，玉皇大帝嘅天宮裏便，第四顆就供奉響海裏便龍王嘅宮殿。至於響北京呢一顆、響忉利天呢顆同埋響龍王裏便供奉呢顆佛牙呢，係有相當長嘅歷史嘅，但係我哋現在講少少關於我哋人世間呢顆佛牙嘅舍利一啲靈異事蹟。

佛陀滅度之後，佢嘅一顆聖牙被人帶到去北印度嘅卡林加省，呢個省嘅人對佛陀呢一顆聖牙係好尊敬，而且作出好多嘅供養。但係，有一派人反對供奉佛陀嘅聖牙，於是佢哋設辦法將佢破壞，將呢顆佛牙去消滅。佢哋用咩方法呢？首先佢哋攞咗佛陀嘅聖牙將佢放喺木炭上便燒，但係當燒呢顆佛牙嘅時候呢，呢顆牙嘅舍利突然間現出神通，飛到天空上便去，呢顆佛牙飛到天空竟然佢能夠發放出光芒，佢光芒嘅光輝射向十方世界。呢啲反對供奉佛牙嘅人見到呢個方法唔成功，佢哋又設法攞一啲硬物希望能夠將啲舍利打碎，但係佛牙越擊越堅，係永遠都打唔碎。最後當佢哋再想打擊佛牙嘅時候，佛牙突然間隱身不見而逃避咗。可以見到佛陀雖然圓寂咗之後，佢嘅神通、佢嘅法力仍然係存在響呢個世間裏面嘅。

頭先我哋曾經講舍利子嘅時候，提到碎身舍利，咁邊啲人有碎身舍利呢？佢係點樣得嚟嘅呢？等我哋首先講一講章嘉大師嘅事嘞。章嘉大師係蒙古嘅活佛，佢通曉漢、滿、蒙、藏嘅語言。章嘉大師響中國擁有內蒙古嘅四十九旗同青海嘅二十九旗嘅廣大信衆，響蒙旗裏便共有寺廟三百多間，另外響西藏、北平、遼寧、熱河、綏遠、察哈爾、青海、山西嘅五台山等等嘅地方，亦都有好多嘅大寺廟，每間寺廟都住有三百到四千嘅喇嘛，出家嘅弟子一共有十多萬人，係蒙旗人民信仰嘅中心。章嘉大師每日只食一餐，日常持誦經咒，圓寂以後燒出將近八千多顆舍利子，係所有燒得舍利子最多嘅一位活佛。

咁章嘉大師其實每日做啲咩功課呢？點解會有咁多嘅舍利子呢？相信大家都有好有興趣。其實章嘉大師每日唸嘅係密宗裏便一個極爲秘密嘅咒語，佢嘅名稱係叫做“六道金剛咒”，據說呢個咒語響密宗裏便係好靈驗，既可以轉生，又可以圓寂火化之後得到好多舍利子。除此之外，章嘉大師嘅修……（註：接下文）

215.舍利子之研究（二）

（註：接上文）

佢嘅房間，除咗佢媽媽以外，係冇再第二個女性出入，所以見到章嘉大師嘅戒律係好精嚴嘅。

咁章嘉大師嘅舍利子同其他人燒出嚟嘅舍利子有咩唔同呢？大師嘅舍利子，有啲好似黃豆一樣大，有啲好似米一樣大，此外仲有一種叫做“金剛寶”嘅，有一種叫做“六字輪”嘅。所謂“金剛寶”好似就係透明嘅玉石，形狀亦都好似珊瑚，水火不能侵、刀斧不能傷，“六字輪”係好似調味用嘅八角茴香一樣嘅形狀，因爲佢有六隻角。尤其稀有嘅係大師嘅舍利子好似一啲果子一樣長喺舍利子嘅樹上，好似一束雜亂嘅細鐵絲，好容易折斷。關於“金剛寶”呢一樣嘢，佛經上面記載，係修持密宗嘅人到咗最高境界嘅時候精華凝結而成，響三種寶物當中呢，佢係最珍貴㗎喇。

咁樣，係咪每一位活佛死咗之後都能夠燒出舍利子呢？活佛係不可思議嘅。西藏活佛嘅諾那上師佢專門修持密法，有一次，諾那上師曾經被人幽禁響深山裏便一個深坑，而且幽禁佢嘅人派咗一隊人去看守佢。看守嘅人每日將食物丟到洞裏便去俾諾那上師食，但係過咗一個時期呢見佢唔死，於是就將毒藥放喺食物裏便去毒害佢，之後就再將食物丟落去，又唔見佢食，於是就以爲諾那上師死咗。其實諾那上師係冇死到，相反，佢每日用佢雙手不斷去挖地洞，終於挖到見到有光嘅地方，趁黑夜就逃咗出嚟。當時其實諾那上師係修緊綠度母法，假裝死亡留低個假屍身裏便，於是佢嘅真身就能夠逃出咗呢個深坑嘅黑洞嘞。諾那上師逃出咗黑洞之後，佢雖然衣服破爛，頭髮好長，不顧一切佢就向錫金方面逃走。

響路上便，佢遇見白教嘅弟子，貢噶活佛嘅弟子，佢哋將衣服俾諾那上師換，帶佢去到印度。諾那上師沿途爲人唸咒醫病，接受供養。到咗印度之後，諾那上師又搭船嚟到中國，首先去北平見到當時嘅執政段祺瑞，但係段祺瑞呢，聽到活佛已經死咗嘅消息，以爲諾那上師係假冒，就唔歡迎佢，諾那上師於是靜靜咁修咗一個咕嚕咕列法，然後段祺瑞執政先召見佢，經過佢說明原因之後呢，段祺瑞就開始相信，於是佢就立刻開始傳法，出現咗好多奇蹟。

記得有一次，活佛響臨川縣傳法嘅時候，有一位居士問佢：“師父吖，我想供養舍利子，您可唔可以俾一粒我呢？”活佛話好容易啫呢件事，於是諾那上師就喺頸上面拍一拍，就攞咗一顆舍利子出嚟，呢件事係有好多人親眼見到，諾那上師嘅神通妙用，簡直就可以叫做活神仙。諾那上師後嚟返番去西藏，佢圓寂響西藏，但係佢吩咐弟子將佢嘅屍體送番去中國廬山安葬。嗰個時候呢，佢嘅屍體竟然縮成有三尺長，據說呢個就係成佛嘅證明啦。

響我哋高，中國嘅高僧裏便，有好多位都能夠燒出有舍利子嘅，其中有一位好出名，相信大家都聽過，就係虛雲和尚。虛雲和尚俗姓蕭，係梁武帝嘅後人，佢嘅爸爸同媽媽四十幾歲呢，都冇生產，於是呢，就去到觀音廟求子。響當晚，佢嘅爸爸媽媽兩個人同時夢見一位穿住長袍嘅老人騎住一頭老虎向住佢哋前面走嚟，於是佢哋就生咗虛雲和尚啦。虛雲老和尚初生嘅時候係一個大肉團嚟嘅，佢嘅媽媽見到非常傷心而失望，立刻氣死，家裏便嘅人將呢個肉團丟到去外便。第二日有一個賣藥嘅老公公執到，將佢破開一睇，原來裏便係一個男嬰，虛雲和尚後來就由佢繼母將佢撫養長大。

佢嘅祖母從小就爲佢搵咗兩個太太，但係佢只係將佢哋當作家姐同妹妹一樣看待。老和尚從小就喜歡到佛教嘅地方去住，中意讀佛經，後嚟佢就偷偷出咗家。當佢爸爸去世之後，佢嘅繼母亦都帶住佢兩個太太一齊去出家，安心咁樣修行。

佢出家以後，無論打柴、挑水、種菜，樣樣都肯做，每日只係食一餐，但係身體就好健康。虛雲和尚因爲仰慕玄奘大師嘅求法精神，於是就到山洞裏便去生活，三年之中都係食一啲松毛同埋青草葉，飲嘅係山水，衣服破爛得不能蔽體，頭髮亦都長到好長，但係雙眼就炯炯有光，健步如飛，有啲人見到佢都以爲佢係鬼一樣而避開佢。但係佢咁樣修行呢，都冇咩成就，有一個老和尚就鬧佢，而且教佢參話頭，參一句“拖死屍嘅係邊個呢？”佢參呢一句話頭，於是佢又開始食米，開始做工同繼續研究教理。

光陰苒荏，出家二十年冇咩成就，人生慚愧，爲住報答父母嘅辛勞，於是虛雲老和尚就三步一拜朝禮普陀山同五台山，由蘇北直入河南省，經過鳳陽嘅八州、昊陵、嵩山少林寺，一直到洛陽嘅白馬寺，全程一共有三千多華里，佢日行夜宿，口唸佛號。有幾日狂風大雪，道路不通，飢寒交迫，忽然遇到一個叫做文吉嘅乞丐送佢一碗黃米粥先至救咗佢一命。文吉又指點佢嘅路程，於是後來虛雲老和尚先知道根本係冇文吉呢個乞丐，原來文吉呢個乞丐係文殊師利菩薩化身嚟救佢，因此先見到佢嘅道行係幾深。

虛雲老和尚響高旻寺裏便打禪七嘅時候，日夜努力參禪，甚至連自己嘅身體係咩樣都唔知道。響一個晚上，睜開眼睛突然一睇，忽然大放光明，好似白天一樣，佢見到牆邊另外一邊嘅香燈師響度小便，呢個係透牆而看嘅天眼通。佢見到有一個和尚響菜園裏便，見到遠方河中嘅船隻，又見到兩岸各種樹木，於是響第二日就問香燈師同園丁去對照佢見到嘅答案，完全係冇錯，但係虛雲和尚一啲都唔覺得有咩特別。響第三個晚上，有一個和尚沖開水，唔小心將開水潑喺佢嘅手上，茶杯立刻落地，突然間斷咗虛雲和尚咁多年參禪以來一切嘅疑根，所以佢寫咗一首偈語話：“燙著手，打碎杯，家破人亡語難開；春到花香處處秀，山河大地是如來。”

虛雲老和尚響寧波嘅阿育王寺禮拜舍利子，燃燒手指頭去供養佛菩薩，藉以超度佢嘅母親，每日禮拜三千拜。起初，佢見到佛陀嘅舍利子大如綠豆，顏色係紫黑色嘅。第二次，佢見到仍然好似第一次一樣大，但係舍利子嘅顏色已經變成紅色嘞，有一啲光亮，於是佢繼續拜落去。後來佢見到舍利子好似黃豆一樣大，變成黃色同白色，所以我哋可以確信舍利子係以各人嘅根境而示現嘅。

虛雲老和尚嘅奇蹟實在係太多，度人無數，可惜響大陸淪陷嘅時候唔能夠立刻到臺灣，據說佢死咗之後燒出好多好似花生米一樣大嘅舍利子，但係佢嘅舍利子被弟子請到香港、臺灣，甚至亦都被人請到美國去起塔供養。虛雲老和尚響佢晚年嘅時候曾經拍攝咗一幅法相，手持念珠，身著禪宗嘅斗篷，係黑色嘅，喺佢嘅下巴裏便係留有長須，兩眉低垂，非常之莊嚴。響呢幅相下便呢，佢自己曾經自題咗一首詩，佢自號“幻遊比丘”，呢一首詩足以能夠表明到虛雲老和尚一生嘅心跡，呢首詩係咁講嘅：“這個痴漢有甚來由，末法無端爲何出頭？ 嗟玆圣脈一髮危秋，拋卻已事專爲人憂。向孤峰頂直鉤鉤鯉，入大海底撥火煮漚。不獲知音徒自傷悲，笑破虛空罵不唧留。噫，問渠爲何不放下，蒼生苦盡那時休！”

講完虛雲老和尚，我哋繼續講下中國嘅近代高僧太虛大師。太虛大師喺光緒十五年十二月十八日默默無聞咁出生響浙江省海甯縣嘅長安鎮。大師嘅童年孤苦伶仃，兩歲嘅時候就死咗父親，五歲嘅時候母親又改嫁，養育佢嘅係年老力衰嘅外祖母。

太虛大師細個嘅時候體弱多病，由舅父教佢一啲簡單嘅文字，十一歲嘅時候，外祖母就帶佢去安徽嘅九華山進香，順路又去朝禮鎮江嘅江天寺。響返屋企嘅路上便，又去朝禮普陀山、寧波嘅天童寺、育王寺、雷峰寺等等嘅佛教聖地，所以太虛大師非常羨慕寺廟出家人嘅生活。

但係到咗十三歲嘅時候，太虛大師就去小商店裏便做學徒，時時做一啲煩雜嘅家事，所以佢時時病倒，嗰個時候佢心目中係感覺到好苦惱，但係佢一方面亦都好嚮往佛門嘅清靜生活。到咗十六歲嘅時候，太虛大師藉故離開長安鎮，準備去普陀山出家，但係當佢響小九華寺旁邊散步嘅時候，得到監院嘅允許，將佢帶去蘇州嘅一間小廟去做和尚，法名叫做唯心，後嚟得到祖師嘅愛惜爲佢醫病，又帶到佢去天童寺受戒，就取名叫做太虛。

太虛大師努力於學識嘅探討，專心研究哲學同文學。佢閱讀《大藏經》，受到康有爲、梁啓超、孫中山先生同章太炎先生、吳稚暉先生等等嘅影響，產生革新新佛教嘅思想同整頓僧伽教育嘅決心。大師嘅足跡遍及武昌、北京等等嘅地方，率領中國佛教嘅代表出席東亞佛教會，佢去過南洋、新加坡等等地區訪問，亦都到過歐美各國去講學，係僧侶之中向外國傳教嘅第一人。

響太虛大師二十六歲嘅時候，曾經響普陀山閉關，出關之後佢就去到臺灣講學，又去到日本訪問，返到中國之後又主編一個《海潮音》月刊，佢宣講《維摩經》《心經》《大乘起信論》等等嘅大乘經論，成立武昌佛學院，爲佛教造就第一流嘅僧衆人才。太虛大師提倡“人間佛教”，一生爲振興佛教而致力。響民國三十六年，佢五十九歲，太虛大師就響上海玉佛寺圓寂，佢圓寂之後火化得到五色好似拇指咁大嘅舍利幾千顆，除咗一部分供奉響玉佛寺之外，其餘呢，亦都分，分開供養響浙江奉化嘅雪竇寺同埋泰國、香港等等嘅名山寶剎。

咁有人話，從以上嘅事蹟我哋可以見到，太虛大師係有好多舍利子，但係太虛大師一生爲法奔馳，邊有咁多時間去唸經拜佛，邊會有咁多舍利子吖？其實，有成就嘅人，有邊個唔忙呢？但係你又見唔到佢究竟點樣修，又點可能咁武斷話佢冇舍利子呢？其實修爲唔係一定在於唸經拜佛，最緊要係一個至誠爲衆生嘅心，犧牲自己，成全他人，將學咗個佛法融入響你生活當中，難道呢啲唔係修行咩？如果淨係識唸經拜佛，但係身體唔識力行，或者淨係唸完經之後身體仍然去做惡事，唔檢點自己身口意，咁修行與唔修行係根本冇分別嘅。

修行，只係檢點我哋日常嘅身口意，時時注意諸惡莫作，衆善奉行，自淨其意，將啲佛法融入響生活之中先係真修行。唸唔唸經、拜唔拜佛，最緊要你係專心，千祈唔好執著唸經拜佛係修行嘅唯一途徑。太虛大師呢個故事，燒出咁多舍利子，佢一生奔波，就可以證明佢係有非常嘅修持。

跟住落嚟我哋講下另一位值得我哋效法嘅高僧，係民國時候淨土宗嘅祖師——印光大師，佢已經往生咗去極樂世界得到上品上生嘅蓮花果位。印光大師俗姓趙，法號常慚，係陝西省嘅人氏，三十歲嘅時候大師響圓廣寺出家，曾經居住過終南山、紅螺山同埋普陀山。自從大師出家以後就唔喜歡同人家往來，亦都唔願意人哋知道佢嘅名，佢嘅目的係由於佢專心修持，日夜唸“阿彌陀佛”，希望能夠早啲成佛。

響民國十九年，印光大師創立咗靈巖山淨土宗嘅道場，教人要以倫常因果作爲根底，以念佛求生西方作爲志願。大師平時自己非常節儉，但係待人呢，就好寬厚，凡係有弟子供養佢，佢都用嚟印贈經典或者救濟貧民。佢又設立救濟院同慈幼院，時常去監獄講經。

印光大師嘅慈悲心亦都普及到其他嘅小動物。響民國十九年，大師去到蘇州，佢住嘅地方有好多臭蟲，弟子恐怕大師被臭蟲咬親，就叫人去消滅臭蟲，但印光大師極力阻止，只係話佢自己冇德行，所以臭蟲唔肯離開佢。直到民國二十二年，臭蟲忽然絕跡，佢知道，但唔對人講。當弟子問及臭蟲嘅事，佢話臭蟲已經消失咗，弟子以爲佢老眼昏花睇唔清楚，一定要去檢查，果然發現臭蟲嘅蹤跡已經銷聲了。

大師每餐食完飯之後恐怕糟蹋咗米糧，一定要用條脷去將飯碗舔乾淨，然後再加開水將碗衝過飲埋呢啲洗碗嘅水先至心安理得。佢每日兩餐都係一飯一菜，佢係每日過咗中午十二點鐘就唔喫嘢㗎喇。有一日，一個客人同印光大師同一檯食飯，嗰個客人唔愛惜飯菜，印光大師就大聲責罵呢個客人：“你究竟有幾多福氣要咁樣糟蹋糧食呢？你知唔知道‘雖知盤中飱，粒粒皆辛苦’吖？”

印光大師教導我哋要惜福，唔好將福報享盡，要留一啲俾自己嘅子孫同朋友，仲要留一啲俾來生去享受。大師嘅床頭時時貼住一個“死”字，當佢見到“死”字，就會努力念佛，以求了生脫死，佢依種做法就正如越國勾踐臥薪嘗膽一樣咁有功效嘅。印光大師係唔中意談玄說妙嘅，佢說法係切合人間嘅需要嚟講，除咗教人父慈子孝、兄友弟恭之外呢，亦都教人求生極樂世界。

求生極樂世界，印光大師倡導嘅方法當然係最簡單嘅老實念佛，佢一心求生去阿彌陀佛嘅極樂淨土以免受輪迴嘅痛苦，所以佢嘅弟子，無論係士農工商，每一行都有，總計一共有二十多萬人，都係修持淨土嘅。印光大師嘅著作一共有一百萬字，佢嘅壽命有八十歲，響靈巖山念佛堂裏面坐化之後呢，佢三十二顆牙齒全部都齊全，後來經過火化荼毗之後，得到五色嘅舍利一共有幾千顆。

接住我哋再講下一個亦都非常偉大高僧，就係近代嘅律學泰斗弘一大師李叔同。大家知唔知道弘一大師係邊個呢？佢嘅俗名叫做李息霜或者李叔同，喺中國嘅近代史上係好出名嘅。你嘅音樂課本有冇曾經唱過一首《送別》嘅歌吖？響我哋細個嘅時候亦都曾經唱過，歌詞曾經有講過：“長亭外，古道邊，芳草碧連天。晚風拂柳笛聲殘，夕陽山外山。”冇錯，呢首送別嘅作者同埋一首好出名嘅《三寶歌》嘅作者，我哋時時唱嘅，或者佛教舉行重要儀式嘅時候都要唱呢首《三寶歌》，作者就係弘一大師，俗家名叫做李叔同，佢係一個音樂家，一個好出名嘅藝術家。

弘一大師，俗名叫做李文濤，原籍浙江省嘉興縣，生長響天津，自從父親死咗之後，佢嘅哥哥李文熙日日將佢鎖喺書房裏便，由《千字文》《朱子家訓》《養性篇》《黃石公素書》一直讀到《論語》《孟子》《大學》《中庸》，甚至讀到秦文、漢文、唐文等等，佢嘅哥哥希望將佢塑造成爲一個經院式嘅傳道士，雖然佢認定李叔同唔會成功，但係仍然一心一意去訓練佢，學習一切君臣、父子、兄弟、朋友種種嘅儒家禮儀。

弘一大師十八歲以後，佢嘅智慧學歷都發展到顛峰，佢嘅每一動作都有分寸，亦都有風格、有出處，譬如寫字呢，都能夠自成一格，呢一，呢種係長長柔軟帶有棱角，活動好似一條蠕動嘅蠶蟲，佢嘅字的確係好靚，仲有詞吔、詩吔、金石吖、篆刻，只要佢練習過都成咗一種創造。總之，弘一大師係一位天才橫溢、熱情奔放嘅文學家，係一位風流瀟灑嘅藝術家，亦都係一位音樂家，當佢響日本留學嘅時候，曾經扮演過茶花女，演得惟妙惟肖、絲絲入扣，轟動日本嘅劇壇。此外，對於評劇，弘一大師亦都好拿手，佢會演小生、武生、花旦等等嘅角色。亦都係物極必反嘅緣故，當佢厭倦呢啲多姿多彩嘅生活以後，響佢風華正茂，突然間急流勇退，毅然投靠佛門，歸依我佛。響民國七年嘅夏天，響西湖嘅定慧寺捨俗出家，拜咗悟老和尚爲師，李叔同出家之後，法名就叫做弘一或者演音，佢專修律宗，嚴持戒律，過午不食，每日除咗研究律學之外，就係寫經、唸佛，分析、整理同注釋佛陀嘅戒律《四分律》，使到佢能夠發揮實際嘅功能。佢認爲末法時代嘅佛弟子好似獅子身上嘅蟲，去學世俗人追求名利而唔做了生脫死嘅功夫，呢個就係佛教破產嘅絕症。

佢又認爲，如果冇咗戒律，唔肯實行律學，都不足以去醫治呢種歇斯底里嘅精神虛弱症，咁樣再落去，一百年後中國就冇佛法啦，所以弘一大師發願刺血寫經，爲一切生命懺悔，以佢用血寫成嘅經嘅功德回向俾衆生。大師出家有四個規定：第一，寧願佢墮地獄，唔做寺廟嘅主持，亦都唔收出家嘅弟子；第二，佢以簡易嘅方式去宣揚佛法，唔做大法師；第三，佢拒絕一切名利嘅供養，以粗茶淡飯過行雲流水嘅生活；第四，佢精嚴去持戒，老實念佛，誓成佛道。由以上四點嚟睇，我哋知道佢係幾清高。

出家以後嘅弘一大師永遠唔提及在家嘅事情，甚至由家裏便嚟嘅親人亦都一概唔接見。咁樣我哋可以話，在家嘅李叔同，同出家以後嘅弘一大師，前後根本判若兩人，呢個係一般人好難做到嘅事。大師出家多年，以文字嚟度化衆生，對佛教實在有好多嘅貢獻，但係世事無常，有邊個能夠逃得過人世間嘅生老病死呢？響關房之中，大師正當病危嘅時候，弟子都嚟爲佢唸佛，但係佢嘅表現一啲都冇痛苦、冇悲哀，平靜咁躺喺床上便，就默默離開咗人間。當弘一大師火化荼毗之後，所撿拾出嚟嘅舍利子，有銀色、白色、乳白色、黃色、淺紅色、淡綠色，總共有一千八百多顆舍利。

宗教上嘅靈異，對於好多冇宗教修養同信念嘅人，往往係唔容易相信。有啲人認爲舍利子嘅靈異未免有啲過於神化，所以竟然有人主張用化學嘅分析去試驗，或者認爲呢啲迷信係麻醉人民思想，同科學唔切實、同人民無益。如果咁樣諗，實在係太唔理解舍利子響佛教之中嘅意義，亦都可以話對舍利子係冇認識嘅批評。

如果講到有益無益嘅問題，好明顯嘅現實，前面已經講過，舍利子唔係普通人都有，佢係無量戒定慧等等功德所熏修，係一個人精神，人事行爲純潔、品格高超嘅結晶品，遺在人間，使到人對佢生起信仰、信敬之情，鼓舞自己嘅精神意志向上，所謂見賢思齊，因嚮往舍利、禮拜舍利而學習先賢嘅良好行爲。假使每個人嘅行爲都能夠純潔，意志都能夠向上，咁社會自然少咗好多壞人、少咗好多罪惡，由此可見，舍利子對於罪惡嘅社會感召嘅潛力係好巨大嘅，所以能夠講供養舍利係無益於社會咩？又何必一定要有科學嚟做一啲驗證去證明舍利子嘅真假呢？

216.三十三天天外天（一）

三十三天天外天

響1969年嘅7月16號，美國太空人Alden Armstrong，艾魯准·阿姆斯壯，駕駛太空船阿波羅11號進入遼闊嘅太空，準備登陸月球，爲人類開闢一個新嘅天地。佢一面飛行一面四下張望，睇一睇地球以外嘅世界究竟係咩景像，但係佢失望，響太空裏便，佢咩嘢都睇唔到，彌望嘅係灰蒼蒼嘅天空無邊無際向下延展，好似一個碩大無朋嘅帳幕，好似有鬼眼似嘅繁星此明彼滅，閃爍不定，真係令人不寒而慄、毛骨悚然。太空人見唔到活動嘅物體同生命嘅跡象，只有花炮嘅流星穿插交錯，划空而過，留下幾道銀色嘅光弧，閃躍幾下就消失，一切亦都歸於沉靜。響呢個荒漠嘅太空，太空人感到可怕、寂寞同空虛，所以佢對地球嘅花花世界更加迷戀，格外珍惜。

地球係好可愛，你睇下有藍天白雲、紅花綠樹，有家庭嘅溫暖，有親友嘅眷顧，佢係荒漠嘅綠洲、希望嘅燈塔、生命嘅搖籃。其實人類係幾荒唐同愚昧呢，身在福之中而不知福，美好嘅一片天地，人類不但唔知道點樣愛護同珍惜，反而想盡辦法去摧殘、去毀滅佢，咩原子戰、細菌戰吖、太空戰，幾乎現在成咗廣播電視嘅熱門節目同報章雜誌嘅時髦課題。阿姆斯壯駕住太空船，一面飛行一面個心裏便諗，佢感到宇宙嘅無窮、生命嘅渺小、人生嘅空虛，同埋人類自我毀滅嘅悲哀。當太空船飛近月球嘅時候，佢用眷戀嘅眼光望番轉頭睇一睇，一角裏便有一個星球響度浮動，呢個究竟係個咩景象呢？一個橙黃色嘅橄欖形嘅球響渾無涯際嘅太空裏便浮浮沉沉、閃閃有光。吖！原來呢個就係我哋最珍惜、最可愛嘅地球，太空人幾乎驚叫起嚟，但係隨住太空船嘅推進，呢個橄欖形嘅球開始逐漸縮小，終於消失響銀河系裏便無數嘅星群之中。

講到呢度，我哋會不期然諗起，諗到一啲問題，宇宙其實究竟有幾大呢？有冇限度呢？我哋日常居處於呢個地球，究竟響太空裏便係佔有一個咩位置呢？呢個問題嘅答案其實係太多了，幾乎牽涉到整個天文學同太空學嘅演變歷史。莊子曾經講過“自細視大者不盡”，渺小嘅人類無法藉住有限嘅感官經驗同科學儀器，其實去探測大宇宙嘅底蘊，就時間嚟講，宇宙係亙古如斯、長駐久存，時間嘅無限同虛無，比起空間上嘅零點或者空洞亦都係不可思議。宇宙間任何個別嘅物體都有大小方圓嘅體積，佢哋響發展嘅過程之中都要生長、成熟、衰敗同死亡，不過宇宙嘅本身係無始無終、無量無際、圓滿自足同不容增減嘅。響呢個無限大嘅世界裏便，日、月、地球同無量數嘅星體好似隨風飛捲嘅塵沙，響人不經意嘅太空角度裏便構成難以計數嘅星雲層太陽系。我哋嘅地球究竟係咩嘢樣嘅呢？佢不過係太空裏便一粒微塵，大海上便一滴水珠，呢個無始無終、無量無邊嘅大宇宙其實就係代表咗整體同埋完善。

跟住落嚟我哋大家一齊試嘗探討一下佛經裏便講三界嘅情況。所謂三界，係欲界、色界、無色界。“界”就界別嘅意思，分界嘅意思，呢個三界裏便構成咗衆生善惡差別同埋禪定嘅相。

第一係欲界。欲界係地獄、畜生、餓鬼、修羅、人間同埋六欲天嘅總稱，呢個界嘅衆生躭於食慾、色慾、睡慾等等嘅各種慾望，所以叫做欲界。

第二係色界。色界係身體、宮殿、國土、物質，都係殊勝精妙，稱爲“色界”，“色”就係有物質、障礙嘅意思，一共有四禪十八天。

第三係無色界。無色界呢，係冇物質嘅，只有心識，由空虛嘅地方有四種空天，一定由空無邊處天開始至到非想非非想處天嘅四天，只有受、想、行、識四種心，但係冇形質，所以叫做“無色界”。

咁首先我哋嚟講一講欲界，我哋由地獄道開始講啦。地獄其實粗略可以分做八寒地獄、八熱地獄同埋無間地獄等等嘅地獄。其實地獄係由我哋嘅心去感召而應現嘅，但係由於我哋造嘅因唔同，感受嘅果唔同，造嘅惡唔同，感受嘅苦報唔同，所謂萬法唯心，故此就應現咗無窮無盡無邊嘅地獄，有一個惡心，就有一個地獄。

首先我哋講一講八寒地獄，八寒地獄故名思義就寒冷嘅地獄嘅刑罰啦。第一個地獄叫做“頞浮陀”，“頞浮陀”嘅意思係梵語，解釋爲“皰”。“皰”嘅意思猶如我哋嘅身裏便起啲水皰，由於太過寒冷吖，所以個身呢，開始生瘡、生水皰，呢個係凍嘅跡象。第二係皰裂地獄，梵語“尼賴浮陀”，“尼賴浮陀”嘅意思係寒苦所逼，令到嗰啲身上所起嘅凍皰開始崩解，開始裂開。第三個寒冷嘅地獄叫做“阿吒吒”，“阿吒吒”嘅意思係極爲寒苦咁嘅意思，“阿吒吒”係寒苦嘅衆生響地獄受報，個口裏便發出嘅聲音咁解。第四係“阿波波”，“阿波波”嘅意思係寒苦增極，受苦嘅衆生係唇上便微顫微顫，猶如我哋好冷喺度震顫，喺地獄裏便就發出呢個“阿波波”嘅聲音。第五係“嘔喉”，“嘔喉”，寒苦亦都比阿波波再開始增極嘞，呢個地獄，越嚟越大嘅凍嘅寒冷，於是由個喉部而發出呢個聲音。第六係青蓮花地獄，青蓮花地獄梵語“郁波羅”，“郁波羅”嘅意思，由於太過寒冷凍到皮開肉裂，顏色就好似青色嘅蓮花一樣。第七就紅蓮花地獄，梵語“波頭摩”，“波頭摩”地獄呢，係比青蓮花地獄更加寒冷，凍到啲肉好似紅色嘅蓮花開花一樣爆開撕裂。第八係白蓮花，梵語“芬陀利”，“芬陀利”嘅意思呢，係已經比紅蓮花嘅冷凍呢更紅，紅呢慢慢再轉白，白到冇得再白，開始皮肉脫落，骨嘅顏色就好似呢個花一樣。以上所講嘅八寒地獄，呢啲地獄嘅壽命呢，係比熱地獄更長或者係減半嘅。

講完寒嘅地獄，我哋又講下熱嘅地獄，第二種我哋所講嘅呢，就係八熱地獄。

第一個地獄叫做等活地獄。等活地獄係呢個地獄之中嘅衆生佢哋互相瞋恨、憤怒，攞啲利器你㓤我，我㓤你，到大家互相相殺咗之後，死而復活、活而復死，所以叫等活地獄，呢個就等活地獄嘅苦報。我哋講個等活地獄苦報呢，係有一個好長嘅壽命嘅，好驚人，如果我哋以人間五十年去計，就四天王天嘅一日，如果呢個獄呢就係四天王天嘅壽命五百年爲一日夜，所以累積個數呢，就達到五百歲。

第二我哋講下，就係黑繩地獄。黑繩呢，好似世界嘅木繩一樣，計佢嘅壽命呢，係人間百歲，人間百歲呢，等於玉皇大帝帝釋忉利天嘅一日一夜，呢個地獄以忉利天嘅壽命一千年爲一日夜，呢個壽命呢，總共有一千歲。

第三種係衆合地獄。衆合地獄呢，係衆生死後，將個罪人嘅身呢，壓逼成微塵，所以叫衆合地獄。如果用個壽命計，係以人間二百年爲夜摩天嘅一日一夜，呢個獄嘅壽命係以夜摩天二千年爲一日一夜，天壽總共有二千歲。

第四係嚎叫地獄。嚎叫地獄呢，係響個大鍋之中沸湯烹煮，令到啲罪人嚎叫。壽命呢，如果以人間四百年就係兜率天一日一夜，呢個地獄就以兜率天四千年爲一晝夜，總共受苦要有四千歲。

第五係大嚎叫地獄。大嚎叫地獄就響熱鐵嘅鍋中烹煮，受煎熬苦，痛極嘅時候大叫，所以叫大嚎叫。佢嘅壽命如果人間八百年就化樂天嘅一日一夜，呢個地獄呢係以化樂天八千年嘅壽命爲一日夜，一共嘅壽命有八千歲。

第六係炎熱地獄。炎熱地獄係烈火猛燒，燒到皮開肉裂而變糜爛，好似煮粥一樣，由固體而變成液體，所以叫做“炎熱地獄”。佢嘅壽量人間一千六百年就他化天嘅一日夜，呢個地獄係以他化天嘅一萬六千年爲一日夜，壽命一共有一萬六千歲。

第七種地獄呢，係極炎熱地獄。極炎熱呢，係罪人響火中裏便燒，內燒外燒，燒到已經無可再燒嘞，身心同靈魂都已經受燒灼之苦，所以叫做極炎熱地獄，佢嘅壽命一共有半個中劫。

第八就係我哋平時所講嘅無間地獄，亦都叫做“阿鼻地獄”，“阿鼻”係梵語，譯爲我哋漢文呢，就“無間地獄”。無間地獄係受苦無間歇，一共有五種意思嘅其實“無間地獄”：

第一就趣果無間，趣果無間呢，意思話係有極重罪嘅罪人呢，而落到呢個地獄裏便呢，受到呢個果報係冇休息、冇間歇；

第二係受苦無間，意思就話喺呢個地獄裏便呢，受各種痛苦亦都係冇間歇；

第三種係時無間，意思話落到呢個無間地獄呢，受苦嘅時節亦都係冇間歇；

第四種呢，係命無間，命無間呢，係話落到呢個地獄，壽命有一終結，無有間歇；

第五係形無間，形無間，喺呢個地獄受罪嘅衆生，生而復死，死而復生，身形係冇間歇。

跟住我哋講下有第三種地獄，叫做“十六遊增小地獄”。八熱地獄每一個方向亦都有四個小獄，一共呢，就有十六個小獄啦，四四一十六，所以八大地獄總共有二十八個小獄（註：疑爲一百二十八個），八寒八熱，佢哋所附屬嘅地獄夾埋一共有二十八個小地獄，就叫做“遊增”。“遊增”嘅意思係受刑嘅衆生，喺大嘅地獄受完之後，然之後呢，再輪，輪轉去呢啲“遊增”，啫小嘅地獄裏便再繼續受苦。

呢十六個地獄，第一係黑沙地獄，“黑沙”嘅意思係熱，熱嘅風吹熱嘅黑沙，吹到燋爛，吹到我哋皮骨燋爛；

第二係沸屎地獄，沸屎地獄呢，係呢沸屎嘅鐵丸吖，喺地下上便呢，驅逼罪人，全部係燒熱晒嘅；

第三鐵釘地獄，係鐵釘釘滿全身，周身遍體嘅懲罰；

第四係焦渴地獄，意思當你渴嘅時候，就用一啲好高熱度溶咗嘅銅漿灌口；

第五係飢餓地獄，意思猶如《地藏經》一樣，“飢吞鐵丸”，頭先個焦渴嘅地獄亦都係渴飲鐵汁嘅地獄；

第六係銅鑊地獄，銅鑊地獄呢，係投於油鑊裏便蒸炸；

第七係多銅鑊地，係經過好多銅鑊嘅痛苦，頭先第六個係一個銅鑊，今次呢個呢，係衆多嘅銅鑊；

第八，石磨地獄，係受一啲炎熱嘅石去壓逼煎磨；

第九，膿血地獄，係一啲膿血沸湯，將個身泡爛，然之後再食番啲膿血，通徹過腹；

第十，係量火地獄，係意思有啲大火將全身嘅身體燒到焦爛；

第十一，係灰河地獄，係一啲灰河沸涌、惡氣蓬勃、鐵刺縱橫、劍樹刀林，惡獸毒鳥而啄磨我哋嘅身體，受無量嘅極苦；

第十二，係鐵丸地獄，係一啲熱鐵丸呢，爛壞我哋嘅身體，令到我哋身體著火，舉身焚燃；

第十三，係斧鉞地獄，斧鉞地獄係攞啲鐵斧吖、鐵錘吔，斬斫我哋嘅身體，𢱕我哋嘅身體；

第十四，係豺狼地獄，係鐵嘅猛獸、鐵嘅豺狼呢，咬到罪人呢，皮開肉裂；

第十五，係劍樹地獄，劍樹地獄，罪人進入咗個劍林，當啲暴風吹啲樹嘅時候，啲樹嘅樹葉都能夠好似劍一樣咁鋒利，將身體斬開成一件件；

第十六係寒冰地獄，係有啲大嘅寒風吹我哋嘅身體，吹到我哋皮開肉綻。

以上呢十六個地獄係附屬八寒同八熱地獄。我哋粗略講講呢啲地獄，呢啲地獄就係唯我哋嘅心所現，若然我哋唔造罪，又何嘗遊地獄呢？

跟住再同大家研究一下畜生道。畜生道其實嘅分類亦都係好廣泛，有披毛嘅啦，有戴角，有四足、多足、有足、無足、水陸、空行，其實畜生呢，係好慘，佢哋互相吞啖，受無明障蔽，受苦無窮，佢哋亦都愚痴貪欲。如果你生前係做咗中品嘅五逆十惡，“五逆”嘅意思係殺父、殺母、殺阿羅漢、出佛身血、破和合僧，“十惡”呢，就“十善”嘅相反，如果我哋做咗中品嘅五逆十惡，就會感到畜生道嘅報應。現在我哋就畜生道嘅報應嚟講，有八個角度去睇：

第一，譬如由形體嚟講呢，畜生有披毛、戴角、鱗甲、羽毛等等嘅分別；

第二，如果我哋呢，就佢所居住嘅地方呢，就有水啦、陸啦、空啦、行啦，等等嘅分別；

第三，就陸地嚟講，重者呢，就匿入嚟土裏面，中者呢，就喺山林裏便，輕嘅呢，就係人所畜養嘅；

第四，如果就時間晝夜嚟講呢，有啲晝行，有啲夜行，有啲晝夜俱行；

第五，如果就強弱嚟講呢，畜生道，所謂物競天擇，適者生存，強嘅一定去伏弱，飲佢哋嘅血，啖佢哋嘅肉，互相吞啖；

第六，如果就壽命嚟講呢，畜生道嘅壽命呢，係有時冇一定嘅，最長嘅呢，可以到達一中劫咁長嘅壽命嘅；

第七，如果就果報勝劣去講呢，其實雖然屬於畜生吖，由於生前所修嘅福德力唔同呢，有啲福德大嘅呢，可能做龍王、象王或者金翅鳥王、獅子王等等；

第八，就出生嚟講呢，出生嘅種類就有胎、卵、濕、化等等。

以上係畜生道簡單嘅敘述。

我哋再嚟去研一研究餓鬼道。餓鬼呢，其實響六道裏便都有嘅，有福德嘅餓鬼呢，其實就相當於一啲小神一樣去管理一啲細細嘅地方，如果冇福德嘅呢，就時常居住喺啲唔潔淨嘅地方，時常受飢餓，受苦無量。由於生前做人陷曲心意而作下品嘅五逆十惡，就會感生餓鬼道。餓鬼道嘅壽命以人間一個月作爲一日，佢哋嘅壽命通常一共有五百歲，但係極長嘅呢，亦都有七萬歲嘅，種類其實都好多，現在同大，大家講一講，餓鬼大約可以分爲三種九類。

第一種係無財鬼，一共分爲三類。“無財”嘅意思呢，係得唔到飲食咁解。無財鬼嘅第一類係炬口鬼，炬口鬼意思就係好似我哋而家所講嘅焰口鬼一樣，當你俾嘢食佢嘅時候呢，佢食唔到，個口裏便呢，由於生前嘅業力噴出猛火，將你俾佢嘅食物燒焦，所以得唔到食物。所以我哋佛教裏便所謂“打齋”，所做嘅法事其實叫做“放焰口”，就去障祭呢啲餓鬼一種功德法事。第二種係針咽鬼，針咽鬼呢，佢嘅頭同埋腹部呢，好似山咁大，但個咽喉就細到好似針一樣，所以呢，滴水都唔能夠進入。第三呢，係臭口鬼，身體呢同埋個口係好臭，好似屍體咁臭。

第二種呢，我哋講到係少財鬼。少財鬼亦都分開三類，話佢“少財”嘅意思呢，唔係得唔到飲食，係比無財鬼優勝一啲，係得到少少嘅飲食。第一種係針毛鬼，針毛鬼個身呢，嘅毛好似針一樣呢，自己嘅毛㓤返自己嘅身體呢，而時常出血，佢哋呢，就以呢啲血呢爲食；第二係臭毛鬼，臭毛鬼身體裏便猶如頭先無財鬼嘅臭口鬼係一樣，身體亦都係好臭，佢身體上嘅毛髮亦都係臭穢不堪；第三種係大癭鬼，大癭鬼嘅意思就係頸裏便，“癭”就係一個肉瘤咁解，頸裏便有一個好大好大嘅腫瘤，腫瘤裏便呢充滿咗膿汁，大癭鬼就擠壓頸上便嘅腫瘤嘅膿汁去飲，作爲自己嘅食物。

第三種，我哋講到係多財鬼。多財鬼係有福德嘅鬼嘞，一共分爲三類，“多財”嘅意思係福德多，所以飲食亦都多。第一種係得棄鬼，得棄鬼嘅意思呢，係時常得到呢，人哋丟棄嘅飲食；第二係得失鬼，得失鬼嘅意思呢，係時常得到我哋遺失嘅食物而食，所以叫得失鬼；第三係勢力鬼，勢力鬼呢，係有大嘅勢力，亦都一共分爲三類。第一種係夜叉，亦都叫做“藥叉”，“藥叉”係梵語，我哋中文叫做“勇健”同埋“暴惡”，一共有三種：有地行夜叉啦，喺地上便啦；有虛空嘅夜叉啦，喺虛空裏便遊行啦；有響天界上有福德嘅夜叉。勢力鬼嘅第二種係“羅剎”，我哋成日聽到“羅剎”，“羅剎”嘅意思係梵語，我哋中文叫做可畏鬼、食人嘅鬼，“羅剎”係一類惡鬼嘅通稱嚟嘅。第三種係“毗舍闍”，“毗舍闍”呢，譯做“啖精氣鬼”，專係食人嘅精氣嘅鬼。呢啲都係有力嘅惡鬼嚟嘅。所以六道輪迴裏便，其實人死爲鬼只係六分之一個機會，但係鬼類呢，其實亦都唔止咁少，由於時間嘅關係，響呢度只能夠介紹到咁多，我哋一般見到個鬼，其實都可以用以上所講嘅三種九類去分辨嘅。

跟住嚟到我哋講到修羅道，修羅道嘅果報係好殊勝嘅，係次於天界，但係修羅個意思，由於佢嘅心呢，時常有瞋恨心，時常好鬥，有天接近嘅福報，而冇天嘅德行，佢哋好恐怖，有時呢，因爲心懷小小妒忌呢，就興起戰爭，雖然有時都能夠行善，但係呢，佢哋有個心希望能夠勝過他人。如果我哋生前做咗下品嘅十善呢，就會感生呢個道路。修羅道呢，係上三道，“天、人、阿修羅”嘅“修羅”就係呢個“修羅”啦，解釋爲“無端正”咁解，“無端正”呢，就係樣貌唔端正，“非天”咁解，“非天”係有天嘅福，但係冇天嘅德行，而下三途呢，就相對於上三途，就頭先所講嘅地獄、旁生同餓鬼。而家就講到上三途啦。其實阿修羅呢，都可以用四類去分嘅：

第一喺畜生道裏便嘅阿修羅，因爲有濕氣嘅緣故呢，係畜生趣所攝；

第二係鬼道嘅修羅，由卵而生嘅，係鬼趣所攝；

第三係我哋人界嘅阿修羅，係由胎生嘅，係人趣所攝；

第四係天界嘅阿修羅，由化生而出，係天趣所攝。

以上嘅分類就所講嘅四種嘅阿修羅，其實我哋“阿修羅”呢，用我哋現代術語講，可以係叫做精靈界嘅衆生。

跟住落嚟我度講，我哋講到我哋自己“人道”嘞。人道係苦樂相間，響修因嘅時候能夠守持殺、盜、淫、妄、飲五戒，做咗中品嘅十善就會生於人道。一共有四大部洲、四種龍王同埋十種仙人之分，現在我哋就開始研究一下啦。

第一，四大部洲。四大部洲嚟講呢，喺佛經裏便講到，論福報，響北俱盧洲，北方呢個洲係最勝，南方個洲呢，係最亂，但如果講佛法嚟講呢，南方個洲係最勝，北方個洲呢，係最亂。南方個洲，所謂“南贍部洲”，響佛經時候常提到嘅呢，其實係相當於我哋嘅地球。

第一，係北俱盧洲。北俱盧洲梵語叫做“郁單越”，“郁單越”呢，係解釋爲“勝處”咁解，亦都叫做“高尚”，因爲由於呢個北洲嘅福報吖，係比其他洲呢，較爲優勝，佢哋嘅壽命一共有一千歲。中途呢啲響北區，北洲裏便生活嘅人民係唔會中夭嘅，亦都唔會做十惡，佢哋命終之後就會生響天上，純樂無苦，亦都唔怕無常，佛法呢，但係好難呢，傳到入呢個北俱盧洲，所以響佛教裏便呢，北洲亦都係八難裏便嘅其中之一難。第二係西牛貨洲，西牛貨洲梵語叫做“瞿耶尼”。西牛貨洲嘅人壽命五百歲，但係呢，中途會有夭折嘅，稍微亦都有佛法能夠傳入到西牛貨洲。第三係東勝神洲，或者叫做東勝身洲，梵語“弗於逮”。“東勝身洲”解釋爲“勝”咁解，由於佢福報勝過南洲，壽命一共有二百五十歲，亦都有中途夭折嘅。第四係講到我哋住嘅地方南瞻部洲，其實呢個“瞻部”嘅意思呢，亦都係梵語，有時譯做“閻浮”，所以喺佛經裏便我哋亦都聽到有“南閻浮提”呢個名稱，其實同“南瞻部洲”呢，係一樣嘅，只係譯音嘅問題，翻譯我哋中文叫做“勝金”咁解。由於我哋嘅壽命冇定限，響呢個世界形成嘅時候，劫初嘅時候嘅壽命係無量，減劫嘅時候呢，減到呢，十歲，增劫嘅時候又會增到八萬四千歲，但係而家我哋人類嘅壽命呢，已經唔夠一百歲，可能係六十歲多至七十，但係仍然會中途夭折。所謂不道……（註：接下文）

217.三十三天天外天（二）

（註：接上文）

如果講到我哋人類世界嘅果報呢，當然唔及東勝身洲啦，何況係西北兩洲呢？但係有三樣嘢係比天界更爲殊勝，何況其他嘅三洲呢？第一，就係能夠斷淫；第二，就係我哋呢，明白我哋嘅念力；第三呢，就能夠精進。所以諸佛喺出南洲，所以呢個洲嘅人呢，根性猛利，但係呢，亦都容易升、容易沉，呢個就係我哋人界南贍部洲嘞。

第二，我哋講到四輪王。四輪王呢，即係轉輪王，亦都叫轉輪聖王，呢啲嘅皇帝嘅身體呢，響佛經裏便我都聽見過，有三十二相，好似佛陀一樣嘅，而且能夠，能夠感得呢，統領人天嘅寶物：輪寶。亦都能夠長伏四方，所以又叫轉輪王，亦都能夠飛行響空中，增劫到人壽八萬歲以上出世，減劫亦都由人壽無量歲到八萬歲嘅時候出世。所以輪王同埋輪寶呢，分別有金、銀、銅、鐵四種，而次第統領一、二、三、四個大洲，即係金輪王就統領四洲，銀輪王就統領東、西、南三洲，銅輪王就統領東、南兩個洲，鐵輪王呢，就統領只係南贍部洲呢一個洲啫。第一種係鐵輪王，鐵輪王係感得鐵輪嘅寶，統御南贍部洲嘅聖王，響增劫嘅時候到人壽兩萬歲就會出現，或者減劫嘅時候到人壽八萬歲以上就會出現。呢個鐵輪王呢，統御一個洲，佢哋呢，用十善化世。第二係銅輪王，銅輪王呢，係感召得到銅輪嘅寶物，而去呢，統領兩個洲嘅聖王。喺佛經裏便記載，菩薩嘅五十二個階位，十住嘅位呢，其實係銅，銅輪王嘅位，統御東、南兩個洲，亦都以十善化世。第三，係銀輪王，銀輪王感得銀輪王嘅寶物，呢個銀輪嘅輪寶呢，能夠統領三洲嘅聖王，亦都呢，使到三洲得以稱服，用十善化世。銅，銀輪王呢嘅功德已經係勝過頭先所講嘅銅輪王嘞。第四係金輪王，金輪王係感得金輪嘅輪寶而統領四大部洲。金輪王出世，風調雨順、國泰民安，亦都具足七寶，有一千個兒子，金輪王亦都能夠使到天下呢，行十善，所以四個輪王之中呢，以金輪王嘅功德最大。

跟住落嚟我哋講到，頭先已經提過人界裏便，修心不正，意思以偏重某一方面去修嘅十種仙人。十種仙人呢，其實雖然離開人世，但係離唔開人類嘅，響《楞嚴經》裏便其實已經講過㗎喇。有一種人，佢爲咗求堅固嘅形骸，長生不死，以各種嘅藥物炮煉、修冶，製作一啲膏丹丸散去不斷服食，等到呢啲功夫圓滿成就呢，佢不但身強體壯，能夠祛病延年，而且身體係好輕，行走嘅速度極快，係我哋人唔能夠及得佢，呢一類就叫做地行仙，呢個就係第一種仙人。第二種，爲咗求長生，唔食人間煙火，只係服食各種草木，譬如紫芝吖、黃精吖、松枝吖、柏葉嘅藥物，服食不斷，等到功夫圓滿成就，於是就行步如飛，能夠跳躍高空山崖，身輕勝前，呢一類呢，就做叫做飛行仙。有一類，爲求長生，由於烹煎鉛汞、煉養丹砂，所謂煉丹，不休不歇，一旦功夫圓滿成就，就能夠化形易骨、點石成金，因而超脫而雲遊世外，爲咗利人濟世呢，而去遊行人間，呢一類呢，就叫做遊行仙，呢一類嘅仙人呢，我哋喺道教裏便呢，都見得到好多。有一類，爲咗求長生，專心一致，煉精化氣、煉氣化神、煉神還虛，等到功夫圓滿成就，精氣俱化，形神皆妙，可以乘風御氣、騰雲駕霧、遊於虛空，呢一類叫做空行仙。有一類，爲咗求長生，專心致志，鼓天池、咽玉液，使到身內嘅水火升降，久而不息，而後最後達到水火相濟，功夫圓滿，而結成身內嘅丹，內外融通，唔被世俗嘅物質所累，能夠乘風御氣、雲遊天上，同天地合德，同六氣合用，亦都能夠利濟萬物，呢一類亦都係好高境界嘅天行仙。有一類，爲咗求長生，專心致志，採日月嘅精華，餐雲採氣、久行不息，到功夫圓滿，精氣潛通，形同埋氣化，神亦都同物通，呢一類嘅仙人能夠穿金石、蹈水火，任運無礙，物質已經阻礙唔到佢，已經通咗造化，呢一類呢，就叫做通行仙。有一類，爲咗求長生，專心致志，但係呢一類同以前唔同，佢哋奉持咒語、嚴守禁戒，久久修行而唔停止，等到啲咒語、法術得以圓滿成就，可以治病、祛病、降魔、伏鬼，不但可以用呢一種方法去養身，亦都用呢一種符咒嘅方法去濟世，呢一類就叫做道行仙。有一類，爲咗求長生，堅定心智、沉思靜念，佢哋嘅心存想喺頂門裏便出神，運用呢個方法嚟去修煉，等到思念圓滿成就，佢嘅元神就能夠出入自在，佢嘅氣可以上下交通無滯，形神照應不失，呢一類就叫做照行仙。有一類，堅固交媾而唔休息，感應圓成，呢一類叫做精行仙。十種仙人嘅最後一類，就係堅定心智，以窮物變，呢一類嘅仙人呢，佢深研造化嘅道理，參悟天地嘅玄機，久而不息，悟通造化之道，與大自然造化相通，覺悟圓滿成就，佢哋嘅能力足以移山倒海、呼風喚雨，將春夏秋冬四季嘅時序能夠顛倒，呢一類叫做絕行仙。呢十種仙人呢，其實係喺人中煉心，唔修正覺，但係佢哋嘅功力同埋神通已經係非常之高，我哋聽完之後呢，好容易誤會係得到道嘅，其實，呢一類嘅仙人有啲都自己響陶醉佢嘅修煉嘅滿足感之中，以爲自己能夠證道，以爲自己能夠呢，化人濟物，但係其實呢，都響人中煉心，而唔修正覺。呢一類嘅神仙呢，有千萬歲，有啲呢係匿埋喺深山，有啲響大海，有啲響人嘅境界裏便，但係其實都出唔到六道輪迴，都係一啲妄想流轉。呢啲仙人唔修三昧，等佢報應，當然個天壽係好長，壽命完咗之後呢，其實佢都要須要再輪迴嘅。

好嘞，跟住我哋講到，向上嘅天界就三十三天天外天。其實三十三天呢，係玉皇大帝道教裏便嘅稱謂，響我哋佛教裏便呢，叫帝釋、釋提桓因，係欲界嘅天帝嚟嘅，三十三天嘅天帝。三界裏便一共有二十八天，簡稱欲界、色界、無色界。欲界六個天，色界十八個天，無色界一共有四個天。

第一，六欲天，六欲天嘅福德同埋其他天呢，係一樣，而有飲食，有男女，有睡眠三種事，但係同“色、聲、香、味、觸”五欲同埋其他五道呢，都係一界。第一係四天王天，距離我哋最近嘅天界係四大天王天。四大天王我哋成日聽到，啫係護世嘅四天王同埋佢嘅眷屬去保護人間，呢啲天王都係修咗上品嘅十善，係唔殺生，戒功增上，德行所感，或者一日一夜齋戒嘅功力所感。佢哋身長五十七丈，以人間五十年爲一晝夜，壽命五百歲，如果合人間嘅數呢，其實就係九百萬年，但係亦都有中夭嘅，死嘅時候呢，有五衰相現，亦都好似陽世間嘅人有一部分嘅苦惱。四大天王分別係：第一，東方持國天王，佢統領乾闥婆神；第二係南方增長天王，佢統領鳩槃茶神；第三係西方廣目天王，係統領龍衆；第四係北方多聞天王，佢哋統領夜叉衆。

欲界嘅第二層天再上，就係我哋所講到嘅三十三天。三十三天梵語叫做“忉利天”，“忉利”意思解釋爲三十三，所以叫做“三十三天”。因爲天界裏便呢，中央爲中心，四方各有八天，四八三十二，加埋中間呢個天呢，係統領，係玉皇大帝統領其他天界嘅皇帝，所以叫做“三十三天”合共，亦都係修上品十善所感，或者不殺、不盜、戒功增上嘅德行，就會生去忉利天。忉利天嘅天人身長五十丈，但係呢，帝釋嘅身長呢，就三百丈，以人間一百年爲一日夜，壽命一共有一千歲，合計就人間三千六百萬年，但係中途都有中夭，亦都會現五衰相嘅。三十三天呢，第一就係帝釋天所居住，所謂善法堂天，亦都係位於呢，三十三天嘅中央。

跟住我哋嚟講下，南、西、北方或者東方每一邊嘅八天嘅名稱，雖然唔夠，唔能夠今日詳細解釋天界嘅內容，但係起碼大家能夠知道天界嘅名稱。響南方嘅八天，佢哋嘅名稱分別係：山峰天、山頂天、善見城天、鉢私他天、俱吒天、雜殿天、歡喜園天、光明天；響西方嘅八個天界就係：波利耶多天、離險岸天、谷崖岸天、摩尼藏天、旋行天、金殿天、鬘形天、柔軟天；響北邊嘅方向嘅八個天，係：雜莊嚴天、如意天、微細行天、歌音喜樂天、威德輪天、日行天、閻摩那娑羅天、速行天；響東方嘅八天分別係：影照天、智慧行天、衆分天、蔓陀羅天、上行天、威德顏天、威德焰輪光天、清淨天。所以呢，四八三十二，加埋玉皇大帝統領嘅天界，合共就三十三天。玉皇大帝就掌理人間嘅善惡功過，我哋一日解脫唔到生死，一日都受玉皇大帝所管轄。玉皇大帝再上一個天呢，就所謂夜摩天，“夜摩”嘅意思就係“善時分”咁解。夜摩天以蓮花開合去分晝夜，呢個亦都係修上品十善，而且亦都識得少少禪坐，亦都不殺生、不偷盜、不邪淫，三條戒增上嘅功德所生，生去到呢個天嘅，或者守持八關齋戒、十戒等等嘅功德所感，佢哋身長二百五十丈，以人間二百年爲一晝夜，壽命一共有二千歲。第四就係兜率天，兜率天就好出名㗎喇，“兜率”嘅意思呢，解釋爲“知足”，由於響五欲嘅境界知足所現，如果我哋修上品十善呢，能夠呢，感生到呢個天。呢個天嘅身呢，係非常之長嘅，或者可能我哋修八戒、十戒亦都能夠感生呢個天。天人嘅身長係三百丈，以人間四百年爲一日夜，壽命四千歲。兜率天呢，亦都有呢，唔俾世界毀壞嘅時候，水、火、風三災所壞嘅內院，內院亦都係彌勒菩薩嘅淨土，將來彌勒菩薩響釋迦佛圓寂五十六億七千萬年之後就會降生響印度開龍華三會，現在就喺兜率內院教化菩薩。兜率內院呢，係一生補處菩薩所居住，一生補處菩薩，啫係掙一個階位就成佛去補佛位嘅菩薩摩訶薩，所以內院呢，係好重要，係培訓菩薩嘅道場。兜率天以上呢，再上一層天就係化樂天，呢個天界呢，自己化現呢，塵俗、塵世嘅娛樂去以爲自己嘅娛樂，修上品十善，而且呢乘欲界中嘅定，修持少少欲界嘅禪定所感召，身長一共有三百七十五丈，以人間八百年爲一晝日夜，壽命八千歲。再上一層天，就欲界嘅頂——他化自在天嘞，呢個天呢，係假他人所化嘅娛樂爲自己嘅娛樂，所以叫做他化自在天。他化自在天呢，身長四百五十丈，以人間一千六百年爲一日夜，壽命一共有一萬六千歲。有啲人話，他化自在天有一個裏便，就係魔天，所謂“魔”，“魔羅天”，響他化自在天之上，有破壞佛法嘅魔王嘅魔宮，係魔天所居，亦都係他化天所攝嘅。

講完欲界嘞，跟住我哋再講下色界。色界一共有四禪十八天，就係初禪、二禪、三禪、四禪。初禪有三天，二禪有三天，三禪有三天，四禪一共有九天。第一係初禪三天，初禪三天開始呢，身體呢同埋衣服都係隨意，亦都係冇男女，佢哋以禪定發起爲食，只係一個內外，內在嘅覺觀心。響外在裏便呢，火災壞呢個世界嘅時候就會燒到上初禪天。初禪嘅三天，第一係梵衆天，梵衆天係超越六欲天，遠離飲食同埋淫慾、睡眠三種過患，所以叫做“梵”，“梵”係清淨、離開慾望嘅意思，到達梵天呢，都須要去修禪定，去離開呢個慾望嘅。呢個梵天嘅身長呢係半由旬，壽命一共有二十小劫。第二係梵輔天，梵輔天呢，猶如梵，大梵天嘅自，嘅神衆一樣。第三天係大梵天，呢個梵輔天係佢嘅神衆，係初禪天天主嘅輔神，係幫助初禪天統理呢個初禪嘅三天嘅。呢個梵神嘅身長呢，就係一由旬，壽命四十小劫。初禪最高嘅天就大梵天王，大梵天王響我哋佛教裏便就相當於所謂叫做四面佛，其實就係四面神。初禪天嘅天主呢，叫做尸棄，尸棄呢，就統領呢，呢個呢，大梵嘅三天，亦都係婆羅門教嘅主神。

跟住講到二禪嘅三天，二禪嘅三天呢，世界破壞嘅時候呢，水災呢能夠淹到二禪。第一，第一係少光天，少光天意思係光明比較少，由於禪定力未深。呢個天係世界壞嘅時候呢，火災燒唔到，壽命有兩大劫，身體有兩由旬咁長。“由旬”嘅意思呢，相當於我哋四十華里，但係亦都有一種說法，相當於六十或者八十嘅華里。第二係無量光天，無量光天係比少光天嘅光明呢，增勝嘞，無限量嘞，亦都係須要修禪定先能夠去到呢個天界。呢個天界嘅四，嘅壽命一共有四個大劫，亦都係呢，身體有四由旬咁長。第三係光音天，光音天嘅意思呢，係話呢個天呢，以光明作爲語音，作爲溝通嘅語言、工具。我哋人類初時嚟呢個世界嘅始祖，就由光音天而嚟嘅，光音天亦都呢，兼修四無量心嘅，命終之後呢，亦能夠呢，得生呢個天界。壽命光音天有八大劫，身長八由旬。

現在我哋講到三禪天，二禪已經講完了。三禪有三個天，三禪嘅天呢，喺世界壞嘅時候呢，被風災能夠所摧毀嘅。第一係少淨天，少淨天嘅意思呢，係話呢個天嘅意識樂受清淨。少淨天嘅人呢，命終嘅時候呢，水災係到唔到嘅，但係風災就會吹得到嘞。佢哋身長十六由旬，壽命一共有十六大劫。第二，係無量淨天，係呢個天呢嘅清淨比少淨天呢，優勝咁解。身長三十二由旬，天人壽命亦都有三十二個大劫。第三，係遍淨天，意思係呢個天呢，樂受呢，係最勝、最清淨、周遍。呢個天嘅天人呢，身長有六十四由旬，壽命有六十四個大劫。

三禪天講完嘞，跟住我哋再講四禪，一共有九天。四禪天裏便呢嘅九天呢，係水、火、風三災都唔能夠破壞佢嘅。第一係無雲天，無雲天嘅意思呢，係天上嘅雲呢，以雲爲居，係好輕薄咁解。天人嘅身長一共有一百二十五由旬，壽命有一百二十五個大劫。第二係福生天，意思係呢個天呢，所修勝福力而生咁解，天人身長二百五十由旬，壽命二百五十大劫。第三係廣果天，呢個天嘅果報廣大，無能勝故，天人嘅身長五百由旬，壽命五百大劫。以上呢，頭先所講呢三天，四禪九天裏便，依三天係凡夫所居住嘅。

跟住落嚟所講呢五天呢，係無想天、無煩天、無熱天、善見天、善現天、色究竟天，呢五天呢，係聖人所居住，係三果聖人同埋呢，阿羅漢所居住，亦都叫做五不還天。咁呢，呢啲天界呢，一個天比一個天嘅壽命同身長更加殊勝，譬如以最後嘅色究竟天爲例嘅天人竟然能夠有一萬六千由旬嘅身長，壽命一共有一萬六千個大劫咁長。喺佛經裏便記載呢，響色究竟天之中呢，再上亦都有摩醯首羅天，亦都係破壞正法嘅魔王，亦都翻爲，響我哋中文叫做“大自在天”。

最後，我哋講到無色界，無色界嘅四空天係比色界更高嘞。因爲呢，呢啲四個空天呢，係厭棄我哋嘅色身而不自在，所以呢個色身已經解脫，只係得返一個心去懸於虛空同色相無邊相應而住於空處。但係，呢個無色界嘅四天嘅“空”，唔係佛法所講涅槃寂靜究竟嘅“空”，係有漏嘅“空”，所以無色界就算到到最後嘅非想非非想處天呢，爭少少能夠解脫生死呢，都未到嘅其實，所以，唔好誤會無色界好高嘅空天嘅禪定，就以爲解脫生死，但往往有啲外道嘅禪定能夠修到呢個天界，由於壽命係非常之長，所以佢哋誤解咗能夠解脫生死。無色界嘅四天係空無邊處天，空無邊處天，壽命亦都有兩萬個大劫。第二，係色無邊處天，色無邊處天嘅壽命呢，有四萬個大劫。第三，係無所有處天，無所有處天嘅壽命呢，有六萬大劫。第四，係非想非非想處天，非想非非想處天嘅壽命呢，竟然有八萬大劫咁長，所以我哋可以知道，呢啲天人嘅壽命係非常非常之長遠，好容易令到佢哋產生喺禪定裏便一個錯覺，認爲佢哋已經得到不生不滅嘅境界。

屬於生滅門嘅有漏世界，頭先我哋其實已經大概講晒，係包括三界、六道，上至非想非非想天，下至餓鬼同埋地獄，都係由業感而生。佛陀所講嘅惑、業、苦三樣，其實係構成有漏世界嘅成因，顛倒、妄想就係“惑”，由呢個迷妄嘅“惑”而去造“業”，因爲“業”而去受“報”，就感召到六道流輪迴、生死流轉嘅痛苦。“惑”係業因，“報”係業果，“惑”由妄生，但係呢個虛妄其實冇本體，不離開我哋嘅心性，響我哋迷嘅時候就會覺得有，當我哋一旦覺悟，就會冇嘞。如果呢個業因除去嘅時候，業果唔生，其實邊有三界吖？邊有六道呢？生死流轉亦都變成咗戲論了。

218.情慾婚姻桃花劫（一）

情慾婚姻桃花劫

呢套專門探討人嘅感情世界同婚姻嘅吉凶禍福嘅帶，係我多年嚟好想講嘅作品，畢竟我哋罪業唔重，唔會生於娑婆世界。我哋之所以會感召嚟呢個五濁惡世，亦都係來自於我哋嘅貪愛執著、情慾熾盛嘅結果，呢個問題就係點解佛陀稱我哋做有情衆生嘅緣故。

衆生因爲愛慾而受生，因爲有咗生命嘅開始，就脫離唔到一連串嘅生、老、病、死、煩惱、求不得苦、愛別離苦同埋災厄凶險等等嘅苦。好多佛教徒或者係修行人亦都時常因爲情慾熾盛嘅苦而傷透腦筋。有關你嘅感情世界、桃花運、婚姻前後嘅命運、業命同埋苦報、福報等等嘅變化，響呢套帶之中，我都會爲你一一作解釋同埋講出對治嘅方法。

無論你現今係唔係佛教徒，只要你對自己嘅感情生活同埋未來婚姻對象，或者婚後生活，外遇、桃花、情苦等等，一切疑難嘅問題，想要尋求解脫或者突破呢，呢套錄音帶都會一一爲你介紹，希望能夠令到聽衆響呢套錄音帶之中得到大利益，以解決同埋避開感情業報嘅痛苦。

首先第一點，我哋同大家講下重感情、情慾、邪淫嘅分析。有啲人天生就有一副樂善好施嘅心腸，而且大多數係個性耿直，佢哋嘅心地光明磊落，道德觀亦都比較強。呢一啲人安分守法，響人際同埋親朋好友方面亦都會係較重情義，所以我哋稱呢一類人係重感情嘅人。其實良好、健康嘅感情生活係好嘅，亦都係人性光明嘅天性，所以無論響親情、手足之情、父子之情、夫妻之情、友情、師徒嘅情分、君臣嘅禮儀等等，其實都係喺道德、良性互動之中嘅感情生活。呢啲講義氣、重倫理、重情義嘅人，其實係值得肯定，尤其響呢個工業文明嘅社會裏便，貪婪成性、物慾橫流、功利盛行又冷漠自私嘅社會，呢種理智型嘅，嘅重感情生活係應該大力宣揚同埋鼓勵，以彌補社會發展之中嘅失衡現象。

至於講到情慾，情慾係人類原始嘅劣根性，多多少少都深藏響每個人嘅潛意識之中。情慾係一種強大嘅慾望，而“慾”係來自於人內在深層生命之中嘅貪愛同執著。情慾係每一個人響無量劫嘅生死輪迴之中所不斷累積低嘅，所以可以話，係你我每一個人生命內部所共同存在嘅根本業障同習性。

有時係有意嘅，有時就響不知不覺之中，我哋經常會喺心裏面生起情慾嘅想念，想同異性親近，想上前同佢傾下偈，進而想由異性嘅身上得到一啲慰藉。如果感情嘅慾望過籠而時常對異性有非分之想嘅話，我哋就可以稱做淫慾過重或者色慾過重。

淫慾心強嘅人，時常會想貪求魚水之歡，想要透過肉體嘅歡樂同身心嘅刺激去佔有對方。貪求情慾嘅男女，其實佢嘅目的呢，只係爲咗使到雙方嘅肉體同心靈藉呢個渠道而得到依靠同撫慰，而且獲得身心快樂。對於情慾嚟講，如果過度嘅追求同貪執，其實就會造成縱慾。如果情慾過盛，進而貪求夫妻之愛或者非時、非地嘅苟合，更加會造成邪淫嘅惡業，爲自己同埋他人帶嚟以後無窮嘅煩惱同痛苦添。

而縱慾同邪淫，其實唔係男人嘅專利，好色之徒亦都可能係女嘅。雖然係咁講，但係多數人響根深蒂固嘅觀念之中，情慾熾盛，甚至邪淫好色嘅標籤，似乎都係喜歡響男性身上貼。但係值得注意嘅係，前面講過，男性往往係比較熱衷響權力嘅追求，而有啲女性，多數係透過滿足男性嘅情慾去抓住男性嘅心，而藉呢個機會掌握男性嘅權力，所以呢，佢內在嘅情慾世界吔，往往女性係要比男性複雜而微妙嘅。

其實，情慾唔係唔好，而係往往佢嘅副作用係太大，而且時時會俾人帶嚟患得患失嘅慾求同埋貪執嘅苦難，亦都係衆生六道生死輪迴嘅根源。情慾係人嘅根本業障，有一啲人轉世到咗人間，待人處事或者其他方面都好好，但係呢，與生俱來，佢嘅情慾同愛念係特別旺盛，有啲人從小時候或者青春期呢，就漸漸發現自己嘅愛慾、情慾嘅需求係特別強。

情慾業障嘅風暴其實係分爲自發性同埋外在刺激性兩種。所謂自發性，係指一個人因爲內在情慾嘅毒素太過濃，時常響一個人獨處嘅時候，就會自發性貪執男女嘅色相，肉體嘅慾望一幕幕咁浮現響腦海之中，心裏便嘅慾火隨之後沸騰燃燒，自己亦都唔好意思話俾人聽，驚人笑，而且要同自己心中嘅慾火煎熬交戰，真係苦不堪言。而外在刺激型嘅情慾呢，係指一個人平時讀聖賢書，行君子之禮，道德觀亦都好注重，守法守份，但係響男色或者女色當前嘅時候呢，呢啲人心裏便就有一股好強大嘅燃燒力量浮現，響嗰個時候或者我哋會發現，點解自己嘅思想有一種力量響度牽引住你，使到你一直被嗰啲唔道德嘅思想所污穢、所包容？所以呢類人呢其實都係好煩惱。但係無論係自發型，或者外在刺激型嘅人，亦都無論係男性或者女性，只要有前面所提到呢啲現象，我哋都可以話，呢類人嘅根本最大業障呢，就係情慾嘅毒，所以好多有心修心養性學佛嘅朋友，因爲自己情慾嘅業力特別強而係好矛盾，想盡辦法要除去心中嘅情慾嘅毒素，當然亦都好多人或者自己嘅情慾所擊敗而懊惱不已了。

情慾業障太過於熾盛嘅人，如果唔透過佛法或者修行去淨化同埋消毒，日子耐咗就會漸漸惡化就變成咗邪淫嘅惡業嘞，所以佛教響居士五戒之中就有“不邪淫”呢一條戒律。俗語講過“外在嘅敵人容易打，但係自己本身嘅問題呢，就係真正嘅敵人。”當人嘅情慾、業障現前嘅時候，人嘅理智或者平時嘅思惟能力呢，多數都會喪失，甚至迷迷糊糊，響自己嘅心裏有一股衝動嘅愛慾，呢股情慾嘅毒當一點燃之後，乾柴烈火，真係一發不可收拾。一個人如果造下有違背道德同良知嘅行爲嘅時候，我哋就稱爲“邪淫”，譬如男女通姦、外遇、強暴、淫蕩、淫亂、貪求、執著等等。一個人造下邪淫嘅罪業，其實只要良心仲未泯滅，自己係知道，所以先會有道德同良心上嘅責備，呢啲矛盾痛苦。

色慾係世間嘅禍患，係凡夫迷戀追逐而且至死不悟嘅一個大陷阱。色慾亦都係人間嘅災害，生而爲人，都受呢個問題所污染。學佛嘅人，如果能夠睇破呢個關鍵，而又能夠惺惺不忘，好似出監獄而又再入監獄，亦都好似病癒又再度病患一樣。色慾係造成邪淫嘅禍因，而呢個邪淫呢，亦都係佛教五個重戒之一。邪淫，除咗夫妻之外，凡係唔正常嘅身體嘅淫亂，同埋非時、非人、非女淫、非處淫都係屬於犯下邪淫重罪嘅範圍。除咗大家比較熟悉嘅狀況之外，恐怕有啲人對於邪淫，因爲唔了解而誤犯，造下咗無邊嘅地獄、餓鬼、畜生等等三途嘅苦報而自己唔知道。跟住落嚟，我就爲各位介紹邪淫嘅種種問題。

由於情慾過度或者偏差所犯下嘅邪淫呢，其實可以分爲三種嘅。第一係同血統有關嘅人行淫，呢一點，係指同父母親或者兄弟姐妹之間行淫，包括翁、媳、姑、侄之間等等，所有同血緣相近或者有姻親關係嘅人行淫呢，都係犯咗邪淫嘅重罪，亦都係一般人所講嘅“亂倫”。

第二點呢，就係同有主之婦行淫，呢一點係指無論同有夫之婦或者係有婦之夫去行淫呢，都係屬於邪淫嘅。

第三點，係不依法度行淫，呢一點又可以分爲五類，即係夫妻之間如果違犯咗下面所講呢五種情況呢，其實都係算做邪淫嘅，所以要注意嘞。

第一點係指非器行淫。非器行淫嘅意思係指唔正當嘅器官嘅地方去行淫。

第二點係非境行淫。非境行淫呢，係指響近住師父嘅地方，或者上師嘅地方、靠近廟宇嘅地方、佛塔之前同埋大衆集會嘅地方去行淫。響佛寺前面行淫呢，其實已經犯咗嚴重嘅邪淫，更何況響佛寺以內行淫，如果要犯咗，所有嘅邪淫之中呢個罪呢係最重嘅。

第三係非時行淫。非時行淫係指響婦人齋戒之期、懷孕、哺乳，同埋日頭嘅時候，其實都算係邪淫嘅。呢一點尤其係好多夫婦，好可能響唔知道嘅情況之下誤犯，所以呢一點呢，係要特別注意。

第四點係非量行淫。非量行淫係指夫妻之間嘅正淫，如果貪求魚水之歡而縱慾過度，其實都算做邪淫，因爲如果縱慾過度，不僅容易傷身、短命，而且淫慾嘅毒素吖，會不斷大量去滋長，污染我哋嘅神識，死咗之後更容易唔小心會墮入惡道，受無量嘅苦楚添。

最後一點係講非理行淫。非理行淫係指用毆打、武器等等嘅暴力方式去強暴婦女，其實係包括自己嘅太太，或者同性之間乃至於陰陽人。陰陽人係指同時具有男女兩性嘅特徵，或者係非男非女，非男非女呢，係男女兩性嘅特質不足，同呢啲以上所講嘅人呢去行淫，其實都係算做犯咗邪淫嘅戒。

咁由以上嘅介紹我哋可以知道，無論外遇、婚前試婚、亂倫等等，都係邪淫，就算係夫妻之間，如果發生咗有上述嘅狀況，都係算做邪淫。如果你因爲從前無知而誤犯，而家應該生起懺悔嘅心，馬上制止，下定你最大嘅決心，以後絕對唔好再犯。但係你即使知道自己犯咗係邪淫嘅業，但係心無慚愧，唔知道悔過，碰到有機緣嘅時候呢，其實你仲係會心痕痕，咁樣鐵定呢，可能你嘅邪淫嘅果報一定會受得到你將來嘅果報嘅慘痛同埋痛苦。

其實面對情慾根本業障現前嘅時候，我哋應該點樣對治呢？情慾惡業，形成嘅來龍去脈同埋緣由到底係點嘅呢？情慾，而係點樣蔓延變成邪淫嘅呢？而邪淫嘅慘痛代價又係咩嘢呢？

邪淫嘅罪業，最大嘅根本造業來源呢，其實係呢個身業所造低嘅。一般邪淫心重嘅人，當佢邪淫心生起嘅時候，身體內在嘅慾火就開始燃燒，全身會脹脹熱熱、口乾舌燥、心跳加速，佢體內嘅微血管會擴張，血液運行快速，全身嘅毛細孔亦都擴展散熱。

因爲邪淫嘅心同埋情慾升起嘅時候，就會觸動人體內在嘅拙火，當人嘅拙火引發嘅時候，身體內部嘅熱氣就由我哋腹部裏便嘅丹田上升一直衝上去我哋嘅腦部，所謂叫做“氣衝天靈穴”，係佛家時常因爲邪淫慾望而引發嘅腦熱。前面講過，一個人淫心、慾火正喺燃燒嘅時候，無論呢個人嘅情慾係來自外界嘅美色、肉慾嘅刺激，或者潛意識之中我哋嘅如來藏情慾種子嘅浮現，其實都會產生腦熱嘅現象，而響呢個時候，氣血同埋熱力一直就會向我哋腦部集中，我哋嘅腦袋呢，當然會昏昏沉沉啦，再加上全身猶如火山要爆發一樣，全身響色慾同淫慾充滿嘅時候，當然就好想發泄自己嘅愛慾淫心嘞。呢種全身混熱、昏沉嘅感覺，同埋體內好似積聚咗好多能量嘅情形同埋種種嘅變化，其實都好容易使到人失去理智，隨住邪淫、色慾嘅貪愛執著而造下無量嘅罪業，所以邪淫嘅根本業障種子，凡夫俗子如果被引燃爆發之後，係好難抵擋佢嘅禍害。

如果一個人邪淫心生起嘅時候，身體嘅生理開始產生種種變化，譬如呼吸或者心跳加快，體內嘅拙火升起、氣血沸騰、腦熱充，充塞等等嘅現象，其實都係唔可以用言語去表達。因爲呢個身體，身業係自動運行緊，亦都可以話係人嘅前世或者生生世世就時常行淫，先會一直留下呢個身體嘅性慾、習性，所以色慾、情慾係人嘅夙業，唔須要透過，透過今世嘅語言思想，人嘅身體業力就會自動引燃情慾嘅火。

所以我哋時常修佛法、持清淨嘅戒或者唔邪淫嘅人，響色慾方面都係比較健康同埋節制。但係佛法係唯一能夠淨化我哋身、口、意三業所造下嘅一切惡業，佛陀本師釋迦牟尼佛亦都曾經講過：“色慾係凡夫一生之中所能夠體驗到嘅各種享樂之中喺凡人嘅標準嚟講呢，係算做最快樂嘅。”所以人只要一陷入邪淫嘅慾望之中，大多數會沉迷嗰個層次嘅快樂而無法自拔。因爲邪淫係一種唔潔嘅行爲，如果迷戀貪愛呢，輕者喪財傷德，重者會招致殺身之禍，如果唔能夠覺悟，死後甚至仲會墮入地獄去受苦添。

至於講到愛慾嘅淫心，點解係人流轉生死嘅根本呢？跟住落嚟，我就同大家一齊打開慧眼，去睇一睇生死輪迴嘅最大原因同埋由來。

人嘅性愛淫慾係透過生生世世慢慢熏習累積而種喺潛意識裏便嘅，如果今世投胎爲人，又勤修佛法，因爲誠心懺悔同努力修行，係會慢慢消除響我哋嘅八識，啫係如來藏裏便嘅情慾種子。但係如果今世冇修行嘅呢？甚至一直響度造邪淫嘅惡業，咁呢個人嘅潛意識之中就會種下更重嘅情慾業力，除咗今世感召邪淫各種禍害之外吖，內心更可能墮入三惡道，亦或者百病叢生，淪爲娼妓，感召情業苦報。

人死後，其實唔係即刻進入六道裏面，六道係天、人、阿修羅、畜生、餓鬼、地獄六種空間嘅輪迴。其實人死後，係響死亡數小時之後，身體已經冇生命嘅跡象，響身體裏便嘅地、水、火、風四大元素就開始一一分解同還原，而且神識係會脫離軀殼而形成中陰身，即係俗稱嘅亡靈或者靈魂。

“中陰身”係佛家稱呼人由死後到尚未投胎之間響四十九日之內所處於嘅生命狀態，有時又稱爲“中蔭”，“蔭”呢，就係“蔽蔭”嘅“蔭”，啫係“障蔽”咁解，亦都叫做“中有”。響人間行善積德、修佛禮佛、守佛戒律嘅人，響臨終嘅時候，好多人都會直接超生響天界，或者由各個佛國淨土嘅佛菩薩去接引而往生到佛國。而響人間大奸大惡、多行不善、違背良心嘅人，佢哋死咗之後嘅靈魂通常係由地府之中嘅黑白無常或者鬼卒前嚟勾魂，帶返地獄，有啲係因爲生前所做嘅惡業去感召而直接墮入地獄去受報。

以上呢兩種大善同埋大惡嘅人都係直接轉生，所以死後呢，其實係冇中陰身嘅，但係如果響生前唔係大善或者大惡嘅人，呢個亡靈嘅中陰身，呢個神識呢，就會感覺到飄飄渺渺、似夢非夢，似真又似假。因爲靈魂響失去肉體嘅束縛之後就會進入純精神嘅狀態，呢個情形係有啲好似平時響我哋人間發夢一樣，只係死咗之後個神識所處於嘅空間呢，係屬於異次元嘅時空，又好似夢境同埋現實物質組合一樣而會進入全精神活潑渾濁嘅狀態，呢一切都係人嘅如來藏，即係潛意識第八識響度作用。

人死後嘅亡靈神識大多數會返到生前住嘅地方，或者係會時常去最喜歡或者印象最深嘅地方，而我哋嘅中陰神識全都係靠意念快速去飛行，任何嘅山川、湖泊、銅牆鐵壁、障礙城牆、花草樹木等等呢，都可以輕易飛穿而過。民間對於車禍意外死亡嘅亡者，都會牽魂或者招魂，以便將意外身亡響他鄉嘅亡靈帶引番屋企，再擺設靈堂香案或者壇城去做法事超度。人死咗之後嘅中陰幻境多數都會存在四十九日，而亡靈所處於嘅空間呢，係由人嘅如來藏所產生大量嘅精神放射作用而構成亡靈嘅時空感受同埋環境嘅。當人活著嘅時候，如來藏就成爲你嘅潛意識嘞。人所以有記憶，或者前世所遺留低嘅習慣、習性、行爲動作等等呢，都係由如來藏嘅記憶吸收嘅結果，但係到咗人陽壽將盡，或者因爲意外狀況而死亡嘅時候，呢個如來藏就會釋放出大量嘅資訊同埋影像，而且產生好似夢境之中嘅空間同感受，響呢個時候所謂嘅時間概念其實唔重要啦，係全憑亡靈生前嘅記憶去行事嘅。

至於講到中陰身呢個問題，中陰身響四十九日之內係唔需要食飯，中陰身嘅“食”係靠聞食，即是意思話用嗅覺去食嘢。我哋可以諗一諗，其實鬼魂係邊有牙齒、嘴巴、食道、腸胃等等嘅消化器官呢？因爲中陰身冇肉體，所以亡靈係以嗅食嚟食嘢，即係用個鼻去聞，所以我哋拜祭祖先嘅嘢，鬼魂嚟食嘅時候都係用個鼻去聞人間所供養、祭拜嘅食物嘅氣味，所以中陰身對於嗅覺同香味係好敏感，而且會聞香而嚟，所以西藏密宗有特別嘅除障香，當點燃之後可以用嚟驅趕鬼魂陰障或者邪靈，而佛教時常用嘅檀香、沉香，經咗燃燒之後呢，亦都可以用嚟闢邪驅凶嘅。

我哋響前面提過，中陰神識係嗅覺特別敏銳，而且都用嗅食嘅方式去維持中陰身嘅生命。其實男女響交會嘅時候，因爲愛慾嘅火被觸動同埋點燃，男女雙方響情愛、性慾嘅交會之中，就會釋放出一種味道同埋光明，咁響呢個時，異次元時空嘅中陰身就會見到一啲幻境大放光明，就會隨住而嚟㗎喇。

因爲人間男女響行淫嘅時候，雙方佢哋嘅腦裏便都會諗住情慾、美色等等嘅執著念頭，所以亡靈嘅中陰神識響純精神領域嘅狀態之中對於男女行淫嘅時候所產生嘅幻想就會起咗一個交感嘅作用，呢個時候中陰神識如果生前情慾係冇斷除，多數都會受到人間夫妻男女交會嘅時候所輻射出嚟嘅大量腦電波所吸引而飛馳接近男女交會嘅所在地。又由於男性嘅精子進入女性嘅卵子嘅時候，意思就話精卵受孕嘅時候，即係精同卵結合嘅時候會釋放出一種特別嘅異香氣味，呢種異香係亡靈特別喜歡去聞嘅，所以中陰身會向母體嘅胎門，即係女性嘅子宮飛去。而神識……（註：接下文）

219.情慾婚姻桃花劫（二）

（註：接上文）……而除非你能夠往生去佛國淨土啦，否則一受生到我哋人間，就有生、老、病、死等等嘅苦，一切苦難同埋煩惱，就係由生命開始出生嘅時候就一個接一個咁嚟。三界猶如火宅，人生無常，即使有快樂亦都係好短暫，所以淨土法門係好適合現在末法惡世嘅衆生，亦都可以講，佛菩薩嘅慈悲同埋方便，先會開放各個佛國淨土嚟救渡接引衆生嘅。

以前我都講過，父母嘅遺傳只係響小孩子嘅身體、五官外貌、組織器官等等方面嘅遺傳，但係個性同埋心理狀態就好難百分之百去遺傳嘞。同時呢，大體上嚟講，嚟投胎嘅靈魂，如果即將出生爲男仔呢，呢個靈魂響父母交會嘅時候，佢一定會喜歡母親嘅，而即將投胎做女性嘅靈魂呢，對於父親呢方面係較爲喜歡而被吸引過嚟。

所以我哋人間家庭裏便，父母所生嘅孩子，有啲個性同嗜好、習性吖，係會好似爸爸，有啲就會好似媽媽，呢一種道理就稱爲“業力嘅感召”。而且，呢個原因亦都係點解佛教家庭或者行善積德嘅家族會有善業功德而嚟投胎嘅仔女，而呢個仔女呢，通常都係孝順、乖巧，或者佢哋係靈魂品質比較高尚一啲，所以響人間行善積德、勤修佛法，都會影響下一代子女嘅宿命同埋靈魂品質，而胎教同埋育兒教育都係好重要嘅。

其實情慾唔係咁可怕，最可怕嘅係人類一陷入愛慾同埋感情之中，情慾嘅毒素就會使到人更加迷惑、貪執，同時亦都使到自己種下更深嘅愛慾種子，對於將來嘅生死輪迴之中又將成爲投胎轉生嘅因。人，就係咁樣反反復復、周而復始、輪迴不已，造下永無出離三界火宅嘅命運。

跟住落嚟，我哋同大家再講情慾同邪淫嘅對治辦法。相信大家都好有興趣聽一聽佛陀係點樣教我哋對治情慾同邪淫嘅方法。大家響聽頭先我講嘅時候，一定會深深感覺得到情慾呢個根本業障對衆生靈性嘅破壞力係好大嘅，除咗使到我哋生生世世響六道之中輪迴浮沉之外，佢熾熱嘅慾火更加焚燒咗我哋嘅心智，使到修佛同修道嘅人果位盡失，冇辦法進入涅槃寂靜。因爲愛染情慾係修行人最難斷絕同根除，咁我哋修佛嘅人又要有咩辦法去對治呢？

好多學佛嘅讀者同朋友有啲長久以嚟知道自己嘅情毒係好重，愛慾熾盛，但係又唔好意思同人講，又好傷腦筋，自己實在係好有誠意去長伏呢個邪淫嘅心。亦都有啲聽衆，生下嚟之後懂得事就發現自己情慾需求好強，自己嘅心靈時常被情慾嘅惡業所佔據，或者被自己嘅邪念淫心所打敗，一次又一次而想由腦海之中去除，但係實在係控制唔住自己腦海嘅浮現嘅邪念。另一種人係出社會工作之後呢，或者學佛之後先發現自己潛意識之中或者前世留低嘅情慾惡業。點解呢個愛染貪欲嘅慾望時常會破咗自己平時嘅理智同埋檢查嘅思考防線，而整個人會陷入強大嘅情慾雜念之中呢？亦都有啲人，由青少年發育期以嚟呢，時常都起邪淫心，受情毒嘅苦，愛慾需求永無止境，但係由於佢學佛，就好想修佛，由修佛法開始，心裏便嘅良知同覺悟心就日漸萌芽，但係實在亦都搵唔到對治情慾淫心嘅辦法。

以上嘅種種問題，各種宗教，譬如回教、天主教、基督教、道教等等，大多數以禁慾守戒嘅辦法，或者向上帝認罪祈禱嘅辦法去對治邪淫、不貞潔、縱慾放蕩嘅罪業，但係對於情慾業力強大嘅人，用禁慾嘅方法去對治，不僅效果唔大，有時反而會引發更嚴重嘅後果。

佛教對治情慾嘅毒，應該係比較圓滿。佛教除咗有戒律、禁令之外，佛法之中仲有各種懺悔、密行消除情慾毒素嘅方法。佛教首重智慧，能夠觀透惡業、情慾嘅根本結構，就對症下藥呢，如何應時、應緣、應機去對治情慾嘅毒。跟住落嚟我爲大家提供一點淺見，希望能夠俾你一啲啓示，或許你嘅朋友、親人，或者佛教徒時常爲情毒所苦所困擾，呢個時候，或許你可以幫佢一臂之力去降伏情毒嘅毒素。

不淨觀與白骨觀

響修行上嚟講，就算一個人朝頭早清醒嘅時候，佢守法守戒、中規中矩，但係響夜晚瞓覺嘅時候，潛意識嘅淫心種子其實都會走出嚟作怪嘅，而響夢裏便，我哋造作種種嘅邪淫重罪，其實都係犯咗戒律。另一種就係前面章節所講嘅，一位禪修高僧響禪坐嘅時候產生貪愛美色嘅幻境，最後起咗魔障。而當你響淫心情慾嘅種子濃度仲好濃嘅時候，響禪坐之中其實係好容易由心之中產生邪淫嘅雜念，我哋可以稱之爲“心魔”，所以響夢中或者禪定之中要有警覺性。而響夢中亦都係可以修行嘅，夢境之中你不但可以修行，而且對於每一種夢境唔同，都可以加以解夢。

響嚴格嘅修行同埋規定之下，響夢中或者禪定之中犯咗邪淫重罪呢，其實都係算做造業，因爲呢啲貪愛淫慾嘅劣根性係深藏響你嘅如來藏之中，而如來藏係構成亡靈中陰神識嘅主要元素，而且會下地獄受各種邪淫嘅惡報，亦都係人嘅神識。而且地獄之中種種鐵床銅柱、刀山劍林都係神識惡業力量所顯現，人生活響夢裏便貪淫好色，時常犯邪淫重罪，到死咗之後都係一樣罪業深重。

所以要漸漸去除情慾邪淫嘅第一步，就係響日常生活之中要時常生成正念同埋正思惟，而且要時時注意自己嘅念頭，觀照自己嘅起心動念之間邪念淫心有冇浮現或者鑽出嚟呢？呢種禪宗嘅基本修養係要有嘅。人一唔留神呢，腦裏便嘅情慾毒素就走出嚟啦，當自己有咗警戒心之後，跟住嚟就要練習不淨觀。

淫心好色嘅人，實在係好難擺脫美色嘅誘惑，但係應該去諗一諗，女仔或者男仔雖然容貌係好，係莊嚴，但係好喜歡，你好想佔有佢，但係如果你有警覺嘅心，不妨將佢由頭到腳嚟睇一睇，去觀察一番。首先你睇下佢頭上嘅秀髮，佢個頭上嘅秀髮呢，其實同動物嘅毛，同象吖、馬吖、其他動物嘅毛呢，都係一樣，本質係冇分別。再睇一睇佢頭髮之下係有骷髏，骷髏之下係得幾塊骨頭，我哋睇下屠夫所殺豬嘅屋企之中，豬頭都係得幾塊骨頭走埋一齊，拼合埋一齊。我哋再睇一睇佢裏便嘅腦，腦裏便有腦漿，腥臭難聞，如果𢱕喺地下度，冇人夠膽踐踏，係好惡心。

眼睛點樣迷人，但係挖低攪碎佢只係啲汁液，而人嘅鼻中有鼻涕，口中有口水，腹中全部係肝肺、屎屎尿尿，同埋一啲蟲，係好腥臭。再嚟係人嘅腸胃膀胱，再嚟全部係糞便，種種難聞不淨嘅嘢，而人嘅四肢手足，骨節同骨節相抵，筋身皮張因爲呼吸而動，呢個同木牛流馬有咩分別呢？如果解剖身體，支離破碎、血肉狼藉，個個人都係一樣，有咩嘢美麗同漂亮？無論係俊男或者美女，時間嘅刮痕好殘酷，人會死，到頭來只不過都係一堆白骨啫。

以上所講其實係比較簡單不淨嘅觀法思惟，呢啲正思惟可以話俾你聽、提醒你，話俾你聽智慧理性嘅清醒度，平時我哋應該多啲去照以上方法所諗，跟住以上嘅線索，自己去思考一下男色同女色種種嘅不淨，你嘅邪淫愛慾係會因爲你嘅正念增強而減少嘅。但係禪宗對於不淨觀有九種正統嘅觀想方法，所謂“運九想，除六慾”。聽衆可以響平時禪坐或者正思惟嘅時候，多加運用呢個九種不淨觀嚟對治自己生命之內情慾邪念同埋愛染心。呢個九種禪定嘅不淨觀法，我簡單講一講。

第一叫做胖脹想。胖脹想係諗人死咗嘅時候，身體首先開始發胖發脹。

第二係青瘀想。青瘀想係我哋諗一諗死屍死咗之後，身體發脹之後，係會產生青斑、瘀斑喺身體，屍體上嘅顏色。

第三點係壞想。有青色瘀色嘅時候，屍體就開始壞，一塊一塊開始敗壞。

第四係血塗想。敗壞之後，屍體嘅血就化爲液體，白色，而喺身體好似膿咁慢慢流出嚟。

第五係膿爛想。白色嘅液體跟住濃流出嚟，屍體就開始逐步逐步腐爛了。

第六係蟲啖想。再嚟就會身上好多屍蟲走出嚟吞食呢一具屍體。

第七係分散想。啲蟲吞食屍體呢，我哋身體嘅皮毛血肉就漸漸分散完畢了。

第八係白骨想。分散完畢之後，其實冇咗血肉，留低嘅只係一堆骷髏頭，一堆白骨。

第九係塵土想。日子耐咗，一陣風吹啫，我哋嘅白骨又化爲灰塵隨風而去了。

人呢個臭皮囊，由死亡而敗壞化爲灰燼，自然而然都會出現上述嘅九種敗相，無論富貴貧賤、智愚賢者、男女老幼、好嘅醜嘅，到頭來都係一樣啫，所以世人唔知道喺度爭一啲咩嘢，追逐一啲咩，死後塵歸塵、土歸土，乜嘢都冇，只有業隨身。

所以禪修嘅人，可以用上述九種不淨嘅觀想法嚟觀照自己或者你最貪愛嘅人，無論係美係醜，皮包骨吖，或者內在係腸肚屎尿，又有咩嘢可以貪戀可愛嘅呢？當你深深感覺到呢個身體唔值得貪愛同埋留戀嘅時候，你嘅心境就會好平靜，妄想、雜念就會沖淡，心如止水。心念定、安寧，唔起邪淫嘅慾念，呢個時候，你所修持嘅不淨觀法門可以算做就係有初步成就了。

你如果響不淨嘅白骨觀修持之中有進步或者有心得嘅話，希望你可以教人，教一啲時常被情慾、愛慾所荼毒嘅人，希望佢哋都能夠解除苦惱。只有佛法先係最究竟同最有效徹底淨化人心，佛法亦都有高超嘅智慧同埋大方便嘅殊勝法門俾大家去參考。除咗不淨嘅白骨觀之外，佛教之中仲有密行、拜佛、懺悔、苦修等等種種消除罪業嘅方法去針對情慾、邪淫方面，亦都係好有作用嘅。

跟住我哋嚟講下響佛前求懺悔同祈禱嘅修法。

當你犯下邪淫重罪或者情慾心重嘅時候呢，其實可以響佛前去求懺悔嘅。如果你因爲生命嘅覺醒，痛悟到邪淫惡報嘅可怕而內在生起大慚愧、厭離或者恐怖嘅時候，你可以跪響佛前，雙手合十，一心仰告佛菩薩，真誠咁樣表露，好似下便呢一段說話咁講：“誠心懺悔，弟子……（然後響‘弟子’之下講出你嘅名稱或者法名），因一時嘅無知同埋糊塗，造下咗……（依度就講你造下咗嘅罪業，造下咗某一啲邪淫嘅惡業），罪不可赦（如果係你情慾心嘅呢，就應該改爲‘情慾心重，因爲平時起邪淫同埋妄念，無法平息同埋痛苦不堪’，響‘一時無知同糊塗’呢句，‘造下咗’裏便就加頭先我所講嘅‘因爲我邪淫，情慾心重，冇辦法平息，痛苦不堪，造下咗罪不可赦嘅業’），唯願佛菩薩慈悲攝受，佛力加持我，使到我一切淫念同埋惡業都能夠得到消滅。”

你應該學似以上嘅說話咁講，響懺悔嘅時候，應該攞出你至誠同懇切嘅心，而且要將所有嘅邪淫同惡業一五一十話俾佛菩薩聽，請求佛菩薩慈悲加持，使到你嘅罪業清除，最後響佛前要發重誓願，保證以後一定唔好再犯。

響佛前求懺悔嘅好處呢，係有時靠自己嘅力量去懺悔，力量不夠呢，而響佛前求懺悔，咁一方面仰仗佛嘅加持，第二方面響十方佛菩薩同龍天護法作證之下，以後自己遇到類似嘅境界或者狀況，亦都比較係唔會再犯一個業嘅，咁樣一方面可以將以前惡業懺悔清除呢，以後吔，又能夠避免再犯。咁樣唔造惡業嘅因，點會招感惡道嘅苦報呢？

此外，響佛菩薩嘅法門之中，又以觀世音菩薩嘅法門吖，係最容易，亦都最有效，能夠清淨我哋內心嘅情慾嘅業，所以平時應該勤修觀音嘅聖號，譬如四臂觀音菩薩嘅六字大明神咒，或者千手觀音嘅千手千眼無礙大悲心圓滿陀羅尼呢。有時間嘅，如果能夠多多去修持如意七寶塔去圓滿你嘅願望、去懺悔你邪淫嘅業，咁就更好。

第三點，我哋要講下慈悲衆生觀想嘅修法。其實慈悲觀呢，亦都係對治情慾邪淫嘅一大利器，千祈唔好忽略呢一點。無論係不淨觀或者係慈悲觀，都唔係另外製造一種觀想嚟要我哋去揣測、去想象，只不過自古以來證悟生命實相嘅祖師大德響見到生命呢啲真實狀況嘅時候，內心生起大悲憫而話俾我哋聽呢啲觀想生命真實情況嘅方法。

跟住落嚟，我要介紹慈悲觀嘅其中一種觀想。我哋凡夫嘅肉眼真嘅係難，不僅隔一張薄薄嘅紙就見唔到對面，對於過去未來嘅好多因緣果報都係盲無所見，而得道嘅聖人就可以見得到嘞。原來我哋無量劫嘅生死沉淪都係曾經互爲父母夫妻、兄弟姐妹，我哋屋企裏便所養嘅寵物呢，好可能就係我哋過去世嘅親朋戚友，而我哋餐桌上所食嘅，更可能係我哋以前嘅至親骨肉。咁樣講，聽起嚟其實好似好荒謬、好無稽，但係修行成就證悟嘅人所共同見到一致警告人嘅其實就係呢啲實相，所以，當你見到一位令你心動嘅美少女嘅時候，可能佢正係你過去世嘅姐妹，而當你正想跟佢有來往、有污染嘅時候，你就應該要諗一諗，佢可能係你以前對你好親切、好有悲憫、好愛錫你嘅媽媽。

我哋無始劫以來生死輪迴，好可能都曾經互爲親朋摯友，呢個就係點解慈悲觀話俾我哋聽，要將年紀比我哋大嘅女性去睇成我哋嘅母親，或者姑姑，或者阿姨，年紀同我哋相當嘅呢，要睇做我哋嘅姊妹，而且年紀比我哋細嘅呢，要將佢哋睇做我哋嘅子女。透過呢種不斷嘅思惟同觀想之後，當然唔係一日啦，如果你觀想一日就放棄，就冇用，應該日以累積去熏染我哋識田，用慈悲觀，用不淨觀，用呢啲觀想去熏染我哋嘅思想，修習日子耐咗就自然會成功。

由於心存慈悲去修習呢觀想，就會慢慢同佛菩薩相通，就能得到佛菩薩嘅加持而漸漸去除我哋內心嘅情慾、邪淫嘅毒素。如果你做一日就話能夠去除你毒素，就放棄嘅呢，其實係一個愚痴嘅想法，應該要加以恆心，有毅力去做呢啲觀想，因爲慈，因爲呢個淫慾嘅毒響我哋內心裏便扎根咁耐，生生世世，唔係一時間能夠除去嘅。響呢個時候，你情慾嘅淫心毒素除去，你就會發覺你心中嘅淫念妄動同非分之想其實就算唔除去，透過觀想都係會減輕好多，有咗呢啲正業之後，你就能夠百尺竿頭更進一步去勤修佛法，去徹底拔除你嘅淫根，永斷呢一生嘅生死根本。

佛法法門廣大，有八萬四千咁多，如果你暫時學唔到白骨觀、不淨觀或者慈悲觀等等嘅觀想，亦都可以首先修持我下便介紹一種簡單嘅觀音法門。只要你能夠誠心有時間去禮供、修持，一定能夠得到觀世音菩薩嘅慈悲加持，去清淨你生命之中堅固嘅情慾業障。

跟住我哋講下，就係要介紹嘅觀世音菩薩禮誦法。

第一，我哋要設像去供養。如果我哋家中係已經有佛堂，只要有西方三聖像或者觀音聖像就可以嘞。如果冇壇城呢，或者住響外面嘅宿舍、學校、機關、部隊等等，可以請一張細嘅西方三聖像或者觀音像，佢，要將佢啤膠或者擺相架裏便，修法嘅時候攤開淨布或者淨紙，而將你觀音像擺喺上便，或者亦都擺，擺喺乾淨嘅書檯上便。我哋供奉嘅像嘅時候應該要展開經卷，慢慢去誦讀經文，然之後修法完畢，就可以將呢個聖像包番佢放喺乾淨嘅地方。

第二點，我哋需要禮拜唸誦。可以首先面對佛像，虔誠默唸或者朗誦“南無西方極樂世界大慈大悲救苦救難廣大靈感觀世音菩薩摩訶薩”，三稱三拜，或者問訊。然後拜完端坐或者長跪響佛像之前，要恭唸“南無大悲觀世音菩薩”，亦都係三稱，再唸《妙法蓮華經觀世音菩薩普門品》一卷，然之後再去唸《般若波羅蜜多心經》一卷，然後再唸大悲神咒一遍或者三遍，跟住應該恭唸讚觀世音菩薩嘅偈嘅：“觀音菩薩妙難酬，清淨莊嚴累劫修。三十二應遍塵剎，百千萬劫化閻浮。瓶中甘露常遍灑，手內楊枝不計秋，千處祈求千處應，苦海常作度人舟。”再唸嘅係“南無西方極樂世界大慈大悲觀世音菩薩”，一稱，起座繞唸或者坐喺度唸都可以，然後再唸“南無觀世音菩薩”數百聲或者數千聲，然後再唸“觀音菩薩”百聲或者千聲。

第三個步驟，我哋要發願回向。應該要稱念“南無本師釋迦牟尼佛”，三稱三拜，然後再唸“南無阿彌陀佛”，一樣三稱三拜，再唸“南無觀世音菩薩”，一樣三稱三拜，最後唸“南無清淨大海衆菩薩”，三稱三拜。跟住我哋要跪唸，誦唸祈禱嘅願文：“南無過去正法明如來，現前觀世音菩薩。成妙功德具大慈悲。於一身心現千手眼。照見法界護持衆生。令發廣大道心，教持圓滿神咒。永離惡道得生佛前。無間重愆纏身惡疾，莫能救濟悉使消除。三昧辯才現生求願，皆令果遂決定無疑。能使速獲三乘，早登佛地。威神之力歎莫能窮。故我一心求哀護持，十方三世一切佛，一切菩薩摩訶薩，摩訶般若波羅蜜。”然後一拜。

跟住唸：“弟子……（稱自己嘅名，法名或者俗家名）”，然後再唸：“普爲四恩三有，法界衆生，至誠懺悔。願我及衆生，往昔所造諸惡業，皆由無始貪瞋痴，從身語意之所生，一切我今皆懺悔。”一拜。

然後：“弟子……（稱自己嘅法名或者俗家名），普爲四恩三有，法界衆生，至誠懺悔。願我及衆生，願消三障諸煩惱，願得智慧及秀巧，普願災病悉消除，往生完成菩薩道。”一拜，然後再：“以此功德回向……（再講你嘅心願，自己可以隨意祈禱，譬如父母康寧啦，家宅平安，或者求男求女、國運昌隆等等都可以）。”

第四點，就要唸三歸依啦。應該起立合掌恭唸：“自歸依佛，當願衆生，體解大道，發無上心。”一拜。“自歸依法，當願衆生，深入經藏，智慧如海。”一拜。跟住再唸：“自歸依僧，當願衆生，統理大衆，一切無礙。”一拜。於喺佛前三禮拜之後，再一問訊，咁就課誦完畢。

依個係簡單嘅觀音修持法，呢個禮誦方法唔係一定限住，可依時間其實自由增減嘅，《普門品》可以唔唸，可以改唸《心經》，或者直接唸大悲咒，如果唔識字，可以直接由偈讚唸起，或只修觀音菩薩聖號。

220.前世記憶潛能（一）

各位師兄，今晚同大家講嘅題目呢，有冇收到呢啲通信吖？有冇收到通信吖？有邊位師兄冇收到通信吖？如果冇收到通信呢，就留低你嘅地址嘞，因爲呢，淨係講你嘅名呢唔足夠吖，有啲師兄話收唔到通信啦，因爲佢冇擺低自己嘅地址吔。如果你將你地址擺低啦，法輪會就會通知你嘞，吓，如果冇呢，就一陣同阿龍姑娘呢，登記你嘅地址，咁變咗你收到通信呢，可以選擇到個題目同埋配合你哋作息嘅時間，睇下啱唔啱聽呢個題目。

咁今晚同大家講嘅題目呢叫做《前世記憶與潛能》。嘩！呢個題目個名好吸引吖，一講到前世咧，好多人呢，都想了解下究竟佢前生係乜嘢嚟，係嘛？特別學咗佛嗰啲人呢，有個好奇嘅心。

咁一般人呢，想了解佢嘅前世呢，有咩方法吖？係唔係去睇三世相吖？查三世書？我聽到好多人話查三世書嘅喎，但係呢，我覺得呢，三世書好似有啲荒謬吖，荒誕不羈，因爲點解呢？咁多人出生嘅八字，梗有人相同嘅，但係嗰本三世書呢，我都睇過，大部分都話你前生係中國乜嘢乜嘢人嘅、喺咩地方、咩省出世嘅、有幾多錢吖，吓，做過啲乜嘢，好簡單，但係好似冇外國出生嘅喎，三世書我睇，所以呢，我哋學咗佛之後呢，就唔好去查嗰啲三世書了，聽講有幾個嗰啲師傅呢查三世書好出名嘅，吓。

咁佛教講嘅“三世”呢，同術數裏便吖，所講嘅“三世”係唔相同，術數講嘅“三世”呢，就係你今生呢，現在呢，對上一世係前世，而家係今生，來生又係一世，就夾埋就三世嘞。三世書只係查到你對上嘅一生啫，就算係準的話。但係佛教講嘅“三世”呢，就係過去你有無盡嘅生命，由於你去造業，有善、惡、不善不惡嘅行爲呢，呢啲力量呢，影響你繼續不斷吖，響宇宙裏便去轉生，我哋今生如果唔修行嚟講呢，唔解脫生死呢，永遠受宇宙裏面嘅時間同埋空間控制，將來亦都有無盡嘅轉生，有無盡嘅生命，一世一世咁輪迴落去，吓。所以佛教所講嘅“三世”呢，係無盡，過去世無盡，直至你現在，現在再去造業呢，亦都會輪迴啦，到無盡世代嘅將來，所以我哋唔想我哋嘅生命延續落去。

咁吖每個人都想長壽啦，我講唔，我講我哋生命延續落去呢，就唔係話今生唔想長命，我意思就係話，如果你想今世之後希望能夠解脫生死嘅，唔響天、人、阿修羅、畜生、餓鬼、地獄六道裏便輪迴嘅，今生你就要開始修行，修行之後呢，就可以擺脫呢個六道輪迴而得到一個宇宙不生不滅嘅永生，呢個就係佛教所講嘅未來世，解脫生死嘅未來世。如果你今生唔修行的話呢，繼續不斷受時間、空間影響，去控制呢，將來你會繼續出生響六道裏便輪迴，所以而家我哋得到人身，聽到佛法，係好重要、好寶貴，我哋要珍惜呢啲時刻，珍惜修行，我每次都係咁講，希望大家把握到你學識嘅佛法，識幾多去做幾多，咁將來呢，你就能夠呢，解脫生死。

咁我哋分開兩部分嚟講吖。第一部分呢，講前世記憶，第二部分呢，再講點樣開發我哋嘅潛能，簡單講一講。

我哋嘅前世記憶呢，其實係保存咗響我哋嘅阿賴耶識裏便，佛教裏便講八識——眼、耳、鼻、舌、身、意、末那、阿賴耶，阿賴耶就係第八識，我哋生命輪迴嘅本體，咁我，響我哋佛教裏便呢，叫做“神識”，但係其他宗教，譬如天主教叫做“靈魂”，道教叫做“元神”，咁比較科學啲嘅名稱呢，就叫做“精神體”，啫係除咗我哋物質嘅身體現象之外，精神嗰部分。我哋人呢，係物質同精神兩部分結合，咁第八識阿賴耶識呢，係我哋輪迴嘅本體，而呢個阿賴耶識吖，生生世世都保存咗啦，我哋吖，做善事、惡事、不善不惡中性嘅行爲嘅種子吔，響我哋阿賴耶識裏便，猶如一塊田地一樣，所以我睇佛經裏便呢講“識田”，“識田”吓嘛？叫做“識田”呢個名稱，猶如一塊田有好多種子響裏便，呢個種子呢，經過灌溉，一塊田嘅種子經過陽光吖、水分吖、泥土吖、施肥吔，呢啲灌溉呢就會發芽生長。咁我哋前生所做嘅善事、惡事同不善不惡嘅事呢個種子呢，就保留響我哋呢個阿賴耶識嘅識田，我哋今生再做善、做惡或者不善，不善不惡嘅行爲呢，猶如對啲種子呢灌溉吔，淋水吔，吓。

以前喺阿賴耶識所種下嘅“因”，我哋淋水呢就係“緣”，今生我哋亦都會繼續做善、惡同不善不惡嘅事，因緣結合呢，就會變成一啲果報。善有善報啦，惡有惡報，不善不惡啦，就係我哋平時一般生活嘅行爲習慣，各人嘅喜好唔同，就不善不惡嘅業嘅力量，導致有呢啲行爲嘅結果。

咁所以其實我哋前世嘅記憶吖，係保留響我哋嘅阿賴耶識當中，第八識，阿賴耶識，咁有一啲人呢，譬如現代嘅科學，通過催眠嘅方法，就可以將個人慢慢慢慢控制，催眠咗之後呢，然後進入沉思，好似類似我哋打坐吖，禪定嘅狀態呢，就會將佢前生憶述番出嚟嘅。有冇聽過吖？呢啲，將前生憶述番出嚟：前幾世喺邊度生活過、係咩嘢人、有幾多兄弟姊妹、父母係點樣。通過催眠，可以做到呢一啲嘢。

咁其實係阿賴耶識裏便嘅部分嘅種子，激發咗呢種子呢，就變成咗一個現象，俾呢個人憶述番過去，啫前世吔，佢所做嘅事。咁我哋如果能夠將個阿賴耶識開發，響佛教裏便呢，就係將第八識轉成大圓鏡智，好似一個清淨光明嘅圓鏡一樣，就佛陀本身嘅智慧。呢個智慧呢，就能夠呢，知道我哋前生一生一生嘅事，無盡生、一生一生點樣輪迴而做到今世，我哋呢會好清楚好清楚，如果將呢個神識開發咗，轉變成智慧。

咁我哋嘅前生記憶，其實係保留響我哋前世輪迴裏便，咁響我哋輪迴轉世呢，一共呢，一般呢，有五條道路，有五大管道呢，我哋係前生係乜嚟嘅，導致我哋今生呢，去投胎呢，去做人。

咁第一種呢，就係前生我哋係人嚟嘅，今生我哋再投胎做人，咁呢，今生呢，你係做人嘅習慣呢，就會好深吖。啫譬如，你前生係人，做人嘅原因呢，你一定要守五戒十善，今生先有機會再輪迴做人。不殺生啦、不偷盜啦、不邪淫啦、不妄語啦、不飲酒啦、不貪啦、不瞋啦、不痴啦、不綺語啦、不兩舌、不惡口、不妄語，吓，呢啲五戒同埋十善導致我哋做咗呢個因，導致我哋今生輪再做番人，呢個就係“因”嚟嘅，今生，前生我哋守五戒十善係“因”，今生做人呢，就係“果”嚟。

另外一種呢，我哋係前生呢，由地獄吖，受完苦報，今生再轉生爲人。如果地獄受完苦報呢，今生再轉生爲人呢，我哋見到好慘，有啲人呢，身體殘廢吔，隻眼失明吖，盲吖、聾吖、啞吖，因爲佢喺地獄受完個苦報再轉生嘅時候，佢做咗好重惡業先會落地獄吖嘛，吓嘛？如果佢唔做重惡業，佢唔會落地獄。有啲衆生就喺地獄受咗漫長嘅地獄嘅苦報，火刑吖、刀山吖、劍樹吔、鋸崩吖，呢啲種種嘅地獄嘅苦報呢，個神識，響，唔係太健全，而後再輪迴嘅時候呢，所以佢嘅身體就有殘缺。譬如我哋街邊見到啲乞丐嚟講呢，有啲係盲嘅、聾嘅，吓嘛？有啲係身體殘缺不全。如果我哋前生係做咗惡事，吓，譬如殺，犯咗五戒，殺生吖特別，我哋除咗要酬償俾人殺嘅報應之外，再輪迴轉生，亦都要受地獄嘅苦報嘅制裁，然之後欠人嘅債呢，再轉生之後呢，就要還番俾你嘅債主，有機會再轉生做人嘅時候呢，就會身體上殘缺不全。

如果你前生譭謗佛法吖，你謗佛法、鬧佛陀，唔相信佛法，咁你受完地獄嘅苦報之後再轉生呢，可能你聾，亦都可能你會啞嘅。有啲人好後生，五官好端正嘅，但當你同佢講嘢，點知佢用手語同你表達嘅，啞嘅原來，吓嘛？呢啲就係響地獄受完苦報再轉生上嚟嘅衆生。我哋見唔見到呢啲現象吖？今生見到，有好多聾嘅，吓嘛？有好多啞嘅，我哋亦都接觸過可能，有啲係我哋嘅朋友嚟嘅。呢類就係地獄受完果報再轉生爲人。

有一類呢，由天界轉世人間嘅。嗱，頭先講番地獄轉世呢，做番人嘅時候呢，今生佢會投生響啲貧窮、下賤個國家裏便，亦都朝頭早嗰餐，諗得到，又顧唔到夜晚嗰餐，亦都生喺戰亂嘅地方，個環境係好逼迫，比較係慘啲，冇我哋前生係人、今生係人呢，再投生嗰個生活係比較安定嘅，穩定啲。而第三種由天界轉生，做我哋人呢，當我哋守五戒十善，上品嘅五戒十善就可以生天嘞，啫好嚴格，前生我哋做過五戒十善，我哋有機會呢，轉生去做天人。咁天界嘅人呢，佢嘅壽命比我哋人類吔，非常之長，個福報好大，但係亦都有一個壽命嘅期限嚟嘅，當佢壽命期限到，壽命一完結咗之後呢，佢有機會，個福報仲未盡吖，仲有個福呢，再有機會轉生爲人。嗱，呢一類人呢，我哋容易響而家嘅社會裏便，或者我哋嘅朋友裏便見得到，呢類人喺天界轉生嚟我哋人間嘅人類嘅特點呢，佢好容易出生響個富有嘅家庭，或者係王子，甚至係國王，咁生活兩餐呢，起碼都無憂㗎已經，有冇呢啲人吖？有，同埋由於有呢個福報咧，今生可以俾佢儘量使錢，可以揮霍，同埋咧，基本上物質咧，物質嘅條件已經好滿足佢生活，好滿足佢生活。

當然啦，有錢人一樣有痛苦㗎嘛，係嘛？係佢心理上嘅痛苦，每個人都有，由於我哋前生所做嘅惡業，但係普遍性呢，響物質嘅條件嚟講呢，天界轉生嚟我哋人間嘅人呢，人同人比，人有品流複雜，上中下三層嘅人，佢哋屬於上層，比較上層階層嘅人嚟，因爲佢嘅福未盡，吓，所以天界轉生呢，就有呢啲特點。

另外一啲天界轉生嘅人呢，由於佢天界裏便呢，亦都有神通，吖，有種種嘅神通，所以今生呢，再轉生爲人嘅時候呢，佢容易有啲特異嘅功能。譬如我哋見到有啲氣功呢，而家大陸所講嘅氣功，有啲氣功師，或者有啲教氣功嘅人，佢有啲眼可以睇到靈界嘅，或者係耳呢，可以同靈界溝通聽到佢說話。呢一類就係天界人轉生，可能佢神通未消失得晒，仲有啲餘力保留咗響度，所以我哋容易見得到有呢類人出現，呢一類都係天界轉生嘅人嘅特性嚟，吓，呢個比較簡單嘅角度去描述。

第四類呢，就係由阿修羅界呢，轉生而嚟。我哋呢，亦都時常呢，好接觸得到，如果由阿修羅界呢轉生我哋人界呢，譬如前世你阿修羅嘅，今生你轉生咗做人嘅，你個心好中意好勇鬥狠吖，個瞋恨心好強。因爲阿修羅呢，係一啲精靈，高過人界，但係升唔到上去天界，半浮半沉嘅精靈。佢呢，時常興兵呢，喺佛經裏便記載，侵犯帝釋天，啫我哋玉皇大帝嘅宮殿，希望得到個宮殿，所以玉皇大帝天界裏便成日都練兵嘅，要操兵嘅上便，好似我哋人間練兵係抵抗阿修羅嘅侵略，佢哋嘅神通都好大。阿修羅呢，係精靈界一類嘅衆生嚟，咁阿修羅呢，佢主要嘅心態，個心念吖，佢係瞋恨心，所謂一念無明火呢，能燒功德林。今生我哋接觸到嘅朋友，如果佢好容易起火嘅，瞋恨心好強，亦都有破壞性，有毀滅性嘅，呢一類人呢，就有機會係由阿修羅界亦都可能係魔界，吓，轉生呢，響我哋人間裏面。雖然而家我哋嘅人吖，具足五官吖，眼、耳、口、鼻，好似樣樣器官都齊全具足，但可能我哋嘅心呢，比古人嘅心呢，冇咁純樸，啲古人嗰啲相呢，睇番啲書畫出嚟呢，好似啲野獸嘅，但係呢，個心呢，就好純樸，好光明，但相反我哋今日五官具足，眼耳口鼻齊全呢，有手有腳，但我哋嘅心呢，人類嘅心呢，好壞，有瞋恨心，係嘛？有惡毒嘅心，咁呢一類嘅人呢就阿修羅，阿修羅界轉生，因爲個神識生生世世有瞋恨心，所以佢轉生嘅時候呢種瞋恨心呢，帶埋響今世裏便，唔能夠消失，雖然個肉體係人吖，但個精神係阿修羅嚟㗎嘛，係個神識裏便，冇變壞㗎嘛，係一個，形成一個瞋恨心嘅習慣。

最後一類呢，投胎做我哋人界嚟講吖，有一類係乘願再來呢，嘅佛、菩薩嚟嘅，或者阿羅漢嚟。因爲釋迦佛呢，曾經講過，響我哋末法嘅時期裏便呢，雖然有好多魔啦，破壞我哋修行，但係有楞，釋迦佛亦都響《首楞嚴經》有講過啦，或者其他經典，佢暗中派遣一啲菩薩或者羅漢，甚至喺當時同釋迦佛跟隨佢學習嘅弟子呢，當然係有道行嘅，轉生響呢個人界裏便呢，去輔助佛法復興㗎，去幫助佛法，去度化衆生嘅，去教化衆生。呢一類咧，有個願力而嚟嘅釋迦佛嘅弟子，或者菩薩，呢一類係乘願再來，“乘願再來”嘅意思即是話，有個願望要嚟度化衆生，響呢個末法黑暗嘅時期，希望能夠呢，將一啲佛法嘅光明呢，帶俾衆生。

譬如地藏菩薩嘅精神係“地獄未空，誓不成佛”，觀世音菩薩嘅心亦都係慈悲，佢哋亦都有好多化身響人類裏便，不過你唔知邊個係之嘛，佢亦都唔會話俾你聽：“吖，我係觀世音菩薩，你拜我，叩頭供養我。”如果佢咁同你講呢，有個人咁講，我就要小心啲吔，呢個肯定七至八成就唔會係啦，因爲菩薩轉生呢，佢度化衆生呢，佢唔會貪求衆生嘅名聞利養，佢會暗中去工作，默默耕耘，將佛法去復興，喺黑暗嘅時期，響呢個末法嘅時期，希望能夠呢，將光明呢，帶入衆生嘅心裏便，令到佢哋學佛，離苦得樂、覺悟菩提。呢個第五類乘願再來嘅佛嘅弟子，有釋迦佛嘅弟子，有菩薩，亦都有阿羅漢，響我哋啲末法時嘅世間，分散響我哋世界各地都有，有呢啲咁嘅人。譬如呢啲，呢一類嘅聖者，我哋好簡單可以舉例啦，譬如我哋都有聽過禪宗六祖惠能，有冇聽過吖？六惠能大師，惠能大師好出名吖，佢亦都係一個菩薩嘅再來去度化衆生啦。其中歷代有好多開宗立派中國嘅祖師呢，亦都係菩薩再來，去度化衆生，因爲佢開宗立派有佢嘅成就，佢希望藉助釋迦佛嘅佛法，某一本經呢，去攝引衆生，所以開宗立派。呢啲祖師，通常呢啲宗派所嚟嘅祖師呢，都係乘願再來嘅菩薩嚟。

所以頭先我講過呢，有五，五種前世輪迴，今生，今生做人嘅五種管道。第一種可能你前世係人，今生再投胎做人；第二種呢，你前世喺地獄裏便受報完畢，今生再轉生做人；第三種，由天界轉生人間；第四種，由阿修羅界而嚟；第五種呢，就係佛嘅弟子同埋菩薩乘願再來嚟度化衆生。當然呢，唔可以用呢五種嘅轉生呢，去統括晒所有宇宙間嘅輪迴嘅現象啦，但係我哋身邊接觸嘅人呢，呢五，五種嘅性質嘅人呢，係多的是嘅，但係你唔知咁解，你可以由佢嘅外表、佢嘅行爲、佢嘅性格去判別得到。

譬如我又講番如果係前生係人，或者你前生好多世係人嘅輪迴，今世再做人呢，你嘅執著心比較重吖，對於世間上嘅情愛吔，父子之情吖、兄弟之情吖、朋友之情，呢啲情執嘅觀念好重。由於呢個情執咁重吖，先會輪迴嚟呢個娑婆世界去做人，所以我哋情念執著重呢，就容易做到人，我哋好容易分析得到。譬如假設，你係由旁生道動物，前生係動物嚟，或者好多世係動物，還完債，今生先再轉生做人嚟講呢，動物係咩吖？愚痴，係嘛？譬如你叫啲動物唸佛，佢會唔會唸佛吖？唔會唸佛，所以佢係愚痴。所以佢轉生，今生有機會，如果你前生係動物，今生有機會轉生再做番人呢，你智慧係好低嘅，唔係一點就明嗰類吖，講極都唔明吖，啫係話牛皮燈籠——“你個仔係牛皮燈籠！”解極都唔明。同埋係唔相信佛法，佛法，甚至會譭謗佛法，對於宗教無信仰，呢一類就係愚痴，可能係動物界轉生而嚟，只係有好簡單嘅人本身嘅本性，財色名食睡，食完就瞓，瞓完就食，呢啲係動物嘅性嚟嘅，吓。你檢查下你身邊嘅朋友，如果係比較係呢啲情執太重嘅呢，就係人界轉生，如果愚痴心強呢，就係動物界轉生。係嘛？有冇呢啲朋友？有啦，可以檢查得到。

咁跟住我哋講呢，我哋前世記憶點解會被封蔽？點解？嗱，譬如我哋而家出生咗做人，我問你：“你上一世係乜吖？”有冇人，有冇人發過夢知道佢上一世係乜吖？有冇人想講下？你知唔知你自己上一世係咩嚟㗎？我知你個心裏便好想知吖，係嘛？不過我答唔到俾你，我話唔到俾你知你前生係乜，係嘛？但係你偶爾發夢呢，有時都會知道自己係乜嘅喎，譬如有啲人同我講過佢發夢吖，成日發夢發到佢自己喺天空度飛嘅，呢啲夢境呢，就係你潛意識起作用。當我哋平時呢，我哋嘅顯嘅意識——眼識、耳識、鼻識、舌識、身識，呢啲咁嘅“識”呢，執著世間嘅種種嘅嘢，我哋潛意識第八識呢，就被壓伏埋藏咗，但係當我哋瞓覺嘅時候呢，眼、耳、鼻、舌、身、意呢，潛伏咗，第八識開始活動就容易發夢。

頭先我講過第八識係潛藏我哋前生嘅善、惡、不善不惡嘅種子吖嘛，當呢個第八識一活動嘅時候呢，將我哋前生嘅種子呢，變現番響我我哋嘅夢裏便。譬如你前生多生多世係天空嘅飛鳥嚟嘅，啲雁嚟嘅，咁你咪容易發夢：吖，點解我成日發同一個夢嘅？發到自己喺天度飛嘅？有時吖，發到自己喺水裏便游嘅？好似好舒服喎，可能你前生係魚嚟嘅，江河裏便嘅魚，係水族嚟嘅。有冇咁嘅現象？應該可能你哋會有發夢，發夢啲咁嘅現象，呢個係第八識活躍嘅時候，當我哋顯嘅意識：眼、耳、鼻、舌、身、意潛伏嘅時候，第八識開始活躍，我哋有夢吖，呢個精神體開始恢復。咁我哋人吖，活著嘅時候呢，個肉體駕駁咗個精神，禁住，所以冇辦法由個肉體之中解脫個靈性，但係當我哋死亡咗之後呢，我哋靈性就由個身體出嚟呢，解放咗。但係類似死亡嘅階段呢，就係你睡眠嘅時候呢，你個身體唔喐，眼再唔去睇嘢、耳唔去聽嘢、脷唔再食嘢、鼻唔去聞嘢、身體唔接觸嘢嘅時候呢，呢啲意識停咗，唯獨第八意識恢復番，類似死亡，咁呢，你嘅，嗰個靈識開始活動呢，容易有夢，同埋容易有時個精神呢，走出體外，就有啲咁嘅現象。

咁我哋前世記憶被封蔽嘅原因呢，佛經裏便解釋，由於我哋無明，唔明白宇宙間嘅真理，唔修行佛法，我哋冇智慧，所以唔知道我哋前世究竟係乜，封蔽咗。假如如果你有機會知道你前世：嘩！大佬，我前世原嚟係殺咁多生，做咗一條魚，後屘又俾人殺番，而家咁難得先有機會做人。假設你知道一個咁嘅現象，你今生會唔會修行佛法吖？你肯定會修啦，你知道呢個因果現象，吓嘛？假設你知道你自己前世係一個天人嚟：哎吔，原來我天界又唔修行佛法，有佛陀嚟講經我都唔修行，將啲福報浪費，而家做咗人嘞，唔得啦，我今生要快啲啦，如果唔係呢，我將來又會輪迴轉生做動物吖，下等啲嘅，嘅衆，嘅衆生㗎喇！

咁所以如果你前世記憶能夠被打開，響佛法裏便呢，可能令你所謂恢復番“宿命通”。宿命通就係能夠回憶你多生多世之前，所發生嘅事，點樣輪迴？你係咩位置？係喺邊個空間裏便？天、人、阿修羅、畜生、餓鬼、地獄，邊個法界裏便？咩國家？咩民族？發生過咩事？你全部知。如果你通過修行呢，修行戒、定、慧，將呢個無明打破咗，有個光明，修行佛法就係俾我哋一啲光明，將我哋無明黑暗照破，顯現番我哋本有嘅光明嘅智慧，你就能夠將第八意識打開，另外一角度講就將第八識轉成大圓鏡智，係清淨光明嘅鏡，樣樣嘢經過呢，能夠鑒照，好清楚，但嗰樣嘢過去之後呢，你唔會響鏡裏便呢，留低個影像。

咁所以你前世記憶被打開呢，有方法，通過修行，破咗你嘅無明，顯現番你嘅佛性。響佛教裏面，阿羅漢就有宿命嘅神通，能夠知道自己前生所發生嘅事，亦都有慧眼。菩薩有法眼，佛陀有佛眼，呢啲就係智慧嚟嘅，將無明照破就係光明嚟嘅，恢復番你本有嘅覺性呢，就能夠將覆，覆蓋咗障蔽咗你嘅本性嘅無明呢，打開照破，你嘅前世嘅意識就會被顯露番出嚟，你就會知道你究竟係咩回事，點解你今晚會坐喺法輪會？吖，可能前世你有幾世買過花供佛吖，今生就有機會嚟聽佛法。吓，如果你將你嘅前世意識解開咗，解開咗你個封蔽，你就會有機會知道。

前世意識被封蔽嘅原因，頭先講過就係“無明”。“無明”呢，知唔知咩叫“無明”吖？唔明白事理而起惑造業，唔明白呢樣嘢係啱唔啱，應唔應該做呢？殺生？吖，你自己判斷唔到。譬如話佢係害蟲吖，應該殺，就係一個“無明”，因爲唔合乎宇宙嘅真理。點樣合不合乎宇宙嘅真理呢？佛陀解釋俾你聽，邊樣啱你就去做，唔啱就千祈唔好做，合乎戒律你先好去做，守持戒律，唔合乎戒律呢，譬如殺生你都去做，呢個就無明愚痴。咁我哋不斷，我哋前生有造業啦，惡業，今生亦都不斷有繼續造業，呢啲業呢，就會掩蓋咗我哋嘅智慧，係唔係越積會越厚吖？所以我哋越難將我哋前世意識開發，前世意識呢，越來越被封蔽。所以我哋今生有機會做到人，再唔修行，我哋再造業呢，我哋就好難將我哋佛性開發番出嚟。將我哋前生後世嘅意識打開呢，係好難，因爲你證唔到智慧嘅塵呢，越積越多吖，越累積越厚。

咁跟住我哋呢，講一講呢，潛能嘅開發。我哋阿賴耶識，頭先已經講過，潛藏咗我哋呢，多生多世好多種子，咁有惡亦都有善嘅。譬如善嘅一方面呢，可能前生我哋係一個修行人嚟嘅，會唔會吖？當然會有機會啦，我哋今生有機會喺度聽佛法，可能前生我哋個修行人，咁我哋前生修行，可能你前生呢，係民國時期一個修行人吖，或者一九二幾年嘅修行人嚟嘅，有修過密宗啦，或者念佛，咁你呢啲修爲呢，都會保留響你第八識裏便，所以今生你一出世，見到佛經就開心吖，係嘛？中意聽佛經，中意學佛，可能你前生係一個有修爲嘅人。咁我哋嘅修爲，生生世世修爲呢，都會被保留響我哋第八識阿賴耶識裏便，頭先已經講過，我哋有咩方法打開佢呢？點樣將我哋呢啲修行嘅潛能開發，開發番出嚟呢啲智慧？

其實而家我哋做緊已經係㗎喇，譬如我哋唸佛、誦經、持咒、懺悔，呢啲咁嘅修行法門呢。嗱，譬如頭先我講過第八識，我哋咪種下咗，假設我哋前生個修行人，我哋有冇拜過佛？假設我哋有拜過佛，有唸過咒，有懺過悔嘅，如果今生我哋有機會再重新做一啲嘢，係咪猶如頭先講嘅淋水嘅道理吔？將前生呢個，譬如我哋今生前生，咳，好中意唸“阿彌陀佛”嘅，今生有機會你再唸“阿彌陀佛”，猶如將今生唸“阿彌陀佛”呢個就係陽光水份，施肥去前生呢個“阿彌陀佛”係你識田嗰粒種子，今生就會開花結果，更加偉大，不但能夠將前生嘅寶藏攞番出嚟，今生你再做仲加會累積、會增厚。善業會增厚，惡業亦都會增厚。

所以我哋利用同樣個方法，只要我哋今生去修行，肯修行嘅，懺悔、持咒、誦經、唸佛，我哋就能夠將我哋嘅潛意識裏便嘅寶藏攞番出嚟打開，恢復番我哋本有嘅覺性，我哋本有嘅能力。譬如假設相反嘅，我哋前生去做好多惡業，如果今生咁再殺生呢，就會將前生所做惡業呢個種子引發番出嚟呢，變成一個果報，所以我哋今生容易多病吖、短命吖、仔女唔孝順我哋，所以點解中國人有一句說話“但行好事，莫問前程”呢？而家你聽完之後你覺得有冇道理吔？

不斷去做善事，唔好問將來嘅前程，你不斷做善事就係等於對你前生響個，你個識田腦海裏便吖，呢啲善種淋緊水嘞，淋緊水佢咪開花結果，變現一啲好嘅果報，你衣食無憂啦、身體健康啦、仔女又孝順啦，係嘛？你就等於淋，淋緊水啦，你多啲做善事。譬如你今生去修行嘅，誦經、唸佛、持咒、懺悔，亦都係頭先我所講，對你前生嘅修爲嘅種子嗰一部分去淋水，就會激發番你前生嘅得到嘅能力嘅功能，可能係神通，亦都可能開發到你嘅智慧，所以一定要通過一啲法門先可以將你前生嘅記憶，呢啲咁嘅能力開發番出嚟，如果你唔通過修行呢，係冇方法。一粒種子響泥土裏便，你唔淋水嘅，唔施肥嘅，會唔會發芽生長吖？唔會㗎嘛永遠都，所以我哋而家修爲呢，其實好大利益。可能有啲人呢，修修下有好大嘅進步，有啲人呢，係冇進步，因爲佢冇修爲簡直。點解有啲人一修爲，有啲一個師兄修爲呢，比另外一個師兄好快好多？呢個係決定佢前生，可能佢前生根本係已經修行一段好長嘅時間，可能係四、五世已經係修行人嚟，今生再修行，佢咪能夠開發番佢前生嘅能力，一修嘅時候，佢咪比其他人飆前囉。譬如你今生兩個人一齊學佛嘅，但有一個人飆前咗一段大距離，可能呢一個前生就係好多世之前都有修行，今生一用功就能夠將前生嘅能力開發番，猶如攞到一條鎖匙，將個寶藏打開番，啲寶已經響咗，響咗個寶箱裏便，睇下你點樣攞番出嚟。咁我哋由呢個邏輯上去推論，我哋而家能夠坐喺個法輪會裏便，聽到佛經，學到佛，我哋前生肯定有某一世甚至好多世呢，有見過佛陀，亦都有修行，有親近過善知識，一定有嘅。亦都由我哋嘅人身推論，我哋前生有守過五戒十善啦，係咪？咁所以你今生修爲呢，只有利，冇害。你而家誦經、唸佛、持咒，有利冇害，因爲你前生如果有咁嘅因呢，根據呢個邏輯推論，你不斷淋水嘅時候，灌溉啲種子呢，你前生嘅修行呢，就會被攞番出嚟，但要一段時間啦當然，唔係話而家即唸佛即刻有個效果。你淋水施肥要一樖植物開花結果，發芽生長到個生果俾你食得到都好長時間啦，吓嘛？所以你今生修爲有個恆心，有個毅力啦，要唔好退，唔好一曝十寒啦，慢慢慢慢做，就如培養一樖植物一樣啦，你好快就能夠將你前生嘅力量嘅功德開發番出嚟。一定有恆心，有毅力，否則你唔咁做，一曝十寒嘅呢，修下唔修下、修下唔修下，你永遠都浮沉。

唔好唔記得，你而家一邊修行呢，雖然係做緊善業，另外一方面，你可能亦都做緊惡業，因爲我哋生生世世所累積，而家做人有好多壞習慣，唔係一時間能夠改得到嘅，吓嘛？我哋一手，可能一手放雞，另外一手又劏雞，可能我哋放五隻雞，又劏番一隻雞咁嘅，吓嘛？冇話完全善，冇話完全惡，你仍然係改緊你嘅習氣。所以而家你修爲，持咒、打坐、誦經啦，繼續努力保持不退呢，係非常非常之重要吖，你嘅恆心吖、毅力係好重要。有啲師兄失敗唔能夠成功，修來修去都咁嘅樣呢，就係佢唔明白呢個道理。佢冇去努力，佢唔明白，佢前生可能係有修爲過，佢亦都唔珍惜佢嘅人身，所以佢就容易退，亦都周圍呢，冇善知識去鼓勵佢，就呢種種助緣嘅因素。

咁呢度我解釋，明唔明吖？潛能開發嘅方法呢，有好多種，譬如你今生喜歡唸佛，你咪唸佛囉，你喜歡懺悔嘅，你咪多啲懺悔，喜歡持咒，你咪持咒囉，同埋各種宗派呢，都係冇問題，只要係佛教裏便正確嘅宗派呢，你就搵一個師父去跟從佢去修，千祈唔好跟邪嘅宗派，邪嘅宗派呢，等於你做啲，教你做啲唔好嘅嘢，又會淋到前生做惡事嗰啲惡嘅種子，就會開花結果喎。你前生有冇機會係外道吖？有機會你做過喎，你咁多世。嗱，而家用你呢個身體去推論你前生，一日未成佛，嘩，推推推推推，推到百千萬劫你都仍然係輪迴緊嘅，係嘛？咁呢百千萬劫咁長嘅時間，你話我哋個阿賴耶識吖，我哋個本體，嗰個精神，累積咗幾多唔好嘅嘢響裏便吖？所以你一時間要成佛，一時間要將你業障清洗，開智慧唔係咁容易。所以成佛呢，響顯宗上便講要經過三大嘅阿僧祇劫，係嘛？你哋都聽過，係好漫長嘅時間吖。

“三祇修福慧，百劫修相好。”用三大阿僧祇劫嘅時間去修福德同智慧，用一百劫嘅時間去修莊嚴，自己嘅莊嚴相貌嘅形態，咁所以，你生生世世根本係做咗好多善事，可以推論，亦都做咗好多惡事。咁我哋只要令今生，前生所做嘅善因繼續開發，我哋前生修爲嘅能力攞番返嚟，繼續開發，不斷增上，有一日，你始終一跳，會跳去解脫生死，去西方極樂世界。

假如相反，你做惡嗰便嘅，不斷做惡，係咪又會累積吖？好快你就會向下沉，兩條直線之嘛，一個向上、一個向下，所以你今生不斷向善嗰個方面嘅時候呢，你就能夠解脫。所以，《地藏經》裏便都講，地藏菩薩話，但求有一個人做一件善事吖，佢都會接引佢，引領佢，亦都猶如其他菩薩一樣都會。因爲呢一念善，你唔好睇輕呢一念善，所謂“一毫之善，與人方便”，你就因爲呢一念善呢，第二世有機會啦，亦都因爲呢一念善，你可能亦都會做善事，一件、兩件、三件咁樣累積呢，始終有機會你會學佛，會解脫。但一毫之惡呢，就勸人莫作，一毫紙咁細，一條頭髮一毫吖，咁小惡事你就唔好作，因爲會累積㗎，雖然一個好大嘅碗吖，好似個蒲團咁大裝好多水吔，但一個好似針窿咁細嘅窿吖，都會將裏便嘅水漏晒，吓嘛？你諗下？個碗裝嘅水猶如你嘅修爲嘅功德，如果你今世有缺漏呢，有個窿仔呢，就會將啲功德全部漏晒出嚟。所以呢，統括嚟講，你要明白你自己，你想了解你前生係乜嘢，你通過修爲呢，通過禪定裏便，你就會開發智慧，戒，守戒，修持禪定，你就會開發智慧，由智慧裏便，好似一塊鏡裏便，你要睇乜就睇乜，你就會好清楚，知道你前生後世，點解會輪迴？我點解會做人呢？佢點解會做一隻蟻呢？點解佢會做天神呢？點解佢會做皇帝呢？吓，呢啲全部由因果去累積。你通過修爲，你一定會知道，一定要守戒，修持禪定，開發智慧，照破你嘅無明，顯現番你嘅本性，你就會知道究竟呢啲因果係點，而打開你封蔽嘅意識嘅方法呢，就係修行，修行。

當然，各個人所修行嘅佛菩薩嘅本尊唔同，響有一次一講裏便呢，生命有緣中，《生命中有緣的佛菩薩》啦，我亦都講過，每人，每個人所修爲嘅本尊唔同，亦都關乎到你前世，可能你前世修開觀音法嘅，今生你能夠再修觀音係咪好容易同觀音相應吖？將前生你修觀音嘅功德攞番出嚟，所以亦都係好大關係。各個人有緣嘅佛菩薩唔同，個法門唔同，譬如唔好話人哋修呢個法門，你見到佢咁好呢，你就依樣畫葫蘆啦，照修可能對你未必係啱，你要就你自己本性、根器，揀啱一個法門，一門深入，不斷去努力去修呢，就有機會將你前生嘅潛能開發。

猶如你行樓梯，行一級、兩級，一個細路仔行一級、兩級，但佢唔識，佢唔識跳嘅，猶如，但係佢有跳嘅能力，譬如佢三四歲已經識跳，但有個人話俾佢聽，你唔使行兩、三級㗎，你一跳就跳到上去，佢隻腳只要一𨂾呢，可能𨂾過三級㗎喇已經，唔使逐步逐步行，有冇人話俾佢聽之嘛，你已經具有呢個能力。猶如有冇人話俾你聽，通過修爲你會將你嘅潛能開發，根本你就有咁嘅能力。而家就話俾你聽，通過修爲，你不斷去修，你就會不斷進步，你自己唔覺㗎，其實已經慢慢慢慢累積，可能差唔多到終點啦，不過你唔知啫，你自己睇唔到吖嘛，吓嘛？而家有人話俾你聽，你可以咁做，亦都有方法可以咁做，就係修行戒、定、慧，將你嘅貪瞋痴去熄滅，不斷修，不斷累積呢，你就好快行到返番你間屋企個單位上便吖，三步三步行樓梯，快唔快吖？好快啦，係嘛？（註：接下文）

221.前世記憶潛能（二）

（註：接上文）

咁我就粗略講咗關於前世記憶同埋開發嘅方法。因爲呢，響法輪會每次講都係一個鐘頭鬆啲呢，我唔可以太詳細、太深入，我亦都唔係算命，你問我三世書，你前生係乜？我又答唔到俾你，吓嘛？話唔到俾你聽，所以，但你可以個別，搵我商量，譬如你想了解下你適合修邊一個法門嘅，你可以同我講下，我可以俾啲意見你，你私人可以嚟搵我，你係屬於，譬如話：“吖，你覺得我修觀音好唔好啦？”吓，可以同你研究下，你係適合修邊個法門。

咁今晚粗略講咗你嘅前世記憶啦，同埋你嘅潛能嘅開發啦，明唔明吖？明唔明吖？掌唔掌握到呢個基本嘅概念？我而家講嘅嘢呢，我唔希望太深，但我希望俾一個骨架你，我唔同你黐啲肉，唔黐啲皮，唔俾啲內臟你，呢啲係你自己裝上去。你掌握咗基本嘅觀念嘅骨架係乜嘢，點解你嘅前世記憶被封蔽吔？譬如舉例就係你嘅無明啦。你頭先啲嘢，所有聽唔到唔緊要，你聽到呢兩句得㗎喇，呢兩句就係骨架嚟嘅：點解你嘅前生嘅意識被封蔽呢？就係由於你嘅無明。同埋點解你輪迴做人呢？有好多原因。你今生，你有冇睇達摩吖？達摩套戲，“欲知前生因，今生受者是。”係咪？佢都講：“欲知來世果，今生作者是。”你想知道你點解今生咁重吖，瞋恨心吖？欲知前世因，你今生受者是吔，就算你而家唔須要開發咗有神通、有宿命通吖，可能冇慧眼，亦都冇法眼，但係你由呢個邏輯去推斷，猶如頭先我所講，前生係阿修羅界轉生，就有瞋恨心，譬如你今，今生修爲——唉，點解我嗰個，啲脾氣硬係撳唔住嘅呢？話我兩句我已經火兵兵𠾴𠾴衝到上嚟，又想打人咁滯。呢啲係你多生多世所累積落嚟嘅習氣，可能前生你係阿修羅界，瞋恨心重，勇，好鬥，亦或者可能你係一啲比較有毒嘅動物轉生，啫個，個鬥心，個瞋恨心吖，害人嘅心仍然有，可能係蠍子啦，可能係毒蛇啦，吓，你可以咁樣推論，機會都好高㗎，相信。如果中意害人吖，中意鬥吖，同埋個人呢，同埋你乜嘢宗教信仰都唔信嘅，啫係比較個人呢，接近動物性多，食完飯就瞓覺，瞓完覺呢，就諗“色”呢一樣嘢，呢啲咪動物性囉？我哋人吖，點解能夠超越動物？就我哋有智慧，我哋能夠創造一切，凌駕於其他。對我哋嚟講吖，人稱呼叫低等動物，啫係豬吔、魚吔，但係佛法嘅角度完全係平等，冇話高低，精神係一樣。佢本體好似低過你，霎時間你執著個景象——佢係豬啫，但係將來你都會有機會㗎，如果你愚痴造業的話，人界角度睇呢啲低等動物。如果你今生有呢啲低等動物嘅習性，你中意食飯，好中意食，食嘢嘅，好中意瞓覺嘅，好貪好女色嘅，如果男性，女性吖，貪好男色啦，淨係有呢啲咁嘅基本上動物性嘅需要呢，係大過你自己中意諗嘢吖、智慧吖、搵啲書去讀吖、學佛吖，所以可能呢，呢啲習氣就係你前生好多世做動物帶返嚟，可能前生就係動物嚟，有冇啲咁嘅人吖？你發現吖，將呢啲原則去檢討下，你唔須要有宿命通嘅，由呢個邏輯就去推斷，欲知前世因，今生受者是。我諗相信你身邊冷眼旁觀下有好多人都會係咁，你嘅同事、你嘅親戚、你嘅朋友，咁所以由呢啲邏輯，你就可以了解因果嘅報應。其實佛法呢，就響我哋生活之中，冇離開過我哋，不過我哋唔識觀察之嘛，萬物靜觀皆自得，我哋由呢啲原理去睇一睇下，呢啲就係佛法嚟嘅，係唔係吖你諗下？我咁講有冇道理吖？有道理啦，喺你嘅生活裏便，慢慢去體察，你就知道你身邊嘅人，係邊度轉生返嚟。

譬如我舉一個例，有啲弱智嘅，嘅人呢，啲細路哥吖，孩童嗰啲吖，你有冇發覺呢，我成日都咁樣睇嘅，有冇發覺無論鬼佬或者中國人，弱智細路哥，個樣都一樣嘅，差唔多，有冇發覺吖？係咪吔？嗱，我講呢個道理你會好易明白轉生輪迴嘅因果。佢哋個樣都差唔多，佢哋今生弱智，可能佢前生譭謗佛法，譭謗佛法，同埋亦都係做咗好多生動物，好愚痴，今生轉生，愚痴就冇智慧啦，所以我哋話點解叫“弱智”吔？或者“低智能”，係咪IQ低話佢，愚痴啦，冇智慧，愚痴冇智慧係咩吖？係咪畜生吖？所以呢，可能推論呢一啲弱智嘅人士吔，啲細路哥呢，都幾慘，佢好多世可能做咗好重嘅業，輪迴輪迴輪迴，可能十世一百世，好多世呢，做咗動物，今世再轉生呢，都得唔到個人嘅樣。你見到嗰啲樣好似動物嘅，有冇發覺吖？有時中意蹦蹦跳跳嘅，話唔聽嘅，係嘛？智慧亦都低嘅，咁所以前生佢可能由動物界，旁生界轉生返嚟吖。有冇發覺呢個例子吔？你試下去睇下，鬼佬弱智嘅人同我哋中國人弱智嘅人係一樣樣㗎，啫有，我覺得好似有啲豬豬哋㗎，豬型咁吖，豬型豬型咁吖，係咪吖？有冇發覺？呢啲就係輪迴轉生嘅現象吖，我哋唔可以否認，你點解釋呢個原因吖？係嘛？所以我哋人呢，之能夠得到呢個身體呢，父親嘅精子、母親嘅卵子結合，只可以幫助我哋造成一個外，外便呢個物質嘅軀殼，還有一樣最重要，就頭先我所講嘅，咩吖？阿賴耶識啦，第八識。阿賴耶識響我哋中文裏便叫做“藏識”，“藏”吖，“潛藏”個“藏”，我哋做善惡、不善不惡個種子全部潛藏響呢個“識”裏便，要佢變咗個果報出嚟，善惡、不善不惡嘅果報啦，先會冇咗呢粒種子去。所以呢個阿賴耶識，配合咗我哋父母俾我哋嘅身體呢，我哋先能夠做到一個人嘅，包括其他動物，都有精神嘅部分，所以佢先會輪迴。如果人死如燈滅嘅——哦！瓜咗囉喎！冇咗呢個肉體囉喎！仲會輪迴？唔須要輪迴啦！如果人死如燈滅。嘩，呢個世界仲放肆，而家都咁厲害吖，有宗教，冇宗教，人死如燈滅啦，做善事冇善報，做惡事冇惡報，呢個世界慘吖。過八號風球，今次呢個肯達肯定吹正澳門吖，一定會傷人，因爲我哋做惡事感召呢啲天災人禍嘅惡報吖嘛，就會去侵襲到澳門，就會侵襲到我哋。呢個大家所做嘅惡事嘅共業，感召一啲天災或者人禍嘅現象呢，侵損到我哋。我哋前世一定有，譬如一個國家嘅戰爭，有啲人呢，僥倖生存，有啲人就唔得嘞，有啲人呢嘅自己或者家庭呢，俾呢個戰爭所連累，就你前生有做殺業。“欲知世上刀兵劫，但聽屠門夜半聲。”你前生就有做呢個殺業，被牽連在內，所以啲戰爭一定會波及到你，係大家一齊所做嘅惡業，感召而報應響大家身上。有啲人倖免的話呢，共業之中有不共嘅業，就係佢哋冇做殺業，所以佢能夠喺戰爭之中，能夠僥倖生存，就係咁嘅道理。咁大家做咗譭謗佛法，大家做咗愚痴嘅共業，轉生響動物多生多世，一做番人嘅時候，智慧都低啲嘅，同埋個樣呢，啫五官唔得太端正，有啲六隻手指嘅，吓嘛？唔係外星人，吓，六隻手指，有啲比較低，弱智嗰啲呢，有六隻手指，有冇發覺，吓嘛？好似啲動，嗰啲手型，好似啲動物呢，豬吔，嗰啲指吔，岔出嚟，啲貓咁，你發現睇下啲手吖，你試下細心留意下，呢個就係轉生輪迴嘅現象，係有因果，我哋呢個世界，唔係冇因果。

其實智慧呢，唔係話，除咗開發智慧，頭先所講，我通過修行呢，我哋念念照佛陀所做嘅，念念光明，念念向正呢，我哋念念有智慧，譬如我哋識得去觀察，識得去體察呢個世情，世情吖，用佛法嘅道理，呢啲就係你智慧，由體察呢個因果。譬如體察：係喎，你返去照我呢個，呢個道理去睇下，係喎，點解弱智人一樣樣嘅呢？東西方，吖，唔通我，瑋師兄真係講得啱嘅？佢做咗好多愚痴嘅業，做咗好多世動物，今生就轉生爲人，唉，我都唔好做殺業啦！嗱，如果你能夠信呢個明白咗，你咪唔會去做殺業，係咪有智慧吖？一念愚，你嘅般若智慧就冇咗，你一念智慧你肯相信呢，你嘅般若就生了，吓嘛？咁你又體察呢啲種種世情嘅現象，警醒你自己：吖，佢錯咗，我就唔好再錯，如果咁樣，殺生嘅，譭謗佛法嘅業，就會弱智㗎喇下生，我今生都要信佛法，唔好譭謗。如果你相信的話，你今生都要修行吖，咁你咪有咗智慧吔？係咪吖？智慧係咁得嚟㗎嘛，你觀察世間嘅事物，唔係話坐喺屋企就咁唸經：卟卟卟卟卟……南無阿彌陀佛，南無阿彌陀佛……呢個都會有智慧，開你智慧，但係唸完佛之後，你接觸世情，接觸社會嘅時間係多過你屋企呢一種唸經嘅修行，所以你應該更加響呢個世界裏便用佛陀教你嘅道理。當然有個準則啦，你冇準，冇個準則，我唔講呢個，譬如唔講呢個弱智嘅道理，你冇個準則就體察唔到。你讀佛經，吸收咗佛陀嘅思想之後，有咗呢個準則，就響呢個世間裏便用呢啲準則去驗證世間嘅真假同善惡，咁你就會累積咗好多智慧，係嘛？呢個就係智慧嘅來源。再通過你內修修行呢，佛法嘅光明將你內在嘅無明照破，呢個亦都係你本有嘅智慧，本有嘅光，然之後同宇宙根本嘅智慧，佛陀呢個大光明完全結合咗嘅時候，你就本身就係佛嚟嘅。所以，我強調應該更加喺世間裏便生活，多啲去體察，呢啲係生活嘅佛法嚟嘅。每時每刻你都會接觸到呢啲現象，你有啲朋友有善心啦，有啲朋友有瞋恨心，有啲朋友有鬥心啦，呢啲咪輪迴因果現象囉？你個肉體係人啫，但係你嘅精神，係冇消失到你前世嘅習性，所以你有個習性去體會到嘅前生究竟係乜嚟嘅，亦都可以有方法警惕你自己：哎？我唔好學佢。亦都可以勸誡你嘅朋友：咦？唔好咁嬲喎你，唔好發脾氣喎，傷肝嘅喎，吓，平靜啲吖，啲火，唔好咁容易發脾氣，如果係修行人呢，好容易燒咗自己功德林。嗱，呢啲咪智慧囉？如果你有個心幫自己亦都幫人，你咪已經行緊菩薩道囉，係嘛？你已經累積緊智慧啦。爭在你識唔識諗通呢啲法則，有冇人話俾你聽呢一點呢，係好重要，響世間裏便體察。

除咗唸經、修行，頭先我所講開發你嘅潛能，打坐、參禪、修禪定、懺悔，將啲業障洗清之外，另外響世間裏便，你要體察呢一啲種種嘅世情，用佛法嘅原則，再去累積你嘅智慧。因爲而家我哋末法時期呢，世俗奔波，顧兒女、顧家庭，你有幾多時間能夠坐低唸經呢？一晚頂多都最多數小時啫，係嘛？比較，最少吖數分鐘啦，吓嘛？最多都係咁。你接觸社會、接觸世俗，六根攀緣外在嘅六塵，而啲種子種入你嘅八識裏便呢，係好強，每時每刻，你係接觸世俗，多過你清，污染被世俗污染係多過你自己內在嘅清淨。所以世俗我假設係煩惱，你自己修行係菩提的話，點解唔可以將世俗嘅煩惱去化成菩提呢？就係頭先我講嘅方法，利用，你能夠體會到佛陀教你做人，一個佛弟子嘅原則，守戒、修禪定，有智慧呢，將啲法則去印證人世間嘅種種善、種種惡，你就會識分，你就會累積好多智慧，咁呢啲時間，你咪能夠將煩惱化成菩提，每時每刻你都喺度修行緊，係嘛？你諗下，就係咁嘅方法。

有五分鐘，五分鐘個餅帶差唔多夠鐘嘞，五分鐘。有冇問題問我吖？你覺得我咁講吖，你學唔學到嘢吖？覺得咁講你覺得得唔得到嘢吖你？啫有冇係聽到呢啲嘢吖？講真心話，咁少人，唔係我改一改吔嘛，講得唔好。

222.了卻凡心是佛心（一）

各位，多謝大家嚟參加今晚嘅法會。今晚要同大家所講嘅講題呢，係叫做《了卻凡心是佛心》。《了卻凡心是佛心》呢，係講一部書叫做《了凡四訓》，亦都係個作者叫做袁了凡，佢本身呢，係叫做袁學海嘅。袁學海先生所寫“四訓”嘅講解。

自古以嚟呢，一般人都被命運所控制吔，而身不由己，只有明理嘅人，命運就約束唔到佢，正所謂賢達嘅人呢，能夠安命。《了凡四訓》，世人幾乎都知道係改造命運嘅寶典，有福份嘅人呢，大都能夠響呢部書，吖，細心閱讀之後吖，進而能夠，呢部書俾佢一定嘅啓發，令佢立定志向，力行去實踐。有時可以幫助到種種嘅人，譬如，將疾病化解於無形啦，或者掃除窮困嘅威脅、消除生活嘅煩惱，達到超凡入聖嘅境界。

《了凡四訓》作爲修身嘅座右銘，人人都可以成聖成賢。《了凡四訓》呢部書呢，可以作爲處世嘅準則，亦都能夠令到舉世能夠消除災難同埋業障，確實係自救救人最佳而係最簡單嘅途徑。

《了凡四訓》呢，佢內容吖，講呢部書呢，其實都幾通俗同明朗，亦都唔會失去，吖，原著《了凡四訓》嘅宗旨。因爲《了凡四訓》呢，係有白話解釋嘅，但係啲白話解釋呢，就要視乎人見人殊啦，各人解嘅唔相同，觀念唔同呢，亦都有見仁見智嘅觀點，但係“修身律己，安身立命”之道呢，喺《了凡四訓》呢部書裏便呢，係非常之清楚講得，所以凡係有先見之明嘅人呢，都唔會放過去讀呢部書。凡係有智慧、有志氣、有作爲嘅人，想了解宇宙人生嘅真相，服務社會去造福人群，響讀過呢本書之後呢，一定能能夠逢人傳頌同埋介紹，令到人哋有收穫，正係呢本書所以能夠流傳千古吖，歷久不衰嘅一個原因嚟嘅。

《了凡四訓》呢，係袁了凡先生，一生奉行《太上感應篇》嘅精華所得嚟嘅。呢本書嘅開頭其實首先講所謂立命之學，係爲咗勉勵世人奮發向上，唔好自暴自棄，因爲人生嘅氣數吖，雖然係由前生造因而定，但係命運嘅好壞呢，就隨住呢一生心性狀態而改變，所以立命嘅學說喺呢部書裏便呢，係首先講，係可以話係開宗明義吖。

第二篇呢，《了凡四訓》跟住講就係改過嘅方法，改過嘅方法係因爲一般人都自認自己係無過失而唔知道改過行善。我哋試諗下，唔知改過嘅人就好似漏咗底嘅容器，行善亦都得唔到效果。如果做人想諸惡唔改，衆善奉行，而想去功過相抵呢，其實係等於冇做，因爲功吖，唔可以同過相抵，如果諸惡不改，只係略行數善，見禍呢，嘅結果呢，都係見禍而唔見福，所以話，改過係立命嘅下手工夫，所以第二篇呢，係接住上篇改過嘅方法去講嘅。人如果知道能夠改過，但係唔知道行善嘅道理，亦都係徒勞無益，所以《了凡四訓》嘅第三篇跟住所講嘅係積善嘅方法，以淋漓盡致嘅分析同行善嘅道理同方法去講一講積善有幾多方法。我哋初學行善嘅人呢，雖然難免吖，好似一個窮人一樣忽然變成暴發戶，會有傲慢天下，甚至藐視一切嘅驕傲作風，所以《了凡四訓》嘅最後一篇呢，係講謙德之效嘅，袁先生叮嚀我哋“滿招損，謙受益”嘅道理，人如果能夠謙虛爲懷呢，亦都能夠行善惟恐不足，先能夠使到立命吖，呢個方法去收到效果而達到改造命運嘅目的。總之嚟講，《了凡四訓》雖然話係“四訓”，其實我覺係一氣呵成一篇所謂立命嘅道理，確確實實係人生嘅至理名言。

咁我哋未開始呢，講《了凡四訓》嘅內容，首先我哋或者介一介紹呢本書嘅作者袁了凡先生個簡單嘅傳記。因爲今，可能今晚嘅時間有限吖，所以只係能夠，誒，儘量講一講《了凡四訓》裏便抽一啲大概精華、重要嘅內容去講一講，如果大家有興趣的話，你可以自行翻閱《了凡四訓》嘅解釋嘅白話，甚至佢嘅原文，如果你自己睇呢，比我講嘅可能係更有味道。

好嘞，咁我哋而家講一講袁了凡居士。袁了凡先生呢，佢本身係叫做袁黃，別字呢，叫做坤儀，係江蘇省吳江縣人，佢出生響西元1535年而死於1606年。了凡先生年輕嘅時候呢，入贅到浙江省吖，嘉善縣吖，嘅一笪地方，所以喺嘉善縣得到公費，做咗縣裏便嘅公讀生。咁其實袁了凡先生佢係明朝時候嘅人，佢喺明穆宗隆慶四年呢，大概西元嘅一千五百七十年，響個鄉裏便吖中咗舉人，響明神宗萬曆十四年呢，嗰西元1586年呢，就考上咗進士，奉命做河北省呢，寶坻縣嘅縣長，過咗七年呢，就提拔做兵部嘅職方司嘅主管人。咁了凡四，了凡，袁了凡先生呢，啱啱響到任呢個官職嘅時候呢，碰到日本人正當侵犯朝鮮而向中國求救，當時嘅經略吖（一個官名吖），啫駐韓鮮嘅軍事長官呢，個名叫宋應昌啦，佢呢，請了凡呢，做一個官職叫做“軍前讚畫”，啫參謀長嘅職務，而且督導支援朝鮮嘅軍隊。提督李如松呢，掌握兵權呢，詐諦呢，賜給高官俸祿吖，同日寇談和，日本人就信以爲真，就冇設防，李如松發動突擊呢，攻破形勢險要嘅平壤，所以就打敗咗日本人。咁了凡先生因爲呢件事呢，當面指責李如松，第一，佢唔應用詭詐嘅手段去對付日本人，有損失大明朝嘅威信；第二點，李如松手下嘅士兵呢，隨便殺害百姓，以百姓嘅頭吖，去記功。李如松非但唔接納袁了凡先生義正言辭嘅勸誡，反而自己一個帶住軍隊東走，得到咗袁了凡先生所率領軍隊呢，令到佢孤立無援，日本人因而乘機就攻擊咗了凡先生嘅軍隊，後來呢，好在了凡呢，機智應對，對日本人打退，但係李如松嘅軍隊最後終於俾日本人擊敗，佢想要脫離自己嘅罪狀，反而以十項罪名去彈劾袁了凡，於是了凡呢，好快被提出審判，終於響拾遺嘅官職嘅時候（啫一種諫官嘅任內），被逼停職返鄉下。咁響屋企裏便呢，袁了凡呢，好懇切，認真去行善直到去世，咁佢享年呢，有七十四歲。響明熹宗嘅天啓年間呢，了凡嘅冤案呢，終於真相大白，朝廷追封咗了凡呢，爲征討日本海盜嘅功績，封贈佢做尚寶司少卿嘅官銜。

了凡先生由做學生嘅時候呢，其實佢已經非常喜歡研究學問，書不論古今，事不分輕重呢，佢都好中意研究，而且非常通達。例如星象吖、法律吖、水利吖、理數吖、兵備吖、政治吖、堪輿等等。

了凡先生響寶坻縣做縣長嘅時候呢，佢好注重百姓嘅福利嘅，佢時常會做一啲有利地方嘅事。寶坻縣當時呢，時時有水災氾濫，了凡先生於是積極興辦水利，將三汊嘅河疏通，築堤防備呢，免水災嘅侵襲，而且教導縣裏便嘅百姓吖，沿住海岸吖，去種植柳樹，所以每當啲海水氾濫嘅時候，挾帶一啲沙土衝上岸呢，遇到柳樹呢，就積擋住，久久就變成咗一道堤防。於是袁了凡先生又督導百姓呢，響堤防上便去建造一啲溝渠，而且鼓勵百姓耕種，所以荒廢咗嘅土地就漸漸得以開墾，地方就逐漸繁榮了。了凡先生又免除種種雜役，避免干擾百姓，多方面方便人民嘅措施使到百姓安樂，安居樂業，所以佢係一個好官嚟㗎其實。

袁了凡先生其實佢屋企呢就唔係好富有，但係就好喜歡布施嘅。佢家居生活係好儉樸，佢每日誦經啦、持咒，而且參禪打坐或者修習止觀。無論公務吖、私務係幾繁忙，佢早晚嘅功課係唔會間斷，所以響嗰段時候呢，了凡先生寫低咗四篇短文，去教訓佢嘅子弟嘅，就後嚟我哋坊間所講嘅《了凡四訓》呢部書，就係咁吖來源。當時呢部書就唔係叫《了凡四訓》，係叫做《誡子文》，啫勸誡佢兒子嘅文字，但係用嚟訓勉佢嘅兒子，點都估唔到今日呢，呢部書能夠流通咁廣，被咁多人傳頌！希望大家亦都認識呢一部書。

了凡先生呢，講到佢嘅太太亦都好賢惠嘅，經常幫助了凡去布施行善，而且依照了凡先生佢做咗個所謂叫《功過格》，功同過每日做幾多都記喺一本簿上便，叫《功過格》，記低所做嘅功德。因爲了凡嘅太太冇讀過書吔，冇法用文字去記載，所以用啲鵝毛呢，誒，去點一啲紅墨水，每日響歷書上便去做記號。有時了凡先生比較忙啦，嗰日做功德比較少，佢老婆就皺眉頭嘞，希望了凡先生能夠多啲行善。有一次呢，佢太太爲咗個仔吔，裁製冬，冬天嘅袍吖，佢想買一啲棉絮吖，去做內籠啦，了凡先生就話：“屋企裏便呢，有絲綿，又輕又暖，點解仲要去買啲普通嘅棉花呢？”於是了凡先生嘅夫人呢，佢太太就答佢，佢話：“絲綿比較貴，棉絮又平啲，我想將屋企裏便嘅絲綿去換棉絮，咁樣咪可以裁多幾件棉衲，去送俾貧寒嘅人家過冬？”了凡先生聽咗呢，就好高興而且話：“你咁虔誠布施，就唔怕我哋將來個仔女冇福了！”

咁所以呢，後來袁先生個仔呢，袁儼吖，得中咗進，進士吔，最後呢，係以廣東省高要縣嘅縣長呢，退休吖。吓，所以我哋積善呢，所謂呢，“陰功”呢，積落兒孫受，但嗰個“陰功”呢，唔好誤會話“吖！冇陰功！”個“陰功”，“陰功”係陰德咁解，我哋積落呢，兒孫自然會受到我哋嘅福德，其實呢個係因果嚟。

咁好嘞，我哋就簡簡單單介紹咗袁了凡先生嘅生平，我諗大家都好悶，吓嘛？聽前面嗰啲人物嘅傳，但係我已儘量簡單講解下，但係如果你唔聽過去個傳呢，誒，唔知佢係一個咩人呢，同埋，誒，唔知《了凡四訓》係一部咩書嚟。

咁我哋抽裏便《了凡四訓》嘅精華開始講一講。首先我哋講下“立命之學”，所謂“一切都是命，半點不由人。”了凡先生童年嘅時候，佢話自己失去咗父親，於是佢母親認爲呢，希望佢能夠學習醫術，可以過生活，亦都能夠就，救世濟人，學成一技在手，亦都可以呢，完成佢父親嘅心願，因爲佢父親嘅心願係想佢做醫生嘅，所以呢，了凡先生聽咗母親嘅意思，放棄咗考試做官嘅念頭而去學醫術。但係有一日，響一間寺吔，叫做慈雲寺呢，佢遇到一位道貌岸然，好似神仙嘅老人，佢告訴袁了凡先生話：“你有做官嘅命，明年就係秀才啦，點解唔讀書咧？明年就開考啦！”

誒，於是袁了凡先生呢，就話俾呢個，誒，慈雲寺吔，好似神仙嘅老人聽呢，佢請教老人姓名，吓，同埋住喺邊度。老人就話，佢話：“我姓孔，係雲南人，我得到呢，以前，吖，一個術數家叫做邵康節……”邵康節係宋朝一個術數家嚟，佢得到邵康節嘅《皇極經世書》吖。《皇極經世書》呢，而家傳到落嚟呢，俗稱呢，可以叫做《鐵板神數》，聽講係好靈㗎，呢，呢個《鐵板神數》係打算盤，將一個人嘅命呢，八字呢，吓，喺個算盤上便批呢，遂句遂句講出嚟呢，將你一生嘅命運呢，去縱斷嘅，聽講係準確率好高。咁呢個孔先生得到邵康節，吖，宋，宋朝一個術數吖，好出名嘅大家，呢個《皇極經世書》嘅正傳。呢個孔先生就話，同袁了凡講：“我應該就將呢個術數傳俾你吔。”於是我就，於是呢，袁了凡先生就接引咗呢個老人返到屋企住，而且將情形話咗俾佢媽媽聽。佢媽媽呢，就要袁了凡好好招待呢個老人家，而且亦都屢次試驗老人嘅命學理數，但係呢，唔試驗猶自可，一試驗呢，無論大細嘅事情呢，都好靈驗準確，所以袁了凡就好相信老人嘅說話，又開始讀書，準備呢，就唔學醫生嘞，準備就考秀才。於是呢個孔先生，呢個孔老人呢，就爲袁了凡算命，佢吖同袁了，袁了凡算到，佢話：“你響縣考考童生嘅時候呢，一定會得到第十四名，響府考呢，得第呢，就會第七十二名，響提學嘅考試裏便呢，就會得到第九名。”啫三個考試唔同嘅名次。咁算完之後呢，到咗第二年嘞，三次嘅考試呢，都好似孔先生批中吖，都能夠考得到，而且錄取嘅名次吖，亦都確實符合老人嘅預言喎，所以呢，袁了凡呢，就再請孔先生呢，爲佢占卜終生嘅吉凶禍福。孔先生計咗結果之後呢，就話袁了凡，邊一年吖，就會考到第幾名，邊一年呢，就會補一個官嘅空缺，邊一年就會當貢生，而後邊一年就會入選爲做四川嘅知縣，響在任三年半呢，就離開，誒，在職嘅地方，返鄉下，五十三歲八月十四日丑時，壽終正寢而無子。嘩！呢啲就可以叫做，可以叫做話“金口直斷”！嘩！講到咁準嘅？呢個術數，嘩，連死嘅時候幾年幾月幾日幾時，有冇仔，吖，送終都講到咁清楚，嘩，聽到其實都好驚。

咁從此之後呢，袁了凡聽咗之後凡碰到考試吔，名次嘅先後呢，估唔到都離唔開呢個孔先生嘅《皇極經世書》嘅預言喎！咁孔先生呢，仲算定，袁了凡命中註定呢，領取所用嘅米吔，有九十一石五斗吖，吓，喺個做官嘅期間嘅職位，領取九十一石五斗然後先能夠陞爲貢生，啫跳一級官，但係當袁了凡領到七十斗嘅時候呢，上司呢，就爲袁了凡呢，去補貢吖，所以依度開始唔準嘞，超過咗七十斗，因爲佢九十一石五斗吖嘛，所以袁了凡就懷疑孔先生預言嘅準確性，冇諗想到結果呢，都係被駁回，啫補貢嘅，嘅申請吖，啫補唔到。到咗一定嘅時候呢，上司又發現呢，考場裏便佢個考試嘅卷嘅答案呢，做得好好，唔忍埋沒人才就吩咐縣官呢，替佢搵另外一篇文章，正式陞補貢職，計算所領取嘅米糧，又啱啱係九十一石五斗。

於是呢，嘩！咁準確之後，從此袁了凡就開始更相信，佢話：“‘升官發財，遲速有時；富貴在天，生死有命’嘅‘命’，命理嘅數吖，係啱嘅！咁既然有命運，又俾一個咁高人術數算到咁準，咁人生豈不是冇意思？”所以從此袁了凡呢，就心灰意冷、淡淡無求，因爲佢話“你幾多歲做咩官吖、幾多歲考咗咩試吔、有冇仔送終吔、幾時死吔、一生食幾多米”都講得咁清楚，如果俾一個人算到你咁呢，你聽到之後而啱啱件件事都準吖喎，咁你分分鐘鐘做人呢，好似冇意思吔，墮入咗宿命，吖。

咁跟住我哋再落嚟講呢，就袁了凡點樣改變佢嘅命運，係一個轉捩點嚟嘅，“命由己作，相由心生”，所謂。

後嚟袁了凡呢，入咗去燕京服務咗一年呢，佢終日靜坐，亦都懶於讀書求進，因爲由於個孔先生影響咗佢吖，所以返到南京之後，有一日了凡就去到棲霞山，去拜訪一個禪師，叫做雲谷禪師，於是兩個人呢，了凡同禪師吖，對座響一間房裏便，三日三夜唔瞓覺。咁吖，雲谷禪師呢，就問佢嘞，佢話：“凡人所以唔能夠成聖成賢吖，都因爲被雜念吖，同慾望所牽纏。”佢話：“你靜座坐喺度同我對坐三日，唔起雜念，唔胡思亂想，一定有原因嘅。”咁袁了凡呢，就答雲谷禪師話：“由於我被一個術數嘅專家，佢姓孔嘅，佢同我算咗命，關於我嘅榮辱生死，其實我覺得都係有定數，就算我點樣努力，點樣諗，其實都冇用，所以我就心灰意冷，仲諗乜嘢吖？”

雲谷禪師就話，佢話：“人吖，如果唔能夠達到無心、明心嘅境界，難免就會被陰陽氣數吖，去控制，如果被陰陽氣數嘅氣運去控制呢，當然就有定數啦，但係只有凡夫俗子呢，先有定，定數嘅，大善嘅人嘅命運呢，其實係唔會被約束。”啫意思話做大善事嘅人，命運係約束唔到佢，另外相反嘅方向呢，做好多惡事嘅人呢，命運亦都約束唔到佢喎。雲谷禪師話，佢話：“袁了凡吖，你二十年嚟，你被命運所控制，喐唔到，真係凡夫俗子一個，我仲以爲你係聖賢豪傑添！”雲谷禪師對佢講完呢段說話之後呢，就哈哈大笑，笑佢。

咁袁了凡之後，聽完之後咪仲失落嘞，自己已經好似感覺到窮途末路吖，仲俾人笑添。於是袁了凡呢，過一陣呢，就再問雲谷禪師，聽聽下又好似覺得，諗諗下：咦？又好似有啲道理喎！佢問雲谷禪師話，佢話：“一個人嘅命運，其實能唔能夠改變嘅呢？能唔能夠逃離陰陽嘅氣數呢？”

雲谷禪師就答佢：“命由己作，相由心生，禍福無門，惟人自召啫！”雲谷禪師話：“我哋嘅命吖，係由自己去造，我哋嘅相係由我哋嘅心去改變，禍福係無門嘅，係自己去闖入去。”啫是禍是福、造善造惡係我哋自己，人逼唔到我哋，我哋嘅心呢，係最真，我哋自己能夠作主，我哋嘅命運呢，係由我哋控制，唔係受人去擺佈，命運係掌握我哋嘅手上。呢幾句說話就係咁解釋，雲谷禪師就咁講。跟住佢就再講，佢話：“佛教經典裏便唔係講過‘求富貴得富貴，求男女得男女，求長壽得長壽’？都唔係亂講㗎。如果亂講呢，釋迦牟尼佛亦都犯咗妄語，亦都啦，欺騙咗人。但係呢，歷來嚟講呢，都有好多呢啲說話應驗嘅例子，多得不可勝數。”

袁了凡聽完雲谷禪師講完呢段話之後，佢就話：“孟子曾經提過，佢話：‘求，係能夠得到嘅，但係必須要自己能夠做得到先得㗎。’道德仁義能夠力行去自求，但係功名富貴要待人去賞賜，點能夠求得到呢？功名富貴係咪自己去求嘅呢？點求呢？”

雲谷禪師就話：“冇錯，你講得係冇錯，孟子所講嘅嘢冇錯，但係你未深入去了解啫。我話俾你聽啦，六祖惠能禪師吔，亦都講過：‘一切福田，不離方寸嘅，從心而覓，感無不通。’意思係話衆生想得到一切福樂，都離唔開我哋吔，我哋自己方寸之間，我哋方寸之間就係我哋嘅心，由我哋嘅心去作主，我哋心裏便就可以搵到我哋嘅福田，我哋只要精誠去感動，精誠去改變我哋嘅命運，係冇嘢唔通嘅。”佢話：“人只要呢，由我哋內心去自求，力行仁義道德，自然就能夠呢，贏取他人嘅敬重而得到身外嘅功名富貴。爲人如果唔知道反躬自省，一味向前衝，自己唔識得反省，所謂‘吾日三省吾身’，由我哋心去祈求，只係好高騖遠，祈求身外嘅名利，就算你用盡心機吔，其實兩頭都係空嘅。”

雲谷禪師呢，同袁了凡呢，講咗呢段話之後呢，袁了凡呢，就好似有一啲茅塞頓開嘅感覺，但係呢，佢仲呢，唔係話完全太相信，但係已經打動咗佢嘞，打動咗佢開始同雲谷禪師傾偈，吓，已經開始明白到，明，啫俾佢一個問號：命運係咪可以改變呢？雲谷禪師就俾咗一啲聖人嘅話語俾佢，俾咗一啲忠告佢。

於是雲谷禪師呢，又繼續問袁了凡，佢話：“孔先生孔老人到底算你終身嘅命運係點呢？”於是了凡呢，又詳細咁將孔先生同佢算咗過往嘅經歷一一向雲谷禪師講一次。雲谷禪師就話，聽完之後佢就咁講，佢話：“你認爲自己應該得到嘅功名，應該有兒子，你認爲係咪吔？”

袁了凡諗咗好耐先話，佢話：“官場中嘅人都有福相，但係你睇下我相貌係幾輕薄？又唔能夠積德去造福，加以呢，又唔能夠刻苦耐勞，度量又狹淺，縱情任性、輕言妄談、自尊自大，呢啲都係無福嘅相，點樣做到官呢？”吓，你唔好話喎，如果袁了凡呢，其實能夠講咗呢段嘢呢，佢自己都幾有自知之明㗎，其實都幾謙虛。佢話：“俗語所講呢：‘地穢多生物吖，水清常無魚。’地邋遢呢，就多嘢生出嚟嘞，水太清了則無魚。”佢話：“我自己呢，中意呢，清潔，有清潔嘅癖好，形同孤寡相，係無子一個原因。”啫呢個袁了凡自己解釋，“脾氣暴躁吖，缺乏養育萬物嘅和氣呢，係第二個原因，無子嘅。仁愛呢，係化育之本，刻薄呢，就係不育之因，我一向潔身自好，唔能夠捨己爲人、同情別人，係無子嘅第三個原因。其他仲有好多，誒，好多嘢係耗氣吔，譬如我係好飲酒啦，好中意飲酒啦，或者損耗精氣吔，中意長夜不眠吖，吓，唔識愛惜自己啦，呢啲都係無子嘅原因嚟。”吓，袁了凡呢，就係亦都有一段解釋，向雲谷禪師講，解釋佢自己有套方法，點解佢無子嘅。

但係雲谷禪師聽完之後呢，就咁講，佢話：“照你咁樣講吖，世界唔應該得到嘅事呢，其實唔止你講咁少吖，仲有好多，豈，豈止係功名同埋呢，子嗣嘅事情呢？世界上嘅人，係享千金財富，或者享百金嘅財富，或者應該餓死，係取決於各人心性所造成，天吖，只不過係因材施教、因勢去利導啫，佢係冇加以絲毫嘅力量，好似人體嘅輕重，係決定響本身嘅份量，而唔係，唔係磅吖，嘅厚同埋薄嘅，唔係厚此薄彼嘅，係一樣嘅道理吖。”吓，啫天對人好公平吖，係自己嘅問題，唔關個天嘅事。雲谷禪師吖再話，佢話：“傳宗接代嘅事呢，亦都一樣，但憑各人積德嘅厚薄，有百世功德嘅人呢，一定有百世子孫可以傳，十世功德嘅人呢，亦都有十世子孫可以護，呢啲絕子嘅人呢，係毫無功德嘅人嚟吖，其實。只要能夠了解自我嘅因素，係造就人生吉凶禍福嘅關鍵，千祈唔好將呢，唔做官吖、中唔到狀元吖，或者冇兒子嘅原因呢，去歸咎於一啲不可解嘅因素，吓，你應該將你自己嘅習慣儘量去改。譬如呢，將你吝嗇嘅習慣變成中意施捨呢、偏激變爲平和、虛偽變成虔誠、浮躁變成沉著、驕傲變成謙虛、懶散呢改爲勤奮、殘忍化爲仁慈、刻薄改爲寬容，儘量去積德，儘量自愛，珍惜自己，唔好糟蹋自己。以前種種好似昨日死了，今日種種譬如今日生。咁樣做吖，我話俾你聽，就能夠除去身上嘅病根，重新而獲得仁義道德嘅新嘅身體。”雲谷禪師再同袁了凡講，佢話：“血肉物質嘅身體呢，如果受到生滅氣運嘅影響呢，咁人類嘅道德精神一定能夠感動天地而獲福嘅。古有名言：‘天作孽猶可違，自作孽了就不可活。’”吓，雲谷禪師話：“詩經亦都講過，如果人吖，能夠了悟立命嘅道理、順天嘅道理，自然就能夠求得厚福。”佢話：“孔老先生呢，算你呢，做唔到大官，又冇仔，呢個係天嘅作孽仲可以避免，只要你擴充德行、廣積陰德、多作善事，而且自己所造嘅福，係親手去做，又邊有唔會應驗嘅道理呢？”譬如佢話：“易經裏便一本書吔，專係講趨吉避凶嘅道理，如果講命運唔能夠改變，咁如果好同壞又有咩分別呢？凶又點樣避呢？吉又點樣取呢？易經都有講過話：‘積善之家必有餘慶，積不善之家必有餘殃。’啲福呢，能夠呢，延及我哋子孫，禍呢，亦都能夠禍及我哋子孫。”佢話：“你相唔相信吖，袁了凡？”咁樣講。

於是呢，袁了凡呢，聽完之後呢，從此開始呢，猛然醒悟，佢呢，好感謝雲谷禪師吔，指點咗佢吔，呢一啲道理，於是呢，佢就即刻呢，拜領受教，而且將往日嘅過失，響佛前呢，盡情去表白懺悔。首先佢去求登科，然之後發願做三千件善事……（註：接下文）

223.了卻凡心是佛心（二）

（註：接上文）……功過簿上便，如果有過失呢，就功過呢，就相抵，吖，其實係當冇做過嘅。因果上唔係功過相抵，唔好誤會吔，佢做呢個善同埋惡呢，只係呢，整一條加減數出嚟，令自己做更多嘅善事。而且雲谷禪師呢，仲教袁了凡呢，一個密咒吖，呢個密咒呢，就係准提佛母嘅神咒，去教袁了凡呢，持念去改變命運呢，以期有所應驗，吖，呢個咒響佛教裏便呢，都係好重要吖，准提佛母嘅咒特別適合我哋居士去修持。

誒，咁雲谷禪師呢，又教咗袁了凡呢，其他一啲特別嘅法門，去教袁了凡改變命運嘅。雲谷禪師仲有對袁了凡呢，佢開示，佢就話，都好重要嘅，佢話：“一般人呢，認爲呢，夭同埋壽，啫早死或者長壽，係兩種截然不同嘅遭遇，但係孟子呢，所講，點解佢係話一樣呢？我哋試諗一諗吖，佢話人如果能夠心處於不動慾念嘅境界，隨遇而安，善盡自己在生嘅職務，我哋呢條命吖，一定能夠過得踏實，咁樣我哋能夠日日生活響踏實之中，冇違反因果，咁長壽同埋短命根本就冇分別。進一步嚟講呢，貧富、窮通、貴賤亦都係存在我哋心，係決定於我哋心存慾念嘅分別，正因爲世人心存妄念，唔敢去面對現實，唔能夠用靜心去處理順境、以善心去安於逆境，所以生死就變成嚴重嘅兩面。一切吉凶禍福、毀譽是非、窮通貴賤，亦都係困擾住世人，而搞到我哋心神不寧，永無寧日，人如果能夠修身養性呢，去惡向善，安於順逆嘅現實，時刻亦都處於不動絲毫非非念頭嘅明心似鏡、似有、似無嘅境界，能夠返本還原、歸根復命嘅境界呢，距離呢個境界就唔遠，咁樣一切嘅罪惡其實自然呢，就無影無蹤吖，命運自然就歸於稱心如意、全吉無凶嘅境界，呢個先係真正利人，吖，同埋利益自己，有價值嘅行爲。如果未到達無心境嘅人呢，只要時時刻刻持念准提神咒，唸到滾瓜爛熟，有持等於無持，無持又好似有持，連持咒嘅念頭自己都冇感覺得到，吓，類似好似畫符一樣啦，到達空靈嘅境界咧，就能夠一定得道，所謂呢，福至就能夠心靈。”吓，非常之好吖，其實雲谷禪師講嘅呢段開示吖，我覺得，對袁了凡、對我哋吔，亦都係非常之有用！萬法都係由我哋嘅心嘅啫，其實。

所以雲谷禪師講完，開示袁了凡呢啲嘢之後呢，袁了凡呢嘅外號吖，就將個外號，自己呢，佢叫袁學海嘅嘛，就將自己個名叫，叫做，改咗叫“了凡”，其實佢叫袁學海，啫我哋所謂今日嘅題目叫《了卻凡心是佛心》，或者了卻我哋凡心即佛心，萬法係唯心。

如果大家想學准提咒呢，可以喺佛前裏便受持，我可以將准提咒嘅咒音同埋承授嘅方法，點樣修學講出嚟，如果大家有興趣。

咁吖，袁了凡將個“袁學海”嘅名改咗做“了凡”之後呢，佢就紀念，因爲改呢個名係紀念呢，佢了悟立命嘅道理，而唔落去凡夫俗子，吓，嘅地方嘅，所以叫“袁了凡”咁解，呢個名就來源呢一度。

咁至此之後呢，袁了凡呢，佢做嘢呢，日日小心行事，就覺得心理呢，其實已經變咗同以前唔同，以前譬如佢放蕩憂鬱吖，六神無主嘅狀態呢，到而家變成咗戰戰兢兢，好小心好謹慎。既然處於暗室之中呢，亦都以不獲罪吔，向天呢，而時加警惕，譬如碰到有人呢，鬧佢嘅時候，佢能夠淡然處之，其實同以前唔同咗啦，佢已經唔再計較。

咁吖，到咗講開佢嘅功名利祿呢，到咗佢第二年參加考試，孔老先生算定頭先講佢係得到第三名，但係呢，因爲嗰段時間過渡期，佢聽雲谷禪師講，做吖好多善事，又唸准提咒，點知開始唔準嘞，佢嘅命運開始變吖，脫離咗孔先生所算嘅軌跡，佢考取咗第一名。咁孔先生嘅預言開始失靈嘞。到咗秋季嘅舉人考試呢，亦都出乎孔先生意料之外喎，孔先生話佢唔中㗎嘛，但佢考中咗舉人喎。咁所以證明我哋佛教裏便嘅法門吖，雲谷禪師係教袁了凡佛教嘅法門呢，准提咒同埋改命行善，人天善法嘅道理係真係能夠改變我哋命運。準到好似孔先生嘅《皇極經世書》吖，鐵板神數亦都算唔到佢，證明我哋能夠命運掌握響我哋手，能夠逃出命運啦。但係咧，袁了凡呢，又冷一冷靜去檢一檢討，仲係感覺得修養好勉強，好似戰戰兢兢、謹謹慎慎，行善都覺得唔徹底。救人呢，佢仲有一啲心存疑慮，或者呢，身行善，個口呢，仲係有啲唔修，或者平時嘅自己節操吖，都係做得唔係太好。咁呢，如果將功抵過，其實形同虛度，因爲你做一個“功”，做一個“過”相等，咪啫虛度？一手殺雞，一手放雞。所以呢，袁了凡呢，就於是呢，再發願吖，歷時呢，十幾年呢，佢呢，要做儘量，乜嘢惡事都唔做，善事源泉不斷呢，博命去做，歷時呢，十幾年呢，佢就做滿咗三千件善事，吓，做三千件善事。咁呢，到咗第二年呢，佢，佢就返鄉下，就去，做完三千件善事呢，就到佛堂吖，返鄉下佛堂去還願呢，而且呢，佢又再發求仔嘅願望，啫話冇子嗣㗎嘛，孔先生話佢，於是佢又發願去求子，於是許下一個諾言：再做三千件善事，以去補贖今，佢今生嘅過失。咁經過咗一年之後，估唔到奇蹟出現啦，就係生咗一個男仔嘞，就係佢個仔吔，頭先所講佢嘅仔。

所以我哋每做一件善事呢，其實呢，我哋亦都可以學似袁了凡一樣吖，記喺個功過簿裏便，你唔好以爲呢個方法笨吖，呢個方法係時常提醒我哋點樣去，誒，行善積德。其實行善，你個心呢，只要唔執著呢，係冇問題。咁你話記落個簿度係咪一種執著？唔係嘅，你初頭可以由呢個方法去做，去提醒你自己，你覺得一個提醒嘅方法，唔係執著你去，自己去做咗幾多件善事。

袁了凡就每將一件善事呢，記於自己嘅筆記裏便呢，但係呢，佢老婆頭先講，佢係唔識字嘅，每做一件善事就響個歷書嘅日曆上便畫一個圓圈吖，用支鵝毛筆點墨水，譬如施捨物品救濟窮人啦、助人急難、放生等等啦，有時一日裏便呢，做十幾件善事嘅，咁樣繼續去行善積德啦，兩年嘅時間啦，袁了凡啦，嘩，好快今次，兩年吖，三千件善事已經做完嘞，第一次成十年咁多。咁於是袁了凡又再去佛堂度還願啦，又再去，又求喎，其實袁了凡都求好多嘢，但係只要我哋係求嘅善願呢，係冇問題嘅。於是佢再求中進士嘅願望，並且再許下再做幾多件吖？今次唔係三千吖，一萬件吖，一萬件善事嘅願望吖。

於是又經過咗三年啦，佢，哦！個願望又達成，又考中咗進士，做咗寶坻縣嘅知縣添吖，直程成個縣嘅知縣吖，所以呢，佢就將本筆記簿呢，放，放響個檯度，叫做《治心篇》，交待呢，一啲熟悉同埋佢覺得應該要將呢個方法傳授佢嘅人，凡所有做嘅善事呢，一定要登記，到夜晚呢，就擺一個香案呢，響花園裏便呢，去禱告天地吔。咁佢老婆見到所，佢所做嘅善事呢，又仲覺得佢唔多喎，仲經常擔心佢話：“以前響屋企呢，大家互相幫助行善，三千件善事嘅數呢，就好快就完成，現在響衙門之中冇善事可以做，咁幾時先能夠達成吖，做一萬件善事嘅心願去完成功果呢？”嘩，佢老婆已經做善事，啫做到入晒迷嘅，已經。咁有一日呢，夜晚裏便呢，就夢見呢，發夢吖，見到個神靈呢，去指點，去指點佢話，教袁了凡佢話：“只要你下令吖，減收百姓嘅糧租吖，其實一件事咪可以抵得上做一萬件善事？功果就可完啦，你只要做咗呢件善事。”原來呢，袁了凡後尾發完夢佢返去查探下寶坻縣嘅佃租其實係好高嘅，每一畝呢，須要繳吖，二分三厘七毫嘅租稅，於是佢就即刻計劃減低到到一分四厘六毫。但係佢個心都係懷疑，係咪就係做一件善事咁簡單就可以抵得上一萬件呢？我嗰晚所發嘅夢係咪真嘅呢？個神講嘅嘢有冇假呢？

咁吖，啱啱有位禪師呢，由五台山嚟到，佢就將發夢嘅內容吖，嘅，個神教佢所做嘅嘢向呢個，誒，禪師請教。禪師就話，佢話：“只要真誠去做善事吔，切實力行呢，就算一件都可以抵得一萬件，何況你全縣減租，萬民受福，當然一件事可以抵得做萬件啦。”咁袁了凡聽到呢就好開心，好信受，於是佢就將佢自己嘅薪水吔，捐獻出嚟呢，拜託呢個禪師返去五台山嘅時候呢，希望同佢代辦吖，去請一萬個僧人去食飯，去供僧，去表達佢嘅誠心還願去回向。嘩！你睇下袁了凡做善事越做越做好似滾雪球吖，令到佢自己個心呢，越嚟越大吖，利益衆生，有一個菩薩心，雖然係有爲嘅，有個目的嘅，但係呢，都係屬於善，都係利益衆生。

袁了凡呢，其實孔老先生呢，曾經算佢五十三歲已經死吖，但係呢，佢就從來呢，都冇爲佢自己嘅壽命呢，呢件事去做祈禱，或者發願添壽，但係呢，到咗五十三歲呢，嗰一年呢，佢都平安無事度過咗，幾乎唔記得咗嘞。吓，所以呢，尚書上便曾經講過一句說話呢，吓，亦都係好有道理，命運呢，其實亦都呢，係時時變嘅，亦都係好似佛教所講，有一啲無常嘅道理嘅，“惟命不於常”吖，所謂天命嘅說法呢，其實有時係唔可信，唔係一成不變，命運呢，唔可能係唔可以改變嘅。於是袁了凡呢，佢就真真正正，由佢做咁多善事，發生咁多事響佢身上呢，佢就深明一個道理，一句說話就係：凡係話人生禍福係天定嘅呢，其實係凡夫俗子嚟，如果個禍福係憑我哋心定呢，賢達就能夠安命呢，呢個一定係聖賢豪傑！如果相信呢啲說話，我哋嘅心、我哋嘅力，憑我哋雙手可以創造我哋命運，如果咁樣諗係聖賢豪傑，如果覺得我哋命運係安排，相信術數，迷信術數嘅，話禍福係天定嘅，呢個人呢，一定唔能夠得到好大嘅成功，佢一定係一個凡夫俗子嚟嘅。

總之呢，人嘅命運雖然唔可以知道，但係只要呢，運逢顯達嘅時候呢，亦都以落魄嘅心境去處世，相逢到順利嘅境遇呢，亦都呢，係當作拂逆一樣嘅謹慎。譬如我哋碰到富足嘅時候呢，好似貧窮一樣節儉，就係得到其他人愛戴呢，其實都唔好趾高氣揚，要謙虛啲。如果你嘅家世呢，係望族，亦都唔好自鳴得意，或者你學問高深，應該要禮賢下士，去不恥下問。咁如果你能夠咁做，有咁嘅心呢，所謂“克己復禮”，你嘅道德就能夠上進，道呢，就將近啦。

我哋能夠時時維護祖宗嘅高德同埋重望，日日去彌補，代父母，去彌補父母嘅罪過同過失，在上面我哋能夠諗下國家、社會栽培嘅恩德，響下便我哋能夠呢，謀求家庭同子女嘅幸福。對待人時常抱有救急嘅心情，對待自己呢，一定要嚴格，所謂呢，“待人寬就律己嚴”，就唔好“待己寬律人嚴”喎，吓，相反，我哋務必能夠日日反省、時時改過。有一日我哋能夠安於現狀，我哋自認自己係冇過失、缺點，自以爲自己係十全十美嘅人呢，其實呢，佢係逆水行舟、掩耳盜鈴呢，不進呢，就則退嘅。

我諗天下嘅聰明人呢，所在皆是，所以呢，會有道德不修，事業唔發達，都係因爲因循苟且，貪圖安逸，耽誤咗佢一生。雲谷禪師佢所講立命嘅道理呢，我覺得吖，真係至理名言！我哋應該要經常去誦讀而且力行添，就唔會枉度我哋嘅一生呢，去荒廢我哋嘅時日。呢個立命之學啦，係真係值得我哋去參考，做多啲善事同埋修行佛法。

跟住落嚟呢，我哋仲有一啲時間，我哋可以講下改過嘅方法同埋改過嘅要素。咁響春秋時代呢，有好多嘅大夫吖，僅憑觀察一個人嘅言行舉止呢，就能夠推測嗰個人嘅吉凶禍福，而且係非常之準確，呢種事吔，如果我哋睇一睇古籍吖，《左傳》吖，或者《國語》裏便呢啲書呢，都有好多記載。一般嚟講呢，一個人嘅吉凶徵兆，發源於響我哋人嘅內心，而表現，表現於響人嘅外表嘅，凡係相貌仁慈忠厚呢，行事穩重嘅人，佢都能夠獲福，如果相貌係刻薄、行爲輕佻呢，都容易近禍，絕對冇所謂吉凶未定、渺不可測嘅道理吔。所以一件事嘅發生呢，其實係有啲預兆，所謂山雨欲來呢，風滿樓，所以相由心生呢，亦都大致上係呢個道理。

一個人心性嘅善惡呢，其實呢，同天心係相感應。福之將至，可以由呢個人寧靜嘅心境、安祥嘅態度去判斷出嚟，禍嘅臨，禍嘅來臨呢，亦都能夠呢，從一個人嘅乖戾嘅行爲呢，發現得到。人如果想得到福而避禍呢，其實可以呢，首先無論去點樣行善呢，我哋唔好理呢啲嘢先，只要我哋能夠力行將我哋嘅過吖，去改變呢，自然呢，其實能夠向善吖。咁講到，談，咁講到改過呢，知恥就近乎勇呢，其實第一個要素吖，我哋諗下啦，古代嘅聖賢同我哋係同樣嘅人，點解佢能夠流芳千古呢？但我哋呢，就寂寂無名，甚至身敗名裂呢？人如果其實呢，只係貪戀聲色名利，縱情呢，恣意，去背住其他人呢，做一啲，誒，見唔到人嘅勾當，自以爲其他人呢，見唔到，而自鳴得意，咁其實呢個人慢慢就會變成衣冠禽獸，自己唔，唔知嘅，世界上呢，再冇比呢種行爲更可恥、更慚愧。所以，其實一個人呢，自己獨處嘅時候呢，係改過最好嘅時候，係佢最真嘅時候，呢啲時候先要注重。孟子亦都其實講過，佢話：“我哋知道我哋嘅羞恥俾人嘅影響係好大，能夠知恥呢，就聖賢，唔知道羞恥呢，係一啲咩東西呢，其實係禽獸無異。改過嘅關鍵其實喺我哋一念之間，人所以同禽獸唔同，亦都響一念之差。”

改過嘅第二嘅要素呢，其實係有三個要素吖，第一個要素係知恥近乎勇，第二個要素，我覺得係要有敬畏嘅心。天地鬼神呢，其實我哋係唔呃得，人只犯咗一啲過，過失呢，天地鬼神其實知道好清楚，所謂“十目所視吔，十手所指，其嚴乎”呢，呢個係儒家所講嘅道理。犯嘅如果係重大嘅過錯呢，其實天呢，都會施與一啲懲罰，係降一個災殃，我哋因果就感召到呢啲天，天吖所降嘅災，猶如一個人犯咗罪之後，法官就給予一個刑罰咁解。犯如果係小嘅過錯呢，就會損及我哋陽世嘅福報，所以，人唔可以唔怕天地嘅鬼神嘅，一個人呢，就係生活響隱蔽暗室裏便呢，其實天地鬼神亦都樣，一樣一目了然，你就算掩蓋到幾周密，做到幾巧妙，其實都冇辦法掩飾我哋善惡嘅心念所產生嘅意念，呢個意念就好似一道頻率、一個電波一樣。鬼神呢，係無形嘅導體，呢啲唔係鬼神呢，唔響度，所以呢，人吖，又必須呢，要有一個敬畏心，唔好話自己做咗嘢，儘量去掩飾，話自己過去做嘅時候呢，無人知道呢，就以爲人唔知，其實所謂儒家所講呢，“暗室虧心呢，神目如電”吖。人只要一息尚存呢，其實滔天嘅大罪大惡，都有悔改嘅機會，古時候其實有人一生作惡，臨命終嘅時候佢都能夠覺悟，能夠悔改，佢發一個善願能夠得到善終，正所謂“放下屠刀立地成佛”，可以洗百年嘅罪惡，好似千年嘅幽谷涵洞，一盞燈啫，去照一照呢，咁千年嘅暗室呢，就一朝能夠照亮，所以話呢，過失不拘大小，以能改爲要。

各位，人生無常，肉體易逝，如果等到呼吸停止呢，靈魂想改過都唔可能。有人呢，遺臭萬年，有人得到孝子賢孫嘅尊敬，有人呢，沉淪響地獄受折磨，有人呢，能夠受仙佛菩薩嘅指引，所以呢，我哋身體一旦呢，消失響呢個世界之上，一旦無常，我哋又唔知幾時再能夠做番人。我哋喺夜晚，清夜裏便深思，諗一諗呢啲道理，點能夠唔怕呢？我哋要諗一諗呢個道理，真係。

第三個講到改過嘅要素呢，你要話，係要有勇氣同決心。人所以唔能夠改過，係因爲因循苟且誤咗大事，如果能夠發奮圖強、當機立斷，碰到小嘅過，好似啲竹吖，刺傷我哋肉一樣呢，快啲拔咗佢，犯咗大過好似毒蛇咬我哋手指一樣呢，我哋要斬手指嘞，如果唔係啲毒呢，就走上我哋身度，命都冇，唔能夠猶疑，唔能夠等待吔。所以易經都講過一句說話，其實佢話“風雷增益之象”吖，風起雷動呢，其實係好乾脆利落，咁改過遷善呢，一定能夠成功。咁譬如我以上所講，人呢如果能夠俱備以上改過三種要素呢，知道過能夠改呢，就能夠好似春日逢冰嘅一樣，一定能夠呢，消失瓦解吔。

跟住我哋或者又講下改過嘅三個階段吖，一啲階段。一般人改過，有喺“事”上便改，有喺“理”上便改，有喺我哋“心”上便改嘅三個階段，“事、理、心”，做嘅方法唔同，但係其實所得到嘅效用係一樣。譬如前日殺生，今日戒殺，前日好暴怒嘅，今日反而靜心反省，呢啲係由“事”上便去改過嘅方法。呢種只喺行動上便去勉強壓制嘅方法呢，其實我覺得係好難達到改過嘅方法。比較理想嘅改過方法，係應該由“理”上便去改嘅，“道理”個“理”。譬如我哋諗住想改殺生嘅過錯，就諗上天有好生之德，每一樣物件都應該要珍惜生命，殺佢去養活自己，又點能夠心安呢？再加以水深火熱鍋鼎之苦，一定痛徹骨髓。我哋想得到健康，健康之道，首先在於我哋本身元氣嘅運化，而唔係在於物品嘅稀罕同埋珍貴，就算山珍海錯吖，其實食咗之後呢，都唔係一定能夠令到我哋身體，誒，一定能夠健康嘅，就算我哋能夠用一啲蔬菜果品去充飢呢，可能亦都會好好，何必其實要將自己嘅肚呢，去當作一個墳場呢？吓，裝動物嘅屍體嘅墳場！咁樣因果上便其實折損自己嘅福分。我哋再諗一諗下，血肉之類嘅呢，嘅動物一定係有靈性，同人同體，唔能夠修養大德，使到好似親近細蚊仔呢，咁樣呢，去親我、敬我，已經係屬於慚愧，點可以再殘害生靈，使到仇我、恨我呢？如果我哋諗到呢個道理呢，一定呢，見物能夠憐惜，落唔到手，而我哋慢慢逐步能夠改變呢，殺生嘅壞習慣。

譬如，又講下如果我哋想改一改我哋暴躁嘅脾氣吔，壞脾氣呢，我哋應該諗一諗呢，人係唔可能一模一樣，大家都有佢嘅長，有佢嘅短，係冇十全十美，所以應該要互相體諒遷就，就算唔啱我嘅意思，而干擾到我呢，但係對我呢，亦都係冇損傷，又何必勞氣呢？再講，天下係冇自以爲是嘅豪傑，亦都冇怨天尤人嘅修養法，點樣可以只要求別人，唔要求自己呢？我哋日常生活裏便，如果唔能夠稱心如意呢，係自己徳行未修，涵養唔夠，我哋應該必須再加以反省。如果咁譭謗呢，如果我哋咁樣諗呢：其實譭謗亦都會舉火燒空，吓，揸住一個火把去燒天空，燒唔燒到呢？燒嘅人其實可能會燒番自己吔，會自燒自滅。如果聽到譭謗呢，你就容易發嬲，想盡辦法去辯護吖，加以維護自己，有時恐防呢，適得其反，好似春蠶作繭，自縛一樣呢，自取其辱嘅，有時會係。

總之呢，殺生吖、發嬲吖，都係無益有害，譬如其他仲有好多過失，都可依此類推，我哋細，細心去諗一諗，觀照一下呢啲道理啱唔啱，諗下明，明唔明白，咁呢，如果我哋每一件事都加以反省，至正其言呢，啲過錯就唔會發生。咁一般嚟講，其實人嘅過失雖然呢，有好幾百種吖，但歸根究底呢，都係由我哋心所做起，如果心唔動念，無私無慾，就唔會呢，去逐樣去檢討名吖、利吔、色吖、貨吖，各種過失，只要一心向善，正氣所鍾，邪氣呢，自然係一塵不染，就譬如好似太陽當空一樣呢，鬼魅呢，一定能夠消散，呢個道理就係所謂“本立而道生”嘅道理，亦都係最正確，由我哋心嘅上便去改變我哋錯誤、壞習慣，唔好嘅嘢嘅方法嚟，因爲過由心生，亦都由我哋心去改呢。譬如斬一樖毒樹，首先一定要斷佢嘅根，咁根冇咗，枝葉必定唔能夠生長，就唔需要呢，好繁複呢，將枝枝葉葉呢，遂塊遂塊去剪去，遂枝遂枝去剪，我哋由我哋心上吖，去改變吖，即係呢，去調理我哋嘅心。當我哋妄念一動呢，我哋即刻覺察而加以去化解，咁唔會呢，有過錯。一有心想去做一啲惡事，做一啲損人利己嘅嘢，我哋應該諗一諗，自，即刻去檢點，當下要即刻檢點我哋心態，時常俾一個信息暗示自己：我所做呢樣嘢係利益自己吔？定利益他人吖？有冇傷到他人吖？或者有冇傷到自己呢？要檢一檢討。呢個動念呢，去改過方法，其實係最好嘅方法，如果做唔到呢啲道理同境界呢，只好用頭先所講“理”嘅方法去改過，如果再做唔到呢，只有用“事”嘅方法去慢慢禁制嘅啫。能夠如果治理我哋心呢，而且明白道理呢，而且亦都能夠禁到我哋嘅過錯呢，就再好不過嘅事吔。

由事、由理、由心三個方法一齊去做，當然係最好，但係只係識得去禁止我哋過失，唔明白道理，唔知道調治我哋嘅心呢，其實呢，係一個比較笨嘅改過方法，所以發願改過行善呢，其實最好能夠有親朋戚友去督促我哋，或者呢，奉請鬼神呢，作爲借鑒，一心懺悔，晝夜呢，都唔能夠鬆弛，咁經過一段時日呢，其實就會有效驗。到咗呢個境界呢，我話俾你聽，自然就能夠感到心曠神怡、智慧頓開，或者處於雜亂環境你嘅心係唔會動嘅，唔怕亂性。見到你嘅仇人呢，唔會發嬲，同埋相反會歡喜係自然嘅。或者響你嘅夢裏便吖，會夢見呢，吐出一啲黑色嘅嘢，或者夢見聖賢去提拔去接引你，或者夢見自己呢，飛騰空中，同埋種種罕見嘅勝蹟妙景。如果你有啲咁嘅夢吖，或者你修持咗一啲准提咒之後呢，有啲咁嘅夢呢，或者亦都做咗好多善事有咁嘅夢呢，亦都證明你呢，啲罪過開始消滅，善呢，開始增吖，你嘅，你嘅呢，靈身吖，你嘅精神體上便開始有光明，咁呢，一定證明你呢，所做嘅嘢係冇白費嘅。但係唔好有呢啲現象你就心滿意足，自已覺得好得意，唔再求進步，百尺竿頭，一定要繼續進步，唔好自滿，千祈唔好自滿。我哋凡夫俗子，就好似呢，一啲鮠魚吖、啲刺蝟，好似箭豬一樣咁吖，身上好多刺一樣吖，如果我哋冷靜思考呢，仲見唔到自己嘅過失呢，就一定係粗心大意吔，迷糊嘅人吖，我哋身上嘅過失就好似吔，刺蝟嘅刺一樣咁多。其實，凡係罪孽深重嘅人吖，其實都係心智昏庸，失神健忘，無事煩惱，見到正人君子呢，佢有時會表現出好慚愧同沮喪嘅狀態，聽到真理大道呢，反而唔高興，有時施恩反而招到憎怨，或者夢見一啲顛顛倒倒嘅噩夢，甚至經常呢，好囉嗦嘅，咁以上種種嘅跡象呢，其實有時係自已造孽嘅相，係報應出嚟，如果做人有上述嘅情況呢，其實應該加以反省，加以發憤圖強，去改過遷善，如果唔係日後呢，泥足深陷呢，就不能自拔，自己自誤咗呢，自己嘅前途。

咁呢，今晚就講到呢度，我希望大家能夠呢，自己呢，返去能夠真係睇下《了凡四訓》呢本書，今晚我所講呢，只係拋磚引玉，其實《了凡四訓》響中國民間裏便係一本膾炙人口嘅書，家喻戶曉。其實《了凡四訓》所做，了，袁了凡先生所做嘅善事呢，其實響我哋中國人嘅天性裏便係埋藏咗，喺我哋心底扎根係有一個善性裏便嘅，呢個善性就係袁了凡先生一種犧牲自己嘅思想，吓。但係雖然呢，佢犧牲自己，能夠得到回報，但係呢一種都係利益到他人嘅行爲吔，所以呢，袁先生嘅精誠吖，其實呢，足以作爲我哋嘅榜樣嘅，所以呢，我不惜能夠拋磚引玉去講一講呢個袁了凡呢小小四訓，希望能夠令你睇下呢本書，明白改過嘅問題，亦都我哋知道吖，命運呢，係掌握響我哋手上係最重要，所以我哋呢，唔，唔好迷信算命，最好唔好算，因爲命運掌握我哋手上。我哋學似袁了凡先生笨啲，或者做個功過格，或者只係你努力去行善，去努力去改造你命運。就算你去算命、去睇相幾準都好，話你將來會點，其實可以改變，何必要知呢？何況一般人，佛教所講嘅善惡事吔，都係一啲因果嚟，如果你不斷去行善事，你自然會有好嘅福報，唔需要理得你前生所做惡事會發生響你身上嘅惡果，只要你努力行善，唔好介懷。譬如你去睇相嚟講，佢算到你係你做咗好多惡事嘅，你會有一段時間有啲惡報，你個心一定耿耿於懷吖，聽完，或者唔會發生，或者呢個算命先生，唔係學似孔先生咁樣，不學無術算錯你呢？咁你咪擔心好耐？就算佢真係算真你吔，又何必呢？如果你唔知道咪稍爲更加心安理得？所謂“但行好事，莫問前程”，就係呢，我今晚忠告大家嘅說話。多謝各位！

224.道在尋常日用中之《菜根譚》（一）

道在尋常日用中之《菜根譚》

《菜根譚》係我國明朝萬曆年間，即係公元1573至1619年，有一位叫做“還初道人”嘅人——洪自誠先生所遺留下嚟嘅散文集，全本文集可以分爲前集同埋後集。前集主要係記載洪先生社會生活嘅心得，後集係記載洪先生遺世獨立、同朋友談風說月嘅樂趣。當然，《菜根譚》本身呢，係冇咁嚴格去區分，所以將前後集視爲一體亦都未嘗不可。

“菜根”嘅意思就係指菜葉、蘿蔔等等嘅粗糙食物，宋朝大學者朱熹響《小學》呢本書之中亦都曾經記述宋朝嘅人汪信民先生嘅說話，佢係咁講嘅：“得常咬菜根，即做百事成。”呢本書嘅書名吖，亦都就係咁樣來源，由呢本書嘅書名就可以睇得出呢本書係主張清心寡慾、簡樸而充實嘅人生。關於《菜根譚》嘅作者洪自誠先生，我哋除咗知道佢係明朝萬曆年間嘅人之外，佢叫做應明，別號還初道人啦，關於佢其他嘅生平事蹟，已經係難以考察。《菜根譚》係一本兼具文采，用以修養心性嘅書籍，全部嘅書闡揚中庸之道嘅思想，糅合咗儒釋道三家嘅哲學精義，聯袂成爲一篇警世嘅箴言。書裏便每一章、每一句都可以作爲我哋修身嘅座右銘，係一本不朽嘅處世語錄。

現在，我將《菜根譚》簡單咁樣用錄音帶演述出嚟，分爲三百六十課，每一課逐一加以演繹同解釋，希望對大家做人處世能夠得到一點點嘅幫助，就係呢套錄音帶嘅心願。

第一課：弄權一時，淒涼萬古。“棲守道德者，寂寞一時；依阿權勢者，淒涼萬古。達人觀物外之物，思身後之身，寧受一時之寂寞，毋取萬古之淒涼。”能夠堅守道德嘅人，只係會一時覺得好寂寞，但係嗰啲攀附權貴嘅人呢，就會遭到萬古淒涼嘅命運。一個通達事理嘅人，將會摒棄現實物質嘅誘惑而注重心性嘅涵養，顧慮到死後嘅名譽，所以我哋寧可以遵循道德規範，忍受一時嘅寂寞，亦都唔適宜吔，去依附權勢，去招致萬古嘅淒涼。人生最美同最尊貴嘅唔係在於食衣住行等等物質享受，雖然住嘅係高樓大廈，著嘅係綾羅綢緞，吃嘅係山珍海錯，但係如果生活糜爛、醉生夢死，咁樣嘅人，咁樣嘅人生亦都毫無意義。我哋試觀古今中外歷史上嘅名人、偉人，佢哋之所以受人敬仰，係由於人格、學識嘅偉大，而唔係因爲佢哋嘅地位、權勢，所以古人話：“世上最尊貴嘅莫過於道；最美善嘅莫過於德。”一個人如果能夠遵守道德，一定爲世人所尊重敬仰，如果唔修品德、作惡多端、饞利奸佞，雖然高官厚祿，依然呢，係會遭到世人所咒罵嘅。

第二課：抱樸守拙，涉世之道。“涉世淺，點染亦淺；歷事深，機械亦深。故君子與其練達，不若樸魯；與其曲謹，不若疏狂。”涉世經驗較爲淺嘅人，佢所沾惹嘅惡習呢，係一定較少，但係涉世經驗較深嘅人，佢所沾惹嘅惡習就必然亦都較深，因而懂得運用各種嘅奸詐同埋計謀，所以，有道德修養嘅君子，同埋精曉人情世故嘅人，佢處事係圓滑老練，與其咁，不如做一個淳樸正直嘅老實人啦，與其拘泥於小節、行事過於謹慎，不如稍爲狂放一啲，反而不失人嘅坦率同埋真誠。社會就好似一個大染缸，我哋初入社會嘅人呢，多數係比較天真純樸，但係一旦經歷咗世間嘅各種驚濤駭浪，閱盡咗各種艱難險阻，經驗越多就越爲世故而變得投機取巧，專走旁門左道嘞，所以，凡事唔應該只求熟練精通而忘記咗抱樸守拙嘅做人原則。太過於練達嘅人往往容易變成老奸巨猾，所以一個君子吖，與其過於虛矯不實呢，不如敦厚樸直，先唔會失去佢自己嘅本來嘅真實。

第三課：心事宜明，才華須韞。“君子之心事，天青日白，不可使人不知；君子之才華，玉韞珠藏，不可使人易知。”君子嘅心意，要好似青天白日咁樣清淨明朗，係冇一件事唔能夠俾人知道嘅，但係君子嘅才智同埋學識呢，就要好似藏珍珠寶，藏玉咁嘅藏起來，唔可以輕易呢，係俾人知道。如果一個人嘅心意就好似青天白日咁樣清朗，冇絲毫嘅烏雲遮染，行爲“上仰不愧於天、俯不怍於地”，即使一個人獨處室內或者響暗處亦都唔會欺騙自己，咁樣其他人對佢呢，就冇咩嘢可以批評。但係一個人嘅才華就不宜過於炫露吖，我哋需要懂得韜光養晦嘅功夫，非到必要嘅時候絕不輕易展露自己嘅聰明才智，否則係好容易遭人猜忌。內心保持住深謀遠慮，響外貌就顯露出瀟灑飄逸嘅作風，咁樣做呢，就唔會輕易敗壞事件，亦都唔會遭致人哋去妒忌。

第四課：出污泥而不染，明機巧而不明（註：網上資料爲“明機巧而不用”）。“勢力紛華，不近者爲潔，近之而不染者尤潔；智械機巧，不知者爲高，知之而不用者爲尤高。”對於權勢名利、富貴榮華能夠唔接近嘅人，佢嘅品行必然高尚，如果接近佢而唔被浮華奢侈嘅習氣所沾染呢，咁樣品格就更爲高潔嘞。對於智巧機謀等等嘅虛偽欺詐嘅手段，唔知道嘅人固然高尚啦，但係知道而唔去運用嘅人呢，就更爲高尚。一般人對於有利益嘅事呢，都會好似螞蟻一樣吖，想貪一啲甜頭，因此有權有勢嘅豪門望族天天呢，都門庭若市，然而呢啲豪門望族一旦失去權勢、生活困頓、性命危急嘅時候，平日饞利阿諛響門前嘅人都會紛紛避開，咁樣就係所謂人情冷暖、世態炎涼嘅道理。以前有個翟公，當年佢響在朝爲官嘅時候賓客盈門，等到佢被辭官返鄉之後呢，就門可羅雀，我哋可以見到呢，人都係喜好權勢榮利。一旦有咗權勢榮利而能夠唔受佢束縛嘅人呢，人格自然高尚，對於富貴榮華嘅引誘能夠視若無睹嘅人，行爲自然清廉，而即使接近咗仍然唔爲佢所污染嘅人，品格就更高潔。

第五課：良藥苦口，忠言逆耳。“耳中常聞逆耳之言，心中常有拂心之事，才是進德修行的砥石。若言言悅耳，事事快心，便把此生埋在鴆毒中矣。”響我哋嘅耳裏便時時聽到令人唔舒服嘅忠告，心裏便時常有唔順心嘅事，呢個先係增進我哋道德、修養我哋品行嘅磨石，如果所聽到嘅都係令人愉快嘅說話，所遇到嘅都係順心如意嘅事，就等於將自己一生埋浸響劇毒中了。“良藥苦口，忠言逆耳”，呢個係千古不變嘅至理名言，當我哋聽到朋友嘅忠告嘅時候，我哋嘅心裏便往往呢，都會生出厭憎嘅感覺，剛愎自用，根本係唔會理會人家嘅金玉良言。如果聽到其他人嘅懇切勸言，而能夠進一步反省檢討而加以注意改進我哋嘅缺失，無形中其實就可以增進咗自己嘅德行。因此聽到唔中聽嘅說話呢，唔好覺得厭煩，遭遇困境亦都唔好埋怨灰心，因爲逆境往往可以磨礪我哋嘅心智，鼓勵我哋向上求進。俗語話“一枝草，一點露”“天無絕人之路”，唔好爲自己已經走到窮途末路，我哋要知道上天有好生之德，一切都要靠我哋自己去努力創造嘅。

第六課：和氣致祥，喜神多瑞。“疾風怒雨，禽鳥戚戚；霽日光風，草木欣欣。”可見天地不可一日無和氣，人心不可一日無喜神。狂風暴雨嘅天氣，連到禽鳥亦都會感到憂傷哀淒；晴朗嘅天氣呢，清風送爽，連無心嘅草木亦都會欣欣向榮。由此可見，天地之間唔可以一日缺乏平和嘅氣象，人嘅心內唔可以一日缺乏愉快嘅情緒。狂風暴雨嘅日子呢，天氣灰暗，連鳥類吖，都會顯得悲傷哀淒，但係天氣晴朗嘅時候，草木亦都跟住會呈現出欣欣向榮嘅景象。大自然嘅變化對天地萬物竟然有咁大嘅影響，所以，天地之間絕對唔能夠一日冇平和嘅氣象，猶如我哋人間社會唔可能一日缺少歡樂嘅氣氛。人嘅七情六慾係照映人心嘅一面鏡，如果以不平、不滿嘅心去處世呢，就會呈現出憂惱、懊悔。如果以歡喜、愉快嘅心去待人接物，就唔會遭人排斥同埋厭怨，一切呢，都會顯得極爲和諧同埋圓滿㗎喇。

第七課：淡中知真味，常裏識英奇。“醲肥辛甘非真味，真味只是淡；神奇卓異非至人，至人只是常。”濃烈嘅醇酒、豐盛嘅美食、辛辣甘甜嘅嘢，唔係真正適合我哋嘅口味，真正適合我哋口味應該係清淡嘅，嗰啲神妙、奇特、超凡神異嘅人，唔係真正有道德嘅人，其實真正有道德修養嘅人，佢嘅作爲其實係同普通人一樣嘅。粗淡嘅蔬果最適宜我哋嘅腸胃，呢個先係爽正、真正嘅口味，食過多嘅醇酒美食，反而唔及食一啲簡單嘅菜根嚟得香甜可口。因爲自己係具有神奇技藝出衆而自以，自以爲超群拔萃、與衆不同嘅人呢，並唔係別人崇敬嘅對象，相反一個有住圓融嘅人格同品德嘅人，會循守住自己嘅理念，默默實現自己嘅理想，就好似虛心嘅竹有低頭葉一樣謙遜平和，喺外表上同別人一樣嘅平凡無奇。

第八課：閒時吃緊，忙裏悠閒。“天地寂然不動而氣機無息稍停；日月晝夜奔馳而貞明萬古不易。故君子閒時要有吃緊的心思，忙處要有悠閒的趣味。”天地睇起嚟彷彿靜默得係冇一絲動靜，但係充滿天地間嘅陰陽之氣呢，就會時刻不停喺度活動；日月夜以繼日奔馳運轉，但係日月嘅光明就係萬古不變。所以君子響閒散嘅時候要有警惕應變嘅心理準備，響繁忙之中呢，其實亦都需要保留一分悠閒嘅興致。西方人認爲神係天地萬物之主，又認爲人類應該充分利用自然嘅潛在資源，用文明去克服自然，由河川山谷嘅聲音去探測水嘅流量，利用水力嚟發電，由山石顏色嘅深淺去探知礦物嘅所在，然後設法努力去採集資源，運用資源。東方人就認爲天地養育萬物，就好似同人間嘅父母一樣，天地運行嘅道理，就同做人嘅道理一樣。天地自然嘅變幻，靜中有動，動，動中有靜，所以人響悠閒嘅時侯應該隨時都會有所警覺，響百忙之中亦都應該有悠閒嘅趣味，呢個先係人生嘅真意義。

第九課：靜中觀心，真妄畢見。“夜深人靜獨坐觀心，始覺妄窮而真獨露，每於此中得大機趣；既覺真現而妄難逃，又於此中得大慚愧吔。”響夜深人靜嘅時候，自己一個人靜坐，反省檢討，所謂“吾日三省吾身”，就會發覺我哋嘅一切妄念、煩惱都會消失於無蹤而露出我哋嘅真正本心，每次響呢個時候呢，都能夠得到人生嘅真義，但係響我哋嘅本心流露之後，又會覺得雜念、煩惱係唔係咁容易擺脫？呢個時候又不覺，覺得自己有一啲慚愧不安。響日頭繁碌不停嘅工作活動使到我哋吖，時常無法靜下我哋嘅心嚟審視自己，只有響夜闌人靜嘅時候呢，先有屬於自己嘅一片天地，呢個時候將自己閂埋響屋裏便或者房裏便，俾自己心思平靜下嚟就可以發掘到心靈嘅泉源。就好似一桶污水，如果想俾佢澄淨嘅話，首先要將佢擺喺度唔好喐，等到過一啲時辰，過一啲日子呢，自然雜質就會沉到桶底，如果將佢攪動呢，污水無論如何都唔會澄清嘅。曾子好似頭先所，所講過呢句說話：“吾日三省吾身：爲人謀而不忠乎？與朋友交而不信乎？傳不習乎？”連忠聖嘅曾子吔，都不忘隨時反省自身，何況係我哋一般人呢？

第十課：得意須早回頭，拂心莫便放手。“恩裏由來生害，故快意時須早回首；敗後或反成功，故拂心處莫便放手。”蒙受恩寵嘅時候，好容易因此會產生禍害，所以響得意順心嘅時候要及早回頭，響遭受挫折失敗之後，亦都會反而可能會帶嚟成功，所以響失意、唔順心嘅時候呢，千祈唔好輕易放棄。朱子曾經講過：“凡名利之地退一步便安穩，只顧向前呢，便危險。”人往往響得意嘅時候呢，多數都唔考慮到事情嘅後果，往往會驕矜自大、恃先傲物，等到災禍臨身嘅時候就倉皇失措、無所遁形，所以響得意嘅時候，我哋嘅心時時要謹慎去約束自己，做一啲準備功夫，要及早回頭，以免災禍發生嘅時候懊悔，就嚟不及㗎喇。所謂“得意莫忘失意日，上臺勿忘下臺時”就係呢個道理。但係唔好因爲事情稍有挫折就灰心喪志，所謂“失敗係成功之母”，人必須要有百折不撓、奮勇向前嘅精神毅力，然後先能夠達到成功嘅目的。

第十一課：澹泊明志，肥甘喪節。“蔾口莧腸者，多冰清玉潔；袞衣玉食者，甘婢膝奴顏。蓋志以澹泊明，而節從肥甘喪也。”能夠忍受三餐粗菜淡飯嘅人品格嘅操守呢，通常都好似冰玉咁潔淨無疵，而嗰啲喜歡穿住華麗衣裳、講究美味佳餚嘅人，多數都係甘心好似奴僕向其他人屈膝奉承。因爲一個人嘅志節係喺恬淡寡慾之中表現出嚟，而節操呢，則係喺貪圖物質享受之中就往往會喪失咗。只需要簡單粗菜淡飯就能夠滿足需求嘅人，對於現實嘅事物就唔會抱持任何嘅野心，佢嘅心就冰之清澈，好似玉嘅潔白。但係講究華衣美食嘅人，時常都係甘願以諂媚奉迎嘅姿態去換取榮華富貴，所以一個人如果冇貪求名利嘅念頭，就冇必要向人低頭，佢嘅名節、操守自然堅定不移。相反，貪求錦衣玉食嘅人，就會以各種嘅手段嚟取得所需，因此品格往往會變得卑劣無比，所以老子曾經講過：“知足常足，終身不辱；知止常止，終身不恥。”

第十二課：眼前放得寬大，死後恩澤悠久。“面前的田地要放得寬，使人無不平之嘆；身後的恩澤要流得久，使人有不匱之思。”眼前心胸要放得寬厚一啲，先唔會使到人對你有所不滿；死後要留俾後人嘅恩澤要能夠留得久遠，先能夠使到後人對你有不盡嘅追思。佛家將人生分爲過去、現在、未來三個階段，所謂“面前”就係指現在意思，“田地”就係佛書裏便所講嘅心田，意思係話人心實在係種種煩惱嘅根源，人生在世猶如夢幻一般轉瞬即逝，所以人心需要放開我哋嘅心田，打開我哋嘅心扉，無論善惡智愚、長幼親疏都應該同等看待，對人體貼寬厚，一視同仁，就唔會引起其他人嘅不平不滿。所謂“前人種樹，後人乘涼”，一個人響有生之年應該善盡自己嘅職責，貢獻自己嘅心力，多啲爲社會大衆謀求更大嘅利益，咁樣身後自然會爲人所追思同埋緬懷。

第十三課：路要讓一步，味須減三分。“徑路窄處，留一步與人行；滋味濃的，減三分讓人嘗；此時涉世一極安樂法。”我哋行經狹窄嘅小路，應該留一步俾別人去行走，有好食嘅嘢應該分一部分同別人同享，呢個先係立身處世、求取安樂嘅最佳方法。山間嘅狹路往往唔能夠兩個人同時走過，如果爭先恐後呢，就會有墜落深谷溪壑嘅危險，所以最好呢，先能夠俾人行一步，咁樣彼此都能夠保存住性命。有功勞利潤嘅時候，應該與別人分享嘅，唔適宜唔顧他人嘅存在而獨自享受，咁樣呢，做呢，先唔會招惹怨尤。《易經》上吖，曾經講過：“天道之盈虧也，乃視謙之有無。”（註：根據CBETA，“乃視謙之有無”疑爲“乃視益謙之有無”）如果爲咗達成目的而不惜絆倒別人，或者謀取他人嘅財物去滿足自己，就係違反天道，咁樣做將會使到自己陷於痛苦嘅深淵。

第十四課：脫俗成名，超凡入聖。“作人無甚高遠事業，擺脫得俗情便入名流；爲學無甚增益功夫，減除得物累便超聖境。”想做個成功嘅人呢，其實唔需要咩高遠偉大嘅事業，只要能夠擺脫世俗情慾同埋功名利祿嘅枷鎖就可以躋身名流；研求學問亦都唔需要咩嘢訣竅，只要能夠唔受外物嘅誘惑，其實就可以達到超凡入聖嘅境界了。有高明手腕同埋聰敏見識嘅人，固然能夠成就一番大事業啦，但係平凡嘅人縱然冇轟轟烈烈嘅大事業，只要能夠專心一致嘅努力從事，唔被功名利祿所誘惑，終會有成功、躋身名流嘅一日。響研究學問或者修養品德方面，應該抱住遠大嘅理想，站穩我哋嘅腳步，積極奮進，保持我哋嘅恆心同毅力，絲毫唔會受外在事物嘅牽累同影響，應該全副精神吖，放響進德修業上，努力不懈，咁樣即使唔能夠成爲偉大嘅人物，亦都能夠超凡脫俗而出類拔萃。

第十五課：義俠交友，純心做人。“交友須帶三分俠氣，作人要存一點素心。”同朋友交往呢，要帶有三分俠義嘅心腸，做人處世呢，就要保留一顆赤子嘅心懷。朋友之間應該互相窺過勸善，互相切磋鼓勵，有福同享、有難同當，好似難兄難弟一樣，呢個先係交友之道。如果只係爲咗私利吔，而同人交往，係唔可能獲得真誠嘅友誼。至於平時爲人處世吖，應該保存一顆真誠善良嘅赤子之心，坦誠去對待其他人，唔好因爲風氣嘅敗壞、人心嘅險詐難測而污滅咗自己善良嘅本性。所謂“敬人者、人恆敬之；愛人者，人恆愛之”，呢個係千古不變嘅至理嚟嘅。（註：接下文）

225.道在尋常日用中之《菜根譚》（二）

（註：接上文）

第十六課：德在人先，利在人後。“寵利毋居人前，德業毋落人後；受享毋逾分外，修爲毋減分中。”名利恩寵係唔須要同其他人爭先恐後去爭取，道德事業嘅表現呢，就唔應該落於人後；生活享受唔適宜超越本分之外，但係學問道德嘅涵養就應該盡自己嘅能力去研求。對於榮耀同利益嘅獲得唔可以搶喺人前，應該首先讓其他人之後，然後自己先去領受，咁樣就唔會引起別人嘅怨恨同埋猜忌，但係對於社會國家有利益嘅事，或者增進個人嘅道德學問呢，就唔好落喺人後了。獲得長上嘅恩寵或者受到他人嘅饋贈嘅時候，應該反省一下自己係咪應該得到嘅呢？所獲得嘅千萬唔可超過自己所付出嘅，凡事都要有轉彎嘅餘地，咁樣先能夠有和諧快樂嘅人生嘅。

第十七課：退即是進，予即是得。“處世讓一步爲高，退步即進步的張本；待人寬一分是福，利人實利己的根基。”做人處世以謙讓一步爲妙，因爲退讓一步啫使到自己往前進一步嘅基礎；待人接物呢，以寬厚一點呢，就係福，因爲方便別人呢，就係方便自己嘅基礎。佛家曾經講過：“手把青秧插滿田，低頭便見水中天；六根清淨方爲道，退步原來是向前。”待人處世有兩種方式，一種係將其他人壓低使到自己佔優勢，一種係同人互信互讓。一般人呢，多數係採取第一種方式，寧可獨佔鰲頭而唔願意同人分享利益，處處以自我爲本位，抱持咁樣觀念又點樣同別人互信互讓呢？社會又點能夠達於和諧同安樂呢？當然，響研究學問、造福社會方面，我哋應該有不落人後嘅觀念，但係響日常生活裏便，無論做任何嘅事都應該以讓人一步爲貴，待人亦都不宜過於苛刻，太苛刻就會使到其他人去疏遠咗你了。

第十八課：驕矜無功，懺悔滅罪。“蓋世功勞，當不得一個矜字；彌天罪過，當不得一個悔字。”即使立下蓋世嘅功勞，亦都抵擋唔得到一個“矜”嘅消磨；即使犯下滔天嘅罪惡，只要能夠及時悔悟呢，亦都能夠立地成佛。所謂“一將功成萬骨枯”，一個名將立下咗蓋世嘅功勛係要犧牲無數嘅士兵先能夠成就佢嘅功勛，能夠時常懷有呢個念頭就係一個道德高尚嘅人，所以絕唔可以因爲一點成就呢，就驕矜自傲，自以爲高人一等，有道就係“驕者必敗”嘅道理。而犯下滔天大禍呢，係天地所不容嘅人，如果能夠由我哋心底真誠懺悔、改過自新、洗心革面，將所有嘅罪過亦都能夠一筆勾銷，好似佛經上講：“罪性本空由心造，罪從心起將心懺，心若滅時罪亦亡，心亡罪滅兩俱空，是則名爲真懺悔。”罪業深重嘅人亦都有善根嘅，如果能夠啓發佢嘅善心，就能夠令到佢放下屠刀，立地成佛，就算最壞嘅人，莫過於一啲欺善怕惡，有啲強搶蝦蝦霸霸嘅人，咁樣嘅人呢，先係最可悲可憐嘅。

第十九課：完名讓人全身遠害，歸咎於己韜光養德。“完名美節不宜獨任，分些與人可以遠害全身；辱行污名不宜全推，引些歸己可以韜光養德。”完美嘅名譽同節操決不可自己一個人獨自承受，應該呢，分一啲同其他人去共享，咁樣先能夠遠離禍害，去保存生命同名節；令到人感到恥辱嘅行爲同名聲呢，唔好全部推卸俾別人，自己應該承擔幾分，咁樣先能夠掩藏才華、涵養嘅品德。完美嘅名聲或者功業呢，其實係最容易遭受其他人嘅嫉妒，因此一個人應該懂得明哲保身之道，唔適宜呢，好事佔盡，而招嚟別人嘅怨恨，只要將自己嘅成就利益分出一部分同人分享，就可以保存自己嘅生命同名節。相反呢，敗德亂行嘅名人呢，人人吖，都遠而避之，自己嘅清白固然唔願意遭人污損呢，然而呢，一旦污名降身亦都唔須要呢，好急去推卸，自己能夠承擔一部分嘅罪辱雖然表面上唔係咁光彩，但係只要我哋心中能夠光明磊落，其他人對我哋嘅誣蔑其實又有何害處呢？咁樣反而可以長養我哋德行，令到我哋韜光養德、進德修業啫。

第二十課：天道忌盈，卦終未濟。“事事留個有餘不盡的意思，便造物不能忌我，鬼神不能損我。若業必求滿，功必求盈者，不生內變，必召外憂。”做任何事都要事先留一個餘地，唔好走極端，咁樣創造天地、發育萬物嘅神就唔會嫉嫌我了，鬼神亦都唔會加害我；如果事事要求稱心如意，達到至善至美，功勞一定要求到達到登峰造極、無人可比嘅呢，咁樣即使唔會發生內部嘅變亂吖，亦都會必然吖，招致外患嘅。對於任何事，人人都想有個圓滿嘅結果，事情要做到盡善盡美，事業要達到登峰造極，但係如果唔能夠留幾分退步嘅餘地，凡事做盡做絕，就連鬼神都會嫉恨你、加害於你。正如朱子所講：“勢到八九分即已，如張弓然，過滿則折。”古人亦都話：“滿招損，謙受益。”任何嘅事達到圓滿嘅時候就容易走下坡，所以做任何事呢，都唔宜太過強求到十全十美，做人亦都唔好太驕矜自大，只有虛懷若谷、凡事唔做，唔好做盡做絕嘅人呢，先至能夠受人敬重嘅。

第二十一課：人能誠心和氣，勝於調息觀心。“家庭有個真佛，日用有種真道。人能誠心和氣、愉色婉言，使父母兄弟間形骸兩釋、意氣交流，勝於調息觀心萬倍矣！”一家之內有個真正嘅佛，日常生活之中亦都存在住一個不變嘅真理原則，就係人人要坦誠和氣、神情愉快、言語溫和，咁樣就可以使到父母兄弟之間嘅情感能夠水乳交融、了無隔閡，彼此相互了解、相互影響，咁好比座前同拜佛、修心養性呢，勝過千萬倍嘅。學佛或者修道，非要向遠處去求取，其實係莫大嘅錯誤，真理係唔須要向遠處而祈求嘅，響家庭或者日常生活之中隨時我哋可以悟得到真理，因爲家庭之中就有一個真佛，日常生活之中就存在住一個真理，係咩嘢呢？就係人人相處有一顆坦誠嘅心，神態愉快、言辭溫婉，咁樣彼此之間自然心氣相通，氣氛和諧圓融，即係等於悟得咗佛理。若果只係依求打坐參禪、調息觀心，以爲依啲途徑先能夠悟得真道，咁無疑係捨本逐末而緣木求魚啫。

第二十二課：動靜合宜，道之真體。“好動者雲電風燈，嗜寂者死灰槁木；須定雲止水中，有鳶飛魚躍氣象，才是有道的心體。”好動嘅人就好似雲之中嘅閃電、風之中嘅燈燭，搖擺不定，而好靜嘅人呢，就好似冷卻嘅灰燼、枯槁嘅樹木，死氣沉沉。人嘅心境應該響不動嘅浮雲之中而有自在飛翔嘅雀仔一樣，響靜止嘅水流之中有任意跳躍嘅魚一樣嘅動態，靜中有動、動中有靜，先係有道德人嘅心胸。過於好動嘅人就好似風前搖擺不定嘅燈火，係冇片刻嘅停止，做事急躁不定，好難有靜下嘅時間去冷靜思考，好容易呢，導，導致誒，事物嘅敗壞。過於好靜嘅人就好似乾枯嘅樹木毫無生機了，所以對任何事都漠不關心，無論成敗或者得失佢都無動於衷嘅，呢兩種人其實都過於偏執而唔合乎中庸之道。人生在世唯有動中取靜、靜中取動，動靜恰宜先唔會失其真趣，呢個先係做人嘅處世原則。

第二十三課：攻人毋太嚴，教人毋過高。“攻人之惡毋太嚴，要思其堪受；教人之善毋過高，當使其可從。”指責批評其他人嘅過失，唔好過分苛刻，要諗一諗，對方係咪能夠接受呢？教導別人去做善事，千祈唔好佢期望過高，要使到對方能夠做得到先係至係真嘅。處世嘅藝術係我哋必須加以注意，同朋友交往，見到佢嘅過失，我哋需要勸諫，去規勸佢，但係唔好過分嚴格要求使到佢難堪，應該事先考慮，我同佢講嘅忠告、我嘅責難係咪適當呢？因此，刻意去批評、刁難吖，或者呵責都係有欠適當嘅。至於教導其他人去行善吖，唔可以要求過高嘅，必須顧及對方嘅能力同埋佢能唔能夠遵守呢，爲原則，咁樣先能夠因爲各人嘅才智而使到佢達於至善，依據個人嘅性格而予以妥當嘅啓示。凡事先求諸己，然後求之於人，自己無法做到嘅呢，唔好刻意苛求別人都能夠達成，別人能力所不及嘅亦都唔好期望太高，因爲“己所不欲，勿施於人”，你唔好希望別人去苛求你，別人亦都同樣唔希望你過分嘅苛求。

第二十四課：淨從穢生，明從暗出。“糞蟲至穢，變爲蟬而飲露於秋風；腐草無光，化爲螢而躍彩於夏月。固知潔常自污出，明每從晦生也。”響糞便裏便嘅蟲呢，其實係最邋遢嘅，但係變成蟬之後呢，就會棲宿響枝頭之上吸飲秋天潔淨嘅露水而生；腐爛嘅草木係唔會發光嘅，但係變成螢火蟲之後呢，就會響夏日嘅夜裏便發出閃爍嘅光芒。由此可知，潔淨嘅嘢呢，往往由污穢之中出嚟嘅，明朗嘅事物其實從呢，黑暗之中產生嘅。宇宙之間存在任何嘅嘢，由大到細吔、由貴到賤，以至糞便裏嘅蟲同腐草都各有佢嘅價值，所謂“天生萬物，各有其生”，所以暴殄天物呢，自暴自棄嘅行爲都係最唔要得嘅。潔淨嘅嘢時常出於污穢，光彩嘅事物時常係從暗淡之中產生，所謂“將相本無種，男兒當自強”，只要我哋肯努力，響不斷嘅求新、求進步之中成長，終有飛上枝頭嘅一日嘅。

第二十五課：客氣伏而正氣伸，妄心殺而真心現。“矜高倨傲，無非客氣；降伏得客氣下，而後正氣伸。情慾意識，盡屬妄心；消殺得妄心盡，而後真心現。”驕傲、傲慢、自以爲了不起，都係一時嘅血氣之勇，能夠降伏、剋制呢股血氣，咁樣光明正大嘅浩然之氣呢，就能夠響心中滋生而能夠擴展開嚟，一切嘅慾念同意識活動吖，其實都係虛妄唔真實嘅，如果能夠將呢啲妄念消除淨盡呢，咁樣就能夠顯現出我哋善良嘅本性。凡事以爲卓越嘅人呢，必然心高氣傲嘅，認爲只有自己先係天造英明嘅聖賢偉人，對人總係擺出一副傲慢不恭嘅態度吖，即使具有超人嘅勇氣，其實亦都係一時嘅血氣之勇，唔係真正嘅大智大勇。如果能夠以純真嘅氣去降伏客氣，就可以使到心靈充塞響浩然嘅正氣之中，浩氣長存就能夠百邪自然不侵，如果能夠除去我哋心中嘅情慾意念，自然能夠顯出純真善良嘅本性，所以孟子話：“養心莫善於寡慾。其爲人也寡慾，雖有不存焉者，寡矣；其爲人也多欲，雖有存焉者，寡矣。”

第二十六課：事悟而痴除，性定而動正。“飽後思味，則濃淡之境都消；色後思淫，則男女之見盡絕。故人常以事後之悔悟，破臨事之痴迷，則性定而動無不正。”酒足飯飽之後再去諗菜餚嘅味道呢，就唔會感到食物嘅濃淡甘肥了；色慾滿足之後再去想淫慾嘅事，就唔會再有男女交會嘅意念，所以，人如果能夠常用事後嘅悔悟嚟除去臨事嘅愚痴迷茫，咁我哋嘅本性就可以唔受動搖，行爲亦都冇不正當啦。飢餓嘅時候，咩食物都可以覺得係最可口嘅，但係飽食之後，對於食物嘅味道好壞就唔會再去分別了，所以淺嘗淡酌最能體味出事物個中嘅滋味，過多過飽呢，就會令人生離。因此無論做一啲咩事吖，都唔可以過分貪求，過分貪圖享樂往往就會適得其反，所謂“樂極生悲”就係呢個道理。我哋如果要使到心意堅定唔好動搖，就必須先去除去愚痴同埋虛妄，唯有咁樣先能夠堅定我哋嘅心念，使到一切嘅行事唔會再有任何嘅怨悔。

第二十七課：軒冕客志在林泉，山林士胸懷廊廟。“居軒冕之中，不可無山林的氣味；處林泉之下，須要懷廊廟的經綸。”身居高官顯爵嘅時候，應該有隱居山林、淡泊名利嘅觀念，但係如果幽居響山野泉林嘅時候呢，就應該有出而治理國事嘅胸懷嘞。位居高官、擔負國家重任嘅人，當面臨國家興衰存亡嘅關頭，應該以國事爲重，但係如果有咗私心嘅存在呢，就好容易誤入歧途，禍國殃民，所以身負國家重責嘅人必須要擺脫優越嘅心理，淡泊名利，“己立而後立人，己達而後達人”，咁樣先能夠使到國家政治步入正軌，民生得以安樂富足。而一般人平民百姓呢，亦都應該時時吔，去關心國事，遇到有重大事變發生嘅時候，就應該盡一己之力，以求國家社會嘅和諧安定，所謂“身在林野，心繫廟堂”就係呢個道理。

第二十八課：無過便是功，無怨便是德。“處世不必邀功，無過便是功；與人不求感德，無怨便是德。”人生在世，不必刻意去求取功勞獎賞，只要能夠唔犯過錯就係功勞啦；施恩惠俾其他人，不必要求其他人去感激回報，只要唔遭別人怨恨，其實就係回報㗎喇。大丈夫應該有建功立業嘅精神，但係千祈唔可以令到我哋嘅理智頭昏腦脹，以卑賤嘅手段去做出不可告人嘅事以爭取自己嘅榮耀同地位，咁樣係會招致種種災禍嘅，做人必須腳踏實地，努力奮鬥，先能夠成就偉大嘅事業同埋功績。幫助別人其實唔係在於求取別人嘅回報，如果幫助別人嘅目的只係想獲得感激回報，就好容易遭到別人嘅怨恨，所以凡事但求無過，而唔可以強求功賞；助人但求無怨，而唔可以務必去求取一啲回報嘅。

第二十九課：作事勿太苦，待人勿太枯。“憂勤是美德，太苦則無以適性怡情；淡泊是高風，太枯則無以濟人利物。”盡心盡力做事係一種美德，但係過分操勞呢，就違反咗本性而使到心情無法開朗愉快了；恬淡寡慾係一種高尚嘅節操，但係如果表現得太冷淡就唔能夠幫助別人或者有利於事物嘅發展。勤奮專注響自己嘅事業固然係好吖，但係呢，應該知所節制嘅，如果超過咗限度而使到自己變得憂愁勞苦，就失去咗勤奮嘅意義了。對於事物唔可以有過分嘅執著，抱持偏見或者過於熱情呢，都唔適當，而應該以淡泊平凡嘅態度去處理，但係所謂嘅淡泊並唔係指冷淡、漠不關心嘅意思，而係指不慕名利、不求富貴，對於事物如果過分冷淡呢，就會失去人生嘅意義，所以爲人處世應該抱持中庸之道，不偏不倚，咁樣幸福快樂先會源源而嚟嘅。

第三十課：原諒失敗者之初心，注意成功者之末路。“事窮勢蹙之人，當原其初心；功成行滿之士，要觀其末路。”對於事業衰敗、時運不繼嘅人呢，應該諒解佢最初奮發向上嘅精神；對於事業成功、行事圓滿達成嘅人呢，應該觀察佢最後嘅結局。響社會上，創立事業係冇人一開始就會成功，事實上成功嘅人少，而失敗嘅人呢，就好多，雖然事業失敗咗，但係佢創業嘅精神呢，其實係值得嘉勉嘅，絕對唔能夠因爲人嘅事業失敗而予以嘲笑或者落井下石。相反呢，事業成功、春風得意嘅人，亦都唔好因爲一時嘅成就得意忘形，所謂“創業容易守成難”，能夠永遠持續下來嘅呢，先係真正嘅成功。做人亦都係咁，所謂“聲妓晚景從良，一世之煙花無礙；節婦白頭失守，半生之清苦俱非。”事業嘅成敗興衰，個人嘅善惡忠奸，只有到最後呢，先能夠蓋棺定論嘅。

第三十一課：富者應多施捨，智者宜不炫耀。“富貴家宜寬厚，而反忌刻，是富貴而貧賤其行矣！如何能享？聰明人宜斂藏，而反炫耀，是聰明而愚懵其病矣！如何不敗？”富貴人家待人應該寬大仁厚，但係反而猜忌苛刻，咁樣嘅人雖然身處富貴嘅環境吖，佢嘅行徑呢，其實同貧賤嘅人一樣，點樣能夠享受安樂嘅生活呢？聰明嘅人應該收斂深藏自己嘅才華，卻反而處處誇耀表現自己嘅才華，咁樣嘅人雖然天賦聰明吖，但係同愚昧無知嘅人呢，相差唔多，點樣唔能夠遭到失敗呢？常言道：“待富貴人不難有禮，而難有體；待貧賤人，不難有恩，而難有禮。”富貴嘅人呢，待人多半刻薄冷酷、多疑多忌，雖然身處富貴環境呢，心地呢，係好卑賤貧乏，咁樣嘅人邊能夠享受富貴安樂嘅人生呢？聰明有才華嘅人應該含蓄收斂一啲，但係聰明人往往自恃才華，處處表現自己，而唔俾其他人有表現嘅機會，結果就會遭人怨忌，所以聰明人應該虛懷若谷，先能夠明哲保身。

第三十二課：居安思危，處亂思治。“居卑而後知登高之爲危，處晦而後知向明之太靄；守靜而後知好動之過勞，養默而後知多言之爲躁。”居於低下嘅地方然後先會知道攀登高處嘅危險，居於陰暗嘅地方呢，然後先會知道面向光明嘅時候太過於顯露，保持寧靜嘅心境然後就會知道活動太多就會過於辛勞，修養心性、沉默寡言然後先會知道言語過多呢，就會顯得煩躁不安了。處喺高地位嘅人正係意氣風發嘅時候，自然唔會知道自身嘅處境嘅危險呢，但係站喺低下地位嘅人嚟睇呢，原來高處嘅地位先會明白身處高處嘅危險同埋冷清，所以我哋應該時時超脫自己嘅崗位，由另外一個角度吖，客觀審慎去反省檢討，咁樣對於任何嘅事物先能夠有全盤性嘅認識同了解，爲人處世呢，先唔會呢，偏頗同埋歪違嘅。

第三十三課：人能放得心下，即可入聖超凡。“放得功名富貴之心下，便可脫凡；放得道德仁義之心下，才可入聖。”如果能夠將功名富貴嘅心全然都能夠放下，就可以超脫凡俗；如果能夠唔被道德仁義嘅心去羈縛呢，就能夠達到聖人嘅崇高境界了。功成業立、富貴榮顯呢，係人人所祈求嘅，有咁樣向上進取嘅心思就要努力奮鬥，不斷去增進自己嘅知識技能，但係一般人呢，就會姑息怠惰，唔會充實佢自己，而擇以投機取巧、不擇手段嘅方式去達成目的，結果就使到自己成咗功名富貴嘅奴隸，豈不可悲可嘆呢？所以爲人要由平凡嘅地方去著手，唔好好高騖遠，牢牢站喺功名富貴之上去用心，亦都唔好爲咗博取讚美呢，而去刻意行善，隨時心存善念，身行善事，眼光放得長遠一啲，咁樣先能夠擺脫塵俗雜念，去超凡入聖嘅。（註：接下文）

226.道在尋常日用中之《菜根譚》（三）

（註：接上文）

道在尋常日用中之《菜根譚》

第三十四課：我見害於心，聰明障於道。“利慾未盡害心，意見乃害心之蟊賊；聲色未必障道，聰明乃障道之藩屏。”利慾嘅念頭唔一定都會傷害我哋嘅本性，嗰啲自以爲是嘅偏見先係傷害我哋本性嘅禍源。淫魅嘅音樂同美色唔見得都會妨礙道德嘅修養，而自作聰明呢，先係損害道德嘅障礙物。其實邊一個呢，都有利慾嘅心，利慾響惡嘅方面就變爲貪圖私利私慾嘅貪念，響善嘅方面就會成爲奮發向上嘅激發力，所以利慾其實亦都有好嘅一面嘅。凡事固執己見、剛愎自用、唔肯聽人忠告，或者以成見待人接物，就容易損害到自己同傷害別人。同樣，“色不迷人人自迷，酒不醉人人自醉”，聲色未必能阻礙個人嘅道德涵養，適度嘅享受亦都能夠調劑身心，只有喜好自作聰明、投機取巧，先係容易陷入自身響不義嘅地方。

第三十五課：知退一步之法，加讓三分之功。“人情反復，世路崎嶇；行不去處，須知退一步之法；行得去處，務加讓三分之功。”人情變化無常，世路崎嶇不平，走唔過去嘅地方要有退一步嘅打算，容易通嘅地方呢，亦都必須有謙讓三分嘅美德。人心變化無常，今日覺得美好嘅事物也許明日就會覺得奇醜無比，今日喜愛嘅也許明日就會痛恨入骨。王維先生有一首詩講過：“人情翻覆似波瀾。”有句俗語亦都話：“人情似紙張張薄。”世態炎涼，人情冷暖，又豈可懵然不知呢？如果事事倚賴別人或者睇別人嘅臉色去過活，就終會發生問題嘅。但係人生嘅道路又係咁坎坷不平，走嘅時候一定要謹慎小心，遇到狹路需要知“退一步嘅海闊天空”，平坦順利嘅時候亦都唔好忘記讓人三分，如果爭先恐後呢，就必然會險象環生嘅，俗語話：“事不可做盡，言不可道盡，勢不可倚盡，福不可享盡。”其實就係呢個道理。

第三十六課：對小人不惡，待君子有禮。“待小人不難於嚴，而難於不惡；待君子不難於恭，而難於有禮。”對待小人唔難用嚴厲嘅態度，而係難在唔去厭惡佢哋或者憎恨佢哋；對待品格高尚嘅君子唔難用恭敬嘅態度，而係難於適度嘅禮儀表現。人總有犯錯嘅時候，而我哋亦都總係以嚴詞厲色去責備別人嘅過錯，但係就難以包容嘅心去寬恕別人，其實對人應該持有“憎其罪而不憎其人”嘅觀念，用真理義行去感化同教化別人呢，先係最妥善嘅方法。其次，對待君子要做到恭敬嘅地步唔係困難，但係亦都唔需要表現到過度謙恭而變成阿諛奉承嘅，咁樣呢，就有失禮儀了。所以，如果表現得恰到好處、剛正不阿，其實呢，都唔係一件好容易嘅事。

第三十七課：留正氣給天地，遺清名於乾坤。“寧守渾噩而黜聰明，留些正氣還天地；寧謝紛華而甘淡泊，遺個清名在乾坤。”除咗聰明機巧嘅心智，宜保留一點光明正大嘅氣概還諸於天地，寧可拋棄繁縟嘅美麗景致而甘於淡泊嘅清淨生活，去留一個清白嘅名聲於天地仲好啦。每個人嘅心中都有一股浩然嘅正氣，而自作聰明嘅人呢，喜好掩飾惡行，善於機巧詐術，行事華而不實，於是正氣就顯現唔到出嚟。所以，如果要伸張正義，使到乾坤正氣光明普照人心，就必須首先由我哋內心做起，人人守住正直純樸嘅本性，浩然正氣就會自然會常存。同樣，如果能夠拋棄富貴榮華、繁縟嘅景致而甘於淡泊清淨、與世無爭嘅生活，咁樣就能夠響身後留低一個清白嘅名聲。

第三十八課：伏魔先伏自心，馭橫先平此氣。“降魔者先降自心，心伏則群魔退聽；馭橫者先馭此氣，氣平則外橫不侵。”邪惡障礙自然退卻而起唔到作用，要控制唔合情理嘅事去發生呢，首先要控制我哋浮躁嘅情緒，情緒能夠平和穩定，咁外來嘅橫逆就自然唔會侵入。要降伏我哋嘅邪惡，其實首先就須要降伏我哋自己內心嘅邪念，如果能降伏我哋內心嘅邪念呢，咁一切邪惡障礙自然就唔會生起㗎喇。王陽明先生講過：“捉山中嘅賊易，擒心中嘅賊難。”心魔障礙咗我哋修道嘅路程，使到我哋冇辦法達到至真、至善、至美嘅境界，令我哋失去咗光明，見到嘅只係一片黑暗，唔能夠有清醒嘅意識，所以臨事即迷，乃非事物能夠迷人，而係心魔作祟。如果唔能夠降伏心魔，就會受到迷惑永遠唔能夠擺脫，如果能夠下定決心除去心中嘅魔障，咁外魔自然就會退卻而聽從我哋本心嘅命令，咁樣就可以除去一切魔障而返璞歸真，所以《六祖法寶壇經》裏便講過：“菩提只向心覓，何勞向外求玄呢？”

第三十九課：種田地須除草艾，教弟子嚴謹交遊。“教弟子如養閨女，最要嚴出入，謹交遊。若一接近匪人，是清靜田中下一不淨的種子，便終生難植嘉禾矣！”教育子弟就好似養育閨女一樣，應該要嚴格管束佢出入嘅生活，注意所交往嘅朋友，如果讓佢哋接近品行唔端正嘅人，就好比響良田裏便播下不良嘅種子，咁樣就永遠冇辦法長出高大嘅稻禾嚟啦。《三字經》上便曾經講過：“養不教，父之過；教不嚴，師之惰。”教育子弟係爲人父母師長應盡嘅責任，絲毫係唔能夠馬虎放鬆，只要一放鬆，年輕人就容易誤入歧途，而且必須緊密注意佢哋出入嘅場所同埋交往嘅朋友，所謂“近朱者赤，近墨者黑”，交上咗壞朋友就有墮落沉淪嘅危險。《孔子家語》亦都講過：“與善人居，如入芝蘭之室，久而不聞其香，即與之化矣；與不善人居，如入鮑魚之肆，久而不聞其臭，亦與之化矣。”教育子弟係一件好重大嘅事，爲人父母、師長實在唔可以唔慎重嘅。

第四十課：慾路上勿染指，理路上勿退步。“慾路上事，毋樂其便而姑爲染指，一染指便入萬仞；理路上事，毋憚其難而稍爲退步，一退步便遠隔千山。”關於情慾方面嘅事，唔好爲咗貪圖便利而姑且沾取非分嘅利益，一沾取非分嘅利益就會陷入響萬丈深淵之中；關於道義方面嘅事，唔可以因爲畏懼佢嘅困難呢，而稍微讓步，一讓步就好似隔咗千重山咁遙遠，想再前進就更爲困難了。情慾、物慾人皆有之，但係呢，要有個限度，唔可以一味貪圖一時嘅快樂，如果超越咗限度就會成爲佢嘅奴隸，好似跌咗入深谷一樣唔能夠自拔。例如婚喪嫁娶等等都用得住酒，醫藥上亦都用得住，如果用得適度就可以達到醫療效果，恢復疲勞而促進健康，俗語話“一醉解千愁”“酒係百藥長”，但係如果用之過度，就會爲，酒爲萬病之機，酒後亂性不但有害身體，而且會誤人不淺。而進德修業就好似“逆水行舟，不進則退”，一旦稍有懈怠疏鬆，如果再想迎頭趕上呢，就要付出加倍嘅努力同辛勞了。

第四十一課：不流於濃豔，不陷於枯寂。“念頭濃者，自待厚待人亦厚，處處皆濃；念頭淡者，自待薄待人亦薄，事事皆薄淡。故君子居常嗜好，不可太濃豔，亦不宜太枯寂。”心思豐厚嘅人對自己固然甚爲豐厚，對待他人亦都會好豐厚，處處都會講求豐盛濃厚，心思淡泊嘅人呢，對自己必然會淡泊，對他人亦都會好淡泊，事事都會顯得好好淡泊，所以一個有涵養嘅人，日常生活嘅喜好唔好過於濃豔豐盛，亦都唔宜過於枯淡死寂而顯得毫無生機嘅。心思過於豐厚嘅人必然會追求浪漫華麗嘅生活同埋享樂而忽略咗正道嘅發展，一味講求舒適，結果陷於華而不實嘅境地而爲人所嫌棄，所以濃豔過度唔係爲人處世應有嘅態度。而過度嘅淡泊，咁一切呢，都顯得枯淡無味，響生活上、心理上都會陷自己響寂寞嘅境地，對周遭事物亦都瞭然無趣，咁樣嘅生活唔係單調死寂咩？所以，凡事應該求恰到好處，太過與不及都係將於偏頗。

第四十二課：超越天地之外，入於名利之中。“彼富我仁，彼爵我義，君子固不爲君相所牢籠；人定勝天，志一動氣，君子亦不受造物之陶鑄。”別人雖然富貴，而我仍然堅守住仁德，別人雖然居高官顯爵，但係我仍然堅守住節義。一個君子絕對唔會被高官厚祿所籠絡，一個人如果能夠堅決奮鬥，一定能夠戰勝外在環境嘅羈絆而開拓佢嘅命運，精神意志集中就能夠變化氣質，所以一個君子唔會爲造物所主配、所支宰，別人雖然位居高官，過住榮華嘅生活，而我依然係我，依然堅守住仁義之道，絲毫唔會埋怨，亦都唔會感到羨慕或者動搖自己嘅心志。一個有爲有守嘅君子應該以仁愛待人，以道德作爲待人處事嘅尺度，高官厚祿只不過好似牢獄一樣，將會羈縛我哋嘅自由，我哋寧願做一個自由嘅人，又何必爲名利富貴所困呢？做個有品德嘅君子，係遠勝於整日鑽研名利嘅小人，人到咗最後免不了兩腿一伸，富貴名利原本係一場空，又何必窮盡一生，孜孜不倦咁去鑽營呢？只有君子嘅美德先係永遠值得敬仰、懷念嘅。

第四十三課：立身要高一步，處世須退一步。“立身不高一步立，如塵裏振衣，泥中濯足，如何超達；處世不退一步處，如飛蛾投燭，羝羊觸藩，如何安樂。”立身於世如果唔高人一丈，保持超然嘅態度，就好比響塵土之中抖震衣物、響污泥之中洗濯雙腳一樣，如何能夠超越其他人而達到目標呢？處理世事如果唔留一點餘地，就好似飛蛾撲火、羝羊觸藩一樣，使到自己進退兩難或者自取滅亡，點樣先能夠使到自己得到安樂呢？生活響呢個世界之上，自身要站得安穩、站得牢，心地要放寬、要高超，唔可以同世人一般見識，咁樣做先唔會呢，與俗浮沉，否則就同凡夫俗子一樣了，點樣超越他人而成爲唔平凡嘅人物呢？如果咁樣做。同樣，處世待人應該以謙讓爲懷，後退一步可以進十步，如果魯莽行事，一味橫衝直撞，就好似飛蛾撲火、羝羊觸藩一樣，只有使到自己陷入於困境。朱子曾經講過：“凡名利之地，退一步便安穩，只管向前便危險。”所以，要達成目的，絕對唔可能盲目，一方面要持住超人一等嘅智慧，另一方面仲要以謙虛虔敬嘅態度，如此先能夠成就大業，圓滿去達成我哋嘅目標。

第四十四課：修德須忘功名，讀書定要深心。“學者要收拾精神並歸一路，如修德而留意於事功名譽，必無實詣；讀書而寄興於吟詠風雅，定不深心。”追求學問應該集中精神嘅，專心致志，如果響潛修道德嘅時候仍然去注意事功名譽，咁樣必然得唔到真實嘅造詣；讀書嘅時候就偏好吟詠詩文，如果將個思想沉迷響吟詠詩文裏便，就必然唔會用心去思考學問嘅問題了。求學問係爲咗深明事理，所以應該振起精神潛心研究，求學嘅最大目嘅係爲咗涵養道德，發揮道德同增進學識係一樣重要，但係一般人呢，多數只係重視學識嘅增進而忽略咗道德涵養嘅重要性，或者係附庸風雅咁吟風弄月，只求華而不實嘅東西而唔深入研究去思索問題，呢一種淺薄嘅態度根本就失去咗求學嘅意義。

第四十五課：真偽之道，只在一念。“人人有個大慈悲，維摩屠劊無二心也；處處有種真趣味，金屋茅禪非兩地也。只是慾閉情封，當面錯過，便咫尺千里矣。”人人都有一顆慈悲嘅心，印度嘅維摩詰居士同埋屠夫劊子手嘅本心其實係相同冇兩樣嘅，處處都係顯得一種自然嘅趣味存在，富貴人家華麗嘅屋宇同貧窮嘅人家簡陋嘅房舍亦都冇咩唔同，只係人心時常爲貪欲私情所蒙蔽，一旦錯過就差之毫厘，失之千里了。孟子曾經講過：“惻隱之心人皆有之，羞惡之心人皆有之，恭敬之心人皆有之，是非之心人皆有之。”亦都就係話人心本善，人人都有善良嘅本性，只可惜人心時常爲情慾所綁，混沌污濁而不自知，我哋嘅善心被七情六慾所佔，一轉眼間就錯失咗修養嘅道心，咫尺之差就隔去千里之遙，有道嘅人因爲情慾而成爲非道嘅人，就好比光明嘅人忽然盲目失明，豈不可悲呢？而原本處處存在嘅真趣味亦都渾然唔知道佢嘅存在，反而多方去強求添。所以，我哋應該切戒慾心，唔可以使到佢高漲，努力去抑制、降伏原始嘅慾心，堅持我哋唔退嘅道心，咁如果想修菩薩嘅道就唔會遠了。

第四十六課：道者應有木石心，名相須具雲水趣。“進德修道，要個木石的念頭，若一有欣羨，便趨慾境；濟世經邦，要段雲水的趣味，若一有貪著，便墮危機。”增進德行、修養心性需要有個好似木石一樣堅定，唔被外物所動嘅心念，如果對富貴榮華一有咗欣羨嘅念頭，就會墮入物慾嘅境地了；濟世助人、治理國政需要有一種好似行腳僧悠遊山水、淡泊名利嘅樂趣，如果一有咗貪欲嘅念頭存在，就會陷入危險嘅境地了。一個有志勤修道德嘅人，應該有個木石堅定不移嘅意志，任何事情都唔能夠動搖佢修行嘅決心，唔貪求世上嘅富貴名利，亦都唔至於攀附功名利祿。孔子話：“飯疏食，飲水，曲肱而枕之，樂亦在其中矣。不義而富且貴，於我如浮雲。”如果稍有一點羨慕富貴嘅心思，而想求取權勢功名，咁樣最終都會成爲慾望嘅奴隸而墮入可悲嘅境地。一個治理國事嘅政治家亦都應該有一種行腳僧一樣嘅淡泊胸懷，如此先能夠爲人民謀取福利，如果一心想攀附權貴，貪戀榮華富貴，患得患失，咁樣點能夠爲人民謀取利益？恐怕自己身後都會將陷入危險嘅境地呢！

第四十七課：善人和氣一團，惡人殺氣騰騰。“吉人無論作用安詳，即夢寐神魂無非和氣；兇人無論行事狼戾，即聲音笑語渾是殺機。”心地善良嘅人，唔需要話，佢嘅言行舉止都係非常安詳平穩㗎喇，就連在睡夢中神情呢，都依然帶住和樂嘅氣氛；兇殘暴戾嘅人，唔需要話，佢嘅所作所爲好似狼一樣咁暴戾兇狠，就係連佢嘅聲音笑語吔，其實都充滿咗殺氣嘅。心地善良嘅人必定處處爲其他人著想，佢嘅一言一行都顯得非常和氣，因此容易同人親近，就連他喺睡夢之中神情亦都會帶住一團和氣，俗語話“吉人天相”，善良嘅人必然會得到上天嘅庇佑，相反呢，兇狠嘅人往往性情暴戾粗野、野蠻兇殘嘅，呢啲野蠻兇殘嘅動作往往響無意之中就會表現響佢嘅外表裏便，就連聽見佢嘅笑聲亦都會令人不寒而慄，因爲佢嘅笑聲裏便係充滿咗殺氣，呢種兇狠殘暴嘅人必然得唔到好嘅結局。孟子話：“聽其言也，觀其眸子，人焉廋哉。”可見要了解一個人嘅善惡並唔係一件好困難嘅事。

第四十八課：欲無禍於昭昭，勿得罪於冥冥。“肝受病則目不能視，腎受病則耳不能聽；受病於人所不見，必發於人所共見；故君子欲無得罪於昭昭，先無得罪於冥冥。”肝臟如果感染疾病，眼睛就會受影響而唔能夠睇清楚，腎臟如果感染疾病，就會耳仔受影響而唔能夠聽得清楚嘞。感染疾病嘅時候，人係冇辦法去察覺，但係病人一發作呢，衆人都會見得到，所以一個君子想唔喺明顯嘅地方犯錯嘅話，就首先要喺別人見唔到嘅地方唔犯錯。身體內部器官嘅疾病感染，如果唔細心留意嘅話多半係好難察覺嘅，等到病情發作或者病情惡化嘅時候再去救治，咁就好麻煩嘞，如果再唔做根本嘅防治而任佢發展，咁到咗病入膏肓嘅時候就會後悔莫及。一個有德嘅君子屏居應該謹言慎行，心地要光明純正，表裏一致，即使極細微嘅地方亦都應該細心留意，唔好以爲其他人見唔到就姑且爲之。響《禮記·中庸篇》上便講過：“莫見乎隱，莫顯乎微，故君子慎其獨也。”

第四十九課：多心招禍，少事爲福。“福莫福於少事，禍莫禍於多心。唯苦事者，方知少事之爲福；唯平心者，始知多心之爲禍。”人生最幸福嘅莫過於冇乜嘢事可以操勞牽掛，而最大嘅災禍莫過於多疑猜忌。只有成日忙碌唔停嘅人先知道無事係最大嘅幸福，只有心胸寧靜平和嘅人呢，先知道疑心呢一種病呢，係最大嘅禍患嘅。人生最大嘅幸福係咩呢？係富貴福壽定係功名利祿呢？其實我哋好容易搵到一個圓滿嘅答案，呢個就係少無謂嘅禍端，而禍端通常係源於多事，人生嘅災禍同不幸大部分係由於人嘅多心，亦都就係話多心係人最大嘅禍根，所以聰明嘅人應該抑制內心嘅散漫，唔好盲猜多疑，唔好胡思亂想，如此不安同埋煩惱自然就會離身而去了。

227.安心斷臂雪千尋（一）

今日同大家要講嘅題目係《達摩禪法及其修正》。我哋今日所講嘅達摩係一個歷史嘅人物，但係有啲學歷史嘅史學家，或者對佛教有偏見，亦都或者係出於學術上嘅狹隘觀念呢，認爲根本係冇達摩呢個人，所以由呢個觀點考慮，首先要正本清源，我哋講一講達摩祖師先。

有好多嘅歷史資料記載咗的確有達摩呢一個人，我哋根據中國歷史嘅角度去睇，首先有一部書叫做《洛陽伽藍記》，可能大家都聽過。呢部《洛陽伽藍記》呢，係有位居士，叫做楊炫之，係楊炫之所寫。《洛陽伽藍記》係一部記載寺廟嘅構造，同埋寺廟文化嘅脈絡，相當重要一部書嚟。另外呢，一個就係曇琳法師所講《略辯大乘入道四行觀·序》，佢亦都詳細記載咗達摩祖師呢，修習禪觀嘅次第方法，喺呢篇序度。仲有好出名嘅唐朝嘅道宣律師啦，佢所寫嘅《續高僧傳》裏便，其中亦都記載咗達摩祖師佢嘅事蹟同埋行儀。再嚟，我哋亦都可以睇到神會和尚嘅《菩提達摩南宗定是非論》呢一篇著作裏便呢，亦都有講到達摩祖師呢個人，亦都係非常重要一本書，呢本書裏便嘅資料係好豐富，如果大家有機會都可以讀一讀。另外，《神會和尚遺集》呢，呢本書亦都提及咗達摩祖師嘅一啲事蹟，同埋佢嘅修行。

咁“達摩”係咩意思呢？“達摩”都係梵文“Dharma”，佢嘅全名其實都係叫做“菩提達摩”，Bodhidharma，或者係“達摩多羅”。“菩提”呢，就係智慧，“達摩”就係“法”，翻譯成我哋中文，就係叫做“智慧法”。由於響古印度，叫“達摩”嘅人非常之多，所以我哋呢，喺前頭就冠以“菩提”，故此通常稱之呢，就謂之“達摩”，咁有啲就叫“菩提達摩大師”，簡稱佢個名就叫“達摩”啦。根據《洛陽伽藍記》記載呢，達摩祖師係波斯五胡十六國時代嘅胡國人，胡國人就係西域嘅人啦，仲有一種說法認爲呢，佢係古印度人，係大婆羅門國王嘅第三個仔嚟嘅，大婆羅門係一個比較豪富嘅家族啦。佢遊化爲務，不測所蹤，過住一種雲水古行嘅生活，咩時候圓寂都冇人知道，但係有一個說法呢，就係話佢呢，嘅壽命吖，有一百五十歲咁長。

達摩祖師之所以喺中國成爲一個傳奇性嘅人物，原因就在於佢終生以遊化爲務，就不測所蹤，好難喺一個地方去落腳，喺一段長嘅時間。咁樣如果據文字資料嘅記載，只係片段，係冇一個好有系統嘅記載，所以有啲學者認爲呢，達摩祖師只係傳說之中嘅人物。但係實際上，我哋可以睇一睇呢，由中國禪宗初祖吖，呢個菩提達摩祖師開始呢，如果冇達摩呢個人嘅話，我哋可以話中國嘅禪宗就冇咗根本，因爲達摩祖師嘅師父，按佛教禪宗嘅傳承喺印度，誒，西天第二十八代祖師，就係般若多羅大師，而般若多羅大師呢，就預言授記吔，達摩祖師會嚟中國去將禪法去弘揚，所以授記佢以爲呢個西天，啫印度嘅第二十八代祖師。故此達摩祖師嚟到我哋中國之後呢，啫係我哋中國嘅禪宗初祖呢，就開山嘅祖師，咁就慢慢一代一代傳到六祖惠能啦，初祖達摩祖師，二祖慧可大師。

咁其實講起歷史，大家都明白。咳，以前有套達摩嘅電影啦，大家都睇過晒嘞，咁其中嘅傳說都係根據達摩祖師嘅一啲資料去改編啦，比如達摩祖師傳法俾二祖慧可，啫神光，咁吖“斷臂立雪”呢啲故事吖，咁大家都聽過、睇過，都係好熟。咁達摩祖師傳俾二祖慧可，二祖慧可就傳俾三祖僧璨，僧璨大師，僧璨大師最出名嘅一部著作就係《信心銘》啦，有機會大家都可以參念，或者有時間日後都會講。三祖《信心銘》，三祖再傳俾四祖道信，道信禪師，咳咳咳咳咳，sorry，道信禪師再傳俾五祖弘忍，弘忍禪師就係六祖惠能嘅師父嘞，弘忍，弘忍再傳到惠能，惠能就係禪宗嘅第六代祖師，就好出名。所以我哋睇一睇，如果根本冇達摩呢個人嘅，嘅說話，我哋可以話中國嘅禪宗根本冇咗根本，我哋學禪法，所以就要追溯到菩提達摩。如果係喺歷史嘅年代記載，達摩祖師係喺西元嘅四百二十年吖，大概，而後到四百七十八年，就係我哋中國劉宋嘅時代。咁由現在嘅海南島去登陸，達摩祖師啫嚟我哋中國啦，喺現在嘅海南島登陸，咁首先就到咗梁朝，好出名啦，呢個故事，達摩大師同梁武帝嘅對白，佢同梁武帝呢，呢段對白，思想內容非常豐富，時常都被人引用，作爲一個公案、作爲一個故事去講下，講開禪宗。梁武帝問：“我一生建寺，度僧無數，功德大唔大呢？”達摩祖師回答：“一啲功德都冇。”咁梁武帝聽咗之後當然唔能夠接受啦。梁武帝呢，就講開，佢係號稱叫做“佛心天子”，點解叫做“佛心天子”？因爲佢係大力好推崇、弘揚佛法，起好多寺廟，亦都好有佛心，不過梁武帝佢所做嘅事嚟講呢，喺佛教裏便都係屬於人天乘所攝，啫人天善法，佢係有，用一個有相嘅心，去求一啲有相嘅功德，所以達摩大師就，喺禪宗空性嘅角度嚟講，如果執著功德就不能解脫，故此就答佢一句：“根本如果修行有相嘅心，去執著，就一定冇功德嘅。”但係梁武帝喺做善功嘅方面嚟講，的確積集咗無數嘅福報。

咁樣梁武帝聽完達摩大師講嘅，話佢一點功德都冇，當然唔能夠接受啦，但係我哋睇下點解會有呢段對話，我哋諗諗。由大乘佛教嚟講，菩薩嘅行願嚟講，菩薩，我哋做“四攝六度”嘅時候，不但要捨去“非法”吖，唔係“飛頭髮”個“飛髮”，哈，唔好誤會。“非法”，“是非”個“非”，“法理”個“法”，“非法”，不但要捨去“非法”，而且連“法”都係要捨去，吓。菩薩喺“四攝六度”嘅時候，到咗呢個境界，亦都係話不但要出離世間，而且我哋心外求法，亦都要捨去，唔可以心外求法，仲要出離世間。如果一個人做咗功德，佢又起寺廟，又去度僧衆，問自己功德大唔大？呢個問題講明呢個人呢，其實仲有一個求功德嘅心啦，喺佢心裏便，所以就呢個角度嚟睇，修行嘅角度去睇呢，唔係一個上乘嘅境界，仲未到達一個高嘅層次，講明求功德嘅人吖，喺心性上仲係有污染。“污染”，咁係咩嘢呢？“污染”又係咩呢？污染、冇污染，我哋個心本身就係受住污染，受住“無明”，所以障蔽。梁武帝冇染污非法，冇染污惡法，但係呢，染污咗咩呢？染污咗一個善法，善法都係一種污染嚟嘅，因爲梁武帝認爲仲有一個功德性可求，有所求，就係講明功德有限啦，功德喺個心裏便，真正功德，係明心見性之後嘅功德，心量等同虛空，咁樣嘅功德先係非常之大，而人間一切有爲嘅功德其實都係如夢幻泡影，呢個喺“空性”嘅角度去睇係非常之啱。如果認爲自己喺度做善事，咁樣呢個“善”係非常有局限性，因爲我哋本嚟嘅清淨嘅心性呢，就有咗污染性，實際你哋喺法界上係一法不立。所以達摩祖師答梁武帝答得好啱，係好適當，好貼切，好到根嘅，所以佢就話：“冇任何嘅功德。”作爲一代帝皇嘅梁武帝，聽咗心裏便當然唔高興啦，達摩祖師一睇，同佢機緣唔投契，所以就唔能夠接受。故此呢，我哋如果用現代嘅說話嚟講吖，唔能夠達到思想上嘅交流，唔能夠印心，所以達摩祖師決定，就離開梁武帝繼續向北上。

喺呢個，呢個問題之上到呢度，就所以係出現咗嗰個“一葦渡江”個典故嘞，我哋睇達摩套戲，達摩祖師，佢好似唔係一條蘆葦，我記得係，好似係抌一隻鞋落去，吓嘛？唔記得太清楚，總之係有一個典故，呢個典故，達摩祖師攞一條蘆葦，由一個江，到第二個江，咁套戲裏便佢仲救咗個細路仔添，可能係冇呢啲事，吓，嗰套戲加以強化，誒，加呢啲故事，有個感染嘅力量啦。咁當時梁武帝，達摩祖師走呢，佢派好多兵去追佢，一方面想挽留佢，但係另一方面因爲呢，佢怕達摩祖師呢，呢一個人會破壞咗梁武帝整個嘅教化系統吖，所以呢，亦都係派兵去追。呢個時候達摩祖師到咗江邊，就拔咗一條蘆葦啦，一葦就如一個江，一個岸就到達第二個岸。如是者，之後達摩祖師用咗好多時間遊化喺嵩山吖、洛陽一帶。咁呢，喺呢度，嵩山，嵩山呢一帶當然就係好出名啦，嵩山少林寺嘅周圍啦，咁嵩山方圓呢，就有百里吖。咁點解達摩祖師選擇咗嵩山吖、洛陽呢一帶去教化呢？如果我覺得作爲一個禪師嚟講，佢用心真係良苦，因爲洛河一帶係中國傳統文化嘅發祥地嚟嘅，我哋要知道，係中國民族文化嘅搖籃，有好多文化嘅本源都可以上溯到黃河同洛河一帶，係一個重要嘅文化中心所在，咁當時嗰個時空，喺當時嘅時空呢，有魏文帝，喺當時係魏文帝四百九十六年吖，係跋陀禪師所造嘅少林寺，有呢一座嘅寺，開始少林寺已經有規模。佢喺少林寺，達摩祖師呢，咁一住，住咗好短嘅時間，就離開咗少林寺七百里嘅地方，嗰度有個山洞，咁佢入個山洞度修定，咁相傳佢喺個山洞裏便呢，面壁咗九年。咁達摩大，祖師嗰套戲呢，就有啲渲染呢，插，打坐面壁嗰陣時插支針入嗰啲肉度，支針吖彈番出嚟，咁吖好似冇呢啲記載。相反鳩摩羅什法師食咗啲針去教化佢啲弟子，將啲針喺啲皮膚灑番出嚟，就有呢個故事。咁達摩大師面壁咗，面壁咗九年呢，一方面佢係等待東土有人去接佢嘅法，另一方面呢，佢認爲機緣仲未到，唔可以隨便去弘揚禪法。後來佢等到咗兩個人，係二祖慧可同埋道玉。咁中國文化同印度文化畢竟係兩種文化嘅系統，中國嘅儒家思想、道家思想對印度文化有排斥，非常多嘅人經常去摧毀達摩祖師嘅思想同佢所講個禪法，但係唯有道可，sorry，講錯咗，唯有慧可同埋道玉親近咗佢六年，呢六年嘅時間，奉茶倒水去服侍達摩大師，達摩大師只係話俾慧可同埋道玉聽，叫佢哋讀誦同埋研討，研討乜嘢呢？達摩大師嗰套戲嗰度都好似有提及到，就係《楞伽經》，達摩大師帶咗《楞伽經》嚟我哋中國。

有一日，慧可感到親近吖師父六年咁耐，仲冇得到師父嘅印可，於是佢就希望向師父呢，去求受心法啦。咁就係一個雪夜裏便，佢站喺現在嘅少林寺嘅立雪亭（現在起咗個立雪亭），一直到天光，雪差唔多已經係到落到膝頭咁深嘞，咁達摩祖師依然喺度面壁，就冇將咩法傳授過俾佢。咁後來慧可呢，就斬咗隻手臂落嚟，捧住，然後希望達摩大師同佢印心，傳法俾佢，慧可話：“我斷臂求法，身疼難忍，希望達摩大師您能夠幫我安心啦。”咁達摩大師話：“你將你個心攞出嚟啦，我幫你安啦。”慧可呢，個利，利根嘅人，根性好利嘅，所以佢覺得上下左右內外，咦？個心喺邊度呢？佢一剎那，慧可就直接契入佢自己本心嘅心源。嗱，呢一點好重要吖，禪宗就講誒，呢樣嘢，呢度到家就係，佢一問佢之下，呢個疑情就將佢參禪咁耐嘅積累咁多個疑情吖，打斷喺呢一個問，即，即當下能夠見番佢自己真心，呢句說話非常之重要，佢上下，上下左右內外覓唔到心，覓唔到心就係真心啦。心點可以覓到出嚟嘅啫？唔係我哋“肉團心”，又唔係“唯識”裏便所講嘅“識”，亦都唔係我哋嘅思想，“覓唔到心”呢個“心”，就係真心嚟，咁其實已經係傳咗個心印俾佢，咁上下左右內外覓心了不可得，冇呢個心。佛法講嘅“心”呢，唔係指我哋嘅“肉團心”啦，當然。有啲人睇達摩祖師套戲，佢曾經問過：“咦？‘覓心不可得’，我根本自己搵唔到呢個心。”以爲佢哋一聽到，搵心、搵心，咦？係搵內便去搵“心”，點搵個“心”吖？肉團心，當然唔係，千祈唔好誤會，唔係我哋心臟，物質器官嘅“心”。咁有人講，唔係我哋物質嘅心，係唔係我哋腦裏便嘅思惟呢？係咪思惟心？我哋要知道呢，思惟心係前念接後念，念念相續嘅妄念，咁最好用番現代科學心理學嚟講，就係意識流。我哋思念係一個意識流，一條意識嘅河，由各種假象構成，不過係我哋耳朵聽嘅、眼睇嘅、鼻聞嘅、條脷能夠嘗到，其實都係眼耳鼻舌身意所觸到嘅呢啲幻境，六根對六塵，都係十八界嚟，六根對六塵同埋六識，三六一十八，呢十八界嘅作用嘅啫，都係根、境、塵相續。如果大家對心理學有睇過的話，就會知道眼睛作爲心嘅一個窗口，只係一個官能嘅作用，對於外部世界，眼睛響天晴嘅時候，情況之下只能夠見到十里外嘅地方吖，最多，形象過大嘅事物我哋都睇唔到吖，如果形象更小，我哋更加睇唔到，所以一般人相信自己嘅眼睛，但係按佛法嚟講呢，往往其實自己呢，呃緊自己。再講我哋耳仔啦，有幾多分貝以上嘅聲音，我哋係聽唔到，幾多分貝以下過小嘅聲音，我哋亦都聽唔到，係一定範圍，以分貝嚟分，我哋能夠聽到，只係我哋能夠接受嘅有限範圍。咁樣各位師兄都會諗一諗，如果講話眼耳鼻舌身所得到嘅信息都係虛幻，我哋嘅思惟心，我哋每日起心動念呢個“心”，究竟係咪真心呢？呢一點好重要。喺原始佛教，嗰個時候佛陀成日教我哋觀察呢個問題，我哋每一個動作都由我哋心念去發起，係善惡或者無記，係一種機械嘅動作，就無記啦，無善無惡。我哋呢啲每一個心念嚟講，究竟起心動念嗰一剎那嘅“心”係咪真心呢？你諗下，當然唔係啦，當然唔係真心啦。由呢啲，咁由呢個意義上講，我哋講番慧可，佢覓心了不可得，搵唔到自己嘅心，咁樣佢搵咩心呢？所以呢段話就成爲禪宗以後，一個傳爲佳話嘅公案，一個話頭留咗俾後人，其實搵唔到個心，先係真心，有“搵嘅人”同埋“被搵嘅對象”，喺佛教上，就落咗兩邊啦，叫做“能、所”啦，有“能找嘅人”，亦都有“被找嘅心”，既然落“能所”係相對嘅境界，唔係中道實相，點能夠到達一種空性呢？呢個好簡單嘅邏輯嘅解釋，故此就係“俗諦”，唔係“真諦”，唔係真正嘅道理嘞，響佛教裏面講。

咁講到呢度呢，我又諗起另外一則公案，佢同呢件事亦都有內在嘅關聯。咁以前有一個小徒弟成日跟喺佢師父後面，成日問師父：“師父，乜嘢係佛法呢？乜嘢係祖師嘅西來意呢？”咁佢師父，師父係點呢？今日同佢講咩佛法，佢聽到，聽日又問呢，即是話同佢講一段佛法嘅道理啦，聽日又問嗰段佛法嘅道理係咩，越追又越深，越問吖越多。意思就係話呢，其實我哋人嘅思惟，如果由理路之上去攀緣，真係無窮無盡，一個問題往往去諗呢，會越辯越深。咁好嘞，有一日，咁佢師徒兩個人呢，就去咗一個溪邊呢，去泡麻衣，將啲麻布、麻衫去浸下。咁過去我哋知道中國窮人嘅生活都係以農繕爲生活，衣食住行樣樣都要自己照顧自己，咁吖喺個溪邊嗰度，個徒弟，小徒弟又問了：“師父，乜嘢係西來意呢？祖師嘅西來意呢？”佢師父就擰個頭過嚟同佢講，即刻答佢三個字吖，當時，“麻衫巾！”佢話，因爲佢浸緊麻吖嘛，所以佢話“麻衫巾！”咁個徒弟當時一見到師父擰過頭答佢呢句說話三個字，即時俾呢三個字呢，嚇住咗，愣住咗，咁佢諗，個徒弟：乜嘢麻衫巾呢？乜嘢係麻衫巾呢？即是，其實我哋嘅思惟心時時都攀緣事物，如果我哋時時攀緣事物嘅說話呢，好難就會達到一種境界，我哋真心好難展現，唯有喺一個大喝嘅時候，嗰個清淨心嘅上面覆蓋住嘅雲層、嘅障蔽、嘅污垢先能夠透出一小小嘅光亮，即是呢啲係以前嗰啲禪師指導佢徒弟用嘅種種唔同嘅方法。禪師喺禪堂裏便呢，通過講一啲公案將你妄想呢，打番轉頭，佢問你：“咩係佛法？”如果你答，你話：“佛法就係‘三皈五戒’‘四攝六道’。”咁個師父又會再問你：“咁‘四攝六道’又係咩呢？”咁你答佢：“‘四攝’當然好簡單嘅啫，就係布施、愛語、利行同埋同事啦。”咁個師父又會再問你喎：“布施、愛語、利行、同事，又係咩嘢？”咁樣問落去，問一千年都會問唔完，所以師父就喝一聲：“麻衫巾！”一話“麻衫巾”，徒弟嘅狂心就頓時休竭，頓時竭低，妄想心就再冇攀緣嘅地方。我哋嘅心唔係好似啲猴子一樣咩？要攀藤條，要攀到上去個山頂，咁樣聰明嘅人就會將啲藤條割斷，咁割斷啲猴子咪跌落嚟囖？就冇攀緣嘅地方，我哋攀緣心斷咗，前後制都斷咗，冇前冇後，所顯露嘅就係當下，“當下”呢兩個字嘅意思就係真正嘅佛法，就係我哋嘅本性，真正嘅佛嘅大法亦都係心法。當然，呢個只係文字上嘅解釋嚟㗎啦，真正嘅修證境界，係要過來人先會明白嗰種感覺，點樣斷疑情？虛空大地都係粉碎六塵呢個境界，一即一切，你與個宇宙融合，你同宇宙係打成一片見性光明的，見性光明嘅境界。

咁古來啲祖師形容“見性”嗰個“性”，用說話文字表達出嚟就：圓陀陀、光灼灼、赤灑灑。記得好似係，誒，印光大師講，唔知係邊個祖師講，我呢度都唔記得清楚，係形容呢個本性有呢幾句說話，我哋係唔可以話係用語言文字去表達到，只係一種感覺、一種感受，但係人人嘅感受唔相同，但係見性嘅剎那光明嘅境界，佢所證得嗰種一念嘅境界就係人人都相同，但係表現出嚟嘅外像可能就係唔相同。禪宗公案嘅妙用之一就係令到你因指見月，呢啲公案睇得多之後呢，我哋會發現祖師，佢會各立門庭，覺得佢揚眉瞬目，無非都係一種方便去指導徒弟、指導衆生，一舉手一投足都係嘅。咁喺實際理地之上，法界真義之上呢，呢個角度去睇，無論由邊個角度去講吖，都係殊途同歸。如果你，譬如中意喺文字名相上去追求，喺義理上去鑽呢，於是你當然可以，可以攞到博士文憑啦，但係呢，對於禪宗嘅角度嚟睇，你一啲都冇受用到。你識佛法，好叻，講到天花亂墜都好，講到法界，講到真義，幾強勢，邏輯幾好，分析幾得當都好，但係唔代表你係見到你自己嘅本性。呢個係真受用，同博士文憑，同呢啲佛學上嘅理論係無關，同學佛係無關。所以最重要一樣嘢係貴在呢，當下承當，承當我哋自己嘅本心。

達摩祖師話：“吾與汝安心竟吖。”佢同慧可講：“吾與汝安心竟。”我已經同你安完心，“竟”就已經完畢啦，我已經同你安完心。咁“安心”嘅係咩“心”呢？又講到呢度，講來講去“安心”係咩“心”？我哋喺呢度立一個假名叫做“無心”，咁容易解釋啲。就係話妄心係虛幻，如果祛除我哋妄心之後，嗰一樣嘢，俾一個假名佢，就係“真心”。其實你講到“真心”，名相相對咪有假心？其實又係兩邊，嗱，所以喺名詞上就好容易執著，但係我哋如果唔咁樣講就冇辦法明白，一定要用語言傳遞。有啲人聽到“真心”兩個字，總以爲呢，“妄心”後便其實仲有一個“真心”，總係想搵到一個“真心”，如果咁諗，就係錯嘞，好錯，唔係咁嘅意思，所講嘅“真心”只係俾個假名稱佢。所以希望大家能夠聽得明白，安心嘅“心”唔係相對嘅心，係搵到我哋自性本源清淨嘅心，係本師釋迦如來喺菩提樹下，《法華經》裏便所講，一切如來衆生，“一切衆生皆有如來智慧德相，因妄想執著，不能證得。”吓，咁我呢度係憑記憶去讀呢個經文出嚟，你或者查證下《法華經》可能有啲文字讀錯，唔出奇，但係其實釋迦佛原本，佢本來嘅意思都係咁，佢發現大地衆生都係有如來嘅智慧德相，呢如來智慧德相就係成佛，所謂“悟心成佛禪”，係見性嘅境界。人人都有佛陀嘅德相，見性，明心見性，喺外便表現出嚟，自然就有三十二相八十隨形好啦。

咁曾經聽過一個師兄講過啦，佢每日讀《金剛經》，經文上便就要講，佢話要“破四相”，佢話本嚟佢學佛，係想有所得嘅，咩有所得呢？佢話呢，譬如話得到羅漢、得到菩薩、得到佛啦，但係一睇《金剛經》之後呢，呢度又空，嗰度又空，空到最後呢，連佢讀《金剛經》佢自己都想唔通究竟應唔應該讀《金剛經》，我曾經聽過有個師兄咁樣講法。呢個問題由境界上去講，佛法無非都係醫病嘅良藥，因爲我哋喺心性上、響精神上有障礙，有貪瞋痴慢疑見覆蓋咗我哋個心，所以佛先會講三皈、五戒、四攝、六度，講呢啲係要將你心裏便嘅毛病除去，你一貪呢，佛陀就話俾你聽唔好貪，呢個道理好簡單，好似佛係一個大醫王，佢喺你嘅毘盧性海之中裝咗好多靈丹嘅妙藥。佢喺《金剛經》上面講過：“過去心不可得，現在心不可得，未來心不可得。”咁樣達摩大師同二祖慧可傳心嘅時候，言外之意其實就係講三心不可得嘅，已經係《金剛經》呢個道理其實，因爲如果有所得嘅心就係妄念，咁樣點能夠有所得？（註：接下文）

228.安心斷臂雪千尋（二）

（註：接上文）……真心，嗰個真正嘅“心”只係有當下承當，咩叫“當下承當”呢？譬如“清潭映月”，啫深山裏便，老樹林之中，你見到啲水好清，響個清潭之中個月光映落去，就係“當下承當”嘞，呢個過程冇經過咩嘢階梯，喺嗰個地方係不立一法，佢只係一個“清潭映月”嘅境界，明唔明？“過去心不可得，現在心不可得，未來心不可得”吖，就係，前後心制斷，真心先會顯現，而顯現嘅真心，如果安立咗個假名，安咗個假名其實都係有污染性，連嗰個“真心”嘅假名其實都唔能夠安。禪宗嘅祖師苦口婆心，有時用棒喝去打啲弟子，其實目的都係爲咗令你當下承當，去截斷呢啲疑情，所以嗰個三心不可得同達摩傳慧可嘅境界係相同嘅，達摩傳慧可嘅過程實質係一個磨練嘅印心，佢認可慧可，乃至於呢個咁樣嘅印心，係對於後來禪宗，由初祖到六祖一脈相承，都起咗好重要嘅作用。初祖係達摩，頭先講過啦，跟住慧可，慧可傳俾僧璨，僧璨傳俾道信，道信傳俾弘忍，弘忍傳俾六祖惠能，由初祖到六祖，呢個禪宗嘅發展歷史係好明白，好清楚，冇任何疑問，而六祖之後就更加燦爛，禪宗，所謂禪學史上面叫做“一花開五葉”。之所以將呢段講得係比較細緻啲，係爲咗正本清源。

好，跟住我哋落嚟就正式講達摩禪法。達摩禪法嘅第一個特點係叫做“藉教悟宗”，“藉”就係“憑藉”嘅“藉”，“經藉”個“藉”；“教”，“宗教”個“教”；“悟”，“了悟”個“悟”；“宗”，“宗教”個“宗”。“藉教悟宗”四個字，“藉”就係“憑藉”咁解；“教”，“教”喺呢度我所講呢，就係《楞伽經》；“悟”呢，就係“悟入”；“宗”就係我哋嘅心，心爲宗，以心爲宗。呢個“宗”字唔係“宗教”個“宗”，即是頭先我講，當然話俾大家聽個字係“宗教”個“宗”啦，但意思唔係“宗教”個“宗”，係指我哋嘅“心”，以心爲宗，以心爲宗，發之於言語，在“言”呢，就謂之“教”。比如你得到一種佛法嘅禪悅，乃至於一種開悟嘅境界，明心見性嘅境界，喺心裏便隱藏住就叫做“心宗”，喺說話裏便講出嚟就係“教”，我哋通過語言文字、通過思辨、通過邏輯，我現在講俾大家聽，咁已經叫做“教”嘞。“藉教悟宗”意思就係話，藉《楞伽經》嘅教義而悟自心宗，明白自己嘅本心。所謂“禪法”就係“禪”嘅方法，係非常具體，可以把握到嘅，而單獨嘅一個“禪”字呢，呢個字係心靈所達到個一種境界，同“禪宗”唔同，所以要搞清楚呢啲名稱。“禪”字嘅意思係到達一種境界，係非邏輯，而係言語道斷，言語講唔到，所以用一個單獨嘅“禪”字去表達。“禪”，當然仲要同“禪宗”去分別，分別開嚟，“禪宗”係並列響八大宗派吖，佛教裏便嘅一個專門研究禪法嘅派別。仲有一個名稱，大家都知道啦，就係“禪定”，“禪定”用現代說話去講明白就係叫做四個字嘅啫——“心的永恆”。心嘅永恆，就係我哋通過修定嘅方法，好多種，比如數息，數自己嘅出入呼吸，呢啲真係釋迦佛所教，古佛教嘅方法，念佛啦，等等呢啲法門，咁我哋通過呢啲法門可以使到自己嘅心唔會起妄念，去達到一種境界，達到一種定境，去入定，去專注響一個地方，所以六祖講過：“外不亂爲禪，內不亂爲定。”外內境界擾亂唔到你就係真正嘅禪定，去專注一笪地方，但呢笪地方都係有障有漏，因爲你仲有一笪地方執，你個心仲係有所住，呢一點要注意。但係你到咗呢個此時此景呢，可以話係同凡夫嘅境界有所分，你係已經唔攀緣外界嘅妄念，可能係攀緣喺內在，或者係守於一樣嘅地方，比如念佛啦，所以念佛都係一種執著，不過係一種高深嘅執著，到最後連呢個佛念都打破咗之後先可以見到我哋本來吖，禪宗所講嘅本身嘅空性嘅境界而進入念佛嘅三昧。“禪”同“禪定”其實係有內在嘅關聯，但係亦都有區別，往往有人，佢以爲“禪定”就係“禪”，但係“禪”係活潑潑，著衫吖、食飯吖，舉手投足、揚眉瞬目都可以表現出禪嘅靈活同禪嘅智慧，但係“禪定”呢，就係諗到，我哋要諗到，翹埋對腳、跏趺坐閉目嘅一種狀態，而用心去得到一種永恆，咳咳。假如話如果有人每日朝頭早七點鐘起身，到九點鐘呢段時間打坐，持續一段時間之後，偶然某一日朝頭早，如果你冇喺呢個時間打坐，咁就喺呢個時間，你個心因爲以往慣性嘅驅動，依然係一種清淨嘅恆定嘅狀態，會有，有呢種境界，但係呢一種定境，並唔等於係明心見性，要注意了，有人會有呢種感覺。但係“禪”係專指明心見性，而“禪定”係一種過程，係心嘅一種永恆。往往有人將“禪”吖，“禪宗”“禪定”同埋“禪法”混爲一談，我哋爲咗明心見性，咳咳咳，sorry，爲咗明心見性，爲咗開悟，必然要有一種方法，咁呢種方法就叫做“禪法”嘞，“禪法”係具體嘅方法，係可以把握嘅，唔係虛無縹緲，用現代說話去講，可以叫做話係“有操作性”。

咁爲咗令到大家可以對以往一啲模糊嘅概念搞清楚，咁現在講禪門裏便所謂嘅“四料簡”，即係“不立文字”“不捨文字”“不住文字”同埋“不離文字”。所謂“不立文字”係話喺實際嘅理地同法界圓義嗰個真如本性之上，喺我哋開悟嗰個心境上面，善法、惡法，我哋一法都不立，任何一樣嘢都唔擺喺我的心裏便，乃至於文字嘅假相當然亦都唔能夠立啦，呢個所謂“不立文字”嘞。“不捨文字”呢，更加係老生常談啦，喺大乘佛教嘅八大宗派之中，教典最多，其實你話禪宗不立文字，教典最多就係禪宗，你睇下大藏經裏便禪宗嘅祖師嘅公案同語錄幾多？大家可以查下《大正新修大藏經》，你就會明白。咁樣點解又會講“不立文字”呢？古代嘅祖師同禪宗嘅修行人爲咗讓學禪，爲咗讓想學禪嘅人而達到明心見性，由迷到悟，所以啲禪師前說後說，就立咗好多文字，寫咗好多書，尤其就係公案，最普通吖，都有一千七百幾條，比如好出名禪宗嘅典籍，可能大家都聽過，但係未必明白呢本書，或者未睇過啦，裏面所講嘅咩，《指月錄》吖、《碧巖錄》吖、《古尊宿語錄》吖、《祖堂集》吖、《五燈會元》等等呢啲禪宗典籍。咁我哋時時依止嘅經典就係《楞伽經》《楞嚴經》《達摩多羅禪經》《金剛經》《六祖壇經》，甚至有人將《維摩詰所說經》吖，吓，亦都劃入禪宗嘅範圍。雖然話禪宗不立文字，但係大家如果通過呢個問題可以睇得到，佢不捨文字㗎，不捨文字就係一種方便、一種方法，爲咗使到學禪嘅人走向覺悟，應該講就講，唔講呢，就唔啱嘅。喺境界上呢，唔應該講，講呢，就好難講明白，甚至講錯，因爲境界就不可思議啦，好難講、好難諗，你唔明白個境界，唔悟到個境界，點講呢？但係如果明白咗就唔講，而且你就係自己明白咗開悟以後，爲咗上求佛道、下化衆生，其實都係要講，你要將你明白個道理講俾其他人聽，一定要假以文字，所以“不捨文字”就係唔捨棄文字，但係唔係執著文字，啫係“指”同“月”嘅關係嘞，好簡單。

咩叫“不住文字”呢？以前曾經記得有位老師父，時常響青燈黃卷之下去深入經藏，佢嘅徒弟到外便遊方參學已經開悟咗，返到嚟，嗰個徒弟就想引導番佢嘅師父喎，嘩，好，好厲害，但係正面教育，當時呢，就與世相違。有一日，佢師父呢，睇經嘅時候呢，有隻蜜蜂就喺個窗裏便嘅紙呢，轉圈個紙，以前啲紙窗嚟㗎嘛，想飛入個房間裏便嘞，但係呢，就出唔到去，徒弟就話：“嗰個門打得咁大，點解你唔由對門裏便出去呢？咁喺呢度鑽故紙堆呢？咩時候你先能夠出得去呢？”呢個係一個雙關語嚟嘅，即是意思就話，藉助個蜜蜂出唔到去，就話佢師父：你幾時能夠出得到去？一味喺度睇經。實際上佢係令佢師父能夠當頭棒喝，敲佢嘅師父，佢話唔喺自己嘅心裏便去悟佛法，淨係喺文字上裏便去求。好似記得達摩祖師，係達摩祖師講嘅，兩句說話，偈語或者詩都好：“若然紙上談佛法，筆尖就蘸乾洞庭湖。”紙上點談佛法呢？洞庭湖嘅水寫乾吖，都寫唔晒。佛陀佢老人家說法咁多法門，恆河中嘅幾粒沙嚟㗎咋其實，對於我哋呢個娑婆世界，可以咁樣睇。咁個徒弟希望能夠師父明白，喺個紙上便係搵唔到佛法，佛法係明心見性，係由我哋心裏便去悟，佢希望個師父咩時候先能夠由啲紙堆裏便去能夠到達跳出嚟，嚟一個新天地呢？咁佢師父聽咗呢句說話之後，立時又會開悟啦，佢師父當然係上根啦，佢徒弟都開悟，早得過師父，只係一時間嘅執著。所以佛法唔係依文字上去求，去文字上去求，其實同三世諸佛已經係無緣，呢個係禪宗所講嘅，好高深嘅道理。

咁由呢個觀點我哋就反射到一個問題，西方哲學我哋睇一睇流派好多，而家學哲學嘅人好多，但係後嚟西方哲學就陷入咗一種困境，點解呢？大家發現都係按我哋嘅思惟嘅邏輯研究個哲學問題嘅話，如果研究到最終、最後，唔能夠解脫我哋人身吖，我哋自己本身嘅問題，而且好似啲蜘蛛網一樣，自己將自己困喺網裏便嘅，研究哲學，亦都係話由理念到理念、由概念到概念、由理論去到理論，走來走去都搞唔清楚，就好似先生同學生去接觸一樣，講咗一堂之後就提到一大堆問題，上堂亦都提到問題，下堂亦都提到問題，搞來搞去都喺概念理論之中，唯物主義同唯心主義嘅辯論，乃至於唯心主義之間嘅辯論、唯物主義之間嘅辯論都好，可以話，無論係一元哲學所講，二元嘅，其實辯論到而家兩三千年了，邊一個思想都冇打低另外一個思想，你冇將我推下歷史舞臺，我亦都冇將你推下歷史舞臺，原因係咩呢？由理論到理論，因爲每一個人所企嘅角度唔同，每個人運用個方法唔同，每個人都可以講出自己嘅一套理論。所以西方哲學因爲思辨走入咗困境，佢哋唔得，唔嚟到中國去參考東方嘅哲學，去求取一種頓悟嘅學說，所以西方好多人亦都係學禪，學真正嘅禪，當然唔係假禪。佢哋所講，有啲佢哋話飲茶又係禪，誒，食飯又係禪，佢哋所講嗰啲全部都係口頭禪，當然唔係呢樣，有好多西方人真正係尋求禪境，禪宗所講嘅“禪”。所以西方哲學唔得唔嚟到中國去求一種頓悟學說，去求取一種直觀，係“直觀”吓，直接觀察，領悟人生同宇宙嘅方法。咁我哋，好嘞，呢個其實都係題外話，但係諗到呢個問題，旁及講到嘅啫。咁我哋再嚟就係所講嘅“不離文字”，禪宗雖然“不立文字”“不住文字”，但係同時亦都係“不捨文字”同“不離文字”，達摩禪法嘅第一個特點就係“藉教悟宗”頭先講，就係要通過精研經教嘅教義而悟入理地，悟入我哋真理嘅境地。

達摩禪法又有一個特點就係“二入四行”，乜嘢叫“二入四行”呢？“理入”“行入”就叫“二入”，“行入”裏便呢，有具體有四種“行”嘅，邊四種“行”呢？“報怨行”，吓，“果報”個“報”，“怨恨”個“怨”，“隨緣行”“無所求行”同埋“稱法行”，吓，“名稱”嘅“稱”。咩叫“理入”呢？就係通過文字般若，啫係睇經啦，將文字裏便嘅境界讀出嚟，將文字忘記，然後豁然開悟，就係叫“理入”。再講一次，通過文字般若，啫睇經啦，喺唯識宗裏便有三般若：文字般若、觀照般若同實相般若，呢度套用唯識宗嘅說話去講，文字般若喺禪宗裏便都有講，由文字背後裏便嘅境界，讀出文字以外嘅嘢，而後將文字忘記，豁然開悟，就叫做“理入”。說話就係講到咁多，只係咁講，證，就憑大家去證，要喺嗰度去證，通過研討佛經，我哋睇佛經，思惟佛經，同樣都能夠開悟，都係一種方法，其實呢個方法呢，講到，對知識分子吖，好契機。比如我哋思惟《金剛般若經》啦，“破四相”“三心不可得”，大致所講嘅“一切有爲法如夢幻泡影，如露亦如電，應作如是觀”或者“若以色見我、以音聲求我，是人行邪道，不能見如來”，呢啲就係《金剛經》所講嘅經眼，經中嘅眼，係人稱頌嘅偈語明句，你不斷去思考，同樣都能夠見道嘅，同樣能夠開悟，開悟咗僅僅就係你明白到條路點樣行，但係你仲要一步一步向前行，所謂呢度講就係“行入”嘞，“行入”嘅意思，就係要有生活嚟到實踐，“理可頓悟，禪須漸修。”道理可以頓悟，但係真正嘅修爲係慢慢慢慢去一步一步喺生活之中實踐嘅。

講完“二入”，我哋嚟講達摩禪法嘅“四行”，“四行”之中第一個就係“報怨行”，“報怨行”點解呢？首先就由法界上嚟講，“是法平等，無有高下”，法法都係平等，唔應該生分別心去判斷人我是非，由因果上講，菩薩畏因，菩薩喺修行之中，佢非常害怕“因”，怕咩“因”呢？就係驚身口意我哋三業種下惡因，到咗後嚟受報，但係衆生就畏果，因爲迷吔，迷嘅時候呢，貪吖、瞋吔、痴、慢、疑吔、見吔、爭，等等嘅心都會出，“爭”，爭咩呢？爭名奪利啦、爾虞我詐、人我是非，起心嘅動念時候，凡夫唔理喎，但係佢會害怕果，當個果嚟佢會唔願意承受惡果，所以菩薩喺起心動念嘅時候將念頭睇到好緊㗎，好緊㗎將。咁樣如果已經種咗惡因，要了結呢個惡果嘅話，你就必須當下承當吖，冇得選擇，而世間嘅人通常都係種下好多惡因，等到受報嘅時候就唔願意，唔能夠當下承當因果，恩恩怨怨，是非總係無了期，咁由因果上講，其實冇咩恩恩怨怨嘅，你得咗惡果，當然要承當，得咗善果亦都係要承當。好多人以爲佛法好抽象，係一種玄妙、一種玄談，其實佛法同我哋每個人嘅修養有關，同我哋嘅生活實際緊緊結合一齊。開悟以後修學嘅人爲咗隔除自己所有嘅習氣毛病同精神上嘅障礙，係用“報怨行”嘅方法（唔係以報還報喎，“怨”其實就係怨親平等吖），“報怨行”，提高自己嘅修養，增長智慧，從而使到自己慢慢成爲人天嘅師表，智慧解脫而能夠自他兩利啦，吓。“報怨”唔好唔明，唔好誤會喎，以，啫以德報怨，唔係喎，意思係“怨親平等”，唔好以報還報、以牙還牙。呢個達摩禪法所透露嘅第一行，吖，好重要，要做嘅時候。

乜嘢叫“隨緣行”呢？第二行，有句話叫做“不變隨緣”，乜嘢係“不變”呢？菩薩所達到嘅境界就係“不變”啦，所謂“隨緣”就恆順衆生，衆生有苦難，我去救，衆生需要講經說法就去講經說法，衆生食咩藥就俾咩藥佢食，衆生需要布施，我就去行布施，而且心裏便係冇掛礙，就係“隨緣行”。係最重要呢樣，有冇掛礙，冇掛礙先係“隨緣行”，有掛礙唔係“隨緣行”。世上嘅人因爲執著人我之見，認爲你係你，我就係我，我嘅名就係我嘅，我嘅利就係我，我家庭係我，我地位係我，成日都捍衛住一個執著嘅牢牢不可破嘅我，所以就會有好多煩惱啦。但係如果你受委屈嘅時候或者當你得到榮譽嘅時候，你同其他人易地而處，換個位置吖，企喺別人嘅角度去諗一諗，你就會同情同埋理解，理解佢、同情佢，呢個先係真正嘅理解。“隨緣行”一方面係要堅持佛法嘅原則，另一方面爲咗恆順衆生，都要做種種饒益衆生嘅事，所以包括我哋所講嘅講經說法、流通經書、建設寺廟，做社會各種嘅慈善事業，呢種都係一種恆順衆生，“隨緣行”嘅方法，亦都係圓滿功德嘅一種修爲嘅方法，吓。

咁講到呢度，又有一個老生常談嘅公案，就蘇東坡嘅公案啦。咁世間嘅人有咗榮譽嘅時候往往就得意忘形，失意嘅時候又非常之沮喪，其他人去譏譭你嘅時候就感到好緊張，讚你嘅時候又飄飄然，所以我哋將世間嘅“利、衰、毀、譽、稱、譏、苦、樂”叫做八風，世俗嘅人喺八風裏便搖蕩。咁蘇東坡，宋朝嘅蘇東坡大居士吔，曾經寫過一首偈：“稽首天中天，毫光照大千。八風吹不動，端坐紫金蓮。”老生常談，人人都識背。好自豪啦，佢寫咗呢首偈，咁吖叫吖童子送過江，送俾佢嘅朋友，佢個friend——佛印禪師，俾佛印禪師睇，佛印禪師睇咗之後呢，寫，跟住喺下便批咗兩個字，咩兩個字？“放屁！”寫咗兩個字，又叫個童子帶番去，蘇東坡睇完之後大發雷霆啦，當然，跟住連夜即刻撐船過江去搵佛印禪師。佢話：“我寫咗咁好嘅詩，你點解話我放屁呢？”佛印禪師話：“詩，真係寫得好，但係後便應該改一下。”佢話，咁吖請禪師指教，蘇東坡就話，禪師於是將最後話，“端坐紫金蓮”呢句改咗“一屁打過江”吖，所以變成：“稽首天中天，毫光照大千。八風吹不動，一屁打過江。”唔係“端坐紫金蓮”。呢個就係講明修行唔喺個口裏便講，係心行，心行合一嘅境界，開悟係一瞬間嘅事情，但係修證就需要千百年先能夠功德圓滿，先能夠將我哋無始以嚟嘅雜念毛病去除，唔可以有不勞而獲嘅心吖，去修行，亦都唔可以話：“我求佛菩薩咁耐，佛菩薩都唔相應我，所以我退心，我懺悔咁耐業障仍然有，唔能夠去除。”好多師兄都有咁嘅心。其實我哋過去曾經生生世世做幾多業吖？我哋試問去諗一諗，修行係好長遠嘅事嚟。

跟住我哋講到“四行”之中“無所求行”，點解要“無所求”？因爲有求皆苦，有所求，但係如果你得唔到嘅話，當下就係苦，喺佛教之中，“八苦”唔係當下就有一個“求不得苦”咩？所以行菩薩道嘅人應該無求，呢個係好重要。有人問，佢話：“學佛嘅人點解係無求呢？”因爲佢認爲我哋念佛、學佛，求嘅係成佛，菩薩唔係亦都要上求佛道、下化衆生咩？但係實際上凡係有求嘅現象就會帶嚟無窮無盡嘅煩惱，其實你有心去求成佛都係唔啱，但係呢個比較係高少少嘅層次去講吖，咁我哋世間凡夫執著，當然係有求，善求，而家唔緊要，擇善固執，之但係一步一步就要解脫、就要捨棄，喺禪嘅角度、喺佛嘅本懷嚟講就要通向呢，呢個思想，同佛嘅本心去相應，去達到無求。咁大家都知道“有求”同“求不得”都係相對，“希望”同“失望”都係相對，都係話你對人生抱住幾大嘅幻想，抱住幾大嘅希望，你往往就有好大嘅失望，而且有得必有失，對於凡夫嘅心，所以好苦吖，點解苦吖？八苦交集嘅原因就係凡夫時時去患得患失，時時喺事情嘅處理之上、喺人生嘅路途之上患得患失，一患得患失，個心搖擺不定，就會好苦。但係，喺佛法之中，好似大家受嘅三皈、五戒、十善，喺佛法嘅五乘當中，人天乘，人天乘係有求，叫做求福求慧。通過深入經藏可以智慧如海，呢個就係求慧啦；通過廣結善緣，多做一啲慈善嘅事業就可以培植我哋福田，就係求福啦。咁喺菩薩乘之中應該係冇求，佛問須菩提：“如果有人用恆河沙咁多個寶珠去做布施，你話功德大唔大呢？”須菩提答：“功德非常大啦，當然。”佛陀話如果呢個功德係“有實”，如來就唔講功德多啦。如果有一個人行菩薩道，做咗一件好事，就希望其他人俾自己回報，讚歎自己、誇獎自己，呢個人，你諗下仲係唔係菩薩呢？當然唔係啦，所以菩薩說法、菩薩用智慧去度人、菩薩做布施等等都係無求，正因爲無求，就係得到“無所得”呢三個字。《心經》上好清楚：“以無所得故，得阿耨多羅三藐三菩提。”“阿耨多羅三藐三菩提”係一個假立嘅名，係一個假名去安立，唔好喺文字上去求法，以爲菩薩真正得到啲咩，菩薩度衆生，實冇一衆生得度，因爲每一個衆生都有本嚟嘅佛性，“心、佛、衆生，三無差別。”好重要呢一句說話，迷就係衆生，悟就係佛，所謂“自性衆生自性度”。另一方面，菩薩如果喺度衆生嘅時候話：“我喺度度緊你吔。”佢起咗呢個心，動咗呢個念，咁嗰個唔係真正嘅菩薩，因爲菩薩嘅心量等同虛空，唔住於有爲，亦都唔住於無爲，亦都唔捨有爲，亦都唔捨無爲，所以菩薩應該係“無所求行”，呢點係好重要，“無所求行”就係講呢啲嘢。

《金剛般若經》上面講：“汝等比丘，知我說法，如筏喻者，法尚應捨，何況非法。”就係話我哋學佛嘅人，學菩薩嘅人唔應該執著喺法上便，法係一種救渡嘅良藥，爲咗度衆生，佛設立種種方便，苦口婆心，講一千道、一萬道。衆生如果冇病，佛仲須要說法咩？無法可說啦。譬如我哋搭船由煩惱嘅此岸爲咗解脫去到彼岸，我哋搭嘅大般若船到咗彼岸之後就應該將呢個大法船放低吔，你落咗船，瀟灑咁自在去走，如果你上咗岸之後仲背住一個法就係法執，法執唔除點成菩薩？就難於得到究竟涅槃。咁有人問：“開悟之後吖，菩薩道係咪‘無所求行’呢？我哋仲未有開悟，係咪仲，啫都要有所求呢？仲未開悟。”其實唔係咁，雖然話你係冇開悟，咁樣咩嘢叫做“行入”呢？你首先要做吖，我哋喺生活之中，當中係以無求嘅心去待人處世，雖然我哋冇開悟，我哋待人接物，你首先要實現，實現一下，睇一睇係唔係你心中無掛礙，有所求，心中自然就有掛礙啦，所以呢度就要實現一下。

咁咩叫“稱法行”呢？就係“相應”吖，“稱”就係“相應”，唔好讀“稱”（註：音同“清”），“稱”呢，就係“相應”嘞，同佛法相應咁樣去實踐佛法，點樣同佛法相應呢？尤其係對現在嘅學佛人嚟講，首先唔講開悟以後嘅事，開悟以前，我哋首先就要發出離心嘞。所謂“出離心”就係對人生同宇宙有一個明確嘅了解，如果冇一個明確嘅了解，咁樣要會認爲人世間係實有，就會貪著五欲，唔能夠生起求道嘅心，呢個要觀照，要修四念處，要修無常觀，要多諗呢啲嘢。悟入佛嘅知見以後，喺具體實踐佛法嘅時候，我哋就要去正確實踐佛法，“無所求行”“隨緣行”“報怨行”，呢種實踐就係叫做“稱法行”。更加深層嘅意思，可能大家唔係咁容易理解，就係佛嘅大法，所謂“心法”，既冇來去，亦都冇長短，亦都冇善惡，亦都冇增減，要求就係你當下去悟入，當下承當，咁樣爲咗除妄想、修行六度而無所行，心唔染著就叫做“稱法行”嘞。

咁喺上面講咗“理入”同“行入”，咁“理入”同“行入”之間要，關係係咩呢？點樣處理呢？悟在一瞬間所謂，修行亦都千百年，一個人覺悟到佛法嘅真理，由於長期積累，瓜熟蒂落，係一瞬間嘅事情。比如虛雲老和尚喺禪堂嘅時候，當啲開水吔，燙到佢隻手，焫到佢隻手，隻杯就跌落地，揸唔穩，咁佢當下由於打落地嘅聲音令到佢豁然透亮，虛空粉碎，所以開悟就係一瞬間，但係證悟嘅過程，修行嘅過程就要上千百年。如果一個人係未開悟，就須要努力去通過深入經藏、藉教悟宗，吖，頭先所講嘅藉教悟宗，去開悟，開悟之後就要通過三皈啦、五戒啦、十善或者菩薩嘅四攝六度使到自己嘅習氣毛病去隔除，先能夠慢慢去修到功德圓滿。好多啱啱學佛嘅人呢，只係明白開悟嘅果實係好甜美，但係佢唔知道開悟之後其實條路只係走咗一半嘅啫，禪宗嘅路叫做難行道，亦都叫做險道，一唔小心冇人指導就會走上岔路，所以自己必須要有抉擇嘅智慧，開悟之後，修行仲要有漫長嘅路係艱難嘅。

至於講到達摩大師嘅禪法，佢具體修證嘅方法只係四句說話，希望各位師兄能夠落一啲功夫，去研究呢四句說話，由文字般若、觀照般若，最後通入實相嘅般若。呢四句說話呢，就係：外息諸緣，內心無喘，心如牆壁，可以入道。再講一次：外息諸緣，內心無喘，心如牆壁，可以入道。

祝大家能夠早日明心見性，多謝大家！

229.喚醒生命中的至親至愛（一）

喚醒生命中的至親至愛——《佛說父母恩重經》解說

呢本經係講佛陀響祇樹給孤獨園，一日率衆南行，佢見到路邊有一堆枯骨嘅因緣開始，展開以人間慈母爲中心嘅生命世界。由懷胎開始伴隨發生嘅種種際遇，無論係心理嘅、生理嘅、家庭嘅、社會性嘅切身問題都敘述得好寫實，感人肺腑而又流暢。加上解說者馮馮居士以佢嶄深嘅佛法素養，洞觸現實社會倫理問題嘅慧眼，生動而又活潑表現出對佛教、對孝道嘅見地同精神。對喚醒人類生命之中最珍貴一份至親至愛，相信呢本經論嘅影響力係可以如期。我哋心中對父母時常存有感恩，響美德之上終身力爭上遊，係現代造經報父母恩嘅最佳方式，而孝親精神響社會上嘅落實亦都係人間淨土展現嘅曙光。

呢本經嘅解說一共分開六點，第一係前言；第二，“白骨堆前話汝報恩”（註：疑爲“白骨堆前話報汝恩”）；第三，“十月懷胎更十恩”；第四，“至親之愛”；第五，“不孝，大地恆久的哀歌”；第六，“如何報答父母恩”。

呢套錄音帶係馮馮居士響加拿大溫哥華永懺樓整理錄音。我係談瑨瑋，我希望能夠將呢套經普及，將佢錄成廣州話，方便廣州人士學習佛經。

呢一部係被人忽略嘅佛經，好多人都唔知道佛教有呢部《佛說父母恩重難報經》，因爲好少人響道場講解呢一部佛經，原因唔係咁明白，可能佢冇咩高深嘅哲學，亦都冇使用咩精微奧妙嘅名相。一般學佛嘅人並不認爲呢一部係好重要嘅佛經，學者往往因爲佢淺白簡單而將佢輕視咗。其實，呢一部係相當重要嘅佛經，係佛陀教導弟子做人最基本嘅道德同人生態度嘅一部寶典，字字珠璣，每一句都語重心長，無論係唔係佛教信徒都應該細讀呢本經嚟學習孝敬父母。有人話，信佛嘅人，尤其係出咗家，四大皆空，割親斷愛，父母妻子全部都唔要，歸依咗佛就一心向佛，只知道有佛，仲有咩親情、有咩孝親可言呢？呢啲咁嘅說法都係對於佛教嘅一知半解，佢哋唔係真正明了佛陀嘅原本教訓，亦都係自古以來歷代對於“割親斷愛”四個字嘅誤解。其實，割嘅“親”同埋斷嘅“愛”都唔係指父母天倫嘅“親”，而係指慾愛之“親”，然而，要斷嘅“愛”亦都唔係講“天倫之愛”“友愛”同埋“無緣大慈、同體大悲”嘅慈悲博愛。不幸，古今好多人誤解咗佛教本意，以爲學佛就連父母都唔要，連妻子親人亦都唔要。其實，佛經本本都載有各種生靈同眷屬嚟聽佛陀講經說法嘅記錄，可見佛陀並未叫人拋棄父母親眷，相反，佛陀鼓勵弟子接引親眷嚟一同學法、一同修行，同證涅槃。

呢部《父母恩重難報經》係由姚秦三藏法師鳩摩羅什奉召翻譯成爲漢語，一般學者相信係鳩摩羅什口譯，由佢嘅弟子筆受記錄。鳩摩羅什係原籍西域嘅一位高僧，由絲綢之路嚟到中原，受姚秦國國王嘅禮遇。佢響中土弘法，口譯咗好多佛經，包括至今仍然流行嘅《金剛經》在內。佢口譯嘅《金剛經》非常深入簡明，之後呢，比唐三藏玄奘法師所譯嘅簡本簡單得多，不過亦都因爲咁呢，漏咗唔少嘅內容，唔及唐譯嘅完整。就經名嚟講呢，鳩摩羅什譯爲《金剛波羅密經》，唐三藏玄奘大師呢，譯爲《能斷金剛波羅密經》，唐譯顯然係比較正確詳盡嘅，不過鳩摩羅什唔識漢文，無從得知譯本筆受嘅內容。佢嘅譯本較爲精簡，所以一直都響度風行，掩蓋咗唐玄奘大師嘅完整詳譯版本。呢啲係本題之外，我哋有時間再談。

《父母恩重難報經》係冇發現其他嘅譯本，鳩摩羅什似乎係唯一嘅版本，所以我哋仲係採用佢嘅譯本。呢個譯本係佢奉咗秦國國王嘅召命而口譯，可以見到秦王係好重視呢本佛經，先叫佢翻譯嚟教育世人。鳩摩羅什喺沙門亦都敬奉呢一本經，教人孝敬父母。後世嘅人，無論出家在家，實在係應該孝敬父母，千萬唔好講咩“四大皆空”“割親斷愛”嘅說話而自己走入咗歧途成爲不忠不孝、不仁不義之人。

出家也好，在家也好，要割斷嘅唔係正嘅邪念慾念，而辭嘅係邪念之親，並唔係割斷天倫人倫。如果要弘法度衆生，就應該首先度親人成爲我哋嘅法眷，“法眷”，啫係佛法嘅眷屬。唔能夠話去度衆生就拋棄自己嘅天倫同眷屬，厚此薄彼，呢個唔係佛法嘅平等法。

要修行，首先要自淨其意，實踐八正道、守五戒，除去貪瞋痴嘅毒，呢個係人所周知嘅，但係好多人唔注意到，孝敬父母、供養父母係百善之首、百善之先。經云：“萬惡淫爲首，百善孝爲先。”要從無私無我嘅真誠孝行開始就更容易踏上修行嘅道路。

好嘞，現在我哋開始嚟研究《佛說父母恩重難報經》。我哋首先唸一段由經文裏便鳩摩羅什譯成嘅漢語原文，然後再將佢用現代白話語體文解釋下。由於現代人生活緊張忙碌，未必每個人都能夠睇得明先進時代嘅中原古文，經中有啲佛教名稱呢，亦都唔係人人識嘅，現在呢，將經文呢，用白話文解釋一下，作爲呢，俾大家參考，如果解釋有咩錯誤，務請原諒同指正。無論點樣，我都唔係一個佛教專家，請各方大德多予指正。

《佛說父母恩重難報經》，第一：“說法因緣”。

“如是我聞，一時佛在舍衛國祇樹給孤獨園，與大比丘二千五百人，菩薩摩訶薩三萬八千人俱。爾時，世尊引領大衆，直往南行，忽見路邊聚骨一堆。爾時，如來向彼枯骨，五體投地，恭敬禮拜。阿難合掌白言：‘世尊！如來是三界大師，四生慈父，衆人歸敬，以何因緣，禮拜枯骨？’”

佛陀自己並冇揸支筆寫低啲講稿，響二千六百多年前紙筆恐怕都係未普及。佛陀講嘅語錄都係弟子由記憶之中傳遞，後來由弟子筆錄，開頭一句都係話“如是我聞”，呢個就係“我從佛陀裏便聽到”咁解。“一時”呢，就係現代語講故事開頭所講“從前有一次”，英文係“Once upon A time”。佛陀喺舍衛國，“佛”就係指佛陀釋迦牟尼。其實佛陀自己從未自稱係“佛”，“佛”呢，係後世弟子尊稱佢嘅。“佛陀”本來嘅字義亦都只不過係“開悟嘅人”，並冇特殊超凡神化嘅意義，將“佛”字睇成超凡神化，係後世尊敬逐步加添上去。“佛陀”係巴利文音“Buddha”嘅音譯，漢語呢，係冇“佛”呢個字，係從譯音而創造嘅，呢個“佛”字，“佛”呢，亦都係“佛陀”嘅簡稱。英文將“佛陀”“開悟嘅人”譯爲“The enlighten one”，亦都冇神格化嘅意義，將“佛”視爲神係後世嘅錯誤。

舍衛國係古代印度諸多邦國之一，嗰個時候差唔多一城一國。呢個舍衛國係喺當時嘅中印度北方，現在已經唔存在，有人考據話可能係現在嘅班那斯市區附近。舍衛國距離佛陀出生嘅地點藍毗尼呢，唔係好遠，呢個係當時佛陀時常講經說法嘅地方。舍衛國有一位太子叫做祇陀，佢好發心擁護佛陀說法，同時亦都有一位富有嘅老人，人哋稱佢做“給孤獨長者”，亦都係好發心護法。佢稱用黃金鋪地買下祇陀太子嘅園林嚟供養佛陀居住說法，太子被佢嘅誠心所感動，就將園林捐出建造咗一座道場去供養佛陀說法，呢個地方就叫做“祇樹給孤獨園”，係將太子同老人兩個人嘅名連埋起嚟並稱。佛陀時常到呢個地，因爲佛陀長住響嗰度說法，後世簡稱呢個地方叫做“祇園”，將佛陀修行居所稱爲“祇園精舍”。“比丘”就係男性嘅出家人，“比丘尼”係女性嘅出家人，都係巴利文嘅譯音。

“菩薩”係譯音同埋簡稱，原音係巴利文轉譯成爲梵文，英文嘅拼法係“Bodhisattva”，就係大覺有情、行大慈悲嘅修行者。《華嚴經》講要必須修到十地嘅程度先可以稱爲“菩提薩埵”。現在對於慈悲布施、行慈悲道嘅人呢，都尊稱爲“菩薩”，已經係近於咗濫稱，但係亦都可以話，只要開悟，人人都可以成佛，只要慈悲，人人都係菩薩。響佛陀說法嘅時代，大概係稱出家修行人爲“比丘”同“比丘尼”，對於慈悲布施、護法嘅在家人，尊稱爲“菩薩摩訶薩”係尊敬嘅稱呼，原音係“Mahasa”，意思係“佛大義”，“俱”就係“響一齊”。

五體投地呢，係尊敬嘅禮拜方式。首先立正、合掌、屈膝下跪，然後以手承足，然後頭禮叩頭，再嚟呢，就係全身趴喺地上面繼續叩頭。呢種五體投地嘅禮拜方式，現在仍然流行響西藏同尼泊爾一帶，好多密宗信徒仍然使用呢一種方式拜佛像同埋師長。響顯宗信徒當中呢，係比較少用，響西方嘅宗教，天主教同猶太教亦都仍然呢，使用呢種禮拜方式。

“世尊”係對佛陀嘅尊稱，原音巴利文係“Lokanatha”，梵文係“Bhagavat”，本來嘅意思係“尊敬老師”嘅意思。中文加上尊敬嘅意思譯爲“世尊”，使到佢聽嚟更加尊貴。“如來”亦都係對佛陀嘅尊稱之一，意思係話，佛陀係乘真如大道而嚟嘅得到正覺嘅人。

三界呢，就係欲界、色界同埋無色界。色界就係指有形有相嘅物質宇宙，欲界就係指有慾望同埋因慾念而繁生嘅衆生。人類、動植物都屬於欲界，要飲壽酒、食橎桃嘅神仙呢，會思凡仍然有男女慾念嘅嗰啲神仙，雖然響天上，其實都係欲界生靈。希臘神話之中嘅男女仙人，要戀愛、要飲酒、要嚟人間搵愛情，呢啲都係欲界嘅生靈而已，只不過係有啲所謂神通啫。

“阿難”嘅巴利文名稱係“Ananda”，漢語譯爲“阿難陀”，佢係佛陀嘅堂弟，係最早追隨佛陀出家修行嘅弟子之一，佢最博聞強記，記憶力特別強，佢能夠將佛陀講過嘅經文都能夠背誦出嚟，最早嘅佛經好多都係由阿難尊者由記憶背誦出嚟嘅，由後來嘅弟子口口相傳同埋進一步筆錄記低。

“四生”呢，係指胎、卵、濕、化。舉例嚟講，雞生蛋，蛋孵化成小雞，呢個就係卵生；人類同哺乳動物都係胎生；澳洲嘅鴨嘴獸呢，就例外，因爲佢係生蛋嘅；植物係濕生，但係細菌就唔係濕生，草履蟲亦都唔係，佢哋係分裂而嚟嘅；生化係從無化爲有，但佢係屬於無機體。

好嘞，名詞我哋簡單解釋完，現在我哋可以將下，上便嘅一段經文一口氣譯成白話。

阿難尊者話：“依個係我聽到用佛陀嘅口中親自解說。有一次佛陀響舍衛國祇樹給孤獨園同兩千五百位大和尚、三萬八千位大菩薩響一齊，嗰個時候，世尊，啫係佛陀，引領大衆外出向南邊走，可能係出去乞食化緣。”嗰個時候嘅佛教徒必須每天托鉢乞食，作爲消除我慢心嘅修行方式之一。“響嗰個時候忽然見到路邊有一堆枯骨。”印度古今都係貧窮，路邊呢，係時常會有餓死、病死嘅屍骨。“嗰個時候，佛陀向嗰堆枯骨行五體投地嘅最恭敬禮拜。阿難就合掌請問嘞：‘世尊，您已經係成爲正覺正真嘅如來，您係欲界、色界同埋無色界三界一切生靈嘅老師，係卵生、胎生、濕生、化生等等四種生態生靈嘅慈父，受到衆人歸依同埋禮敬，但係由於咩緣故，您去禮拜呢堆枯骨呢？’”阿難問得好有道理，唔係好奇怪？老師點解去路邊嘅一堆枯骨，禮拜呢堆枯骨呢？要想知道答案，我哋就要睇本經嘅繼續嘅下文。

第二點，我哋跟住講嘅係“白骨堆前話報汝恩”。我哋現在繼續睇經文原文嘅下面幾段。

“佛告阿難：‘汝等雖是吾上首弟子，出家日久，知事未廣。此一堆枯骨，或是我前世祖先，多生父母。以是因緣，我今禮拜。’佛告阿難：‘汝今將此一堆枯骨分做二分，若是男骨，色白且重；若是女骨，色黑且輕。’阿難白言：‘世尊，男人在世，衫帶鞋帽，裝束嚴好，一望知爲男子之身。女人在世，多塗脂粉，或薰蘭麝，如是裝飾，即得知是女流之身。而今死後，白骨一般，教弟子等，如何認得。’佛告阿難：‘若是男子，在世之時，入於伽藍，聽講經律，禮拜三寶，念佛名號；所以其骨，色白且重。世間女人，短於智力，易溺於情，生男育女，認爲天職；每生一孩，賴乳養命，乳由血變，每孩飲母八斛甚多白乳，所以憔悴，骨現黑色，其量亦輕。’”（註：“每孩飲母八斛甚多白乳”疑爲“每孩飲母八斛四斗甚多白乳”）

呢幾段文字好淺白，並冇咩特別專用名詞，可以直接翻譯成爲現代嘅白話語文。

佛陀話俾阿難聽：“你哋雖然係我嘅上首弟子，出家日子亦都好耐，但係所知嘅事理呢，仲係唔夠廣博。呢一堆枯骨或者係我前世祖先，或者係我好多生以前嘅父母呢，所以我現在先對住呢堆枯骨作禮拜。”佛陀又話俾阿難聽：“你現在將呢一堆枯骨分做兩份好唔好？假如係男子嘅骨呢，顏色就係白嘅，亦都比較重；如果係女子嘅骨頭呢，顏色就比較黑而且亦都比較輕嘞。”阿難就話：“世尊吖，男子響世界上嘅時候，佢嘅衣服裝束有著鞋、有戴帽，比較講究，一望就知道係男子之身啦。女子響世界上嘅時候，佢哋多數塗脂抹粉，或者呢，噴一啲香水，例如蘭花、麝香之類，由佢哋咁樣嘅裝飾就知道係女流之身。現在死人白骨一堆，世尊吖，你又叫我做弟子嘅點樣認得出係男係女呢？”阿難真係問得好！死人白骨一堆又點可以見到去分出係男係女呢？其實，古代嘅中國同印度嘅驗屍專家係可以從醫學嘅解剖上去分別，阿難冇學過呢一套學問，當然認唔出啦。佛陀答覆阿難話：“倘若係男子，響世界上嘅時候，由於佢去佛寺聽經、禮拜三寶、唸佛名號，所以佢嘅骨頭嘅顏色係比較白而且比較輕（註：根據上下文，“輕”疑爲“重”）。至於世間嘅女子呢，智力較低，容易沉溺於情愛，對於生兒育女認爲係天職，生咗一個細蚊仔呢，餵自己嘅乳汁俾呢個孩子養活，母乳其實係由血變出嚟嘅，每一個細蚊仔就要吸飲母親嘅乳汁達到八斛四斗咁多，所以做母親嘅女子憔悴嘞，骨頭就變黑咗，亦都比較輕。”

關於呢一段，有幾個地方呢，需要解釋一下。“伽藍”係寺廟嘅意思，呢個係譯音。佛陀響世上說法嘅時候，並未自稱爲“佛陀”，佢講嘅禮拜三寶係佛、法、僧。我推想佛陀當時唔會叫弟子去持念佢嘅名號，佢叫弟子持念嘅佛號可能係指“阿彌陀佛”或者其他嘅古佛佛號。至於佛陀講男子嘅骨係比較白、比較重，女子嘅骨係比較黑、比較輕，由現代醫學常識嚟睇，並唔算係唔合理嘅，因爲女子生育孩子、哺乳俾孩子，損失咗大量嘅鈣質，所以骨質就比較輕、比較黑，男子係冇呢一種損失大量嘅鈣質，骨頭就比較白同埋重一啲嘞。鈣質係白色，你睇下石灰就知道，睇下啲鈣片亦都知道。佛陀係一位有大智慧、博學精深嘅老師，佢亦都精通醫學，佢講嘅男骨白、女骨黑係符合現代醫學嘅原理嘅。至於佛陀講女子智力較低，如果以現代眼光嚟睇，響教育發達嘅國家，男子同女子嘅智力係冇高下嘅差別，但係響佛陀時代嘅印度，重男輕女，教育唔普及，女子根本係冇機會受到教育，再聰明亦都變成傻瓜啦。現在嘅第三世界落後地區仲係咁樣，就係中國古代亦都係男尊女卑，連孔夫子都免不了要講一句“女子無才便是德”同埋“唯女人與小人難養”吖。所以我哋要明白，佛陀所講女子智力低呢，其實係古代印度嘅情形，嗰個時候女子冇機會受教育，自然就笨一啲，呢啲完全係教育嘅問題。但係今日你睇，幾多女子智慧比男子強得多！女科學家、女工程師、女醫師、女政治家、女藝術家、女作家，有邊一個係輸俾男子呢？可以俾男子仲強得多啦。我哋讀佛經必須要了解佛陀係以當時佢嘅社會情況嚟說明，我哋唔能夠以今日嘅社會情況去批評佛陀去歧視女子。需要知道佛陀嘅時候，女子係俾男子輕視嘅。至於佛陀講，女子容易沉溺於情，呢個都係古今女子嘅通病吖，女子係比男子更重感情，不過佛陀所講女子容易沉溺於情，呢個“情”字呢，並唔係單指愛情，亦都係指親情、母愛。你睇下，做母親嘅幾愛細蚊仔，女子認爲生男育女係天職，生下細蚊仔、哺乳俾細蚊仔，愛護唯恐不周。當然亦都有啲唔喜歡生細蚊仔嘅女性啦，亦都有啲唔肯哺乳嘅母親，不過都係少數人啫。響古代印度同中國，婦女都唔知道咩叫做避孕唔生孩子，亦都冇唔哺乳俾細蚊仔，嗰個時候亦都冇奶粉同埋特別嘅嬰兒奶水，咁做母親嘅都要親自去哺乳，所以唔好忘記……（註：接下文）

230.喚醒生命中的至親至愛（二）

（註：接上文）……所以唔好忘記佛陀講經嘅時代已經同今日唔同啦。佛陀話“乳由血變”，血又點會變成奶呢？其實係血液將營養運輸去俾母親嘅乳腺，再由乳腺製造乳汁，佛陀講“乳係由血變”就係呢個道理。佛陀話，每個細蚊仔須要飲最少八斛四斗咁多嘅母乳先能夠長大。母親嘅血液裏便嘅營養都供給咗俾細蚊仔，所以母親憔悴了，鈣質都俾咗孩子，所以母親嘅骨頭就唔夠白，變黑咗亦都變得輕又脆。你睇下嗰啲因爲缺乏鈣質而致到骨頭老化脆弱，容易跌斷大腿骨嘅老人，唔係大多數都係年邁嘅老祖母咩？古代嘅度量衡同現代唔同，古代嘅“一斛”就係“十斗”。呢個“斛”字，《辭源》講嘅讀音係“酷”，我唔敢確定係咩讀音。《辭源》講“一斛”係等於現代大約五十二公升咁多，咁樣計嚟呢，八斛四斗係大約相等於四百公升左右嘞。平均一個細蚊仔呢，一日大約飲一公升奶，總要飲到兩歲左右，咁樣計起嚟，佛陀估計嘅數量係好接近一般實情嘅。佛陀咁樣開示之後，阿難又點樣反應呢？

跟住我哋講第三點：“十月懷胎更十恩”。

經文原文講：“阿難聞語，痛割於心，垂淚悲泣，白言：‘世尊！母之恩德，云何報答？’佛告阿難：‘汝今諦聽，我當爲汝，分別解說：母胎懷子，凡經十月，甚爲辛苦。在母胎時，第一月中，如草上珠，朝不保暮，晨聚將來，午消散去。母懷胎時，第二月中，恰如凝酥。母懷胎時，第三月中，猶如凝血。母懷胎時，第四月中，稍作人形。母懷胎時，第五月中，兒在母腹，生有五胞。何者爲五？頭爲一胞，兩肘兩膝，各爲一胞，共成五胞。母懷胎時，第六月中，兒在母腹，六精齊開，何者爲六？眼爲一精，耳爲二精，鼻爲三精，口爲四精，舌爲五精，意爲六精。母懷胎時，第七月中，兒在母腹，生成骨節，三百六十，及生毛孔，八萬四千。母懷胎時，第八月中，生出意智，以及九竅。母懷胎時，第九月中，兒在母腹，吸收食物，所出各質，桃梨蒜果，五穀精華。其母身中，生臟向下，熟臟向上，喻如地面，有山聳出，山有三名，一號須彌，二號業山，三號血山。此設喻山，一度崩來，化爲一條，母血凝成胎兒食料。母懷胎時，第十月中，孩兒全體一一完成，方乃降生。若是決爲孝順之子，擎拳合掌，安詳出生，不損傷母，母無所苦。倘兒決爲五逆之子，破損母胎，扯母心肝，踏母跨骨，如千刀攪，又彷彿似萬刃攢心。如斯重苦，出生此兒，更分晰言，尚有十恩：第一、 懷胎守護恩；第二、 臨產受苦恩；第三、 生子忘憂恩；第四、 咽苦吐甘恩；第五、 迴乾就濕恩；第六、 哺乳養育恩；第七、 洗濯不淨恩；第八、 遠行憶念恩；第九、 深加體恤恩；第十、 究竟憐愍恩。’”

下面係白話語體嘅翻譯：

阿難聽到佛陀開示之後，就心痛如刀割，流淚悲泣，對佛陀話：“世尊，母親嘅恩德，點樣先能夠報答呢？”佛陀就對阿難話：“你現在聽住，我嚟爲你分別解說。母親響懷胎十個月嘅時候已經係好辛苦。懷胎嘅第一個月嘅時候，母親就擔心胎兒會好似早晨嘅露珠咁容易響午間好似見到陽光一樣就消失了；懷胎第二個月嘅時候，胎兒脆弱得好似奶油酥一樣；懷胎第三個月，胎兒稍爲聚形，似凝結嘅血滴；懷胎第四個月嘅時候，胎兒先開始初具人形；懷胎第五個月嘅時候，胎兒響母親嘅肚裏便形成咗五體，第一體係頭，手腳四肢就係四體，合成變咗五體；到咗第六個月嘅時候，胎兒響母親子宮裏便開咗六精，就係眼睛、耳朵、鼻、嘴、舌頭同埋意識；第七個月，嬰兒形成骨節，有三百六十根筋骨，又生成八萬四千個毛孔；第八個月，胎兒生成意識同智力，同埋九竅，即係兩隻眼睛、兩個鼻孔、兩隻耳朵、一個嘴巴、一個尿道同一個肛門，一共九處嘅孔竅；第九個月，胎兒響母親嘅肚裏便就會吸食食物嘅各種營養物質，例如桃、李、蒜、五穀等等嘅精華。嗰個時候，母親嘅身體裏便，生嘅內臟就向上，熟嘅內臟就向下，好似地面由上聳起嘅山一樣，呢個山有三個名字，第一叫做“須彌山”，第二叫做“業力山”，第三叫做“血山”，呢啲山都係作爲一種比喻嘅名稱啫，佢一崩潰嘅時候就變做一條將母親體內血液運送嘅營養輸送俾胎兒；到咗第十個月，胎兒全身各部分都已經一一生長完成，就可以降生出世嘞。倘若係孝順嘅兒子，就會合掌舉拳然後頭先出，就叫做順產，就唔會損傷母親，母親唔會有幾大嘅痛苦；倘若係個五逆嘅細蚊仔呢，就會逆產，破損母親嘅胎盤，扯拉母親嘅心肝，踢踏母親嘅骨盤，好似一把千刀萬刃插喺母親嘅心裏便，母親受呢啲咁大嘅痛苦先生出孩子。再進一步分析，母親仲有十種大恩吖！第一，懷胎守護之恩；第二，臨生產嘅時候受到痛苦之恩；第三，生咗細蚊仔就唔計較自己所受嘅痛苦；第四，母親自己咽下痛苦嚟對細蚊仔慈愛、溫暖、甜蜜嘅照顧；第五，寧願自己受苦唔舒服，亦都要使到細蚊仔乾爽舒適；第六，哺乳養育之恩；第七，洗滌細蚊仔嘅屎尿都唔怕邋遢；第八，孩子遠離咗之後母親就懷念惦掛；第九，深深關懷體恤孩子；第十，永遠慈愛憐惜子女。”

佛陀嘅時代仲冇X光，亦都冇超音波設備，見唔到胎兒響母親子宮內嘅實際情形，佢只係由推測嚟解說胎兒嘅十個月情況。佢所講嘅同今日嘅可能唔一致，但係我哋要明白，佛陀當日係冇現代人咁幸運可以響電視上見到超音波拍出嘅胎兒十個月嘅生長過程。我哋現代人用超音波攝影可以見到胎兒響母親子宮之中，由一開始成人就喺肚臍已經生出嚟嘅吸管同埋吸盤，吸喺子宮裏便嘅壁上，吸取母親喺肚臍嘅血液輸送嘅養料。第二周就已經形成咗兩隻眼、兩隻耳同埋個鼻嘅初形，胎兒睇起上嚟好似一隻大肚嘅鰺魚，係有尾巴捲成攣曲，骨骼由一開始已經形成，神經系統、血管系統亦都漸漸形成，尾亦都漸漸退化，第一個月已經略具哺乳動物個樣。第六周到第七周已經會自己吮吸大拇指，亦都有咗聽覺，聽到母親嘅心臟跳動同血液流動嘅聲音。第二個月，到咗兩個半月，性別就開始形成，已經係好似一個細細嘅人嘞。胎兒響子宮裏便係時常移動嘅，佢喺羊水裏便游泳，轉來轉去。到咗第四個月就會伸下手、喐下腳。到咗第九個月接近產期嘅時候呢，有啲胎兒嘅頭就會轉倒面門，就會轉向生門裏便，就稱爲順產。但係有啲胎兒呢，就啱啱將腳呢，轉向下便，而子宮裏便嘅羊水膜就會破，流乾咗羊水，胎兒唔能夠移動，只有兩隻腳同埋屁股首先出嚟，咁就麻煩，成爲難產了。其實唔能夠講順產嘅胎兒就係孝順嘅，逆產嘅就唔係孝順嘅，不過我哋要明白，佛陀響兩千六百多年前冇見過超音波電影嘅胎兒成長同出生，我哋唔能夠以佢響呢方面嘅不足知識嚟批評佢，我哋要睇下佢講呢本經嘅動機同目的。佛陀係已經將盡佢所知嚟解說做母親懷胎生產嘅痛苦，我哋讀經唔可以斷章取義，我哋必須要睇下經文嘅前文後理，我哋必須明白佛陀係以佢嘅時代嘅最佳醫學生理知識嚟表達子女做母親懷胎嘅辛勞痛苦，由此而引出對於母親對養育子女嘅十種母愛大恩，然後佛陀又用詩句去讚頌母愛嘅偉大，下便就係經文嘅原文。

第一，懷胎守護恩。頌曰：

累劫因緣重，今來託母胎，月逾生五臟，七七六精開。

體重如山嶽，動止劫風災，羅衣都不掛，裝鏡惹塵埃。

第一首詩頌譯成白話文就係：經歷好多劫因緣，現在嚟投入母胎嘞，過咗一個月多之後呢，就生出五臟，經過四十九日之後就開六精，胎兒重得好似山峯一樣，母親無論係行動、靜止都響度受苦難。懷胎連穿衣吔，都唔能夠，梳裝鏡亦都停止使用，以致粘滿咗塵埃嘞。

呢首詩頌係稱頌母親懷胎守護嘅大恩。詩中裏便所講嘅“累劫”兩個字，“累”就係累債，“劫”字呢，其實唔係劫數個劫。“劫”應該係巴利文“kappa”，轉譯成爲梵文再譯爲中文，個音應該讀作“ka”嘅，呢個唔係呢，“打劫”個“劫”字，好不幸連《辭源》都搞錯咗，將佢當做係“劫”字。字典呢，免不了都會有啲錯誤，念書嘅時候要小心求證。“劫”字響佛學上嚟講係指唔能夠以通常嘅年月日計算嘅好長好長嘅時間，亦都有翻譯爲“大時空”嘅。簡單地講，一個小“ka”等於大約人間嘅一千六百八十萬年，響呢度唔能夠對佢詳細討論，“累ka”就係講累積咗好多好多、生生世世、千千萬萬年嘅緣份，先有緣得到去投生去母胎裏便。

第二，臨產受苦因。頌曰：

懷經十個月，難產將欲臨，朝朝如重病，日日似昏沉。

難將惶怖述，愁淚滿胸襟，含悲告新族，惟懼死來侵。

呢個係佛陀歌頌母愛嘅第二首詩偈。母親懷胎經過十個月咁耐，艱難嘅生產即將來臨，日日都好似患咗重病，日日都好似昏昏沉沉，難以盡述種種嘅擔憂同恐懼，憂愁嘅眼淚流滿咗胸襟，含住悲傷去告訴親人，生怕死亡會來臨。

依第二首讚頌母親臨生產前受苦嘅，就係呢首頌，下面係第三首，係讚頌母親生孩子之後嘅忘憂歡喜。

第三，生子忘憂恩。頌曰：

慈母生兒日，五臟總開張，身心俱悶絕，血流似屠羊。

生已聞兒健，歡喜倍加常，喜定悲還至，痛苦徹心腸。

譯成白話文就係：慈母生孩子嘅嗰日痛到五臟都裂開，佢嘅身心都悶痛得死去活來，血流好似係殺羊一樣。生孩子以後，聞知孩子平安出世，母親就歡喜到咗極點，歡喜剛定下來之後呢，悲傷又嚟嘞，因爲痛楚呢，係穿徹心腸嘅。佛陀爲咩用殺羊嚟做比喻呢？大概係因爲古代印度係畜牧社會，仲末轉爲農業社會，牧羊呢，係好普遍，殺羊亦都係常見嘅事。殺羊流血就多得好可怕，母親生細蚊仔嘅時候流嘅血亦都好似多到殺羊一樣。

跟住第四首詩頌係讚頌母親自己忍受一切痛苦嚟將甜蜜嘅慈愛給予孩子嘅。

第四，咽苦吐甘恩。頌曰：

父母恩深重，顧憐沒失時，吐甘無稍息，咽苦不顰眉。

愛重情難忍，恩深復倍悲，但令孩兒飽，慈母不辭飢。

翻譯成白話文係：父母嘅恩德係好深、好重，無時無刻唔慈愛照料憐惜孩子嘅，吐出甘甜永無息止，自己吞下苦痛亦都從來唔會皺一皺眉頭，慈愛情深係好難忍捨，慈恩深倍令到佢哋傷悲。但願孩兒食得飽，慈母就甘願用佢嘅飢餓去換取孩子嘅溫飽。

第五首詩頌係歌頌慈母寧願自己換濕冷而俾孩子乾爽舒適嘅。

第五，回乾就濕恩。頌曰：

母願兒投濕（註：經文爲“母願身投濕”），將兒移就乾，兩乳充飢渴，羅袖掩風寒。

恩連恆廢枕，寵弄才能歡，但令孩兒穩，慈母不求安。

譯成白話文：慈母甘願屈身於濕冷，俾孩子安置響乾嘅地方，慈母兩個乳爲兒解飢渴，衣袖遮掩咗孩兒去避風寒。因爲愛惜孩兒而自己睡眠唔安穩，愛惜孩兒先至心放，但求孩兒得到安穩，慈母自己亦都唔求安樂。

第六首頌係頌揚慈母哺乳養育之恩。

哺乳養育恩。頌曰：

慈母像大地，嚴父配於天，覆載恩同等，父娘恩亦然。

不憎無怒目，不嫌手足攣，誕腹親生子，終日惜兼憐。

譯成白話文：慈母就好似大地，父親就好似蒼天，天覆地載完全相等，父母嘅恩情亦都係一樣。慈母嘅心永遠唔會憎怒，唔會厭惡佢嘅細蚊仔，孩子都係親生嘅，好好壞壞都會對佢愛憐。原文嘅“手足攣”係指孩子反抗唔聽話，以“手腳痙攣”嚟做比喻。

第七首頌係讚頌慈母洗滌孩子之恩。

洗濯不淨恩。頌曰：

本是芙蓉質，精神健且豐，眉分新柳碧，臉色奪蓮紅。

恩深摧玉貎，洗濯損盤龍，只爲憐男女，慈母改顏容。

慈母本嚟係好似芙蓉花一樣美貌，精神飽滿又健康豐滿，佢嘅眉毛秀麗好似新出嘅柳葉，臉色好比紅蓮花咁美麗，只因爲憐愛佢嘅細蚊仔而辛勞嘞，憔悴，美玉咁嘅容貌，只因爲洗滌孩兒而損壞咗雙手，因爲憐惜兒女以至於慈母憔悴咗佢嘅顏容。

第八首頌係歌頌懷念孩子遠行嘅。

第八，遠行憶念恩。頌曰：

死別誠難忍，生離實亦傷，子出關山外，母憶在他鄉。

日月心相隨，流淚數千行，如猿泣愛子，寸寸斷肝腸。

譯成白話文：死別嘅痛苦實在難以忍受，生離呢，實在亦都好傷心。孩子遠行到遠方，慈母憶念亦都跟到他鄉，日日月月心中惦念相隨，流淚數千行，就好似猿猴嘅媽媽哭泣思念孩子，肝腸寸寸都痛斷。呢一首頌係描寫兒女長大成人外出去他鄉，慈母響屋企惦念孩兒嘅傷心。

第九首係歌頌母親體恤之恩。

第九，深加體恤恩。頌曰：

父母恩情重，恩深報實難，子苦願代受，兒勞母不安。

聞道遠行去，憐兒夜臥寒，男女暫辛苦，長使母心酸。

譯成白話文：父母親嘅恩情深且重，兒女實在係無法報答得完，孩子受苦，父母願代佢受罪，孩子辛苦，慈母嘅心實在係好不安。聽到孩子要遠行去外地，慈母整夜都唔能夠睡眠以致於受寒，兒女暫時受一啲辛苦，慈母就時常心酸傷感。

第十首頌係歌頌父母嘅帶深恩。

第十，究竟憐憫恩。頌曰：

父母恩深重，恩憐無歇時，起坐心相逐，近遙意與隨。

母年一百歲，常憂八十兒，欲知恩愛斷，命盡始分離。

譯成白話文：父母喜歡孩子，對孩子嘅恩深重，愛憐兒子係永無休止嘅。父母企起身，坐低，佢嘅心都掛念孩子，無論遠近亦都惦念相隨。慈母即使到咗一百歲，亦都係時時憂念佢八十歲嘅細蚊仔，如果要慈母慈愛嘅恩情斷絕呢，除非係到咗生命完盡先會分離嘅。

上面嘅第八至第十首頌實在係好能夠反映古今嘅慈母心。唐詩有話，“慈母手中線，遊子身上衣，臨行密密縫，意恐遲遲歸。”咁樣講亦都唔及佛陀呢幾首偈頌描寫得咁深切。今日幾多慈母響掛念流落外國異鄉嘅孩子呢，幾多人響美國、加拿大、澳洲、歐洲，遠離咗故鄉嘅父母，你又知唔知慈母響家鄉日夜掛念懷念、悲傷流淚到天明呢？冇錯，出國或者創造咗事業前途，但係幾多慈母悲傷牽掛，不少人響美國忽然聽到家鄉傳來消息，父母病重慌忙趕回去，有啲人仲見得到慈母慈父嘅一面，但係有幾多人連呢啲最後嘅一面都見唔到呢？點樣痛哭、點樣喊，能夠補得到呢？幾乎每日都有人打電話或者寫信嚟要求挽救佢垂危父母嘅生命，但係一個講佛法嘅人只不過係一個凡夫俗子，講佛法嘅人又有咩法力去救盡天下慈母慈父嘅生命嚟安慰天下遊子嘅悲痛、後悔嘅心呢？

朋友，都係趁住父母仲在世嘅時候，唔好頂撞父母，多多孝敬供養佢哋，多啲同父母團聚啦！唔好等到父母唔在世嘅時候，縱然能夠唸經超度，到底亦都總係見唔到佢哋嘅面。佛陀慈悲開示，教導世人要孝敬父母，唯恐弟子仲唔明白，所以佢語重心長，再喺經後便詳細向大家繼續說明。（註：接下文）

231.喚醒生命中的至親至愛（三）

（註：接上文）

第四：“至親之愛”。

原經文：

佛告阿難：“我觀衆生，雖紹人品，心行愚蒙，不思爹娘，有大恩德，不生恭敬，忘恩背義，無有仁慈，不孝不順。阿娘懷子，十月之中，起坐不安，如擎重擔，飲食不下，如長病人。月滿生時，受諸痛苦，須臾產出，恐已無常，如殺豬羊，血流遍地。受如是苦，生得兒身，咽苦吐甘，抱持養育，洗濯不淨，不憚劬勞，忍寒忍熱，不辭辛苦，乾處兒臥，濕處母眠。三年之中，飲母白血。”

下面係翻譯嘅白話文：

佛對阿難話：“我觀察衆生世人，繼承咗父母人品，但係佢哋心中仲係好愚痴、好愚昧，佢哋唔念父母嘅恩德，唔恭敬父母，不仁不義、忘恩負義，唔孝順父母。要知道慈母懷胎十個月之中喜坐不安，好比挑咗重擔，飲食亦食唔到，好似患咗大病、久病嘅人。到咗足月生孩子嘅時候就受盡種種痛苦，好唔容易，生咗孩子，好似殺豬羊一樣，流咗滿地嘅鮮血，又怕養唔大孩子，母親受咗咁多嘅苦先生下孩子，自己甘願吃苦亦都俾孩子溫暖甜蜜，抱持愛護小心而養育。爲咗孩子洗淨屎尿不潔嘅嘢，母親不畏勞苦爲孩子去忍受寒冷炎熱，不辭勞苦。乾燥嘅地方俾孩兒睡，潮濕嘅地方就母親眠。三年之中孩兒都靠吸飲母親嘅奶汁爲生，就好似飲白色嘅血一樣。”

原經文：嬰孩童子。乃至成年。教導禮儀。婚嫁營謀。備求資業。攜荷艱辛。勤苦百倍。不言恩惠。男女有病。父母驚憂。憂極生病。視同常事。子若病除。母病方愈。

譯做白話文就係話：父母養育兒女，經歷嬰孩嘅時代到童年到成長爲成人，做父母嘅都需要教導孩子禮儀，又要爲兒女嘅婚嫁而打算，又要爲孩子嘅事業資產而籌備，父母負擔艱辛、辛勞百倍，亦都唔會有咩恩惠去期望兒女去報答。相反，兒女有病呢，父母就擔憂驚慌，乃至於因爲憂慮而生病，直到孩子病痛解除咗之後，母親先至病癒。

佛陀又繼續開示話：“如斯養育，願早成人。及其長成，反爲不孝。尊親與言，不知順從，應對無禮，惡眼相視。欺凌伯叔，打罵兄弟，毀辱親情，無有禮儀。雖曾從學，不遵範訓，父母教令，多不依從，兄弟共言，每相違戾。出入來往，不啟尊堂，言行高傲，擅意爲事。父母訓罰，伯叔語非，童幼憐愍，尊人遮護，漸漸成長，狠戾不調，不伏虧違，反生瞋恨。棄諸親友，朋附惡人，習久成性，認非爲是。”

譯成白話文：父母養育兒女盼望早啲長大成人，等到兒女長成咗，反而不孝。長輩親人勸告佢亦都唔聽從，反而用無禮嘅態度去應對，用兇惡嘅眼光去對待，欺凌叔叔伯伯，打罵兄弟，毀壞侮辱親人，毫無禮儀。雖然亦都讀過書，但係就唔遵守規範訓律，對於父母嘅教訓多數都唔會聽從，同兄弟說話亦都每每爆戾爭吵。凡係由外便或者返屋企亦都唔稟告父母，說話行動乖張傲慢，凡事擅作主張。孩子年幼嘅時候，長輩都會袒護佢、縱容佢，到咗孩子漸漸長成就變咗兇惡爆戾無法教導嘞，非但唔承認自己嘅理虧同埋違背教訓，反而憎恨怨恨父母，拋棄自己嘅親友去同啲壞人朋友朋比爲奸，時間耐咗就變咗壞習慣，將錯誤嘅都認爲係啱㗎喇。

兩千多年前，佛陀開示所指出嘅呢啲情形，大家睇一睇係幾似今日嘅問題少年、今日嘅問題青年。呢啲問題你聽落嚟係咪好熟呢？每年唔知道有幾多個家庭吵鬧，呢啲不良子女嘅悲劇，唔知有幾多人曾經哭訴子女唔聽話鬥氣。

好，等我哋繼續再聽佛陀嘅開示：“或被人誘，逃往他鄉，違背爹娘，離家別眷。或因經紀，或爲政行，荏苒因循，便爲婚娶，由斯留礙，久不還家。”呢一段係話有啲子女長大之後被人引誘逃到外地，違背咗父母離開家庭，拋棄咗家眷，有啲係去做生意，有啲呢，就係從政，時間因循耐咗，就係外邊結埋婚，從此滯留在外，好耐都再冇返過家鄉。

點樣呢？你聽一聽，好，係咪好似今日嘅情形呢？今日唔係有好多子女爭先恐後到外地去移民，將父母留喺家鄉而不顧咩？唔係好多子女響外國定居，再唔返嚟探望鄉下嘅父母咩？

佛陀又繼續開示：“或在他鄉，不能謹慎，被人謀害，橫事鉤牽，枉被刑責，牢獄枷鎖。或遭病患，厄難縈纏，囚苦飢羸，無人看待，被人嫌賤，委棄街衢。因此命終，無人救治，膨脹爛壞，日暴風吹，白骨飄零。寄他鄉土，便與親族，歡會長乖，違背慈恩，不知二老，永懷憂念，或因啼泣，眼暗目盲；或因悲哀，氣咽成病；或緣憶子，衰變死亡，作鬼抱魂，不曾割捨。”

譯成白話文：有啲子女響外地他鄉，唔能夠自己謹慎小心，被人謀害死於非命，或者牽連到橫禍官非裏便去，受咗冤枉刑罰，坐監，進咗監牢被枷鎖綁住嘞。或者又患咗病痛，遭到厄難纏身，被囚禁挨飢餓，瘦弱無人照顧，又被人嫌棄鄙視，被棄於街頭巷尾，因此就喪命，冇人嚟救佢，任由日曬風吹雨淋，佢嘅屍體已經腫脹腐爛，白骨散落於他鄉異國，從此就永別父母親人，永別咗慈母嘅恩德，唔知道父母兩老仲響度永久憂心念念，哭泣到眼睛都盲咗，悲哀到氣喘病重，或者由於苦念孩子而衰老、死亡，就算做咗鬼魂亦都念念不忘佢哋嘅親生兒女吔！

古代有呢啲事，今日就更多。幾多做父母嘅響苦苦懷念、倚淚而坐，流淚等待愛子愛女由外國回嚟呢？流淚流到兩眼都盲咗，亦都唔見到孩子回家，甚至亦都得唔到一封信，點知道孩子已經喺美國撞車身亡了，點知道響加拿大被人連累韞咗入監獄裏便，又點知道孩子早已埋骨異國呢？孩子響咩國被人謀殺父母根本唔知。天下嘅父母心吖，無盡嘅慈愛惦念，流不盡嘅眼淚，做兒女嘅，你又知唔知道父母嘅懸念呢？

等我哋再讀經文：“或復聞子，不崇學業，朋逐異端，無賴粗頑，好習無益，鬥打竊盜，觸犯鄉閭，飲酒樗蒲，姦非過失，帶累兄弟，惱亂爹娘，晨去暮還，不問尊親，動止寒溫，晦朔朝暮，永乖扶侍，安床薦枕，並不知聞，參問起居，從此間斷，父母年邁，形貌衰羸，羞恥見人，忍受欺抑。”

譯成白話文：又有啲做兒子嘅唔中意上學念書，但係去交結一啲異端不良嘅朋友、無賴嘅壞蛋，學一啲不良嘅習慣，打鬥偷竊搶劫、侵擾街坊、酗酒賭博、作奸犯科，拖累自己嘅兄弟，氣壞咗父母。又早出夜歸，出入從來唔問一問父母起居係冷係熱、是否平安，由月頭到月底，亦都永遠唔去扶持老父老母，更唔去安排床鋪俾父母休息，亦都唔會去問候父母一聲，從此就隔離咗嘞。父母年老衰弱咗，忍受呢一切子女嘅欺負，而且亦都羞於見人，唔敢同人訴說。佛陀好似係預見到今日嗰啲不良嘅少年、不良嘅青年，睇下嗰啲逃學唔肯念書、不求上進嘅青年人，你睇下！嗰啲響外面濫交嘅阿飛，呢啲青年人已經學壞咗啦。佛陀呢一段開示，唔係佢哋嘅活生生嘅寫照咩？

等我哋再繼續讀經文：“或有父孤母寡，獨守空堂，猶若客人，寄居他舍，寒凍飢渴，曾不知聞。晝夜常啼，自嗟自歎，應奉甘旨，供養尊親。若輩妄人，了無是事，每作羞慚，畏人怪笑。”

譯成白話文嘅係：有啲係父親孤單咁樣一人，或者係母親守寡獨居，獨自守住空房，好似係客人寄居響別人嘅屋企之中。係飢餓、係苦渴、係受寒、係凍死都冇人知道，冇人可憐，唯有自己傷感嗟嘆啫。而做子女嘅理應盡用甘美嘅食物去供奉父母先啱，但係有啲狂妄之徒根本冇將呢件事放喺心上，做父母嘅呢，只好自已慚愧，唉，恐怕被人恥笑。

現在嘅社會唔知有幾多單身嘅母親或者單身嘅父親獨力撫養兒女，等到兒女養大成人，自己已經老嘞，搵唔到工作，又搵唔到伴侶，孩子長大飛走咗，亦都唔問父母係死係生，係病定是健康。單身嘅母親或者父親爲咗兒女犧牲咗佢哋一生，換嚟嘅只係被兒女遺棄。呢一啲現象，原來兩千幾年前佛陀亦都早有指出嚟吖，正是“可憐古今父母心，無情最是離巢燕。”我套用咗唐代大詩人白居易嘅名詩改編咗呢兩句，我唔係詩人，但係詠嘆唔到世間父母被子女遺棄嘅悲慘。

我哋再聽佛陀嘅開示：“或持財食，供養妻兒，忘厥疲勞，無避羞恥；妻妾約束，每事依從，尊長瞋呵，全無畏懼。或復是女，適配他人，未嫁之時，咸皆孝順；婚嫁已訖，不孝遂增。父母微瞋，即生怨恨；夫婿打罵，忍受甘心，異姓他宗，情深眷重，自家骨肉，卻以爲疏。或隨夫婿，外郡他鄉，離別爹娘，無心戀慕，斷絕消息，音信不通，遂使爹娘，懸腸掛肚，刻不能安，宛若倒懸，每思見面，如渴思漿，慈念後人，無有休息。”

譯成白話文：有啲人用財富同埋美食去供應妻兒子女一啲都唔會覺得辛勞，亦都一啲唔會避畏，被妻妾管束就事事都順從，但係父母尊長嘅教訓呵責，佢就毫無敬畏嘞。又有一啲女兒，未出嫁之前呢，係好孝順，但係嫁出咗去之後就漸漸變咗不孝嘞，父母輕微責罵佢哋，佢哋就心生怨恨。又有啲女兒跟隨丈夫去咗外地，離別咗自己嘅父母亦都毫無留戀懷念，完全斷絕咗消息，不通書信，使到父母牽腸掛肚、惦念擔心，冇一個時刻係可以安心嘅。呢一種痛苦就好似被倒吊咁掛起嚟一樣，時時響度思念子女，係無時休止嘅。

一般嚟講，嫁出去嘅女兒大多數仍然係孝順懷念父母嘅。東西方民族性嘅唔同，風俗嘅唔同，觀念亦都有分別，就一般而言，中國人嫁出去嘅女兒孝順父母嘅比較居多，亦都能夠懷念同照顧爹娘，同埋娘家嘅手足，女婿亦都大多數都能夠孝順自己嘅父母同岳父母。而西方人嫁出去嘅女兒呢，一般就比中國人嘅女兒要薄情一啲，只知道丈夫不管爹娘，洋女婿同岳父母亦都有好多相處得唔係咁好。但係到咗而家呢個時代，可能東西方嘅人都係逐漸變成一樣。

佛陀上述嘅一段話所指出嘅情形可能響古代印度之中係較中國普遍，我哋唔好錯認佛陀係指責所有嫁出去嘅女子都係咁不孝，中文嗰個“或”字係“有啲人”嘅意思。

跟住我哋嚟講第五點：不孝，大地恆久的哀歌。佛陀舉例講說不孝嘅子女嘅一啲例子之後，於是就結語話：“父母恩德。無量無邊。不孝之愆。卒難陳報。”

佛陀話：“父母嘅恩德無量無限咁深，兒女不孝之罪點樣亦都講唔盡。”佢嘅意思就係話，仲有好多好多不孝不義嘅人根本就講唔完、講唔盡。

好，等我哋嚟繼續研究經文：

“爾時，大衆聞佛所說父母重恩，舉身投地，搥胸自撲，身毛孔中，悉皆流血，悶絕躄地，良久乃蘇，高聲唱言：‘苦哉，苦哉！痛哉，痛哉！我等今者深是罪人，從來未覺，冥若夜遊，今悟知非，心膽俱碎，惟願世尊哀愍救援，云何報得父母深恩？’”

譯成白話文：響嗰個時候，大家聽咗佛陀所講嘅父母種種深厚恩德之後，大家都撲伏響地面上，披打胸口，身體嘅毛孔都因而流出血，仲有一啲人暈倒響地上，好耐先再甦醒過嚟，衆人都高聲叫喊：太苦了，太苦了，實在係好痛心，好痛心吖！我哋現在都係罪深嘅人，從來都唔知道自己嘅不孝罪深，好似處於黑暗之中遊蕩咁無明，現在至覺悟前非，心膽都難過得好似碎咗一樣，唯有祈求老師您衰憐我哋、教導我哋點樣去報答父母嘅深恩。

呢一段描述，聽咗法嘅弟子，人人被佛陀嘅開示所感動，悔悟嘅情形。現代人可能必定會覺得可笑同難以置信。點解弟子佢哋會全身毛孔流出血又會暈倒呢？我諗係咁樣嘅情形，印度古代有一種風俗，響悲傷難過嘅時候就撕裂自己嘅衫，自己拚命打胸口高聲痛哭，瞓喺地上嘅沙石之中打滾折磨自己，呢啲係用自我折磨嚟贖罪嘅意思。響沙石之中打滾咗耐咗，裸露嘅皮膚又點會唔流血呢？咁樣響白日之下滾來滾去，就難免有啲人會暈到昏迷嘞。正是好似陶淵明講過：“悟已往之不諫，知來者之可追。”

我哋繼續聽佛陀嘅開示：“爾時，如來即以八種深重梵音，告諸大衆：‘汝等當知，我今爲汝分別解說：假使有人，左肩擔父，右肩擔母，研皮至骨，穿骨至髓，遶須彌山，經百千劫，血流沒踝……”（註：接下文）

232.喚醒生命中的至親至愛（四）

（註：接上文）“……血流沒踝，猶不能報父母深恩；假使有人，遭饑饉劫，爲於爹娘，盡其己身，臠割碎壞，猶如微塵，經百千劫，猶不能報父母深恩；假使有人，爲於爹娘，手執利刀，剜其眼睛，獻於如來，經百千劫，猶不能報父母深恩；假使有人，爲於爹娘，亦以利刀，割其心肝，血流遍地，不辭痛苦，經百千劫，猶不能報父母深恩；假使有人，爲於爹娘，百千刀戟，一時刺身，於自身中，左右出入，經百千劫，猶不能報父母深恩；假使有人，爲於爹娘，打骨出髓，經百千劫，猶不能報父母深恩；假使有人，爲於爹娘，吞熱鐵丸，經百千劫，遍身焦爛，猶不能報父母深恩。’”

翻譯成白話文係：響嗰個時候，佛陀就用八種深重嘅梵音對大衆話：“你哋聽住，我現在分別一一解說俾你哋聽。”呢度所講嘅梵音呢，可能係指佛音而言，或者係佛陀用八種唔同嘅地方方言嚟說法。印度係由好多個國邦所組成，有好多種唔同嘅方言，博學嘅佛陀好可能係通曉好多種方言，因爲古代中國譯經嘅人將印度嘅文字、語言、音樂好多都譯爲梵字。所以我推斷呢度嘅經文所話嘅八種梵音呢，可能係八種唔同嘅方言，而唔係同時一齊發嘅世俗以爲有八種神通嘅佛音，因爲喺呢度說理只係用普通語言就已經使到人聽得懂，無須運用咩神通。仲有，嗰個時候嚟聽佛陀說法嘅人好多係來自各地方唔同嘅邦國，未必個個都聽得明佛陀講嘅巴利文。佛陀於是自己將最重要嘅說法用八種唔同嘅語言嚟講俾在場嘅各種各邦嘅民族嚟聽。你睇下，今日嘅天主教教宗唔係響每年嘅聖誕節同復活節站喺聖彼德大廣場嘅聽衆，用拉丁文、意大利文、法文、西班牙文、英文、俄文、希臘文等等十二種語文去講道咩？我推斷兩千多年前，佛陀說法亦都曾經用多種語言嚟講嘅。

佛陀對大衆話：“假如有任何人，左邊膊頭挑擔住父親，右邊膊頭挑擔住母親，挑擔到皮爛見骨，亦都見到骨髓，咁辛苦繞住宇宙嘅中心須彌山行走，走咗上千千百百年代嘅漫長時間，流血流到浸到上腳踝上便，就係咁樣做呢，亦都唔能夠報答父母嘅深恩。假如有任何人響饑荒災難嘅時候，爲免爹娘挨餓就盡自己嘅全身嘅肉斬成肉醬嚟供養父母，咁樣供養千千百百萬萬年代咁耐，同父母嘅深恩相比呢，只係好似微塵一樣咁微小，仲係冇辦法報答得盡父母嘅深恩嘅。又假如有任何人爲咗要報答爹娘，就自己挖咗雙眼去奉獻俾佛菩薩，咁又千千萬萬嘅年代之後，仲係冇辦法報得盡父母嘅深恩。亦都假如有任何人爲咗報答爹娘，就用利刀自己割出心肝內臟，血流滿地亦都唔怕痛苦，咁樣經過千千萬萬無數年代，亦都係報答不盡父母嘅深恩。假如有任何人爲咗報答父母深恩而用千刀萬斧嚟刺斬自己嘅身體，響左邊插入，右邊刺出，咁樣經過千千萬萬無數年代，仲係冇辦法報答得盡父母嘅深恩㗎。假如有人爲咗報答爹娘就自己打碎骨頭，打到流出骨髓，就算經過千千萬萬無數年代，亦都係報答不盡父母嘅深恩。假如有任何人爲咗報答父母而去吞好熱嘅鐵丸，就算經過千千萬萬嘅無數年代，令到自己全身焦爛，亦都係永遠永遠報答唔盡父母嘅大恩大德。”

響呢七段譬喻裏便，佛陀用咗七種唔同嘅受苦方式去譬喻而已，而唔係叫人咁樣做，做呢一，做呢一啲事先能夠報答父母，佛陀係咁樣譬喻，等於就係話肝腦塗地亦都報不盡父母嘅大恩。讀經嘅人千萬唔好錯解咗經意而去自己殘害自己嘅身體生命，以爲可以報父母嘅大恩吖。從前佛教嘅出家人盛行焚指報親恩，就係用火油將自己嘅十隻指燃燒嚟供佛，以爲咁樣就可以報父母嘅大恩，呢一種做法可能係一種愚不可及嘅迷信愚行。我哋諗一諗，假如焚指受痛苦可以報父母恩，咁樣將自己整個人都當作燒豬嚟燒烤供佛唔係就更大功德咩？咁樣父母就可以成佛做神仙啦咩？你如果唔小心搞傷咗手指流血，你嘅母親就會心痛焦急無比，點樣會要你去焚指報恩呢？佛教有好多陋規同唔合理嘅迷信傳統，好似焚指報恩之類都係唔係佛陀嘅本意，要學佛就得正本清源去研究原始嘅佛經，唔好輕信任何嘅迷信。

好，等我哋繼續研究經文落去。

“爾時，大衆聞佛所說父母恩德，垂淚悲泣，痛割於心，諦思無計，同發聲言，深生慚愧，共白佛言：‘世尊！我等今者深是罪人，云何報得父母深恩？’”

呢一段係話大家聽咗佛陀開示父母恩德係太深重，難以報答得盡，大家都流淚悲傷喺度喊，心痛得就好似被刀割一樣。大家諗來諗去亦都諗唔出一啲咩方法去報答父母恩，同時大家慚愧同佛陀話：“老師，我哋現在都知道自己係不孝嘅罪人了，但係要點樣做先能夠真正報答到父母嘅深恩呢？”

佛陀又繼續講：“佛告弟子：‘欲得報恩，爲於父母書寫此經，爲於父母讀誦此經，爲於父母懺悔罪愆，爲於父母供養三寶，爲於父母受持齋戒，爲於父母布施修福，若能如是，則是名爲孝順之子；不作此行，是地獄人。’”

譯成白話文：佛陀開示佢嘅弟子話：“你哋想要報答父母嘅深恩，你哋必須爲父母抄寫呢一本《佛說父母恩重難報經》，爲父母誦唸呢一部經文，要爲父母去懺悔，消除佢哋嘅罪業，爲父母去供養佛法僧三寶，爲父母去持戒食素，爲父母去布施修福，假如能夠咁樣做，先係真正孝順嘅仔女，如果連呢啲都做唔到，將來就會落地獄㗎！”

佛陀再對佢嘅弟子開示：“佛告阿難：‘不孝之人，身壞命終，墮於阿鼻無間地獄。此大地獄，縱廣八萬由旬，四面鐵城，周圍羅網。其地亦鐵，盛火洞然，猛烈火燒，雷奔電爍。烊銅鐵汁，澆灌罪人，銅狗鐵蛇，恆吐煙火，焚燒煮炙，脂膏焦燃，苦痛哀哉，難堪難忍，鉤竿槍槊，鐵鏘鐵串，鐵槌鐵戟，劍樹刀輪，如雨如雲，空中而下，或斬或刺，苦罰罪人，歷劫受殃，無時暫歇，又令更入餘諸地獄，頭戴火盆，鐵車碾身，縱橫駛過，腸肚分裂，骨肉焦爛，一日之中，千生萬死。受如是苦，皆因前身五逆不孝，故獲斯罪。’”

呢一段經文係佛陀接上文嚟解釋不孝嘅人點樣落地獄受罪。佛陀告訴阿難話：“嗰啲不孝嘅人，到咗肉身死亡命終嘅時候，會因爲有不孝嘅罪名而被罪業沉重咁拖落地獄，呢個地獄叫做阿鼻無間地獄，係最低層嘅大地獄，面積一供有八萬由旬咁大。”響呢度我要註解一下，“由旬”係古代印度嘅一里，大約係等於現代嘅十六英里，各家說法不同，我採用十六英里嘅說法。八萬由旬就大約相當於一百二十八萬平方英里嘞，都係譬喻嘅約數而已。呢座無間地獄四面都係鐵鑄嘅城牆，周圍都有鐵羅綱，地面呢，亦都係鐵鑄嘅，大火響度猛烈焚燒，又有雷轟電閃，又有白熱嘅銅汁鐵汁去澆淋有罪嘅人，又有銅狗鐵蛇響度噴火嚟焚燒罪人，又有油鍋烹炸罪人。種種嘅刑罰痛苦不堪，難以忍受。又有鐵鉤、干啦、槍啦、茅啦、鐵鏈啦、鐵錘啦、鐵戟啦、劍林刀輪啦，好似雨點咁多，好似雲咁大，由空中降落去懲罰嗰啲罪人。或者係砍殺，或者係刺穿，唔知要懲罰到幾多千千萬萬年代，係無片刻嘅停止。而且仲有鬼卒夜叉將罪人驅趕到去其他嘅地獄，叫罪人頭戴火盆，用鐵車去輾碎佢哋嘅身體。鐵車衝駛過去嘅時候，罪人嘅腸肚就裂開了，骨肉焦爛，一日之中真係唔知死過幾多次。唉，咁樣受苦又爲咩呢？就係因爲呢啲罪人生前五逆不孝，所以受到呢一種惡報苦刑嘅懲罰。

佛陀開示嘅上面呢一段描寫阿鼻地獄、無間地獄嘅慘況，已經有人提出過疑問，要叫佢攞出科學證據去證明無間地獄響邊度。慚愧慚愧，唔係科學家，亦都冇咩證據可以證明地獄存在，只有要問科學家留待將來繼續研究。不過我推想，宇宙之中嗰啲黑洞，好可能就係地獄，黑洞嘅高熱唔知有幾千萬度，黑洞嘅物質濃度同埋比重唔知大過我哋世界嘅幾千億倍，黑洞嘅吸力係好大，無論咩物質或者非物質，被黑洞吸入去都被焚化成爲飛灰，就係非物質嘅微中子亦都唔能夠例外。人死咗之後，肉體物質腐化敗壞，但係靈識仍然存在，靈識唔係物質，所謂中陰身，可能係由非物質嘅微中子構組而成。假如呢個人係修行人，心地光明純潔清淨，又冇惡業纏身，當然清醒就會飛向光明，接受諸佛嘅接引，各自隨佛緣去各種淨土啦。假如呢個人一生作惡呢，有好多惡業牽纏，佢嘅心地一定係黑暗污穢，死後就自然係仍然無明，神識昏昏迷迷，隨住惡業嘅黑暗吸力而去，如果唔係輪迴響畜牲道就係進入咗黑暗可怕嘅地獄，可能喺黑洞去受嗰啲種種嘅刑罰嘞，而且可能喺嗰啲刀山油鍋、刀劍茅戟、鉤繩之中受苦，相信只係佛陀嘅譬喻啫，就係話進咗地獄受苦嘅種種痛苦就好比受到刀山油鍋一樣。因爲人嘅感覺係從經驗先知道，古時候嘅印度人或者中國人由經驗之中知道有刀山劍林嘅斬斫之苦，亦都見過油鍋烹炸畜類，所以亦都只能用呢啲嘢去譬喻地獄嘅痛苦。如果佛陀係現代人，或者就會話有死光啦、毒氣啦，用水銀剝皮啦，用灌滾水、灌滾油啦，呢一類現代嘅殘酷名詞，呢一啲酷刑呢，去做譬喻。或者地球同其他星球嘅火山口之下就可能係地獄啦，或者地球嘅中心白熱熔巖鐵槳亦都係地獄之一啦，可能呢，咁樣講亦都有啲符合佛陀開示四面都係鐵牆嘅地獄。總之，無人去過地獄嘅人又點會知道係有冇地獄呢？而去過地獄嘅人又冇返過嚟，一啲口信都冇。不過，就算物理學上冇辦法證明係有冇地獄，心理上就唔係咁難去解釋地獄嘅存在嘅。一個人假如行善做好人係心理上嘅愉快光明，自然就唔會響佢心裏便有咩罪惡感。響佢嘅知識同埋聽嚟嘅觀念之中，佢已經知道作惡會落地獄受罪，而佢亦都冇做壞事，心中坦蕩蕩、光明正大，佢當然呢，就肯定咗自己唔會落地獄，所以佢嘅心就唔會出現地獄嘅境相。相反嚟講，一個人假如又不孝，又唔行善，又多做壞事、多作惡業，無論佢點樣唔信鬼神、唔畏因果吖，唔信道德、唔信公理，佢心裏便嘅潛意識之內總會有多多少少存留住一啲由幼年聽到嘅因果論，“善有善報吖，惡有惡報”吖，同埋一啲有關地獄嘅受苦受罪嘅傳說。等到呢個人命終之後呢，佢嘅潛意識就會伴住中陰身免不了就會產生對地獄嘅恐懼同幻境，咁樣地獄嘅一切苦刑就喺佢嘅神識之中幻現，亦都可以話良心自責嘅罪惡感折磨番佢自己。

佛陀講過心生萬法，又講過諸法都係由心生，咁樣地獄嘅一切恐怖境像同刑罰嘅痛苦都係由罪人嘅心中自責而產生，化幻爲真，就好似活人響做噩夢一樣，咁樣亦都係地獄嘞。如果講“地獄係響罪人嘅心目中裏便”呢句說話可以講得通呢，何必一定要扯上黑洞同火山洞呢？佛陀設教解說罪人必入地獄受苦刑永不得翻身，係要將呢種因果論嘅惡有惡報嘅定律灌入人嘅心，警戒人唔可以作惡。一啲自命好科學嘅人自作聰明嚟否定因果論，否定地獄之說，咁樣做以爲係好科學咩？如果你哋咁樣做係等於否定咗殺人者必判死刑、劫盜都必被判槍弊等等嘅法律，如果否定咗呢啲法律刑罰就係助長犯罪，助長犯罪，認同呢啲定律嘅人呢，亦都等於自己犯罪一樣，點解要否定地獄嘅阻嚇犯罪、行惡嘅功用呢？

跟住落嚟我哋要同大家研究嘅係最後一點，第六：“云何報得父母恩”。等我哋繼續聽佛陀開示啦：“爾時，大衆聞佛所說父母恩德，垂淚悲泣，告於如來：‘我等今者，云何報得父母深恩？’”

佛陀嘅弟子聽聞佛陀所講父母種種恩德，人人都流淚哭泣，再次請問於老師：“我哋從今以後要點樣先可以報答父母嘅深恩呢？”

經文：“佛告弟子：‘欲得報恩，爲於父母造此經典，是真報得父母恩也。能造一卷，得見一佛；能造十卷，得見十佛；能造百卷，得見百佛；能造千卷，得見千佛；能造萬卷，得見萬佛。是等善人，造經力故，是諸佛等，常來慈護，立使其人，生身父母，得生天上，受諸快樂，離地獄苦。’”

譯成白話文係話：佛陀就開示弟子：“你哋想要報答父母嘅深恩，就必須爲父母印送呢一部經典，呢一部經係真正能夠報答到父母嘅大恩。你能夠印送一卷就見到一位佛，印送十卷呢，就見到十位佛，印贈百卷呢，就得見一百位佛，印贈一千卷呢，就得見一千位佛，印贈一萬卷呢，就得見一萬尊佛。咁樣嘅善人發心出力印贈呢一部經會得到諸佛菩薩嚟加持保護，使到佢哋嘅生身父母都可以獲得接引往生淨土，永遠快樂，永遠唔會受地獄嘅苦報。”

呢一段佛陀嘅開示係教我哋印贈呢一部孝經就有功德，可以獲得諸佛菩薩嘅加持，接引父母往生極樂淨土，咁樣做係最好報答父母大恩嘅方法。有人問我印呢本經有咩功德呢？點解會獲得佛去庇佑父母呢？我嘅答案係話：印贈呢一本經可以啓發人人孝順父母，人人行善，人人戒殺生、戒作惡，消除咗社會上好多罪行，所以印呢本經特別有大功德，會得到諸佛各大菩薩嘅加持同埋庇蔭。

佛陀跟住再講：“爾時，阿難及諸大衆、阿修羅、迦樓羅、緊那羅、摩侯羅伽、人非人等、天、龍、夜叉、乾闥婆、及諸小王，轉輪聖王，是諸大衆聞佛所言，身毛皆豎，悲泣哽咽，不能自裁，各發願言：我等從今盡未來際，寧碎此身猶如微塵，經百千劫，誓不違於如來聖教；寧以鐵鉤拔出其舌，長有由旬，鐵犁耕之，血流成河，經百千劫，誓不違於如來聖教；寧以百千刀輪，於自身中，自由出入，誓不違於如來聖教；寧以鐵網周匝纏身，經百千劫，誓不違於如來聖教；寧以剉碓斬碎其身百千萬段，皮肉筋骨悉皆零落，經百千劫，終不違於如來聖教。”

譯成白話文：響嗰個時候，阿難尊者同埋其他大衆弟子，仲有啲阿修羅啦、迦樓羅啦（迦樓羅啦，就食龍嘅金翅鳥，係天龍八部之一）、緊那羅啦（緊那羅係一種非人嘅神，亦都係天龍八部之一），其他嘅仲有摩侯羅伽啦（啫係大網神），同埋嗰啲人非人、仙人吖、天龍吖、夜叉吖、虔闥婆吖（虔闥婆係香神同樂神），同埋一啲小王，仲有轉輪聖王等等等等好多嘅弟子大衆，聽到佛陀開示之後都激動得毛骨悚然、悲泣哽咽、不能自制，佢哋都一齊發願話：“我哋從今以後一直到未來無窮盡嘅時間都寧願粉身碎骨成爲微塵，經歷千千萬萬嘅年代，亦都誓言永遠唔會違背佛陀您嘅教訓；我哋寧願被鐵鉤拔出舌頭，拖到十六里咁長，被鐵犁耕犁到血流成河，就算經過千千萬萬嘅年代，亦都誓言唔會違背佛陀您嘅教訓；我哋寧願被千刀萬剮穿插刺身，插出插入多少千次，亦都誓願唔會違背佛陀您嘅教訓；我哋寧願被鐵網周圍捆綁全身，經過千千萬萬嘅年代，亦都誓言唔會違背佛陀嘅教訓；我哋寧願被刀斧斬斫碎屍千萬段，皮膚筋骨都零碎了，雖然經歷千千萬萬嘅年代，亦都唔會違背佛陀您嘅教訓。”

“爾時，阿難從於坐中安詳而起，白佛言：‘世尊，此經當何名之？云何奉持？’”

響嗰個時候，阿難就由座位安祥起立，向佛陀請問：“世尊，依部經應該用咩名呢？點樣去奉持佢呢？”

“佛告阿難：‘此經名爲父母恩重難報經，以是名字，汝當奉持！’爾時，大衆、天人、阿修羅等，聞佛所說，皆大歡喜，信受奉行，作禮而退。”

譯做白話文：佛陀就開示阿難話：“呢一部經文呢，就命名做《父母恩重難以報答》嘅經文，你哋應當用呢個經名去奉持。”嗰個時候，大衆弟子、天人、阿修羅等等聽聞佛陀咁樣嘅開示，人人都皆大歡喜，都信奉實行，人人行禮之後，然之後退席。

唸呢本經之後呢，須要加唸一個報父母恩咒四十九遍，嘅唸法就係：

南無密栗哆 哆婆曳 娑訶

南無密栗哆 哆婆曳 娑訶

南無密栗哆 哆婆曳 娑訶

唸呢個咒文就可以用呢個功德去回向俾我哋嘅父母，報答我哋嘅父母恩。（註：接下文）

233.喚醒生命中的至親至愛（五）

（註：接上文）

響上面我哋已經正式研讀完咗《佛說父母恩重難報經》。呢本經嘅文字唔算係好深奧，道理亦都好簡單，可能就係因爲咁，一向未受到學佛人嘅重視，並未予以推廣，以至好多人都唔知道有呢一部經，甚至仲有人誤解咗佛教，以爲佛教主張出家修行係唔要父母嘅，係唔孝順父母嘅。現在我哋研讀過呢本佛說嘅孝經，我哋就知道佛陀當時已經出咗家，成咗佛，仲要特別開示教弟子去孝敬父母呢。讀咗呢部佛經我哋就知道，所謂學佛修行並唔係棄家出走，拋棄父母妻子先可以去修行。佛陀當日拋棄嘅係榮華富貴同未來嘅王位，佢並冇拋棄父母妻子，成道之後嘅佛陀仲迎接佢嘅父母同妻子一同去修行，使到父王同個後母全家都得免於被後來嘅兵變屠殺，父母亦都後來修成佛。佛陀嘅太太、太子妃耶輸陀羅同佢嘅仔羅候羅亦都修成咗菩薩品位，佛陀亦都超度咗佢親生母后成爲佛母。你睇下，佛教邊度係唔要父母妻子嘅呢？佛陀係主張將世俗嘅親情度化爲修行嘅法眷同證菩提吔。

讀咗呢本經，我哋就應該自我檢討下自己係唔係對得住我哋嘅父母親呢？我哋應該點樣去報答父母養育嘅辛勞大恩呢？一個明白佛理做人、一個懂得保健知識嘅人，係唔會用酒肉同各種莫名其妙所謂補品去供養父母嘅，因爲肉食同超補徒然會使到父母親得到高血壓、糖尿病、心臟病、腸胃病、中風、癌症，促使父母親早死而已。真正懂得點樣去孝敬父母嘅人係應該用保健嘅素食方法去供奉父母嘅，素食係可以使到父母免於高血壓、糖尿病等等嘅致命疾病，因而可以健康長壽，活得快樂安逸。真正識得孝敬父母嘅人係會趁住父母仲健在就多多承歡膝下，多多照料父母嘅生活同保健，要等到父母唔在世嘅時候先去後悔悲傷，咁又有咩用呢？真正識得孝敬父母嘅人，要報父母嘅大恩，除咗供奉金紙之外，仲應該盡力去爲父母做一啲善事嘅布施，用呢個功德回向俾佢哋。

如果要報父母嘅大恩，我哋就應該好好保重自己、潔身自愛、努力上進、學業有成、事業有成，以慰父母嘅殷切期望。真正要報父母嘅大恩，我哋就應該爲父母持誦佛經佛號，亦都要接引父母信佛修行，能夠接引到父母修行成道，了生死，唔須要再輪迴，呢個先係真正報恩。父母如果不幸唔喺世上嘞，亦都應該爲佢哋多行善事回向俾佢哋，超度父母往生去淨土。一個人如果係不孝不義，縱然係自己出家苦修，亦都係抵消唔咗不孝嘅罪行。你可以見到，有冇不孝嘅人能夠成佛呢？孝行就係修行嘅一項砥礪品德嘅方法，孝行係修行嘅基本法門之一。如果唔修孝行，咁應該修咩呢？修打坐觀心，咩苦行，咩秘法，我相信呢啲都係水中撈月，一定得唔到正果嘅。

冇錯，呢本經係簡單淺白，但係包含咗人生嘅主張、人生嘅大道理，孝行就係最重要嘅基本修行方式，使到我哋嚟學習同埋正式實行佛陀嘅教悔，亦都讓我哋能夠推廣呢種修行方法。好，但願全世界嘅人都孝敬父母，由孝義開始進入高尚嘅品德，從而一步一步再進入佛法嘅三昧，解脫生死，往生極樂世界。

好，跟住我哋嚟研究馮馮居士嘅學佛心得。繼續同大家講嘅係“韋陀菩薩係邊一個？”

觀世音菩薩尋聲求苦，普渡慈航嘅靈異奇蹟從古至今多得不可勝數，古今都有無數沐恩嘅人呢，記述觀音菩薩嘅靈異感應，無論係咪信佛嘅人，個個都知道觀音菩薩嘅人。佛寺凡係供奉觀音菩薩亦都會供奉韋陀菩薩，至於韋陀菩薩就較少人提及佢嘅威靈降魔同救苦渡厄嘅奇蹟，甚至幾乎於沒有。但係大家又知唔知道韋陀菩薩係邊個呢？經論之中好少提及韋陀菩薩，關於韋陀菩薩嘅傳說亦都極爲罕聞，響近人嘅著作之中，我只係見到虛雲老和尚嘅年譜裏便曾經提及韋陀菩薩嘅請厄奇蹟。響一九四一年，日本軍隊侵佔香港嘅一個夜晚，有一位鄭子嘉居士，全家惶怖無計，唯有討唸觀音菩薩。就喺嗰個夜晚，佢哋夢見一位金光四射嘅金甲神人，莊嚴威儀無比，指示佢哋全家向新界東北角逃走，往北走。佢哋全家醒嚟嘅時候，都講同一個夢。響炮火嘅隆隆聲中，佢哋全家連夜逃向東北角。響嗰個時候，日軍已經由大亞灣登陸，封鎖咗邊境，佢哋全家都以爲能夠脫難脫險，響黑夜之中，有一團光呢，指引佢哋、帶領佢哋全家老少避開咗日軍封鎖嘅守兵落慌而逃，終於到達咗東北角嘅邊境。響嗰個時候佢哋全家已經疲憊不堪，如果遇到日軍呢，就一定唔能夠生還，點知東北角上嘅邊境竟然毫無日兵嘅巡哨喎，佢哋全家老少十餘口竟然得以平安通過，進入咗內地。後來佢哋經過惠州到農村再北上到韶關，途經南華寺。嗰個時候虛雲老和尚就喺嗰度施粥贈衣去救濟難民，佢哋一家得以少安，於是就進入南華寺，但係當佢哋拜佛嘅時候，抬頭一睇，嗰位金甲威武嘅神人塑像正係佢哋全家夢中所見嘅天神，於是佢哋去問一問請教虛雲老和尚，原來先知道呢一位救佢哋全家脫險就係韋陀菩薩。佢哋全家慌忙頂禮叩謝，而且立刻發心捐獻修塔去供養菩薩。

呢一類真實嘅韋陀菩薩威靈事蹟係虛雲老和尚親口講，亦都有嗰位鄭子嘉居士全家嘅作證，由岑學呂居士記錄，收喺《虛雲老和尚年譜》呢一本書裏便。當我寫《空虛的雲》呢一本書嘅時候呢，亦都有提過，亦都採用咗呢一段資料。我自己好幸運認識韋陀菩薩嘅不可思議偉大救苦渡厄同埋降魔嘅大能力，我自己從小就深深得沐觀音菩薩同韋陀菩薩慈悲嘅恩惠，有數不清嘅靈異感應。響我屋企嘅佛堂之中都有供奉觀音菩薩同韋陀菩薩，嚟過我屋企嘅客人都曾經見過呢兩尊菩薩嘅雕像，人人都覺得奇怪，因爲好多人響屋企供奉觀音菩薩，但係好少人響屋企供奉韋陀菩薩，有啲訪客甚至問我：“呢位係咪關聖帝君吖？點解佢唔揸青龍偃月刀嘅？”好多中國人家庭係供奉關聖帝君，難怪有啲人誤認韋陀菩薩就好似關聖帝君！碰到呢啲問題我就必須一一耐心去回答。啲訪客問我：“你點解唔供奉關公而去供奉韋陀呢？”有啲訪客亦都問我：“關公係帝君，韋陀只不過係一位小小嘅護法神啫。”我好諒解人重視關公而輕視韋陀，我知道一般人崇拜關公嘅忠義而絲毫唔懂得韋陀菩薩嘅身份同埋大能，一般寺廟亦都冇重視韋陀菩薩，往往只將韋陀菩薩供奉響偏殿或者一個角落，有一啲廟宇呢，甚至只將佢供奉響大門口或者影壁嘅後面，當佢係守門神，咁樣做法就令我大惑不解了。韋陀菩薩，有一位比丘曾經咁樣答覆我，呢個唔係替佛門看門嘅神咩？韋陀菩薩係十八伽藍之一吖嘛！另外一位出家人就講：“係護法，佢係看守廟門，佢唔係佛。”但係我又話：“你話韋陀菩薩唔係佛，但係我請教你，佛經點樣講？何謂衆生是佛？你知唔知道吖？你講韋陀菩薩只係一個小小嘅護法神，你知道可能你咁樣講係造咗口業，你快啲響韋陀菩薩頂禮懺悔。”或者呢種說法係講得太過火，但係對也好，錯也好，呢個就係我反映佛教真實嘅一面，我從無驕飾，我以真面目對人，響修行嘅戒律之上可能係好差。呢件小故事反應出一般人對於佛寺莊嚴嘅唔注重，同埋佢哋對於佛像嘅唔尊敬，呢一點係會令我會產生瞋恨心。我唔喜歡任何人唔敬佛像，我亦都唔喜歡任何人輕視韋陀菩薩，話佢只係一個小小嘅護法神。

韋陀菩薩係咪只係一個小小嘅護法神呢？我所知道嘅韋陀菩薩不單止係小小嘅護法神，響我以前嘅研究裏便，曾經提過韋陀菩薩嘅三重彩虹周天圓光，佢曾經數次響我屋企佛堂上空，三百六十度三重彩虹廣罩周圍數百尺嘅天空。我喺一啲寫作裏便亦都曾經提出過韋陀菩薩嘅真正身份。我一向知道韋陀菩薩唔係一位普通嘅神，而係一位菩薩，佢唔係“Deva”，佢唔係“天”，而係“菩薩Bodhisattva”，亦都係一位古佛。一般人以爲佛只有一個，只有釋迦牟尼係佛，實際上衆生悟時即佛，衆生修成十地菩薩，亦都修成佛位嘅好多。響多元幅度宇宙嘅無限無邊世界之中，有無數嘅佛，釋迦牟尼佛就係爲咗一大事因緣，就係度世人而出世而嚟，弟子尊之爲“世尊”。但係後世誤認咗以爲只有一位佛，呢一個觀念恐怕或多或少亦都受到咗猶太基督教嘅一神思想影響。最著名嘅古佛之一就係阿彌陀佛，但係好奇怪，好多人唸“阿彌陀佛”，但係唔知道或者唔認識到阿彌陀佛就係古佛，亦都係未來佛，響佛經上講到好明白，文殊師利係過去佛，釋迦牟尼係現在佛，阿彌陀佛就係未來佛，佛經本本都講宇宙有億萬無限嘅佛土同埋佛菩薩。另外一位最著名嘅古佛就係觀世音菩薩，佢以悲願尋聲救苦而自居於菩薩嘅身份，仲有古佛地藏菩薩，立誓度盡地獄衆生，亦都居於菩薩位，另外有普賢菩薩亦都係古佛之一。其他好似虛空藏菩薩、賢首菩薩，呢啲菩薩呢，都係古佛，亦都係爲度衆生而行菩薩行，所以叫做“菩薩”。佛同菩薩其實係冇高下嘅分別，只係佛以覺悟嘅超慧而被稱爲“佛”，菩薩以行悲願慈心濟世救苦而被稱爲“菩薩”。其實佛同菩薩係一體嘅，而且響幅度宇宙嘅內外億萬佛土都有佛。《大方廣佛華嚴經》裏便每一卷都講到好明白，億萬佛係一體，一佛即係億萬佛菩薩，一佛化身做億萬，億萬化合爲一佛。

韋陀菩薩原本係一位古佛嘅化身，以行慈悲而被稱爲“菩薩”，以降魔護法、破邪顯正而現出金甲天神嘅相貌。中國佛教一般人將韋陀菩薩誤認爲守門神，又誤認爲呢位金甲將軍嘅菩薩係唐代南山道宣律師所見嘅韋陀天將軍。道宣律師曾經著有《靈威要略》同埋《感通傳》兩部書，《感通傳》有一段話：有一個天人嚟禮敬，當佢同道宣律師打過招呼之後的呢，就道出佢嘅姓名叫做王蟠。王蟠係南天韋將軍之下嘅侍者。跟住冇幾耐，響道宣律師面前又出現一個天人對道宣律師話佢姓費，亦都向道宣律師問禮。呢個費天人就講，佢話弟子響迦葉佛嘅時候就已經往生去四天王天，隸屬於韋將軍之下，而韋將軍呢，佢做童真嘅時候已經遠離淫慾，修梵行，已經唔受天界嘅慾望。響四天王一個天王之下呢，一共有八將軍，四大天王合埋一共有三十二位將軍，往還天下去輔助保護出家人。響《法苑珠林》第十六卷亦都講過有天人姓韋名琨，亦都係南天王八大將軍嘅其中一個將神。四天王一共有三十二位將軍，以韋琨將軍爲首。韋琨將軍出生聰明智慧、早離欲塵、清淨梵行、修童真業，佢曾經親自面受佛足要護持出家人、護持三洲。後嚟呢，有啲人根據道宣法師嘅記載，認爲呢位韋琨將軍就係韋陀菩薩，咁樣講，韋陀菩薩就被誤認爲四大天王嘅手下部將嘅領班，但係恰恰將四天王同韋陀菩薩嘅真正身份，佢哋嘅關係本末倒置咗。

我所向來知道嘅韋陀菩薩，其實佢真正身份就係帝釋。冇錯，韋陀菩薩就係仞利天嘅天主同三千大千世界之主。四大天王係帝釋嘅愛將，居於須彌山嘅半腹，峰有犍陀羅山，呢個山有四座峰頭，四天王呢，分別居住響呢度，各自保護一個天下，所以叫做護世四天王，佢哋所居住嘅天界呢，就稱爲四天王天，係屬於六欲天嘅第一度地方。四大天王分別係東方持國天王、南方增長天王、西方廣目天王、北方多聞天王。關於四天王嘅記載，響《長阿含經》裏便已經講過嘞。東方嘅天王叫做多羅吒，佢統領乾闥婆同埋毗舍遮神像，保護弗婆提嘅人；南方天王叫做毗琉璃，佢統領鳩槃茶同埋薜荔神，保護南贍部洲；西方天王叫做毗留博叉，統領一切龍同埋富禪那，護渠耶離人；北方多聞天王毗沙門，佢統領夜叉同埋羅剎，保護鬱單越人。響《止持會集音義》嘅記載亦都講過，東方持國天王能夠護持國土，所以居住響須彌山蓋嘅金捶；南方增長天王呢，因爲佢能夠令到衆生善根增長，所以呢，佢追，居住呢，須彌山嘅琉璃埵；西方廣目天王能夠以淨天眼觀察護持閻浮提，所以佢居住響須彌山嘅白銀埵；北方多聞大王，因爲佢福德名聞四方，所以居住響須彌山嘅水晶埵。響宋代智嚴法師所譯嘅《四天王經》亦都有記載，每月六齋日四天王呢，由七耀二十八星宿嚟降下四洲，視察衆生嘅善惡而報告俾帝釋。

由佛經嘅記載已經可以證明四大天王係帝釋嘅部屬，而唔係帝釋嘅上司，呢個係符合我以神識以前所見到嘅情形，我係首先用呢個神識去接觸帝釋同四大天王，然後先去搵佛經做證明。響四大天王之下有四方嘅大將，即係北方散支大將、東方樂欲大將、南方檀帝大將、西方善現大將，四個將軍有五百部屬率領二十八部天神去守護佛法嘅。現在，各處寺廟呢，所供奉嘅四大天王造像，可能係根據四方大將嘅各別特性而想象造型，所以呢，有彈琵琶嘅天王啦，弄蛇嘅天王啦，托塔嘅天王啦，同打傘嘅天王等等嘅造型，其實呢啲造型呢，實際並非四大天王真實化現嘅色相。佛經上講嘅須彌山，一般人誤以爲係喜馬拉雅山嘅最高峰，甚至有啲佛學學者亦都響佢著作之中講須彌山呢，其實就係喜瑪拉亞山嘅額非爾士峰啫，有啲學者話須彌山其實係唔存在嘅，係佛教採用上古印度人嘅地理貧乏知識所幻想出嚟嘅一個世界中心，因爲佛經所講嘅四大洲呢，除咗南贍部洲勉強可以講話係印度大陸之外，其他佢講嘅東勝神洲吖、西牛賀洲吖、北俱蘆洲吖等等嘅三洲都唔能夠附會考證係現代嘅任何邊一笪地方，所以，所謂世界中心嘅須彌山，實際上係並無其事嘅，只係一個譬如啫，呢啲論調其實似是而非。佛講嘅須彌山其實唔止一座，而係有無數座嘅須彌山，意思即係有無數嘅世界中心。希望大家多多研究佛經，尤其係《阿含經》同埋《華嚴經》，呢啲佛經呢，幾乎每一品都提及佛講過有無數嘅須彌山，有啲係大須彌，有啲係小須彌，各自成爲世界嘅中心。世界中心即係宇宙嘅中心，“宇”就係各種空間，“宙”就係各種時間，即係話各種幅度時間、空間嘅世界，包括上下四方多度空間同過去現在未來，咁樣講已經係好明白咁指出每一座須彌山就係一種宇宙嘅中心。須彌山又叫做光明山，光明無比，光華億萬丈。分明佛經講有啲須彌山就係現代太空科學所發現各座星雲船系嘅中心，例如銀河系中心就係一座中千世界嘅須彌山嘞。

我哋嘅物質宇宙色界係無數大大小小多元嘅小宇宙、無數空間嘅“界”交織物。小千世界太陽系無數座組成一座中千世界，佢嘅中心係無比高能高熱嘅光芒億兆里嘅一團物質，由上下正面同埋反面嚟睇呢，佢嘅形狀就好似一團蛋黃，由旁邊側面嚟睇呢，就好似一座圓頂嘅光華大山，呢一個就係佛教所講嘅光明山，呢一個就係佛經所講嘅須彌山。星雲船系中心嘅四個方向外面有黑暗嘅太空，佛經稱爲“海”。將太空稱爲“海”呢，係古代印度同埃及同希臘相同嘅。呢個無限嘅太空海之中有好多嘅小千世界，即係太陽系。咁樣一分析，我哋就好容易明白佛經所講嘅須彌山係咩嘢，佛講嘅須彌係喺太空嘅深處，而唔係響印度同中國接壤嘅喜馬拉雅山。世人唔向太空深處去搵，而去喜馬拉雅山去做刻舟求劍嘅功夫，無怪乎點樣亦都搞唔清真相，咁樣去考據當然考據到頭暈眼花亦都搵唔到事實。好多佛學學者就係固執只係講哲學，唔肯由太空科學同宇宙學去入手研究佛所講嘅嘢，佢哋死都唔肯接受佛講，喺經文裏便佛所教嘅係講幅度宇宙，佢同其他衆生說法，係同宇宙嘅衆生說法，係講俾宇宙嘅衆生聽。但係科學家固步自封話佛只係人間嘅，更冥頑不靈鑽牛角尖，就算悟得咗佛學之中嘅哲理，亦都只係得到人生哲學嘅一面，而唔能夠真正獲得佛學嘅更深遠超宇宙真理。科學家唔了解佛講嘅宇宙跨越性，就妄自去批評佛經之內嘅超自然係神話、係迷信，真係愚不可及，不能救。響色界物……（註：接下文）

234.喚醒生命中的至親至愛（六）

（註：接上文）

響色界物質宇宙之中有無數嘅星雲船系中心，即係須彌山，佢哋帶住無數嘅小千世界，即係太陽系，同埋無數嘅星體不停咁旋轉，佢嘅中心響度自轉，亦都響度公轉。佢帶住好多條船臂繞住一個更大嘅中心而進行，呢個更大嘅超級宇宙中心就係更大更高密度光度同埋熱度嘅一團光熱高能中心，佢嘅形狀亦都係由於旋轉而形成咗圓錐形嘅堆，所以稱爲“山”，呢個就係更大嘅須彌山，就係帝釋所居住嘅地方。佢嘅四個象限，每一個象限都係帝釋嘅一位部屬所居住。呢啲地方就係所謂山腰嘅四峯——四大天王天嘞。

帝釋同四大天王同埋佢嘅部屬都唔係色身，佢哋都係超越色界嘅無色界具大高能力，呢種無色界嘅高能力係非物質高能，所以可以居住響色界，即係物質宇宙嘅中心——須彌山。雖然係溫度高達攝氏數十萬度，對於佢哋呢，其實係一啲都冇傷害，佢哋可以出入無色界同色界，來去自如。其實帝釋係萬佛億佛之一，同萬佛同體。《阿彌陀經》唔係講過咩？“其土衆生，常以清旦，各以衣裓，盛衆妙華，供養他方十萬億佛，即以食時，還到本國。”呢一段經文就係講宇宙之中有無數嘅佛，佢哋都可以隨時來去，出入各時空。呢個亦都係我以慧眼、法眼、天眼綜合觀察所見到嘅實情。佛講嘅須彌山，《阿彌陀經》裏便所講完全係實際嘅情形，並不是虛言。

帝釋佛以佢無限嘅大能力，爲咗護法度濟衆生就隨類化現接引衆生，佢對天人就化現天人嘅形相，對於我哋呢個小千世界太陽系裏便嘅地球人類呢，就化現人類嘅形像。因爲降魔同埋護法救危請難而現出威武金甲嘅巨神天像嘅幻相，其實呢個唔係佢真正嘅法身，呢種情況同觀音菩薩係古佛，因爲尋聲救苦、出苦渡厄而隨類化現，情形係相似嘅，觀音菩薩特別以大慈大悲而現慈母相同埋慈母抱住嬰兒之相，有時佢亦都會化現威武嘅大將軍相。我哋要知道詳細嘅情形呢，你讀一讀《妙法蓮華經》裏便觀世音菩薩普門品就知道。

諸佛菩薩都唔係世人以相去求見嘅色身肉體，世人每每以相去相求，往往自墮魔障。心雖然係虔誠，但係以相去求見如來，就會由心中生出魔相，著咗相、著咗魔。所以《金剛經》講到破執去相講到好明白，世俗相傳《金剛經》可以驅邪治鬼降魔，其實就係因爲《金剛經》破執去相。若有所見邪魔，誦唸《金剛經》之外，仲必須響你心中能夠真正破執離相先能夠得嘅。

佛陀原本係唔准去造像崇拜，但係後世唔見像就唔會生出恭敬。自從犍陀羅佛像藝術開始相沿成風，到現在寺廟呢，各個寺廟都開始塑像，造像呢，嘅人隨住佢哋靈感同埋推想而塑造出每一尊佛菩薩同天神嘅形象，其中亦都可能係有真正根據目擊佛菩薩化現而塑造嘅，但係當然大部分都係諗出嚟嘅居多。我哋如果若依廟宇嘅佛像去以相求見佛菩薩係唔一定正確，不過有時候佛菩薩爲咗憐憫衆生嘅戀慕之情，亦都會隨俗化現爲各人所見嘅廟宇呢個供奉嘅形相。

帝釋同億萬佛亦都有呢個心願，係仰賴衆生嘅祈求而對衆生現出唔同嘅情況以慰信衆、以安衆生嘅心。舉例嚟講，上面所講到鄭居士全家所見到韋陀菩薩化現金甲天神嘅形相呢，就係最佳嘅實例。鄭居士一家如果唔見金甲天神嘅形相點能夠安心呢？邊有勇氣去偷渡日軍嘅封鎖線呢？世人著相，帝釋如果唔化現好似中國南華寺所供奉嘅韋陀菩薩嘅塑像，鄭居士又點能夠認識佢而爲之見證呢？所以“有相俱妄”呢一句說話唔係錯，但係佛菩薩有時亦都以幻相去達到請救渡厄嘅目的，安定衆生嘅心，我哋唔能夠執著“有相俱妄”呢一句說話，否定咗一切嘅現象都係非善類嘅幻相。相係幻，冇錯，但係救渡衆生而現幻相，雖幻亦真，若乎爲咗求自己嘅私利血食或者利益而現相，雖然真亦都係妄。現相者係佛係魔，要睇呢個動機來意，我哋就可以分辨嘞。

帝釋響娑婆世界被塑造爲金甲天神嘅形象，除咗上述嘅種種緣故之外，其實仲有歷史上嘅因素。我哋不防簡單講一講由人民角度去睇帝釋點樣被稱爲韋陀菩薩，當然呢啲人民觀點唔能夠推翻帝釋響無色界呢個世界裏便幅度時空嘅存在。

雅利安民族響印度北部嘅西部，由遊牧民族嘅生活逐漸安居而成爲半牧半農嘅社會，呢度要講到雅利安人嘅宗教信仰同埋佢哋所信奉嘅神靈。雅利安人係冇乜資料留低記載，但係取代雅利安人統治繼任民族呢個韋陀民族呢，古時候譯做“吠陀”，係較爲安定嘅農業社會，文化發展亦都較高。韋陀民族亦都繼承咗雅利安民族嘅宗教，佢哋將歷代流傳嘅宗教信仰同神靈嘅故事記錄低，寫成咗著名嘅“韋陀四經”，舊時嘅譯法就叫做“四吠陀典”。呢四部經典將近千萬年嘅讚頌，係婆羅門教嘅根本聖典，亦都成爲後世佛教歌頌體裁嘅模範。

韋陀四經分別係：第一本《梨俱韋陀經》，《梨俱韋陀經》係講述太古以來讚頌歌詩，共有十卷一千七百餘品，一萬五百八十頌；第二本係《娑摩韋陀》，《娑摩韋陀》係讚美嘅詩句而有音樂嘅樂譜，配合《梨俱韋陀經》呢，就作爲供奉響宗教裏便嘅儀式使用；第三本係《夜柔吠陀》，《雅喻吠陀》揆集咗太古以來嘅咒文同埋真言，分爲白部同黑部兩大部分，白部同黑部嘅咒文呢，同埋解說，分別都列出，黑部嘅咒語同埋解說就唔會列出（註：《雅喻吠陀》即《夜柔吠陀》，《佛光大辭典》解釋《夜柔吠陀》嘅梵名係“Yaiurveda”，巴利文名同。印度古代經典“四吠陀”之一。又作耶柔吠陀、冶受吠陀、耶樹薜陀、耶受毘陀、夜殊鞞陀。意譯祠、祭祠、作明供施、祭祀智論。即有關祭祠、祭司所唱之咒文及其註解等之集成。《夜柔吠陀》分黑夜柔、白夜柔兩種，前者咒文同解說不分，即合糅本文同梵書而成；後者咒文同解說分開，文句較短，雖乏文學價值，然卻爲了解印度社會狀態之重要資料）；第四就係《阿達婆韋陀經》，《阿達婆韋陀經》呢，揆集咗攘災消難嘅各種古咒，一共有二十卷，七百六十篇，六千頌。

響佛教嘅經論裏便，有關韋陀嘅四經記載唔係好多，但係雖然唔係好多，講明佛教其實冇排斥韋陀四經，仍然將佢列爲參考書，知道而唔用啫。由佛經可以見到各種唔同嘅音譯：“吠陀”“韋陀”“皮陀”“圍陀”，其實都係由呢個“veda”，V-E-D-A，呢個字譯嚟嘅，佢嘅原意呢，就係“明智”咁解。有一個十九世紀嘅西方學者曾經講過，繼雅利安人而興起自北印度嘅混血民族，因爲信奉韋陀四經而被命名爲“韋陀民族”，“vedava”或者“vedi”。呢個說法冇人肯定，一般學者都安於現狀予以默認，我冇足夠嘅資料可以鑒定，亦都只好跟隨呢個說法。由佛經嘅記載嚟睇可以知道韋陀四經從古就有，歷代祭師、婆羅門不斷予以補充先成爲四經嘅千萬字數嘅百萬頌。韋陀四經之外，仲有史詩《埃瑪瓦那》，或者譯做《羅摩衍那》，敘述宇宙之中太空嘅戰爭等等嘅故事。西方學者呢，公認呢個係印度比《但丁神曲》更偉大嘅文學史詩作品。響韋陀四經之中，同《羅摩衍那》呢個史詩之內呢，時時崇拜嘅宇宙大神就係大梵天帝同帝釋天帝。韋陀四經原文呢，大部分已經散失，資料不足，只可以由佛經嘅經論之中轉錄得到若干嘅概念。

龍樹菩薩響佢著作《大智度論》之中嘅第二卷講過：“韋紐天，秦言‘遍悶’，四臂，捉見持輪，騎金翅鳥。”（註：喺CBETA中，“捉見”一爲“捉貝”，一爲“捉具”）菩薩所指嘅呢，就係雅利安人自古以嚟崇拜嘅毗瑟奴，呢個係宇宙大神，佛經講佢係大自在天之主，生於劫初大水之中，一共有一千個頭、兩千隻手，由臍中生出大蓮花，蓮花之上化生大梵天王。又話佢係三十三天之主仞利天主，佢響色界世界嘅頂，係三千大千世界之主。響《大智度論》第八卷亦都講過：“劫盡熾時，一切皆空，衆生福德因緣力故，十方風來，相對觸能持大水，水上有一千頭人，二千手足，名爲韋紐，是韋紐天臍中出千葉金色妙寶蓮花，其光大明，如萬日俱照，華中有人結加趺坐，此人復有無量光明，名曰梵天王，此梵天王心生八子，八子生天地人民。”由《大智度論》可以見到中國人早已知道有大宇宙，有大神毗瑟奴。雅利安民族所崇拜嘅宇宙大神，上便講嘅毗瑟奴其實就係帝釋天。響韋陀四經之一嘅《梨俱韋陀經》嘅一千零二十八篇詩頌之中呢，讚頌帝釋天因陀羅嘅就佔咗四分之一咁多，顯示住歷代已經崇拜住呢位宇宙大神，可能響雅利安人民就已經供奉咗佢。佢一向嘅造型係一位威武高大、身披金甲、頭戴金盔嘅英俊魁偉中年男子，雅利安人尊稱佢爲百威之神——因陀羅，Indra。佢手持金剛杵發出雷電，亦都有威猛兇惡嘅造型。雅利安民族有數支由高加索西遷進入中東同歐洲，包括北歐同西歐、南歐，成爲現代歐洲白種人嘅祖先，佢哋將信仰亦都傳揚過去，佢哋所崇拜嘅宇宙大神因陀羅帝釋天，後來演變爲古代希臘宗教神話之中嘅宙斯天帝，再傳到古代羅馬帝國演化爲“朱庇特天帝Jupiter”，然之後北傳到北歐，成爲斯干得納維那民族嘅天帝雷神兼勝利之神托爾，佢嘅造型亦都係手持雷矢嘅。

雅利安民族移居去中東地帶同土著結合，漸漸形成咗閃族，即係以色列民族嘅祖先。雅利安人嘅皮膚白色漸漸失色，而貌呢，輪廓依然存在，高鼻藍眼或者啡色嘅眼，多毛髮同埋鬍鬚。另一支雅利安民族進入埃及建立帝國成爲後來著名嘅埃及皇朝多代，直到啡色皮膚嘅阿利伯人興起取代佢哋爲止。呢兩支雅利安人，根據一啲西方學者著作考據講，亦都將宗教信仰帶到咗中東同埃及。傳入埃及嘅係多神，所謂泛神派，帝釋天因陀羅被埃及改爲天帝兼封雷之神阿蒙，由金字塔同埋古墓嘅壁畫同埋象形文字可以知道，阿蒙嘅造型亦都係手持金剛杵放射雷電嘅金盔天帝，不過係冇身穿金甲。傳入伽藍（啫係以色列地區）嘅雅利安人支派呢，就係死硬派，只係信仰大梵天王，尊之爲萬能嘅上帝。天，“八子生天地人民”呢一節傳說呢，演變爲上帝創造天地世界萬物，成爲猶太以色列民族先祖所崇拜嘅上帝，舊約嘅《創世記》就係由此而產生。由佛經嚟講，大梵天王係帝釋所化身嘅仔，如果咁講，猶太教亦都係起源於雅利安人嘅婆羅門教，佛教亦都係同婆羅門教有好深嘅淵源。前者受一神思想支配，只認爲有一個主，後者受泛神觀念影響，認爲宇宙內外嘅無量超自然智慧神力繫與億兆佛菩薩。

咁樣由人民發展嘅歷史角度嚟睇呢，雅利安人因陀羅（即係毗瑟奴）就係猶太民族尊奉嘅上帝之父。基督教提倡平等博愛，反而對猶太教嘅編合民族排外思想，但係仍然繼承咗猶太教嘅《創世記》同埋上帝。咁樣推論，帝釋亦都係基督教嘅太上帝。佛教響呢一方面同猶太、基督教就係一家人，只係各執真理嘅一端，彼此都係一家，何必分彼此？何必互相攻艱呢？響小乘派嘅《涅槃論》裏便講過：“何等外道說梵天是涅槃因？答曰：第四外道圍陀論所說，從那羅延天臍中生大蓮華，從蓮華生梵天祖公。彼梵天作一切命、無命物。”（註：根據CBETA，“第四外道圍陀論所說”疑爲“第四外道圍陀論師說”）呢一段同《大智度論》呢，記載係相似，幾乎完全一樣，只係天嘅名稱唔同，名字可能有變，神仲係一位，“那羅延”呢，就係“因陀羅”。《法華經·聚品》亦都講過“娑婆世界主梵天王尸棄”，《法華文句》第二卷亦都講過：“‘尸棄者此翻爲頂髻，由外國呼爲火，呼火爲樹提尸棄，此王本修火光定破欲界惑，從德立名。’彼深信正法，每佛出世，必先來請轉法輪，又常在佛之右邊，手持白拂，以對於帝釋。”由龍樹菩薩嘅《大智度論》第八卷嚟睇，佢講大梵天王係三千世界嘅，之主，又講過帝釋係三千大千世界之主，顯然帝釋天同大梵天係父子。根據韋陀四經嘅說法，亦都係帝釋毗瑟奴係生大梵天，咁樣帝釋天同大梵天就係父子關係或者分身關係，或者係化身。

帝釋同佛陀嘅關係，響記載佛陀入滅嘅故事之中，出《後分涅槃經》之中，有下便嘅一段話：

爾時，帝釋持七寶瓶至荼毗所，其火一時自然滅盡，帝釋即開如來寶棺，欲請佛牙……樓逗言：“莫輒自取，可待大衆共分。”釋言：“佛先與我一牙舍利，是以我來火滅。”……於佛口中右畔上頷取牙舍利，即還天上起塔供養。爾時，有捷疾羅剎隱身隨帝釋後，衆皆不見，盜取一雙佛牙舍利。

呢一段經文講明帝釋天嘅身份與衆不同，嚟到佛陀嘅荼毗場所，唔理會徒衆阻擋，就先行取去佛陀嘅佛牙舍利一顆帶返天上建塔供養。帝釋講佛陀首先許諾俾佢一顆佛牙舍利，由此可以見到佛陀對帝釋嘅另眼看待，否則唔會預先應承佢贈送佛牙舍利。帝釋如果唔係三千大千世界之主咁樣嘅大身份，徒衆亦都唔會容許佢優先去取舍利。呢段經文嘅下文係講有兩隻羅剎鬼趁機會去盜取佛牙兩顆，後嚟被帝釋（亦都係韋陀）急追取還。

帝釋嘅另外一個名就係大自在天。響《大日經疏》卷五講過：“微瑟紐，舊譯謂之毘紐。”即係那羅延天。玄奘三藏法師嘅名著《大唐西域記》卷九，記載帝釋問法於佛陀嘅事：“因陀羅勢羅窶訶山(唐言帝釋窟)。其山巖谷杳冥，花林蓊欝，嶺有兩峯，岌然特起。西峯南巖有大石室，廣而不高，昔如來嘗於中止。時天帝釋以四十二疑事畫石請問，佛爲演釋，其迹猶在……其中僧衆，或於夜分，望見西峯石室佛像前每有燈炬，常爲照燭。”又有一卷《帝釋所問經》裏便記載：“爾時，帝釋天王聞佛在摩伽陀國毘提呬山帝釋巖中。”響《帝釋巖秘密成就儀軌》一本經裏便講：“摩伽陀國菴沒羅聚落北韋提希山有帝釋巖，而彼巖中有九十九宮……慈氏菩薩今現在彼入三摩地，名最上莊嚴。”

以上所講嘅幾段經文係說明咗帝釋巖自古已經存在，顯然係帝釋時常降臨嘅山巖。釋迦牟尼佛到呢度地方入定，玄奘法師呢，曾經參拜過呢個山洞。根據學者康寧哈武士考證，呢個帝釋巖就喺王舍城嘅東六英里嘅吉里也克山。帝釋嘅梵文，英譯音係叫做“釋迦提桓因陀羅Sakra Devam indra”，簡稱“因陀羅”，《法華二疏》卷二亦都解釋爲“釋迦”就係“能”嘅意思，提桓係“天”，因陀羅係“主”，以其在善法堂治化稱會天心，故爲“能天主”。《法華玄讚》卷二亦都講過：“梵云釋迦提婆因陀羅，釋迦姓也，此翻爲能；提婆天也；因達羅帝也。正云能天帝……此在妙高山頂而住，三十三天之帝主也。”

《阿含經》裏便有一本《帝釋般若般羅密多心經》，有趙宋施護法師嘅譯本，係佛陀響靈鷲峯爲帝釋所講嘅般若經，兼夾講咒。佛陀爲帝釋天說法，可以見到佛陀重視呢位三十三天嘅帝主，亦都證明佛陀承認佢存在，並未因爲佢係婆羅門教崇拜嘅神而加以排斥。

後世嘅佛教徒，尤其係今日有一啲學者每每斥責佛教徒唔應該供奉婆羅門教嘅神靈，我認爲咁樣係太過執著“我”同“法”。帝釋同埋其他佛菩薩係宇宙內外早已經存在嘅超自然大智慧存在體，唔係由婆羅門教創造而存在，亦都唔係婆羅門教或者現在嘅印度教所專有。佛陀嘅應身釋迦牟尼亦都爲帝釋說法，帝釋其實早已經響億萬劫前歸依佛法，每有佛出世，佢一定能夠嚟護持弘教，可以話係佛教同佢嘅因緣遠早於婆羅門教供奉佢。准提佛母亦都係一樣嘅情形。學者如果能夠認識佛教嘅超越時空性，就唔會執著響人民主義嘅人間短短歷史而嚟反對佛教徒供奉韋陀菩薩同准提菩薩等等嘅先天佛衆嘞。

韋陀民族響釋迦牟尼佛出世之前大約一百年左右就已經末落失勢，婆羅門教仍然存在，亦都仍然崇拜帝釋同埋准提菩薩等等嘅佛，佛教徒亦同時供奉帝釋同准提菩薩。佛教東傳至西域各國亦都介紹咗帝釋輾轉傳入中國，但係古代嘅中國僧人除咗玄奘極少數嘅人之外，對於印度都唔係咁了解，可能有啲僧人認爲帝釋唔係佛教嘅神，唔適宜供奉於大殿之內。佛經裏便本身故事既有帝釋護法同埋護送佛陀出世一段，又有佛陀爲帝釋說法嘅故事，因此亦都不妨響前殿或者偏殿供奉呢位護法天神。不過一般人並唔知道帝釋嘅來歷，就只知佢係韋陀民族嘅大神，曾經記載於《韋陀經》之內，所以就稱呼佢做韋陀菩薩。年代悠久到咗今日已經冇幾多人知道韋陀菩薩就係宇宙大神三千大千世界之主，人亦都唔知道佢係一位神威無比、法力無邊嘅護法佛菩薩，只當佢係守門嘅小小神將，恐怕係有一點貶義，貶低佢嘅意思。

上面講咗依啲人民嘅因緣，現在我可以講番到超自然嘅方向。我個人從小就知道韋陀菩薩係帝釋天，可以話同佢有宿世嘅因緣。好記得呢位三千大千世界之主，響我細個嘅時候第一次入佛寺禮佛，就見到前殿供奉嘅韋陀塑像，我就會向佢叩拜，無師自通咁樣呼喊：“因陀羅，因陀羅，Indra，Indra……”周圍嘅人都好愕然，唔知我係度叫咩，但係我心中知道呢個係天帝，係宇宙大神，係最大嘅佛教護法、大神古佛。從來冇人話俾我聽有關韋陀菩薩嘅故事，我屋企根本就冇人明白佛經，父親係唔拜佛，母親亦都或者會信觀音，但係對於佛經故事一無所知，亦都冇睇過佛經，亦都未認識任何佛教人士，亦都從未帶我去廟宇，但係我自己去廟宇就會自動拜。五六歲嘅細蚊仔會識得啲咩吔？但係我知道會叫“因陀羅，因陀羅……”呢個現象係唔可以解釋嘅。

我再講一次，喺加拿大嘅溫歌華有過三次，響夏天嘅正午，碧空如洗，冇雲霧嘅天空之上，就喺我屋企嘅頂上嘅高空出現三重彩虹光環，三百六十度圓周，響藍天嘅高空籠罩住好廣闊嘅地區，而以我屋企做圓心，呢三重彩虹嘅奇觀俾我見到嘞，響嗰個時候係冇半點雲霧同埋水氣，三重彩虹，每一層相隔係好寬闊，響天空成爲三重大圓圈。“因陀羅，因陀羅……”我好高興咁呼喊，我認得呢個就係帝釋嘅虹光，我一向從小就知道呢個係天帝嘅虹光，響我細個嘅時候見過。我即刻返入屋企，想攞相機再走番出外便想將佢拍攝落嚟，但係三重虹光已經淡化咗，咁我一個人只有駐足仰望稱奇。邊個見過三重嘅彩虹呢？可惜出現只有幾秒鐘就消失，我每一次就嚟唔低將佢攝影。我一直以爲我係唯一得見帝釋三重彩虹嘅幸運兒，因爲我同其他人講呢，都冇人見過。響一九八四年，一位佛教嘅友人同埋幾位法師嚟我屋企舍下，適逢我喺度唸緊韋陀菩薩嘅真言，我放下持咒，接見貴賓。呢啲友人未問我就用影相機同我影相，呢個情形係我一向唔係咁願意，我唔喜歡以色相示人，但係兩張照片已經影咗，後來沖咗出嚟，照片中裏便嘅我竟然有一圈彩虹籠罩住全身，七重彩虹嘅光圈層次分明。另外一張同法師同坐嘅照片，我嘅身體發出虹光，背後係金光，都射向法師。對於兩張照片嘅奇象，我只有一個解釋，就係持念韋陀菩薩嘅神咒所產生，並非我個人有咩修爲。我相信任何人只要誠心、淨心、淨意、淨口去持念菩薩嘅真言都可能產生呢一種彩虹同金剛護罩全身嘅奇觀。不過我持念嘅時候心中並無所求，或者呢個就係無求而自得啦。

其實我一向就以與生俱來嘅天眼、慧眼、法眼去認識帝釋同其他佛菩薩嘅法身，縱然我呢三種眼都好幼稚，但都足以去認識佛菩薩嘅法相同佛法。但係對於唔懂佛法嘅人嚟講，無論點樣講其實都係同佢哋講唔通，響佛教上總有啲超自然嘅智慧係……（註：此處錄音中斷）

235.如何解脫人生病苦（一）

（註：此處部分錄音缺失）……講就係，佛陀嘅身邊呢，有好多弟子，但係佛陀身邊最出色嘅呢，一共有十個大弟子，每個弟子呢都各有專長，猶如耶穌十二個門徒一樣，耶穌亦都有好多門徒，但係耶穌近身嘅一共有十二個門徒。咁釋迦牟尼佛近身嘅大弟子一共有十個，係弟子之中嘅弟子，即是話好出色嘅弟子，而目犍連呢係其中之一個。而目犍連嘅專長呢，每個弟子十大弟子都各有專長，目犍連呢，就係神通最第一。點解嗰日要講呢個題目，因爲盂蘭節嘅來源呢，都係出自於目犍連報答父母恩惠吔，講個孝道吖，都係出自佢身上，所以呢，我會講下目犍連嘅少少嘢，同埋佢報答父母嘅恩惠，同埋會講下啲盂蘭節嘅意義，順便涉及會講下一啲神通嘅問題，關於五眼六通嘅問題。跟住到八月十九號呢，二十四呢，舊曆啦，《生命中有緣嘅佛菩薩》，呢個題目所講嘅呢就係話，大家而家響末世裏便呢，修行嚟講呢，你所選擇嘅法門，啱唔啱呢？點樣謂之係啱你嘅呢？點樣係唔啱你，而響你生命之中，同你最有緣嘅佛菩薩係邊一個呢？我會教你鑒別，用一個方法，會話俾你聽究竟邊個同你係最有緣嘅佛菩薩。如果你知道呢個問題呢，你今生修行就事半功倍，你會揀啱一個合適你嘅佛菩薩去修行，去修法，咁成就就會快，猶如你有病食啱藥一樣，一食個病，一食個藥，個病呢，就會好。咁點樣找尋你生命之中有緣嘅佛菩薩呢？而呢啲佛菩薩同你前生有咩關係呢？其實係前生我哋有個遠因，可能同呢啲佛菩薩結咗緣，同埋你今生選擇咗一個適當嘅佛菩薩去修行，你應該點樣同呢個佛菩薩去相應呢？呢個就係《生命中有緣佛菩薩》所要講解嘅大概嘅內容。跟住到三十呢，月尾嗰度呢，七月三十，新歷八月二十五號，《地藏菩薩木輪相法》，嗰日就係地藏菩薩誕。《地藏菩薩木輪相法》主要所講嘅呢，就係地藏菩薩響《占察善惡業報經》裏便呢，教授我哋一個占卜嘅法門，呢個法門呢，係俾我哋末世嘅修行人呢，一個依歸，一個依附。因爲我哋響日常生活裏便呢，好多問題大大小小，自己有時揸唔定主意，有時我哋就算揸定咗個主意之後呢，我哋往往呢，個心都十五十六，唔知究竟我哋所做嘅嘢啱唔啱。咁地藏菩薩曾經開示有一個法門呢，係一個類似世間占卜嘅法門，但係其實同占卜呢，完全係唔相同，如果你聽過嗰日講解呢，你就會好清楚。咁呢個木輪相法呢，你利用咗呢套木輪相法可以占測你前生嘅三世因果，包括你過去生，你由邊，六道裏便邊一個道路裏便轉生響我哋人嘅世界上？同埋你前生所做嘅業障：殺、盜、淫、妄、酒，所犯嘅五戒孰輕孰重，你嘅身所造嘅業多吖，意念所造嘅業多吖，語言所造嘅業多吖？呢個木輪呢有一部分可以替你去占測。你知道自己究竟做過幾多業，你就開始好好咁依住呢個木輪相法去懺悔，以後再占嘅時候呢，可能會顯示出一個清淨嘅輪相，如果能夠顯示出一個清淨嘅輪相，代表你業障已經消除。同埋亦都可以替你解決世間嘅種種事，譬如你想搬一間新屋嘅，我話：吖，好唔好呢？我又問下菩薩，地藏木輪相法就能夠同你取決呢啲問題，話俾你聽呢間屋好唔好、你應唔應該搬入去。我睇啲醫生好唔好呢？呢醫生啱唔啱我呢？地藏菩薩亦都又會俾你一個答覆。我嘅病會唔會好呢？地藏菩薩亦都會俾你一個答覆。咁響呢個《占察善惡業報經》嘅木輪相法呢，就有教授呢啲種種種種嘅法門，咁響地藏菩薩誕嗰日呢，我就會講呢個法門出嚟，就係地藏菩薩木輪相法。跟住到九月呢，就講六祖惠能，禪宗六祖惠能大師嘅事蹟、簡介同埋關於六祖大師所講嘅《六祖壇經》裏便嘅精華部分抽出嚟講解一下，咁呢，對於我哋修行佛法、了解空性嘅道理吖，係非常之重要。咁響九月呢，我分開兩個星期兩個部分就會講六祖惠能第一部分同第二部分。咁如果大家有興趣嘅呢，聽完呢個簡介你就，到時你會收到一份簡介㗎喇，咳，咁你可以依住呢個簡介呢你選擇你喜歡嘅題目上嚟聽。

好嘞，今晚呢，我要講呢，《如何解脫人生病苦》，有乜方法能夠，佛陀吖，教我哋大家呢，將你身上嘅病吖，除去，將你身上嘅病症除去。

我哋知道呢，我哋生活響呢個世界之上呢，尤其是今日二十世紀九十年代呢個社會呢，我哋每個人生存響呢個現代嘅世界裏便呢，會遇到好多社會嘅問題、人生嘅問題，種種種種嘅煩惱令到我哋自己呢，不能夠自拔，解脫唔到。咁我哋社會嘅問題唔講住，有時間呢，再同大家分析，咁我哋講下人生嘅部分。人生，對於我哋自己嚟講，每個人呢，係一個單位啦，無數嘅人就組成無數嘅團體，無數嘅團體呢，又會變成無數嘅社會，咁其實都由一個人爲單位嘅。但呢個人呢，講開呢，以人爲本就非常之複雜，如果佛教嚟講響六道裏便係佔六分之一個機會，天、人、阿修羅、畜牲、餓鬼、地獄，輪迴響呢個六種宇宙嘅時空裏便呢，我哋有六分之一機會，但今生我哋做到人其實係非常之有福報，前生呢，係修行咗呢，五戒十善，一定係修行咗五戒十善。我哋奉持過不殺生、不偷盜、不邪淫、不妄語、不飲酒、不綺語、不兩舌、不惡口、不貪、不瞋、不痴、不妄語，呢啲種種身口意嘅善業，我哋曾經做咗，所以累積咗個因，今生變成咗一個果報，而我哋呢，得到而家咁好嘅人身，仲六根俱足，你有眼、有耳、有口、有鼻，全部唔怕殘缺嘅，所以呢啲係一個前生我哋呢，種善因嘅福報。咁但係雖然係咁，我哋外殼係好健全，但係我哋精神上又健唔健全呢？一個人嘅精神，所謂靈嘅部分同肉體，肉嘅部分，靈同肉兩樣嘢係米能夠完全結合而使到我哋身心都能夠健康呢？呢個係一個重大嘅問題。我諗呢，響今日嘅世界裏便呢，我哋每個人吖，所處於個環境嘅空間係非常之污濁，所以佛經裏便呢，話我哋呢個係五濁嘅惡世，係娑婆嘅世界，係堪忍好多痛苦嘅世界。知唔知“娑婆”係咩意思吖？佛經裏便所講嘅“娑婆”呢，就係“堪忍”嘅意思，譯做我哋漢文吖，梵語印度文譯做我哋漢文呢係“堪忍”嘅意思。“堪忍”呢，就係意思話呢，你吔，能夠承受到我哋外界加之於我哋身上，同埋自己我哋本身吖，嘅內心裏便嘅種種痛苦，我哋能夠承受，所以呢個世界呢，就叫做“堪忍世界”，喺梵語裏便呢，就叫做“娑婆世界”，就係咁嘅意思嘞。

我哋而家面對呢個世界呢，非常污濁，你睇下空氣污染、大氣污染、工業污染。我哋自己精神上，外界種種嘅唔好嘅物質、唔好嘅東西去吸引我哋，污染我哋嘅精神，肉體我哋所食嘅食物污染。點解而家現代嘅人講科學，咁提倡環境保護呢？因爲佢發現呢個世界上污染實在太多，雖然有好多人唔信佛，但係佢吖，亦都有呢啲思想，因爲太過極端呢個社會，物極必反嘅道理，太過污濁，自然有一部分人希望以濁去還清，得番一個好清嘅境界。

咁講到我哋自己本身，我哋身處嘅環境，呢個世界已經係咁污濁，所以我哋本身吸入嘅空氣，食嘅水同埋食物係一啲污染嚟，進入我哋身體就好容易產生種種嘅病症。但係，如果我哋由佛教角度吖，去睇下呢啲問題呢，其實我哋致病嘅原因呢，我哋嘅身體有咁多病呢，唔係淨係因爲呢啲種種因素，呢啲種種嘅因素呢，響佛經裏便呢，都係一個助緣，呢個條件令到你個病發生，但唔係主因，因爲因同緣配合先能夠生惡果吖，呢個只不過係一個助緣嚟，係一個緣份嚟，令到你生病。如果有世界上嘅醫藥，包括中醫同西醫，可以能夠呢，治癒到人類嘅所有病症呢，呢啲唔係真正嘅醫藥，因爲醫藥呢，仍然不斷發展緊，有一個病有一隻新藥，不斷嘅病呢，又有不斷嘅藥。咁所以我哋身體嘅病嘅助緣就係我哋外界環境污濁嘅空氣污染我哋食物水份同埋你自己精神上嘅種種昏逸唔檢點，容易導致一個助緣呢，令你身體生病，但係佛陀話俾我哋聽主因令到你生病嘅就係我哋宿世所造嘅種種種種嘅惡業。呢個“業”字呢，嘅意思呢，有好多人誤會咗，“業”響印度文呢叫“karma”，“karma”嘅意思呢，解釋爲“行爲”，行爲呢，有善有惡，亦都有中性嘅不善不惡，咁我哋身體病嘅來源呢，就係呢個業力，業力去推動我哋去感受一個報應。呢個業呢，係一個力量嚟嘅，推動我哋去感受一個報應。但係我哋感受呢個報應呢，我哋做善事當然有個善報啦，做惡業有個惡報啦，做一啲不善不惡嘅業就有啲不善不惡嘅報。善事發生喺我哋身上感應嘅報應呢，就係你嘅心情時常有個舒適快樂嘅境界，你心情會好開心。但當你做惡業嘅時候呢，你今生所遇到嘅境界，譬如你出生嘅地點同埋你今生嘅遭遇有好多都唔如意，令到你心情唔開心，再加上你身體有好多病，呢個就係你前生惡業所造成，呢個善惡業就係推動你嘅命運喺度循環，生生不息。

咁響呢度呢，有個故事呢，講俾大家聽。咁呢，從前呢，有個法師，呢個法師呢，呢個法師呢，佢響個身上嗰度呢，一共呢，有二十個惡瘡吖，佢得到個惡病，個身上長咗二十個人面瘡，嗰啲人面瘡呢，就會呼吸嘅，會透氣嘅。咁個法師呢，就非常之肥嘅，係非常之肥，但係呢，啲人面瘡就開始吸佢嘅血，令到佢越嚟越瘦、越嚟越瘦。咁有一日呢，呢個法師呢，就喺佢身上個人面瘡呢，其中一個響佢膊頭上嘅人面瘡呢，就開始同個法師對話，但係個法師呢，響佢嗰一生裏便呢，就非常之守戒嘅，守啲戒律就好精嚴。咁但係有一日呢，嗰個人面瘡開始同佢講嘢，佢話：“我等咗你二百年了，二百年，而家我先可以搵到你報仇。因爲呢，你生生世世都係一個出家人，守戒律，所以呢，我近唔到你身邊，但係今日你有機會破咗一次戒，所以呢，我哋呢，呢二十個人面瘡呢，就可以附喺你身上。”於是個法師思前想後諗下自己破咗咩戒呢究竟，原來呢，個人面瘡就對法師講，佢話：“有一次，你記唔記得你落山去買菜嘅時候見到一檔狗肉，啲狗肉嘅香味呢，傳嚟入你個鼻度，你聞到吖，好香好香，於是你個心動一動念，就想食啲狗肉，但係就冇實際行動去食到。”咁個法師諗一諗：咦，係喎！我真係喎，連呢件事我都唔記得咗。起心動念，一絲一毫嘅動念，因爲啲人面瘡呢，呢啲鬼神嘅嘢呢，有個神力嘅，會知道呢啲過去事嘅發生，所以佢講番呢，俾個法師聽，佢話：“法師，由於你守戒咁精嚴，所以我哋呢，就近唔到你身，但而家你動咗呢一念啦，我哋就可以附咗喺你身上。”於是個法師諗一諗：係喎，我心諗想食狗肉嗰次，返番寺廟冇幾耐呢，就開始個身長啲瘡出嚟，個時間吖係非常之巧合。咁於是呢，呢個人面瘡就再對個法師講，佢話：“法師你又知唔知道我點解附響你身上吖？”佢話，“響金朝嘅時代吖，中國金朝嘅時代，曾經你係一個部將嚟，一個將軍嚟，我哋呢，二十個呢，係士兵嚟嘅，係屬於你嘅屬下。咁有一次呢，你就派我哋二十個下山呢，去守衛，去巡邏，巡邏邊防嗰度，咁其中有兩個士兵，我哋其中嘅兩個同僚呢，就見到一個女人好靚，因爲貪愛佢嘅美色就強暴咗佢，有兩個士兵。後來呢，呢個女人呢，嘅丈夫呢，就告到響你面前。”啫向個法師，法師嘅前生係一個將領，同呢個將領去投訴，於是呢個將領呢，就唔查清個原因，將嗰二十個士兵，嘩，全部殺晒，不問個原因。咁有兩個犯罪啫，就冇理由殺埋嗰十八個㗎嘛。所以嗰十八個呢，嘅怨恨呢，怨恨，憤憤不平，加埋嗰兩個犯罪嘅士兵呢，而家就變成咗二十個人面瘡，就附喺呢個法師身上，因爲怨氣唔消解吔，解唔到吖，解唔到，所以就附喺佢身上。“由於頭先講過，你生生世世守持佛陀嘅清淨戒律，所以呢，我哋近唔到你身，入唔到你個身，發唔到個病，所以你就冇事。我哋足，足足等咗你二百年吖，而家先有機會搵到你報仇。”咁後來呢個法師呢，始終因爲呢個定業吖，係重呢，個身體慢慢呢，潰爛呢，咁就死咗。

咁呢個故事呢，話俾大家聽係咩嘢呢？我哋做咗嘅惡業吖，唔係咁容易消解得到吖，呢個因緣配合呢，始終都會發番出嚟。但係我哋話：“咁咪好唔公平？我哋今生唔知道前生所發生嘅乜嘢。”但係宇宙嘅因果律嚟講，當你證到佛陀嘅真正嘅智慧，佢嘅佛眼就能夠觀察到宇宙嘅因果律，呢個因果係最公平。你做咗啲惡業，雖然你今生嘅身體唔同，可能喺六道裏便輪迴，但係你嘅前生呢，所累積咗呢個惡業係一種無形嘅力量，喺你個精神裏便，不過肉眼係見唔到，呢啲力量遲早都會發出嚟變成你身體嘅病症。咁所以呢，呢個法師嘅故事呢，就係其中之一個例子嚟。

咁我哋講番我哋身體嘅病症有好多種，但係點解都醫唔到呢？西醫有啲叫做細菌，細菌，有啲叫做細胞上嘅病變。但係中醫呢，所解釋呢，我哋身體致病嘅原因呢，不外六邪呢，入侵你身體，風、寒、暑、濕、燥、熱，六種邪氣去侵襲你身體。中醫同西醫呢，永遠都拗撬衝突，其實呢，可以做一個調和，冇乜衝突，因爲當中醫解釋病理呢套陰陽五行嘅觀念呢，係比西醫更加詳細，當啲邪氣入侵你身體嘅時候呢，於是呢，你身體就產生組織病變同埋有細菌嘅感染，於是響解剖學吖，響生物化學裏便組織裏便抽出嚟呢，就知道你係有細菌，譬如癌症就有腐敗咗嘅組織。但響外界嚟講呢，就係呢啲邪氣所侵襲，呢啲氣呢，唔係我哋肉眼所見得到，呼吸出嚟你嘅手指感覺有氣吹出嚟嘅氣，係無形嘅一種動力，一種動力，宇宙間一種能，係邪，邪極嘅能量，negative，負極嘅能量嚟，宇宙有正極嘅能量亦都有負極嘅能量，呢一種係宇宙之中其中一種負極嘅能量，咁我哋中國人呢，中醫解釋就用“氣”去代表。依一個係個助緣，係個助緣，頭先我講過，係一啲令到你發病嘅條件，主因就頭先我所解釋，你前生所做嘅種種嘅惡業同呢啲助緣結合，結合就變成咗你今生身體嘅病症，今生身體嘅病症。而家，心臟病、癌症已經侵襲我哋每個人嘅家庭，亦都好犀利，好多人嘅家庭或者親眷啦，都聽到佢有癌病同心臟病，好多情況都係咁，但係群醫束手無策。而家又話有艾滋病，越嚟越犀利。所以你有一樣業就有一樣病產生，醫學嘅原理只係研究醫藥去對治你身體嘅組織，你嘅細胞，但係佢根本嘅業響你自己本身身體裏便。

頭先我講呢個法師嘅故事，前生佢所做嘅業係咪食兩粒藥可以解除得到呢？你諗下？當然唔係，唔可用物質上嘅藥物去將呢啲業力清除，一定要用精神嘅部分去化解，去幫助你，先能夠將你嘅病去徹底根治。咁精神嘅部分響一般嘅層面嚟講呢，我哋能夠醫好嘅病，有啲人就去練氣功啦，有啲人或者去練下太極吖、學下拳吖，或者係學下道家嘅養生吖、調息吖、打坐，呢啲都係屬於精神上嘅修煉。呢啲冇錯，係可以幫你暫時調養個身體，但係都係屬於一個助緣，根本嘅業亦都係除唔到。如果我哋睇番佛教嘅角度嚟講呢，佛陀就講得非常之明確，你要除去你身體根本嘅業力，你必須要學習佛法，因爲佛法響精神嗰部分呢，就能夠將你前生嘅業力去除去，靠你自己修行嘅力量，亦都靠佛菩薩幫助你去將你身體嘅業力除去。但呢段時間呢，講就容易，我而家講兩句呢，我而家講兩句呢，就好容易，但係呢，真正有病呢，係大家，你要將你業力除去呢，呢個鬥爭期同埋你精神同肉體所受嘅痛苦呢，未必係我哋用說話可以表達到出嚟，咁所以呢，能唔能夠成功去戰勝一個病，去克服一個病其實係睇你自己。點解你唔能夠克服呢？唔能夠克服，佛陀所講喺佛經一早已經講咗，呢啲就叫做“定業”，fix karma，“定業”，固定咗嘅業，係註定！響佛陀嘅眼裏便，佢所見到嘅結果，註定你係要受呢個報應，註定你係要受呢個果報，就算你係點改變都改變唔到，因爲你響鬥爭嘅時期可能你呢，放棄咗修持佛法呢個機會，淨係靠醫藥嘅機會。譬如癌症嚟講，一個人得到癌症，會唔會你唔靠藥物嘅治療吖？但係你靠藥物嘅治療，不外放射治療同埋化學治療，化學治療呢，就係打癌症嘅針去殺你嘅細胞，但係呢，呢一樣嘢呢，對你嘅身體產生嘅副作用非常之大，連你好嘅細胞都殺咗，放射治療係一種射線嘅原理，將你壞嘅細胞去摧毀，亦都係同樣嘅原理。但係呢樣嘢對我哋人嘅身心嘅創傷亦都係好大，你所面臨克服嘅癌症嘅精神同埋你嘅肉體所面臨嘅種種困難，嗰個過渡期嘅心態，亦都係非常之難克服。但一個人如果得到癌症，你會唔會唔從呢個醫學角度去醫療吖？而你會轉求去由佛法嘅途徑去幫助你，我相信十個人九個都唔會，包括信宗教嘅人在內，佢都會接受埋化學，化學嘅治療或者係放射性嘅治療。但係用番我哋頭先嘅原理去分析，放射性嘅治療同化學嘅治療呢，都係一個外界嘅條件，一啲助緣，一啲外界嘅條件令到你嘅病好，唔能夠完全令你徹底根治，但係，呢啲助緣你去接受，你亦都面臨一個反作用力，就係損害到你身體。所以我哋見到好多癌症嘅病人十個有九個一定會死亡嘅，點解呢？因爲佢前生嘅業因好重，同埋佢接受咗現代醫學呢啲治療亦都係一個因素。

得到癌症嘅業因，非常惡嘅病亦都同樣嘅比例代表佢前生所做嘅惡業係非常之重，呢個正比例嘅，所謂“欲知前世因呢，今生受者是，欲知來世果呢，今生作者是。”我哋要知道，如果我哋而家，假設我哋身體得到個病，我哋感受嘅痛苦越大，我哋依個身心所承受嘅痛苦越大，呢個係果，反映番條件，呢個條件反映番證明我哋前生所對人唔住嘅，所做嘅惡事呢，所做嘅惡事呢，個量係好多，個量係好深，個數亦都好多，係成正比例。意思話你個病越重越難醫呢，前生你所侵損衆生、你所做嘅唔好嘅嘢係越大嘅、越多嘅，癌症就係一個例子。咁佛陀話我哋所做嘅惡業得到好難醫治嘅病吖，響我哋嘅今生嘅身體裏便呢，不外係一樣嘢，就係你前生殺生，殺生，你殺生呢，你今生就須要以血還血，用你嘅生命去填還番你前生嘅債務。呢個債務係累積，你用而家嘅時空嘅片斷去睇覺得唔公平，我今生冇做任何嘢，但係呢個只係你嘅精神禁固響你肉體，我哋肉眼只係睇到眼前幾尺嘅範圍，周圍後便都睇唔到了，但係佛陀嘅慧眼能夠遍觀過去、現在、未來三世嘅時空，佢將因果透徹咗，佢將我哋一生嘅片斷嘅菲林已經睇晒，包括我哋上一生，其實我哋一生一生係延續落去。站在我哋呢個時間嘅空間片斷就覺得唔公平，但係假如我哋將整套菲林去睇一睇，原來你前生係一個劏牛嘅屠夫嚟㗎，抑或者你係一個劏雞嘅嬸嚟㗎，或者你喺街市裏便賣咗十幾二十年劏魚嘅一個阿伯嚟㗎，你睇下咁長時間你殺幾多生？生靈塗炭幾多響你手上吖？所以呢啲血債，所累積嘅血債，呢啲生靈，有機會你再輪迴嘅時候未必碰到佢，但係因緣會遇時，果報都係受番你自己身上。所以呢二十個人面瘡，頭先我都講過，等咗二百年先能夠搵番個法師，未必碰到。等於我哋失散咗一個好耐嘅朋友，喺茫茫人海，就喺澳門咁大，唔好講咁遠，你都唔係咁容易碰得到，因爲同學唔係成日見面，梗有，但係有機會你會碰得到佢，要經歷好長嘅時間。

所以啲業果係唔會空嘅，梗有機會碰到，係幾時碰到啫，咁所以假如你前生嘅殺業，殺生太大好重嘅時候，你今生所受嘅報應就好苦響你身上，肉體、精神兩者皆痛苦。你受嘅痛苦越大，你前生所做嘅惡業就越重，呢個係成正比例，正比例。咁但係由另外一個角度，我哋睇呢個問題就係話，我哋欠債好應該要還錢吖，如果你真正解決債務嘅方法就係你還錢。如果我哋用一個輕鬆嘅角度去面對我哋嘅病症，你爭人一筆債務，爭人一百蚊，你還番一百蚊，你個心情一定好舒暢，如果你唔還呢，個心呢，始終係有條數欠住，心哽哽，心哽哽，始終有件事擺響心度，做任何事都唔暢快。佛陀教導我哋，如果我哋有個病症嘅時候，如果我哋能夠安然面對，佛經上有句說話叫做“隨緣消舊業，更莫再造新殃”，隨住你前生所做惡業嘅因響度，個緣份嚟嘅時候，因緣匯合，個果報就受番響你身體，有個病嘞，有個病你就隨住個緣份等個病嚟，慢慢令佢消去消去，你去享受呢個病，你唔係同個病去鬥爭，你應該有個咁嘅心態，去享受呢個病。因爲點解？雖然你身心係講唔到你有幾大嘅痛苦，因爲呢個問題呢，我做醫院吖最知道㗎喇，呢樣嘢，第二個我講你都唔信，我講你一定要信，因爲我做啲醫院病房，我見得太多，你要信我呢句說話。就算你身心所抵禦嘅痛苦有幾大，你都要面對你嘅痛苦，安然接受，因爲點解呢？你唔安然接受，你有咩可以做得到吖？如果你而家有個癌症，只有你將個生命交喺醫生手上，你有咩可以做得到吖？試問？但係唔同啦，今日我哋一樣嘢，我哋學到寶貴嘅佛法，能夠將我哋呢個病去減輕甚至消滅，所以你應該要有個心去享受呢個病症，亦都有個還清債務嘅心理，因爲係公平吖，你欠人嘅血債，點解你唔還俾佢呢？你應該要還嘅，但係只不過係點還呢？係一次過還晒吖？定係分段還？如果係血債，你一次過用今生去償還呢……（註：接下文）

236.如何解脫人生病苦（二）

（註：接上文）

咁樣呢，呢啲係種種死於非命嘅情況就係你前生所做惡業而唔能夠得到善終，但係我哋能夠今生得到寶貴嘅佛法，佛法教我哋唔係唔使還，你係將一生所要了斷嘅血債分段去攤還。因爲我哋每個人都會有執著嘅，而家你得到癌症，你訪問下啲癌症嘅病人：“喂，你想唔想死吖？”有邊個話想死吖？除非佢好厭世，唔想面對呢個世界，唔係因爲佢癌症嘅病，而係因爲佢有其他家庭、婚姻或者其他兒女嘅問題導致佢要，逼佢唔想面對呢個人生，除非有呢啲因素，否則冇人會願意死嘅，你揸個咪去訪問下佢。咁如果佢學習到寶貴嘅佛法，對於個肉身，每個人都有執著，未能夠解脫嘅時候，你都希望能夠分段攤還，有乜方法呢？就係你學咗佛法之後就有呢啲方法去教你點樣珍惜你嘅生命，既然你有病，點樣還清你前生所造惡業嘅債務，而家更加好重新再對你嘅人生呢？昨日種種譬如昨日死，今日種種譬如今日生。但係，雖然我係咁講吖，但係做起上嚟呢，我話俾你聽係非常之困難嘅，唔係我就唔需要響醫院裏便見到啲癌症病人呢，幾日幾日就有一個推出去啦，如果佢個個能夠鬥爭成功嘅。有啲神父都去醫院去講下道理，講下天主教嘅道理，一樣響個宗教信仰嘅支持。但係如果呢啲得到惡症嘅病人佢能夠鬥爭成功係唔使死嘅，但係擺喺眼前我哋見到嘅現實就唔係，死嘅多過生，因爲呢個鬥爭嘅過程係非常之痛苦。就算吖，你係得到佛法嘅利益都唔係咁易衝破呢個難關，咁所以佛經上，佛陀一早用佛眼觀照過，呢個就叫做“定業”。吓，好多法師都講過話定業不可轉吖，好難轉，因爲個業，業障好重你前生，今生突然間壓喺你身上一次過，你受唔住。啫意思好簡單解一下原理：你同個配偶結咗婚，男方或者女方突然間好賭學壞咗，突然間借咗成百萬嘅，返嚟同——“老公！我借咗人一百萬，你幫我還，唔係大耳窿追債。”突然間咁同你講，你個心點接受得到吖？個壓力太大啦，你計一計條數，今生我點做嘢都未必可能會搵到一百萬，假如嗰個人係做啲好低下階層嘅工作吖，啫呢個壓力突然間加喺你身上呢，你會覺得好唔公平。“點解突然間我會有呢啲怪病？”有個咁嘅症，咁你就開始會怨天尤人，上天對我唔公平，或者我今生冇做過任何嘅惡業，我一生仲幫人。你一定會埋怨嘅，肯定會埋怨，因爲你唔了解你前生係做咗咩事，況且加之你唔信任何嘅宗教，你唔信宗教就唔會講“前生”啦，係咪吖？況且一神論嘅宗教呢，根本就冇講“前生”，只有佛教先有講“三世六道輪迴”，婆羅門教都有講輪迴嘅道理。咁所以你要經歷去克服呢個病症呢，啫去還你呢個債吖，都唔係咁容易，等於你向大耳窿借咗好多錢，你一便生活搵到啲錢返嚟，咁辛苦仲要去還債，你嘅心情感受都唔開心啦，好正常，唔係咁容易去面對，所以你要戰勝呢一個病症嘅困難呢，呢個經歷一定要有好大嘅精神力量去支持佢，你自己對宗教上嘅信仰要有好堅決，先能夠對你產生個作用，否則係完全冇用，就算你而家信咗佛，我話俾你聽都係冇用。但係如果你係明白我頭先所講呢一啲條件、呢啲方法，用呢個心態面對呢，你基本上掌握得到，掌握得到呢，咁你度過嘅時候呢，你會輕安啲。你明白呢個道理，呢個根本道理，你就會隨遇而安啲，冇咁怨天尤人，會平淡啲，知道你應該接受，你應該要去償還呢啲債務，因爲你係欠人。相反人哋今生借你一百蚊，有啲人比較吝嗇啲嘅，記成世吖，喂！喺街度撞到：“喂！你爭我一百蚊吖！”十年前吖，你都會猛記住啦，何況你係欠咗人一筆血債吔？相反你欠人，人欠你，你會唔會追吖？一樣會追啫。相反你欠人嘅，對方會唔會追你？吓，就係咁嘅道理。天地間好公平，因果嘅法則，爲何人欠你，你就追佢九條街，但你欠人呢，你就避佢十條街呢？你諗下有冇呢個道理呢？你應該今生面對你個病症去隨遇而安，去接受佢。因爲你前生爭人好多筆債務，掘咗好多個氹，填完一個氹，吖，雖然仲有九個氹，已經開心啲吖，又填第二個氹，好似愚公移山咁，你應該要有咁嘅心面對。

我哋換吖，換咗另外一個角度諗吖，我咁樣解釋俾你聽，唔係消極，你而家接受呢個病症，唔係消極，其實係佛教話俾大家聽，佛陀教我哋好積極面對病嘅方法就係你去受咗佢，接受咗佢，唔係去逃避佢。人哋追你還債，你避咗佢，始終個債務不能夠了結嘅，你諗下，係咪？我之所以重複咁多說話啦，都係想將，儘量用我嘅語言表達去反映出你嘅心態吔，我哋應該要經歷嘅心態，點樣去面對個病症。有時講咗方法俾你聽呢，你會隨住個環境呢，個心態就會轉化，遇到好嘅環境你開心，遇到唔好嘅環境唔開心，但你唔好唔記得你個身係仍然有病，你嗰筆債仲未還，開心與唔開心嘅環境，你都要工作去還債。所以而家我哋學到咁寶貴嘅佛法之後，佛法就有方法教我哋將啲債務攤還，你唔希望呢筆債一次過壓到你透唔到氣，亦唔希望你喺因果上呢筆血債要索取咗你嘅生命，包括你家人你親屬在內。將來在座嘅人隻耳亦都會聽到你嘅親屬有癌症有心臟病死亡，亦都有死於非命，我哋唔想聽到呢啲嘢。你有機會遇到一啲咁嘅人，正在見佢行緊呢條道路，食好多肉啦，譬如，或者佢好多殺生啦，你明白咗呢個道理呢，應該要對佢講，有機會呢，加以將啲道理同佢講一講，令佢唔好將來有啲惡事去入你嘅耳。因爲你已經掌握咗呢個方法，你應該要將呢啲事去教導其他人，去幫人，都係你自己嘅一點善心。

咁頭先我所講呢，你係你面對病症我儘量講出嚟用我嘅說話，係表達到你經歷呢個病症嘅心態。跟住落嚟呢，我要同你講疾病嘅成因，有幾種，簡單解釋。因爲詳細一來唔夠時間，二來因果係千絲萬縷，好複雜，唔可以舉一反三㗎，每個人唔同㗎，每個人嘅報應唔同，但係我可以簡單講致病嘅原因有幾種。

第一種就係我所講四大不調嘅病，如果我哋四大不調，我哋呢，就會得病，咩叫“四大不調”呢？響佛經吖，佛教上裏便講呢，我哋身體呢，係由“四大”再加埋“識”組成嘅。“四大”咩意思呢？地、水、火、風，係四種唔同性質，用現代科學嘅術語可以，都可以勉強叫做“元素”嘅，四種唔同性質嘅元素組合變成我哋身體，再加埋精神體嘅參與。物質嘅部分呢，就係四種唔同性質嘅元素組合，精神嘅部分就係我哋嘅第八識“阿賴耶識”，即係天主教所講嘅“靈魂”、道教所叫嘅“元神”，我哋佛教就叫做“神識”，參與咗落去物質嘅部分裏便呢，就變成我哋嘅身體。咩叫“地水火風”呢？“地大”就係我哋身體本身。嗱，你𨂽下個地係咪好硬吖？堅硬，佢嘅性質，佢嘅性質叫做“property”，係堅硬嘅，個性質，代表我哋身體堅硬嘅部分，牙齒吔、骨骼，呢啲咪堅硬嘅部分囉；“水大”係冰凍嘅、濕性嘅、流動嘅，響我哋身體裏便係液體嘅部分，血液啦、口水啦、鼻涕啦、淋巴液啦，呢啲種種係流動嘅，係屬於我哋身體嘅水大；“火大”係咩吖？火係咪暖吖？暖性向上升，響我哋身體裏便呢，我哋感覺有溫暖吖，食咗嘢，就係我哋“火大”上升，火性嘅元素俾我哋身體感覺有溫暖，就係“火大”；“風大”，風係流動嘅，流動飄逸，飄逸不定嘅性質，響我哋身體裏便冇咗“風大”，你就危險啦，“風大”係咩吖？係呼吸吖！我哋只要揞住我哋個鼻吔，數分鐘吖，你身邊嘅嘢全部唔屬於你㗎喇，就係咁簡單吖，“風大”就係流動就係我哋嘅呼吸。所以一個人物質嘅部分就係地水火風，再加埋精神結合，就係“色”，“色”同埋“空”嘅道理，精神係“空”，“色”就係物質，《心經》裏便解釋“色”“空”就係呢個原理。咁我哋嘅人得病嘅原因呢，我哋身體組成不外地水火風，啲地水火風，如果個“地大”呢，唔平衡呢，會有咩病吖？好簡單，我已經解釋過原理，以後你自己知道邊方面唔平衡有病。我哋“地大”有病，骨痛啦，係骨上便嘅問題，骨裏便嘅骨髓嘅問題，又或者骨外表嘅骨痛吖，呢啲就係堅硬吖，屬於骨。水火，“水大”有問題，有咩問題吖？血啦，白血病嗰啲細胞吖，流動咪有問題啦？血，血裏便有病。“火大”嘅問題係咩病吖？“火大”嘅問題呢，如果你“火大”上升就會發燒啦，唔退啦，而感到，當你發燒燒到㷫嘅時候呢，就會感覺到好寒冷，係咪吖？“火大”就係熱病嘅問題，“風大”呢，就係冷病嘅問題，風寒嘅問題。呢啲種種嘅道理講嚟呢，其實睇番我哋中國本身嘅醫學中醫，其實都好相似呢啲，非常之相似。再加埋如果我哋身體上係有精神病，就係我哋“識”嘅問題嘞，“識”嘅問題，眼耳鼻舌身意，末那識、阿賴耶識，係我哋“識”上便嘅問題，所以有啲人有精神上有障礙，神經官能症、神經衰弱、精神病呢啲歇斯底里嘅病，呢啲全部係我哋精神嘅部分嘅病症。“地水火風”再加埋我哋嘅“識大”，咁你明白咗呢個結構之後，我哋普通人嘅病症呢，如果我哋係四大裏便失調嘅，失調嘅，是但一樣嘢失調呢，就導致我哋物質上嘅病症，依啲係我哋身體基本上嘅病症。譬如你突然間天冷唔著衫吖，落雨你唔擔遮任得啲雨溚吖，咁你好快就發燒啦，“火大”就會上升，變咗“水大”制唔到呢，水火不調呢，你就容易有“火大”嘅病，開始發燒，依啲係你唔注意，你覺得你唔注意俾啲雨溚到，你冇擔遮，你唔知道落雨，就得到呢個病，其實係一個助緣。佛陀話俾我哋聽呢，就算你一個傷風一個感冒吖，同前生嘅業病吖，都有關係，都有做過惡業，先有呢個病吖，只不過你嘅惡業係小。但係一個人一生唔係淨係傷風感冒咁小嘅病，亦都有好多嘅病接踵而嚟，一步一步隨住你年紀大衰老，呢啲病苦呢，不斷而嚟。病苦越重，頭先我講過，你前生所虧欠人嘅債就越多吖。咁樣，你四大不調嘅病呢，你今生你以爲你唔小心擔，冇擔遮溚咗落雨，就有感冒，其實唔係吔，亦都頭先我所講嗰一樣原理，係一個助緣，就算你感冒咁小嘢吔，都係前生嘅業因嚟嘅。譬如，我解釋下感冒菌嘅來源係點嚟，感冒菌嘅來源呢，來源於凡係啲傳染病呢，來源於我哋衆生所做嘅共業，佛經裏便呢，亦都記載過共業，我哋精神去創造所有嘅嘢出嚟，如果我哋一做惡業出嚟呢，自然會感召一啲，有個力量去推動呢，就會無中生有。佛經裏便記載我哋宇宙空間各道嘅生命，一種有四種出生嘅形態：胎生、卵生、濕生、化生。細菌類呢，病毒呢，無中化生出嚟，係化生嘅一類嚟，係受我哋人類所做咗嘅惡業個力量去推動而衍化出嚟啲感冒菌，所以係有我哋，有份參與嘅，如果你得到呢一個感冒呢，你今生或者前生都有參與咗個惡業而令到呢啲菌類呢，一個滋生，一個助緣嚟。如果你冇做到啲惡業呢，你今生就算你同埋一班有傳染病嘅人，就算一個神父吖，去到一啲麻風嘅病人，麻風病院去同麻風嘅病人說教呢，佢都唔會染到麻風病，因爲點解呢？如果用佛學嘅原理去解釋，因爲佢自己冇有麻風嘅惡業嘅因子響個腦裏便，響個識田裏便。所以，但係同係另外一個人接觸麻風病人呢，佢會得到個麻風病，因爲佢有做過麻風嘅惡業，同性相吸嘅原理，因爲佢前生有做過惡業而感召到有呢啲麻風嘅細菌產生，於是佢今生嚟講，接觸過麻風病呢，就俾呢個麻風菌所感染到，就係呢個原理。所以你冇做呢個惡業，你唔需要驚會染到呢啲惡疾吖，傳染病，呢個係同類相吸，同性相吸嘅原理。呢啲種種惡業嘅種子呢，就種響你嘅識田裏便，一定要遇到個緣份呢，開花結果，感應咗呢，先會發芽生長得到一個報應。咁呢類嘅病呢，總之凡係所有嘅病，都係你前生嘅業因去驅使。

但有一類病呢，唔係傷風感冒咁簡單，就係頭先我所講嘅呢個法師嗰個例證吖，靈界上嘅病。靈界上嘅病呢，譬如你有啲時候係胃痛，有啲時候可能你潰瘍，胃吔，十二指腸潰瘍，有啲時候呢，係偏頭痛精神病，有啲時候係全身骨痛，但醫生係解釋唔到原因，或者你身體某一部位好痛，呢一種情況呢，如果你睇醫生係用藥物治療唔到的話呢，係靈界病嘅成份呢，非常之高。咩叫靈界病呢？就係頭先我所解釋你前生對唔住，所做出對唔住人嘅事，呢一班債主，呢班靈界嘅衆生可能佢落咗鬼道，亦都落咗係其他空間無形嘅衆生，係冇身體，靈界上嘅，只有存在一個精神，可能係鬼道，可能係其他阿修羅道或者精靈界呢，同你前生，你係侵損過佢，佢就附住響你個器官裏便。譬如有好多人嘅胃病，醫幾十年都醫唔好嘅，慢性胃炎啦，或者潰瘍嘅病啦，反復復發，可能呢，就係有個靈界嘅衆生附住響你個胃部裏便，所以你食藥係醫唔好，淨係靠藥物，一定要靠佛法嘅方法去將你同佢嘅債務解消。你承受之餘，你希望你同佢嘅怨氣解消呢，你呢個病先會好。呢一類嘅病呢，咁響我哋今日時代嘅社會多唔多呢？佛陀已經一早預言咗嘞，係非常之多，十之其七八，就係呢一類病嚟，所以有好多咁嘅病醫唔好。特別可以話一樣病症俾你聽，就係頭先所講嘅癌症，同靈界附身嘅因素呢，係非常之有關係，如果你得到食道癌吖、胃癌吖，特別女性婦科嘅癌症吖，好多都同佢前生所殺生好有關係，佢所殺嘅生靈今生有機會就附響佢嘅身上，附響佢啲器官上便，令到佢要填還番呢一筆債務。做手術係米血光之災吖？流番好多血出嚟吔？如果只係做一次手術，用個血能夠填還到呢筆債務呢，呢筆債務都係尚淺吖，如果做手術之後都唔得嘅，啲癌症再擴散呢，你前生虧欠人嘅債呢，就好深吖，以至於導致你今生嘅生命了結。所以可以話俾你聽，十之其七八呢，就係同靈界因素好有關係。所以我哋而家，頭先我所講過，我哋面對嘅事實嘅病症，好多醫唔好，因爲點解呢？得到呢啲惡症嘅人，佢唔會由宗教嘅途徑去幫助自己，係咪吖？有幾多係信宗教吖？得到癌症。就算信咗宗教，我頭先亦都講過，重複我頭先所講嘅說話，你同癌症鬥爭，經歷呢個階段係好痛苦同好漫長，你一定好難戰勝佢，所以佛經就叫“定業”。所以點解初頭我要解釋俾你聽，你鬥爭嗰個過渡心態呢，係非常之緊要吖，靠你自己嘅精神意志力，靠佛菩薩嘅加持力，你先能夠攤還呢條數。癌症有幾多個會唔死吖？你諗下，就係呢個原理。咁所以而家大部分嘅病症呢，好多都係靈界病嘅因素，我哋相反用邏輯推番轉頭，假如你個病係有靈界嘅因素吖，用氣功、耍兩套太極、食兩粒藥，可唔可以醫好你個病呢？你諗下，梗係唔得啦！所以我覺得呢，真正用藥醫好你個病，呢啲病係假病嚟嘅，真病藥物醫唔好嘅，真正嘅病係冇得醫嘅，真正嘅病呢，就係業病，係要你自己還，先有得醫。要你承受就醫好，你受咗佢咪冇囉？過咗去囉。你唔受咗佢呢，你筆債務未還呢，始終你嘅病係唔會好，時間嘅問題。所以我哋中國，中國人都講過，唔信宗教，老一輩嘅人都會講過：“善惡到頭終有報，只爭來保與，來早與來遲啫。”呢個就係佛教嘅因果道理。幾時報呢？唔係遲就係早，唔係今世就係下一世，只不過我哋唔了解呢個因果道理。

依個呢，就係病症嘅成因，病症嘅成因，頭先我講出，點出呢個因素係非常之重要，如果你以前未聽過，或者你係唔明白嘅呢，而家你就要認識開始，同埋有機會同人解釋，勸化佢修行，去解決佢業病嘅因，再配合埋適當嘅醫藥，咁可能呢個病就能夠醫好，或者呢條債呢，你就會還得舒服啲，慢慢慢慢攤還。

咁呢，因爲時間有限呢，呢部分我唔用得太長時間。咁跟住第三部分呢，我想簡單話俾你聽，你還債都有個方法嘅。你還債呢，你係問大耳窿借吖？爭一個大耳窿又問第二個大耳窿借吖？又要立利息，定是問你啲親屬借呢？唔使利息吖。定是你自己再去做一份兼職賺多啲錢呢？有好多方法還債嘅。跟住嚟講，我就講還債嘅方法，意思就話俾你聽，佛菩薩係你一個庇蔭嚟嘅，我哋今生學到咁寶貴嘅佛法，佢必然有方法教導我哋點樣將身心嘅病苦去除去。響佛教裏便基本，如果按而家大家嘅層次嘅修爲嚟講呢，有三個法門一定適合你去修持而能夠將你嘅病症完全除去。三個有緣嘅本尊，日後頭先我介紹呢，有一講我會講到，你最有緣嘅本尊係邊個，點樣找尋你最有緣修法嘅本尊，亦都會講到呢一部分嘅問題，但係今晚，我會講三個大家最有緣嘅本尊，不特對我哋娑婆世界有緣，亦都個別對我哋某一個衆生係，對呢啲佛同埋菩薩好有緣份嘅，有三個法門係對我哋非常之重要，特別係將我哋精神同肉體嘅病症可以幫我哋完全除去嘅，今晚我要講一講，簡單介紹一下。

第一個就係觀音嘅法門，非常之重要；第二個係地藏菩薩嘅法門；第三個係藥師佛嘅法門。呢三個法門係對我哋娑婆世界衆生非常之重要。有啲人呢，當我講到呢三個法門之後呢，有好多人呢，都會輕視，因爲點解呢？以前我都講過，佢哋個心態會點：有冇搞錯吖？觀音、地藏菩薩、藥師，我學佛咁耐，邊個都知啦，乜都識啦！藥師咒有咩唔識唸啫？觀音菩薩“唵嘛呢叭咪吽”，邊個都識唸啦，地藏滅定業真言，地藏殿都成日教啦，我容乜易？你錯晒啦，千祈唔好輕視呢三個佛菩薩嘅法門吖，三個都係古佛嚟㗎！你究竟學到呢三個法門有幾多？對唔住，你所知道呢一個咒只係呢個佛嘅法門裏便嘅一千萬分之一咋，都唔可以用“一千萬”，唔可以講，恆河沙數嘅一部分。呢個法擴展有好多方法，唔係淨係你識一個咒咁簡單。況且我再問番，如果有呢啲疑問提出嘅師兄呢，往往我都會質疑，我同佢講，我話：“你雖然係識得呢個藥師咒，你雖然識得呢個地藏滅定業真言或者地藏菩薩嘅心咒，你雖然識得四臂觀音嘅咒，但係吖，我問你一樣嘢，你修持有幾多吖？你個病除去晒未吔？吓？你而家係咪身心好健康吖？”佢又冇得答㗎喇，因爲人人都有病，我攞呢句我實贏，我同佢講，因爲人人嘅身心嘅病除去唔到。小心一樣嘢啦，我哋唔好對於我哋熟習嘅法門輕視咗，根本你唔能夠輕視，你以爲你耳熟能詳嗰啲法門你就可以運用，你錯晒吖，真正運用唔係咁，運用咗出嚟產生嘅效力嘅效果唔係你所預期嘅咁低。即是我舉例呢，好簡單，好多人夠唸，識唸大悲咒，一講大悲咒，個個都識，咁大悲咒你應用得到幾多呢？你係咪真係唸杯水可以同人退燒呢？你自己係咪可以退到燒呢？咁你吖咁大聲話“大悲咒我都識啦！”識，唔代表用到出嚟，記得！同埋你耳熟能詳嘅法門呢，我哋人類呢，佛陀話俾我哋聽，衆生有一個劣根性嘅壞習慣，我哋每一樣耳熟能詳，成日聽到嗰啲呢，成日見到嗰啲呢，就會開始產生厭，開始產生怕，要追求一種新鮮，所以我哋學習密宗嘅人好容易追求好多法好多法門，因爲普通嘅法門佢唔想修，成日聽。一講四臂觀音嘅，學吖佛好耐嘅時候，佢都唔會珍惜呢個“唵嘛呢叭咪吽”，好簡單啫六個字，容咩易背吔？但係呢六個字所產生出來嘅效力，佛陀親口講過，就算窮百千萬億劫都講唔到呢個“唵嘛呢叭咪吽”六個字所發出嚟嘅功德有幾高、有幾深、有幾大、有幾廣，係用百千萬億劫都講唔到呢個功德。所以呢，當你，依度呢，我又要點出一個心態吖，修行人最容易犯到呢個毛病。當你聽到呢啲法門，你認識嘅，你應該要更加虛心去學，因爲你記得，佛法裏便嘅法門有八萬四千咁多，淨係一個觀音吖，所開出嚟嘅法吖，已經有好多好多好多！觀音嘅變化身有好多，你係咪個個學得晒吖？而每一個你究竟掌握到幾多吖？你修持所發揮嚟，發揮出嚟嘅威力有幾大吖？你自己用呢啲問題去檢測下你自己啦。所以，對一個佛菩薩嘅法門，千祈唔好輕視，呢個係一個心法嚟。

咁講番頭先我哋所講嘅最重要一樣嘢，就係話觀音、地藏、藥師三個法門對於我哋嚟講消除業障係非常之大。除咗一個本尊衍生好多法門出嚟呢，我哋而家學唔晒呢，窮我哋一生嘅精力其實真係學唔晒，但係最簡單，你可以唸同佢相通嘅心咒。譬如你喜歡四臂觀音呢，你可以唸“唵嘛呢叭咪吽舍”；你喜歡地藏王菩薩呢，你可以唸“唵 鉢囉末呢達呢 梭哈”，佢嘅滅定業真言；你中意藥師佛呢你可以唸“唵 鞞剎遮 鞞剎遮 鞞剎迦 三末揭帝 梭哈”，你可以唸藥師佛嘅心咒。你同邊個本尊有緣，最簡單你就可以唸返佢嘅咒去消你嘅業障。嗱，我又重複提番起一句說話，就係你唸呢句咒嘅時候，你會覺得好沉悶、你會好苦悶，點解會覺得好苦悶？因爲頭先我講過一句，你係有緊病，你好痛苦個嗰心，你個身好痛吖，一個癌症病人攤喺個床度，你叫佢唸“唵嘛呢叭咪吽”？佢嘅心情唸唔唸到先？就係所以你過唔到呢關吖，咁你咪死囉？就咁簡單，嗰條債填唔到。但唔好唔記得喎，你今世填唔到，下一世都要還呢個債務，所以我頭先屢次點出，唔係咁容易克服到呢個病症，縱使你得到一個法門係咁稀有，因爲佛菩薩教呢啲法門，賜予啲法門俾你，仲要靠你自己力量，你肯唔肯修先得㗎，你唔修嘅時候呢，呢個威力發揮唔到出嚟，所以呢個鬥爭期呢，就係睇你自己。你要行嘅人哋扶一扶你，你唔行嘅，人哋扶你都係冇用，所以呢樣係最重要最重要。

日後有時間呢，我都希望能夠將觀音嘅法門呢，慢慢慢慢教出嚟，按大家嘅層次好簡單去教出嚟。譬如四臂觀音嘅六字大明咒嘅法門呢，淨係唸呢個咒，或者呢個咒嘅手印，或者呢個咒嘅觀想，響密法上便嘅修持呢，同埋點樣去消除你嘅業障呢。或者有啲人係喜歡白衣觀音嘅，白衣觀世音菩薩嘅修法又係點呢？有啲人喜歡千手觀音嘅，咁千手觀音嘅修法嘅性質又係點呢？吖，有啲人呢，喜歡送子觀音嘅，咁送子觀音嘅修法又係點呢？一步一步一步，希望有機會呢，去教授大家。譬如地藏菩薩嘅法門呢，響今次嘅地藏菩薩誕裏便呢，我就揀咗占察木輪相法呢，頭先我已經介紹過，解釋個原理俾大家聽，希望你能夠都做得到，呢個係佢地藏菩薩法嘅精華其中一部分。藥師法呢，你點樣修持藥師佛同埋藥師佛所變化出嚟嘅藥師七佛嘅法門去醫治你身心嘅病症，包括精神病、靈界病，點樣去幫助其他人呢？點樣去延壽呢？點樣去修北斗七星嘅法呢？呢啲種種種種都係配合藥師法嘅法門，對我哋今生嘅利益好大嘅。佛陀講過，對我哋娑婆世界衆生好有用，但係有用都係無用，因爲點解係無用？你有冇需要吖？衆生，如果你冇需要嘅，我講出嚟都冇用。如果你有需要呢，我講出嚟就好有價值，因爲你能夠利用得到，你有呢個痛苦解除咗之後呢，再去幫助其他人，身、心嘅病苦去解除。

咁今晚冇時間呢，講呢啲法門嘅詳細嘅細節，我只係簡單解咗病苦大概嘅成因同埋你面對嘅方法，但係真正經歷呢，都係靠你自己去點樣面對，我哋坐喺度每一個人都有病，包括我自己在內，你修行亦都要面對呢個問題。我哋而家末法時期有病，正法時期佛陀時代一樣，佢哋，佛陀嘅弟子，好多弟子都會有病，僧團裏便呢，都有醫生，都幫助啲弟子去療病，不過係用簡單嘅醫藥。有啲人話：“哦，佛陀正法嘅時期根本啲弟子有病就好濕碎啫，佛陀同埋其他弟子都有神通。”如果有咁嘅諗法呢，大錯特錯，錯晒吖。神通係醫唔到病，神通係虛幻吖，醫唔到病，因果連佛陀都唔能夠改變，神通點可以醫病？你諗清楚。如果神通可以醫病吖，因果可以改變，我哋今，而家坐喺度個個人都會冇病，因爲佛陀嘅神通法力將我哋嘅病除去咗吖嘛，可以係咪吖？如果神通可以除病，我哋咪，而家咪健健康康、精精神神？唔通佛陀唔想佢嘅弟子好好哋學佛法，冇……（註：此處錄音中斷）

237.一切如來有長子（一）

普賢菩薩

普賢菩薩係中國佛教四大菩薩之一，佢時常隨侍世尊釋迦牟尼佛嘅右邊，專門掌理德行。喺佛經上講，普賢菩薩嘅“學”係德之於行，“行”嘅謹慎鄭重莫若象，故號“象”。所以，通常我哋見到嘅普賢菩薩塑像同埋畫像，多數都係以白象作爲坐騎嘅。

普賢菩薩喺佛門之中嘅地位係非常之高，係著名嘅上首菩薩，佢同文殊菩薩一齊並列喺釋迦牟尼佛嘅左右兩邊作爲協侍。文殊侍奉喺佛陀嘅左邊，主持智德門；普賢侍奉喺佛陀嘅右邊，主持定德門。咁樣嘅協侍係象徵如來嘅教法——行解並進、定慧雙修、理智圓通。

普賢同文殊喺學佛嘅方法之上各有佢哋嘅特點。普賢菩薩以法界門爲所入之門；而文殊菩薩呢就以般若門爲能入之門，兩位菩薩喺求證菩提嘅時候相互融攝，依體起行，以行顯理，所以普賢菩薩得到三昧自在，而文殊菩薩呢，就得到般若自在。

普賢菩薩以佢偉大嘅德行話俾世人聽，學佛要有“信”；文殊菩薩以佢卓越嘅智，話俾世人聽，學佛要有“解”，但係，“信”同“解”兩者喺我哋學佛嚟講，係唔能夠分離嘅。冇“解”嘅“信”只係盲目，只能稱之爲“無明”。如果係冇“信”嘅“解”係虛妄，只能稱之爲“邪見”。普賢菩薩通過修行圓覺清淨嘅境界，成就咗菩提正果，所以呢位菩薩喺佛學嘅造詣裏便係非常之高。喺各部佛經裏便我哋時常見到普賢菩薩向佛陀提出問題，請佛陀闡述呢啲問題去解決法會之上聽衆同埋末世衆生心中嘅疑惑。有一次響靈山嘅法會之上，普賢菩薩表示：喺釋迦牟尼佛滅度之後，如果有人能夠受持《妙法蓮華經》，普賢菩薩就會對呢個修行人加以守護，將佢嘅衰患除去，令到行者平安，使到修行人命終之後上升兜率天彌勒菩薩嘅內院。釋迦牟尼佛非常之讚賞普賢菩薩呢種堅定護法嘅精神，喺嗰個時候，佛陀就表示：“汝已成就不可思議功德，心大慈悲，從久遠來發阿耨多羅三藐三菩提心而能作是神通之願，守護是經。”喺顯教，係以彌勒菩薩作爲釋迦牟尼佛嘅補處菩薩，而響密教，就以普賢菩薩作爲大日如來嘅補處菩薩嘞。普賢菩薩之所以號稱“普賢”，係爲咗顯示大日如來久已成道，芸芸衆生亦必將成道。喺《菩提心論》指出：“其圓明則普賢身世，亦是普賢心也，與十方諸佛同之，亦乃三世修行證有前後，及達悟已，無去來今。”普賢菩薩係我心目中好尊重嘅一位大菩薩，普賢菩薩亦都喺中國佛教徒嘅心目中有崇高嘅威望。

有關普賢菩薩嘅信仰，最重要嘅文獻就係《大方廣佛華嚴經》裏便嘅《普賢行願品》嘞，而《普賢行願品》嘅核心就係普賢菩薩嘅十大行願——禮敬諸佛、稱讚如來、廣修供養、懺悔業障、隨喜功德、請轉法輪、請佛住世、常隨佛學、恆順衆生、普皆回向。普賢菩薩十大行願嘅主旨係爲咗弘揚佛法而努力，所以普賢菩薩的尊號叫做“大行普賢菩薩”。另外，我哋根據《大方廣佛華嚴經·十忍品》裏便所講到普賢菩薩嘅十種“忍”，對於研究普賢菩薩思想亦都係至關重要。普賢菩薩講過：如果能夠做到“十忍”，何爲“十忍”呢？音聲忍、順忍、無生法忍、如幻忍、如焰忍、如夢忍、如響忍、如影忍、如化忍、如空忍。能夠做到“十忍”就能夠對一切佛法無礙無盡，因而佛教對“忍”都非常重視，宣揚只要到咗忍位就唔會再墮落響惡道啦。顯教同密教都修習普賢三昧，但係都有各自唔同嘅修法，顯教注重觀諸法實相嘅理，懺悔六根罪障，而密教呢，就注重身口意嘅三密相應，而且時常用手印同真言相配合嘅方法去輔助修習添。

隨住四大菩薩響中國佛教界影響逐漸擴大，有關四大菩薩嘅傳說亦都越來越中國化，亦都係文藝作品之中經常出現，比如喺《西遊記》我哋見得到啦，《封神演義》家傳戶曉，呢啲咁嘅古典小說，我哋都能夠見到被小說家描寫得栩栩如生嘅普賢菩薩形象。好似普賢菩薩知名度咁高嘅大菩薩，其實佢嘅影響早已擴散到我哋佛門之外了。四川嘅峨眉山以美麗而著稱，記得李白嘅詩句曾經吟詠過：“蜀國多仙山，峨眉邈難匹。”可以見到峨眉山係不同凡響嘅，道教更加將峨眉山稱爲“第七洞天”，而佛教將峨眉山就視爲“普賢道場”，而凡夫俗子就將佢當成旅遊勝地了。

“普賢菩薩”係梵文“三曼多跋陀羅”嘅意譯，“Samantabhadra”，亦都有譯做“遍吉”嘅。喺各部佛經之中，對“普賢”呢一個譯名呢，解釋係略有唔同，我哋試舉幾個例吖。喺《法華義疏》講：“‘普賢’者，外國名三曼多跋陀羅，三曼多者此云普也。‘跋陀羅’，此云賢也。此土亦名遍吉，遍猶是普，吉亦是賢也。”喺《探玄記》講：“德周法界曰普，至順調善曰賢。”《大日經疏》話：“‘普賢菩薩’者，‘普’是遍一切處，‘賢’是最妙善義。謂菩提心所起願行及身口意，悉皆平等遍一切處，純一妙善備具衆德，故以爲名。”（註：根據CBETA，“‘普’是遍一切處”疑爲“‘普’是遍一切處義”）《首楞嚴經》講：“普賢菩薩言：我已曾與恆沙如來爲法王子，十方如來教其弟子菩薩根者修普賢行從而立名。”（註：根據CBETA，“修普賢行從而立名”疑爲“修普賢行從我立名”）《悲華經》話：“‘我行應當勝諸菩薩。’寶藏佛言：‘以是因緣，今改汝字，名曰普賢。’”我哋以上引證咁多種經文，由唔同嘅角度解釋咗普賢菩薩，呢個譯名嘅含義都能夠言之成理。

喺唐代宗密大師歸納咗“普賢”依一個譯名嘅種種解釋，大致就可以分成三類，依個喺《大方廣圓覺修多羅了義經略疏》之中就有講到嘞。《略疏》之中係點講嘅呢？佢話第一，“約自體說，體性周遍曰普，隨緣成德曰賢。”意思就係話普賢菩薩嘅體性係普遍周滿法界嘅，所以叫做“普”；“隨緣成德曰賢”呢，意思就係話普賢菩薩，佢隨衆生唔同嘅緣份而成立各種德行去度化衆生，所以叫做“賢”。第二個意思就係“曲濟無遺曰普，鄰極亞聖曰賢。”“曲濟無遺”嘅意思就係普賢菩薩去救濟衆生無有遺漏，而佢嘅果位就能夠齊於聖人，謂之“賢”。第三樣嘅意思，“德無不周曰普，調柔至順曰賢。”意思係話，普賢菩薩嘅德行無不周遍，就係“普”嘞，佢嘅性質調柔而至順就叫做“賢”，亦都可以解爲：調順衆生，令衆生柔服，曰“賢”。

普賢菩薩喺密教裏便，又叫做“金剛薩埵”“金剛手”“秘密主”等等嘅名稱，被奉爲真言宗八祖之中嘅第二祖。因爲大日如來就係第一祖，而金剛薩埵就係第二祖嘞。“金剛薩埵”喺漢語，我哋可以譯爲“執金剛”“持金剛”“金剛手”“金剛手秘密羅”“金剛薩埵”“金剛手菩提摩訶薩”，或者“金剛手薩埵摩訶薩埵”等等。所謂“薩埵”，梵文“Sattva”，就係有情、勇猛嘅意思，稱普賢菩薩做“金剛薩埵Vajra-sattva”，意思係表示普賢菩薩係一位勇猛嘅大士。普賢菩薩其實同金剛薩埵只係同體同唔同嘅名稱啫，普賢菩薩其實由大日如來裏便受過灌頂而賜以五智嘅金剛杵，所以就叫做“金剛手”嘞。

喺有啲佛寺嘅圓通寶殿之中，供奉咗二十五尊塑像，分別代表二十五種圓通。而普賢菩薩喺二十五圓通裏便係代表“耳識圓通”。二十五圓通法門包括六塵、六識、六根、七大。所謂“六塵”就係色、聲、香、味、觸、法；所謂“六識”就係眼、耳、鼻、舌、身、意；所謂“六根”就係眼、耳、鼻、舌、身、意六根了；“七大”呢，就係地、水、火、風、空，見，識。二十五圓通嘅總結係著名嘅《首楞嚴經》講，呢部佛經記載，喺一次法會之上，釋迦牟尼佛對於在座嘅各位菩薩同大阿羅漢話：“吾今問汝，最初發心悟十八界，誰爲圓通？從何方便入三摩地？”於是喺佛門弟子裏便，一個個匯報自己最初修道嘅時候係點樣達到圓通嘅門徑，聖者一共講出咗二十五種入道嘅法門，所以就叫做“二十五圓通”嘞。喺《首楞嚴經》，普賢菩薩匯報話自己曾經同恆河沙嘅如來做爲法王子，意思就喺恆河沙如來面前曾經做過大菩薩去協助佛陀轉法輪啦。十方嘅諸佛都以普賢爲榜樣，教菩薩修習普賢行，而修習普賢行，首先就要悟入毘盧性海，然後先能夠入普賢行嘅門徑。當釋迦牟尼佛詢問入圓通嘅門徑之時，普賢菩薩就回答話：“由心聞。”普賢菩薩意思就係話，由我哋嘅真心去聽聞、去入門，用心聞嘅方法去分別衆生嘅所有知見，最後達到心聞法明分別自在嘅境界。普賢菩薩亦都自述最初嘅本因：“但用耳識隨念分別，能發智慧光明普照群機，得大自在。若於他方恆沙界外，有一衆生，心中發明普賢行者，我普賢即時乘六牙白象，分身千百，至其發心者面前，與之相見，縱然彼因障深，看不見我，我也會暗中爲他摩頂，護持安慰，使他所願得以成就。”

對於圓通法門嘅修習方法，喺《楞嚴正脈疏》作咗概括嘅敘述同形象嘅描繪，佢話：“六根互用，周徧圓融，成之妙果。”“六根互用”係要到菩薩嘅境界先能夠運用到出嚟，我哋凡夫，眼只可以用嚟睇嘢，耳淨係用嚟聽嘢。簡單嘅舉例，根門之中係互相隔閡，唔能夠互用，但係大菩薩嘅境界，每個根門都可以做其他根門嘅功能，眼不止可以去睇嘢，亦都能夠去聽聞其他嘅聲音。六根互用嘅方法，修入嘅方法最爲方便，其實就係由耳根修入嘞。喺《楞嚴正脈疏》講到耳根聞性，人人都係本自圓通——“如十方擊鼓，一時並聞，是圓也。”意思係話，十方打鼓嘅時候，係咪一時間我哋都能夠聽到聲音呢？冇錯，呢個意思就係“圓”，係“圓滿”個“圓”。“隔牆聽音，遠近能悉，是通也。”假如隔住一埲牆，無論係遠係近，其實我哋都聽到，如果有聲音傳導係唔受物質阻隔嘅障礙，意思就係“通”嘞。“聲有動靜，循環代謝，而聞性湛然常住，了無生滅。”聲音係有動同靜，有動態亦都有靜態，不斷去循環、不斷去代謝遷流，但係我哋嘅聞性呢，係湛然常住嘅，係唔受時空阻隔性，係永遠一樣。過去又係咁，現在又係咁，未來又係咁，即係話，係不動嘅本體，了無生滅，係無生亦都無滅嘅。“若不尋聲流轉，而能反聞自性，漸至動靜雙除，根塵迴脫，寂滅現前，六根互相爲用，遂得圓通。”如果我哋唔尋外界嘅聲音，唔攀緣外界嘅聲音流轉，唔將我哋嘅心再去向外去攀緣吖，將我哋嘅心反聞番自己嘅本性，人人內在有一個清淨嘅自性，由呢一步功夫去入門做起，慢慢慢慢我哋就會到動靜雙除嘅境界。乜嘢叫做“動靜雙除”呢？我哋聽唔到“動嘅相”，亦都聽唔到“靜聲音嘅相”，慢慢慢慢，而後根塵迴脫，唔攀著“根”亦都唔攀著“塵”，“根”“塵”兩樣都能夠解脫。咁“解脫”呢一樣嘢又係咩呢？其實就係我哋嘅寂滅本性自然現前。如果我哋唔攀緣相對嘅境界，唔攀緣“有”亦都唔攀緣“空”，唔攀緣“外”亦都唔攀緣“內”，但係亦都唔將個心放喺中間。如果我哋個心唔執著種種嘅見相同埋相分，唔攀緣任何嘅嘢，就會慢慢根塵迴脫，慢慢我哋嘅本性就會自然寂滅現前。喺寂滅現前嘅境界，我哋嘅六根就會發揮用處嘞，就可以到達菩薩嘅境界——互用嘅根門，眼可以睇嘢、可以聽嘢嘞，耳亦都可以睇嘢、可以聽嘢，唔受凡夫平時嘅意識阻隔障礙，因爲響嗰個時候已經轉識成智而得到圓滿通達，故謂之“圓通”。至於“圓通”嘅含義，《三藏法數》喺名相度都講得清清楚楚啦：“性體周遍曰圓，妙用無礙曰通。”我哋本身嘅佛性能夠周遍法界，唔係“圓”咩？我哋佛性嘅妙用發之外在，能夠通達去十方，能夠救渡一切衆生，唔係“通”咩？“圓通”係一切衆生本俱嘅本性，只係我哋唔記得咗，我哋忘懷咗啫。“圓通”係一切衆生本有嘅心源，係佛菩薩所證嘅聖境嚟嘅。觀音菩薩亦都講過，衆生嘅耳根係最利、最爲圓通嘅，所謂“此方真教體，清淨在音聞。”如果我哋由耳根去修入，慢慢慢慢就好快證得圓通，係對於我哋娑婆世界嘅衆生運用耳根係比其他根門係較爲利益、較爲厲害，好容易到達高嘅境界，喺修行嘅方面。

釋迦牟尼世尊曾經喺古印度王舍城嘅靈鷲山開講《妙法蓮華經》，喺在座嘅有舍利弗尊者、須菩提尊者、摩訶迦葉尊者、富樓那尊者，其他嘅大菩薩有藥王啦、文殊啦、普賢菩薩啦，都參加在會嘅。釋迦牟尼佛，佢講演大乘教義，主旨在於說明三乘嘅方便、一乘嘅真實，最後指歸淨土、宣揚濟世，所以記載呢次法會內容嘅《妙法蓮華經》可以話係集大乘思想嘅大乘著作。而普賢菩薩喺靈山法會之上就提出，釋迦牟尼佛滅度之後，善男子、善女子如果想得到《妙法蓮華經》，必須要做到下便所講嘅四點：第一就係諸佛護念，第二就係植衆德本，第三係人正定聚，第四係發救一切衆生嘅心。普賢菩薩又喺法會上便表示：喺世尊滅度之後五百年之間，有人受持《妙法蓮華經》，我當守護，除其衰患，令得安穩吖。是人若行若立讀誦此經，我當乘六牙白象王，與大菩薩俱詣其所，供養守護，安慰其心吖。是人若坐思惟此經，我復乘象王至其人前，是人對《妙法蓮華經》有所忘失一句一偈，我當教之，與共讀誦，得見我身，甚大歡喜。若有比丘、比丘尼、優婆塞、優婆夷受持讀誦，書寫此經，一心精進，滿三七日，我當乘白象與無量菩薩而至圍繞。以一切衆生所起智身，現其人前而爲說法。若人受持讀誦此經，經常憶念解其義趣，如說修行，是行普賢行，爲諸如來摩頂受記。若但書寫，是人命終，生忉利天。若人受持讀誦，解其義趣，是人命終，升兜率天，彌勒菩薩所。所以，對於普賢菩薩呢種堅定嘅護法精神，喺《法華經》有詳細嘅記載。佢護持衆生嘅大行大悲，亦都喺《法華經》有詳細記載。釋迦牟尼佛係好讚歎嘅，而且都表示：“汝已成就不可思議功德，深大慈悲，從久遠來，發阿耨多羅三藐三菩提心，而能作是神通之願，守護是經。”普賢菩薩發願要喺釋迦牟尼佛涅槃之後，守護《妙法蓮華經》，而《妙法蓮華經》係乜嘢意思呢？所謂“妙法”，係對三乘嘅粗法嚟講嘅，指嘅係一乘嘅因果，因爲經前便嘅十四品已經講咗一乘嘅因，後便十四品就係一乘之果嘞。所謂“蓮花”係一種譬喻，因爲蓮花必須花同埋果實同時而存在，用嚟係象徵一乘嘅因果係同時存在嘅。普賢菩薩喺靈山會上誓願守護《妙法蓮華經》，講明佢對呢部大乘經典係極爲重視嘅。（註：接下文）

238.一切如來有長子（二）

（註：接上文）

喺唐代嘅般若三藏亦有《大方廣佛華嚴經》，簡稱《華嚴經》四十卷，其中有一卷叫做《入不思議解脫境界普賢菩薩行願品》，就係而家我哋時常唸誦嘅《普賢行願品》嘞。喺呢一品嘅內容就係普賢菩薩爲其他菩薩衆所講嘅，首先就係長行，然後就用偈誦，跟住系統闡述咗普賢菩薩嘅十大行願。《普賢行願品》係《大方廣佛華嚴經》嘅核心，概括咗《華嚴經》嘅主要思想。“所有十方世界中，三世一切人師子，我以清淨身語意，一一遍禮盡無餘。普賢行願威神力，普現一切如來前。一身復現剎塵身，一一遍禮剎塵佛。”

《大方廣佛華嚴經·普賢行願品》裏面記載普賢菩薩對善財童子同法會上便嘅所有菩薩話：“你哋如果想得到佛嘅功德圓果，亦都就係話你哋想要成佛，就應該修學十種偉大嘅行願。”呢個行願就係普賢菩薩嘅德行，功德門係“果”，普賢十大行願係“因”，要想得到“果”，先須修“因”。普賢菩薩自述嘅十大行願：第一禮敬諸佛，第二稱讚如來，第三廣修供養，第四懺悔業障，第五隨喜功德，第六請轉法輪，第七請佛住世，第八常隨佛學，第九恆順衆生，第十普皆回向。

普賢菩薩，我衷心敬禮於您，您加持一切衆生早日得成菩提，成就您嘅行願，好嗎？普賢菩薩，現在我就簡略略述您嘅大願，希望我唔好講錯。

第一“禮敬諸佛”。所謂“禮”，指嘅就係合掌、繞佛、繞塔、長跪、頭面接足、五體投地等等；所謂“敬”，就係發自內心嘅尊承。概括講，“禮敬”指嘅係生恭敬心，遍於身口所進行嘅禮拜嘞。“禮拜”係外在嘅表現，而“恭敬”就係我哋內心嘅活動。如果內心唔尊承，外表上嘅禮拜只係徒做一啲花巧，唔係真禮敬，咁樣點能夠感動佛菩薩呢？所謂諸佛，包括過去、現在、未來嘅十方一切佛，佛教強調，唔止對於過去佛同現在佛要恭敬禮拜，對於未來嘅佛亦都一樣要禮敬吖！禮敬諸佛嘅具體要求就係我哋心觀想、身禮拜、口稱念，一心頂禮本師釋迦牟尼世尊及十方三世一切諸佛，一心頂禮西方安樂國土大慈大悲阿彌陀佛及十方法界常住諸佛。喺頂禮嘅過程之中，我哋一定要做到一心不恙、五體投地、深入法性，離開能所嘅想，好似佛偈講過：“能禮所禮性空寂，感應道交難思義，我此道場如帝珠，阿彌陀佛影現中，我身影現彌陀前，頭面接足歸命禮吔。”佛教認爲，禮敬諸佛，如果能夠達到上述嘅境界，咁樣我哋會覺得我哋嘅身前便有諸佛普賢，諸佛嘅前便都有我哋嘅身體。亦都係話，一一塵中都有佛，一一佛前都有普賢，一一普賢都喺度合掌禮拜。進一步講，一個普賢嘅身遍入一切普賢嘅身內，而一切普賢亦都攝歸一切普賢嘅身內吖。

禮敬諸佛所得到嘅利益花報係現在可以消除根本煩惱之中嘅我慢，低頭一拜又有幾難呢？罪滅河沙。果報係來世所得嘅報身，人人一見我哋就自然生出恭敬尊重心，喜歡接近你、信從你。禮敬諸佛嘅要旨係內佛、外佛同一實相，隨一一禮，曰佛曰禮，重重無盡。

我哋講到第二點嘅“稱讚如來”。所謂“稱”，指嘅係稱頌，所謂“讚”，指嘅係讚歎；“如來”呢，就係佛嘅十號之一，“如”就係如如不動，意思係不生不滅嘅心體湛然寂照，亙古今而不變；“來”就係去來，意思係如如不動嘅心體能夠生起萬德，喺無去無來之中而能夠任去任來。佛所以稱爲“如來”，係因爲佛陀成真如之道去遊化嘅緣故。稱讚如來，有“讚因”同“讚果”嘅區別，所謂“讚因”就係讚歎佛喺因地經過三大阿僧祇劫，修福修慧嘅時候行種種難行能行、難忍能忍嘅修因。比如釋迦牟尼佛喺因地行菩薩道嘅時候，曾經將自己身體上嘅肉一塊一塊割落嚟去餵鷹。又曾經被哥利王所誤會，將佢嘅身軀節節肢解，但係釋迦佛不但唔生起怨恨心，而且仲認真爲哥利王說法，而哥利王就係後來嘅釋迦佛大弟子憍陳如尊者。好似釋迦佛過去嘅難行能行、難忍能忍嘅道行，就係佛嘅修因，稱揚讚歎呢種修因就係“讚因”。而所講嘅“讚果”，就係讚歎佛所成就嘅種種德能，例如無量智慧、無量神通、無量慈悲等等，稱揚讚歎呢啲果德就係“讚果”嘞。佛陀有法、報、應三種身，稱讚如來係對法身佛、報身佛、應身佛呢，都係要讚揚嘅。我哋試舉三首偈誦，一齊嚟讚歎佛嘅三身啦！“清淨妙法身，湛然應一切。”“阿彌陀佛身金色，相好光明無等論，白毫宛轉五須彌，甘目澄清四大海，光中化佛無數億，化菩薩衆亦無邊，四十八願度衆生，九品咸令登彼岸。”稱揚讚歎佛身嘅偈誦，可以有“堂堂黃金相，巍巍不動尊；天上與人間，無不咸恭敬。”稱讚如來利益所得亦都係無窮無盡嘅，係消除我哋嘅惡障，身口意三業亦都喺將來得到辯才無礙。“稱讚如來”嘅要旨係身業禮、口業讚、意業敬，係三業供養如來嘅真實法。

第三種，“廣修供養”。所謂“廣”，意思就係供養嘅範圍，豎窮三際、橫遍十方，普賢菩薩對三世十方一切諸佛都進行供養；所謂“供養”，意思係施捨財物或者舉行法會去弘揚佛法。故此“供養”又有“財供養”同“法供養”嘅分別，“財”有“內財”同“外財”兩種，所以“財供養”又有“內財供養”同“外財供養”嘅分別。“內財供養”就係以自己身上嘅物根據對方嘅需要嚟施捨，比如現在有人自願輸血俾有需要嘅人、志願獻出腎臟俾需要換腎嘅人，呢種真係大菩薩嘅行爲，係好偉大嘅施捨，就係“內財供養”嘞。當然，“內財供養”嘅範圍好廣大，喺《法華經》界定爲“內財供養”係用身口意三業恭敬供養，就係禮拜讚歎供養啦。而“外財供養”就係將金錢財物等等一切身外之物上俸諸佛菩薩、下濟貧困嘅人。佛教嘅修行人具有大慈大悲心，能夠隨緣布施，我哋應該盡心供養一切衆生嘅。（註：接下文）

239.一切如來有長子（三）

（註：接上文）

“法供養”有“自供養”同“他供養”兩種，“法”嘅“自供養”就係自己修學世間同出世間嘅一切學問道德；“法”嘅“他供養”呢，就係將自己學到嘅學問道德無私去教俾別人，使到別人亦都得以開智慧、行道德，呢個就係“法供養”嘞。廣修供養喺實施嘅過程之中可以由小到大、由近到遠個喎。比如“法供養”可以由勸導一人、一家行善開始，而逐漸開始擴展，使到周圍嘅人都可以積德行善，以致可以將呢個力量影響遍及四方。“廣修供養”所得利益嘅花報就係現在可以減少我哋根本煩惱嘅貪欲，而果報呢，就係將來可以得到大富嘞。而“廣修供養”嘅要旨就係“財供養”應該盡己所能，唔好存貪戀嘅心，而“法供養”就以如來正法去開示衆生，令到一切衆生轉迷啓悟吖。

“懺悔業障”。所謂“懺”係梵語“懺摩”嘅音譯略稱嚟嘅，係“容恕我罪”嘅意思；所謂“悔”係中文，意思就係改以往嘅過失、修來世嘅福德。“懺悔”原本係對人發露自己嘅過錯、求人哋去寬恕嘅一種自我表述，但係後嚟就成爲佛教一種宗教儀式。所謂“業”係指我哋身口意嘅三業；所謂“障”係指“惑、業、苦”嘅三障。佛教認爲衆生由於無始一念不覺之間起咗迷惑，起咗迷惑就會失去理智啦，同時又產生唔合理嘅念頭，產生唔合理嘅念頭，身口意就會造出罪業了。造業係“因”，有“因”就必有“果”，將來一定會遭受六道生死輪迴嘅苦報吖，所以我哋千祈唔好造業。好似《普賢行願品》講到：“若此惡業有體相者，盡虛空界不能容受。”因爲有呢啲業障，所以會受唔盡嘅苦，如果想脫離苦海，我哋就一定要懺悔嘞。佛教講“懺悔業障”所得到利益嘅花報係現在可以消除我哋一切煩惱，而果報呢，係將來嘅生活可以永遠富裕同幸福。“懺悔業障”嘅要旨係懺悔我哋一定要真誠，要改我哋嘅心，改往修來，唔係口講。因爲“惑”係我哋嘅心起，所以就要發自內心去進行懺悔，只有咁樣先能夠被污染嘅心，將心識去轉換，換上靈明清淨嘅智慧，有咗智慧就唔會再造惡業，冇咗惡業惡因就唔會再有苦報、苦果了。我哋懺悔千祈唔好擺喺口上便，雖然做錯咗可以改，但係我哋亦都唔好因爲懺悔而有一個藉口，認爲佛教可以洗脫我哋罪業，唸經唸咒可以消除我哋嘅罪障，甚至十惡五逆都可以消除，藉住呢個方便去不斷造業，千祈唔好吖！呢種係一種誤會嚟㗎。相反，我哋更加應該要改往修來，因爲菩薩畏因，凡夫畏果，如果係修行菩薩道嘅聖者，佢每一步、每一言、每一行都會注重所種下嘅“因”，佢會觀察到種種機緣適不適合去講、適不適合去做。所以修行菩薩道嘅師兄，如果受咗菩薩戒，希望能夠注意呢點！菩薩喺種因嘅時候真係好小心嘅。

跟住我哋講到“隨喜功德”。所謂“隨喜”，係指聽佛法嘅時候內心產生喜悅而歸依佛教，比如，喺聽說法嘅時候流下激動嘅眼淚啦，就稱爲“隨喜之淚”嘞；所謂“功德”，指嘅係做善事同得善報，比如唸佛、布施、誦經、建佛塔、印佛經等等。其實“隨喜”有消極同積極兩種，消極嘅隨喜只不過係見人哋做善事，心中生起歡喜心啫，而積極嘅隨喜就係見人哋做善事，不但我哋自己心中生起歡喜心，而且仲要努努力力去實行呢種善事，去幫助其他人成就，係積極嘅。“功德”亦都有“世間有漏功德”同“出世間無漏嘅功德”兩種。“世間有漏嘅功德”指嘅係濟貧扶貧、齋僧建寺、造橋修路、抗洪救災吔；“出世間無漏嘅功德”所講嘅就係廣修六波羅蜜多啦，時常行四攝法，善巧方便而了生脫死吔。對於上述兩種功德能夠心生歡喜、積極支持，有力嘅助力，無力嘅讚歎、隨喜去修，就好似普賢菩薩隨喜淨土法門去稱讚阿彌陀佛嘅功德一樣。“隨喜功德”嘅利益，現生嘅花報就係現在可以消除我哋嘅煩惱之中嘅嫉妒障，而果報，喺將來嘅眷屬亦都可以過上等、美滿嘅生活。“隨喜功德”嘅要旨係對各種功德善舉只能夠稱揚讚歎，唔可以諷刺打擊，能夠隨喜修行，千祈唔好嫉妒同誹謗吖！

我哋講到“請轉法輪”嘞。所謂“請”，指嘅係請求；所謂“轉”，指嘅係運轉；所謂“法”，指嘅係斷除煩惱嘅方法，亦都係佛法；所謂“輪”，原意係車輪；“法輪”就係指佛嘅說法輾轉不停，好似車輪一樣。將佛法比喻爲“法輪”，呢度有兩層寓意嘅，第一，係以車輪轉動，能夠將東西不斷運送到四方八面，暗喻說法係輾轉不斷，可以將佛法不斷運送到我哋衆生嘅心裏便。第二，係以車輪能夠碾碎路上無盡嘅亂石雜草，暗喻佛法能夠不斷消除我哋衆生內心嘅無明煩惱。“請轉法輪”就係請求佛陀俾衆生說法得聽。佛在世嘅時候請求佛說法，佛唔喺世上嘅時候亦都可以請求正知正見嘅大法師代佛說法。佛陀說法，字字句句都係由菩提心之中流出，衆生聞法，字字句句入耳都能夠轉入心中而成爲妙法。我哋只要有個清淨心，打開心胸就可以接受佛陀嘅佛法㗎喇。法師轉大法輪，亦都能夠使到衆生去惡向善、轉凡成聖。“請轉法輪”所得嘅利益花報，現在可以消除我哋嘅“我慢法障”。“慢法”就係驕慢嘅心嚟看待佛法，咁樣點能夠接受佛法呢？唔能夠接受佛法就冇辦法開啓智慧，就形成一種障礙，所以叫做“慢法障”。其實，我哋識得少少佛經，喺佛海裏便只係恆河一粒沙，能夠講、能夠學又有幾高呢？如果我哋自以爲是，將自己識得講好多佛經，能夠弘揚好多佛法，以爲自己喺佛法修學嘅歷程修到好高，就未免過於自以爲是，呢個就係佛經裏便所講嘅“我慢”。無需要吖，其實人人用一個謙卑平等嘅心互相自處，唔好大家互相去妒忌，一齊攜手去弘揚佛法，咁樣真係有幾好呢！消除“慢法障”就會虛心接受佛法，每得一分佛法，就能夠開一分智慧，希望各位佛陀嘅弟子都能夠團結，唔好互相加以誹謗。我哋有入胎之謎吔，我哋唔能夠了知我哋前生嘅嘢，可能我哋前生都係佛陀座下共同弘揚佛法嘅弟子嚟嘅。只要我哋人人能夠團結，唔好分開你我，係一種好嘅方便，係佛陀所希望見得到嘅。消除“慢法”嘅果報係將來可以得到多聞智，有好多機會聽聞佛法。“智”就係佛法一傳入耳之中能夠牢牢記住了。請，“請轉法輪”嘅要旨係喺釋迦如來滅度之後、彌勒如來未生世上，請大法師說法應該真心誠意、虛心頂受，咁樣先能夠破除法障、大開智慧嘅。

跟住我哋講到“請佛住世”。“若悟大乘得見性，虔恭合掌至心求。”所謂“住世”，意思係喺世間居住。“請佛住世”呢種行願，意思係話請求佛陀要久住世間，點解要請佛陀久住世間呢？爲咗只係一樣嘢——希望多啲利益苦難嘅衆生。世人大都處於迷惑之中，只知道盡情造業，唔知學法修行，所以就不停受苦。衆生由於冇智慧，深陷苦海，搵唔到出路，冇人救拔，只有大慈大悲嘅佛陀先能夠普渡衆生出離苦海。佛度衆生嘅方法就係使到衆生獲得智慧、去迷開悟，呢個原因係因爲衆生嘅苦都係由迷而生，去咗迷惑、開咗智慧就能夠離開痛苦，得到安樂，請佛住世嘅目的係令衆生獲得智慧嘅。佛在世嘅時候，我哋應該求佛久住人間，佛唔喺世嘅時候，可以請自性嘅佛住世，所謂“自心作佛，即心即佛”，我哋有冇請過自心嘅佛去住世呢？衆生心淨，見佛常住，衆生嘅心垢見佛就會涅槃嘞。如果衆生念念在佛，就係時時請佛住世，請自性佛住世就係求自己念佛嘅心同佛相應，心即是佛啦。按照佛教講，“請佛住世”所得到利益嘅花報係現在可以消除我哋喺佛前佛後之難——唔會出生喺佛前或者佛後，果報就可以將來得到福德智慧雙重滿足。“請佛住世”嘅要旨係念佛念念不斷，佛先會時常映入我哋心中。我哋要記得佛經所講，心、佛同衆生三樣嘢係冇差別，我哋一定要真正請自性佛住世。

第八樣大行，我哋講到“常隨佛學”。“常隨佛學”呢個行願，係要佛門弟子經常隨從佛嘅學問去修學，佛嘅學問、佛嘅教誨都記載響佛經之中。“常隨佛學”就係經常系統咁學習研究佛經嘞，而且不但要隨佛所學，仲加要隨佛所行。佛喺因地所行嘅種種難忍能忍、難行能行嘅一切行爲都係佛門弟子所要學習仿效嘅。“常隨佛學”嘅利益嘅花報，係現在可以消除我哋墮落同退轉嘅危險，果報係將來可以成佛。“常隨佛學”嘅要旨呢，我哋要誠心憶佛，由因至果、忍得心至、隨之而學、隨之而行。學得一分，實行一分，如果我哋能夠時常咁永遠不變就非常之好了。

第九我哋講到“恆順衆生”。所謂“恆順”就係長久隨順，所謂“衆生”就係大衆。衆生嘅性格、脾氣、心情、習慣都有差異，人同人之間相處要經常不斷去了解對方，先能夠適應對方，就係“隨順”。無論喺何時何地都要同人和睦相處，去造成一個輕鬆愉快嘅氣氛，唔使到對方感到不快痛苦，應該俾對方心生歡喜先係。“恆順衆生”所得嘅利益，現生可以消除我執果報，將來無論做乜嘢事情都會得到好多人嘅擁護愛戴。“恆順衆生”嘅要旨係永遠以大悲心平等對待衆生，亦都能夠好似尊敬父母一樣，乃至如來一樣，對衆生承事供養。具體我哋要做到四點：第一，係當衆生遭到疾病折磨嘅時候，你要成爲良醫。第二，當有人失足或者迷路嘅時候，你要引導佢走上正途。第三，當衆生處於黑暗之中，你要帶嚟光明。第四，當有人貧窮困難嘅時候，你要伸出援手吖。

最後我哋講到普賢十大願王“普皆回向”。所謂“回”就係迴轉，所謂“向”就係趨向。“普皆回向”呢條行願係指迴轉自己所修嘅一切功德，完全無私去施與衆生，或者趨向一個目標。“回向”嘅內容主要有三種：一種係回向自他，就係將自己所修嘅一切功德全部趨向奉獻俾盡虛空遍法界一切衆生；另外一種係回因向果，係將自己唸佛號、誦佛經等等嘅全部功德，爲衆生回向去往生極樂淨土；另外一種就係回事向理，就係由佛學理論嘅高度去認識自己所修嘅一切功德係因緣所生嘅，緣生無性，當體就即空，佛說功德即非功德，而又稱之爲功德。至於回向嘅目標，佛經之中講得清楚了：“願令衆生常得安樂，無諸病苦；欲行惡法皆悉不成，所修善業皆速成就；關閉一切諸惡趣門，開示人天涅槃正路。若諸衆生因其積集諸惡業故，所感一切極重苦果，我皆代受，令彼衆生悉得解脫。”“普皆回向”所得嘅利益，現生果報係現在所修功德唔會消失，果報係將來能夠有願必成。“普皆回向”嘅要旨係回向要專注一個目標，唔使到功德分散，並且要真正做到無一自己嘅私求，係專爲他人謀利益。

“願得普賢真妙行，常樂利益諸衆生。”希望各位師兄早日完成普賢嘅十大願，同證阿耨多羅三藐三菩……（註：此處錄音中斷）

240.自古聖賢邁俗流（一）

喺我哋中國嘅歷史寶庫裏便，有一部閃閃發光嘅巨著，叫做《太史公書》，《太史公書》即係將有歷史以嚟一直到秦、漢嘅整個歷史編寫成一部通史，我哋後人稱之爲《史記》。《史記》被譽爲史家嘅最高準則，呢部著作係史學家司馬遷忍辱負痛，用自己一生嘅血汗寫成嘅。

講到司馬遷嘅家庭係一個仕宦之家，佢爸爸司馬談做過太史令，太史令係專門管理天文曆法嘅事，司馬談亦都精通各家嘅學說，學問好高深，喺家中裏便亦都藏書不少。司馬談好喜歡自己嘅仔，希望能夠一心一意將司馬遷教育成爲世代相傳嘅有才、有志之士。司馬遷後來都好爭氣，佢好細個嘅時候就經常聚精會神聽爸爸講論諸子百家學派同埋所見所聞嘅歷史趣事。司馬遷讀書嘅時候呢，非常用功，啱啱幾歲嘅時候，佢就學會咗當時所通行嘅文字，十歲嘅時候，佢開始閱讀古文，《左傳》《國語》《世本》等等，無書不讀，到咗二十幾歲嘅時候，司馬遷已經讀遍咗家中嘅藏書，而具有比較廣博嘅知識。

爲咗接觸實際，擴大眼界去增長知識、結交學友，啱啱二十歲嘅司馬遷接受父親嘅安排，踏上壯遊祖國嘅大地、進行學術旅行嘅漫長歷程，前後一共二十年，佢嘅足跡幾乎遍及全國。佢所到嘅地方，司馬遷都注意去做歷史嘅調查研究，對於地理環境、人民嘅生活習慣、歷史傳說同埋著名人物嘅逸聞、逸事，佢走鄉串戶、訪問長老，佢查閱史實，進行認真細緻嘅調查，而且隨時做詳細嘅記錄，甚至連嗰啲唔引人注意嘅細微鎖事，佢都好認真去聽取、細心觀察。

通過呢次嘅遊歷，司馬遷親手記低咗幾本好大嘅歷史資料，咁喺寫文章嘅詞藻同埋氣勢方面，亦都受到咗好好嘅鍛煉，爲咗寫《史記》作好準備嘞。例如佢嚟到長沙湘水之濱之後呢，又重讀咗屈原嘅《離騷》《天文》《招魂》《哀郢》等等嘅作品，亦都親自去屈原投水嘅地方進行咗考察同埋實地了解，正因爲佢做咗呢件事，所以佢喺寫《史記》裏便，《屈原賈生列傳》嘅時候，屈原，佢寫到屈原嘅形象呢，栩栩如生。

司馬遷雖然有咗好高嘅學問，但係佢始終虛心學習其他人嘅長處，佢曾經親自登門向孔安國學習《尚書》啦，又到過董仲舒屋企裏面專門請教孔子作《春秋》嘅事蹟。佢同大文學家賈誼嘅孫——賈家一直保持學術通信，多年唔間斷。佢同天文學家壺遂經常相邀，一齊去討論各種學術問題，夜深不散。

司馬遷嘅爸爸司馬談病重嘅時候，將司馬遷叫到面前話：“我死咗之後，你一定唔好忘記著書立說呢件大事，千祈唔能夠俾國家歷史斷絕吖！”司馬遷完全明白歷史對於一個國家、一個民族嘅重要性，佢深沉而堅定，喺父親面前立下咗要編寫國家歷史嘅誓願。喺三年之後，年近三十歲嘅司馬遷繼承父親嘅職位，做咗太史令，從此，佢更加有咗機會閱讀國家收藏嘅大量藏書，去進一步熟悉同埋整理歷史資料，特別對於古代各國嘅歷史、雜記，佢更加係廣泛獵取，用心去鑽研，故此使到自己嘅歷史知識達到咗一個新嘅水平，尤其對各國歷史發展過程嘅了解同埋睇法日益豐富同埋成熟，於是司馬遷就正式開始咗《史記》嘅編寫工作。

正當司馬遷晝夜爲編寫《史記》緊張工作嘅時候，不幸嘅事情就發生了。喺公元前九十九年，漢朝嘅大將李陵喺一次戰鬥之中慘敗，投降咗俾匈奴，而司馬遷喺講到處理呢件事嘅時候，只係隨便講咗幾句公道嘅說話，但係呢幾句說話就觸怒咗漢武帝，被收監而處以宮刑。好好一個健壯嘅身體突然之間慘遭殘疾，咁樣對司馬遷嚟講係一個好嚴重嘅打擊，但係司馬遷並冇灰心，佢嘅意志不僅冇消沉，反而更受到咗考驗，佢下定決心無論如何都要生存落去，要徹底完成《史記》嘅編寫工作。記得佢喺回答一位朋友嘅信裏便曾經講過，佢話：“我受咗咁可恥嘅負刑，所以要忍辱偷生係有原因嘅，因爲我多年嚟搜集咗全國嘅歷史資料，亦都進行咗考察、比較，研究佢嘅成功、失敗、興起同滅亡嘅道理，撰寫一部闡述古代到現代發展嘅一部歷史書，建立一家之言，不料工作仲未完成就遭遇咗呢種慘禍，爲咗完成呢部著作，唔俾國家歷史斷絕，就只好生存、忍受呢種刑罰。假如書已經完成，亦都可以流佈響世上，即使要我立即去死，以致死一千次、一萬次，我都係唔會後悔嘅。”司馬遷喺寫俾朋友一封信裏便講過以上呢一段說話。正係由於司馬遷呢種對於事業嘅堅毅、鄭重、嚴肅、負責嘅態度同百折不撓嘅奮鬥精神，經過前後幾十年嘅努力，司馬遷終於用整個生命同血汗，實現咗自己嘅誓願而完成咗《史記》嘅全部編寫工作。

黃霸係中國西漢時候嘅大臣，佢青少年嘅時代，愛好非常廣泛，佢治學文法、詩書，仲懂得音樂，佢爲人正直，修養亦都好好，對於鄉里之間所發生不平嘅事，無論係邊個，佢都係能夠敢於挺身而出、仗義直言。遇到有一啲無依無靠、鰥寡孤獨、窮苦嘅老人，如果病，甚至死咗，冇錢去安葬，只要話俾黃霸聽，佢就主動出嚟去承擔義務，一個一個都處理安置妥當，如果買唔起棺材，佢就去砍伐樹木去作爲棺材，去幫助啲老百姓。故此黃霸一直好得到平民百姓嘅信賴同埋讚譽，大家都時時暗自祝福佢：好似黃霸咁樣嘅好人，將來如果能夠負起治理國家大業嘅重任，咁就好嘞。

咁講完呢段說話真係巧合，可能係黃霸積咗陰德嘅關係，後嚟黃霸果然官運亨通，相繼就任要職，一，一直嘅官位陞到朝廷丞相長史嘅位置。無論做咗幾大嘅官，黃霸都係堅持廉潔奉公、賢良爲政嘅，但係佢冇想到賢良係總係遭受奸臣嘅逼害。正係黃霸做丞相長史嘅嗰一年呢，朝廷之中嘅奸臣藉咗一位學者夏侯勝嘅案件喺皇帝面前誣告佢，當場加以附和，縱容夏侯勝非議詔書、誹謗皇上嘅罪名而削去一切嘅官職，而且同夏侯勝一齊打入咗監獄，準備對佢哋判處死刑。講到夏侯勝，係當時名望好高嘅學者，尤其喺對金文《尚書》嘅研究方面有好深嘅功力，曾經被人稱爲“大夏侯學”嘅開創者。黃霸一向好賞析夏侯勝嘅學問，夏侯勝亦都非常敬仰黃霸呢個人，現在兩個人同處一個監獄，更加係親密無間了。一日，黃霸突然諗起，現在被關進咗監房，成日冇嘢做，唔係正係學習嘅大好時機咩？於是佢對夏侯勝話：“你嘅學問咁深，可唔可以幫我講解《尚書》呢？”夏侯勝以爲黃霸喺度開玩笑，就冇認真答佢，但係跟住黃霸一次又一次咁重複自己嘅要求，於是侯勝感到好奇怪，好唔理解話：“你同我而家都係獲罪坐監嘅人，講唔定咩時候就會被推出去殺頭，仲講《尚書》有咩用吖？”黃霸於是好冷靜，笑咗一笑然後話：“孔子唔係曾經講過咁樣嘅說話咩？佢話：‘朝聞道，夕死可矣！’如果朝頭早能夠聽到至高無上嘅道理，就算響黃昏嘅時候死去，唔係冇遺憾咩？如果我哋今日仲未被殺頭推出去嘅話，就應該抓緊今日嘅時間，應該學多一啲嘢，即使到咗聽日被殺頭嘅時候，咁我哋個心都會感覺到快慰無憾啦！”夏侯勝被黃霸呢種爭取時間熱愛學習嘅精神深深感動咗，佢完全答應黃霸嘅要求，而且立刻開始系統講授咗《尚書》俾佢聽，從此之後，日日夜夜、朝朝暮暮，一個學不倦，一個教不厭，喺三年監獄之中嘅生活，從嚟冇間斷過“教”同埋“學”。喺三年過咗之後，當黃霸同埋夏侯勝被赦免出獄嘅時候，兩個人嘅學問都比以前大大咁樣長進，黃霸就感歎咁講：“呢三年嘅光陰，我終於真係冇虛度過！”

匡衡係西漢時期一個好出名嘅經學家，佢出生響山東蒼山蘭陵鎮，係一個窮苦人家嘅細蚊仔。窮細蚊仔匡衡從小就好中意讀書了，但係嗰個時候，窮人家想讀書猶如蛤蟆想飛天一樣，係好難嘅，匡衡不但冇條件去學堂讀書，喺日頭仲要幫助爸爸媽媽去做嘢生活。如果利用晚間嘅時間去讀書呢，屋企又冇錢去買燈油，亦都係讀唔成。有一日，匡衡就望住屋企嘅牆壁而諗到一個主意，係咩主意呢？佢喺自己嘅牆壁裏便去鑿開一個小洞，希望能夠喺隔籬鄰舍嘅燈光能夠透過呢個小洞照射過嚟，自己就可以利用呢啲燈光，藉呢啲小燈光去讀書了。咁一日、兩日，三年、數年慢慢過去，匡衡就係利用呢個方法讀書，終於用呢種刻苦求學嘅精神使到自己成才，後嚟，佢不僅文章寫得好好，仲加善於吟詠詩句，而且有超人嘅理論修養同政治見解，到咗漢元帝嘅時候，匡衡就被任命做咗朝廷嘅丞相。呢個係好著名嘅“鑿壁偷光”故事。

玄奘法師係中國歷史上一位有卓越貢獻嘅僧人，佢從小求知好學，而且具有堅毅不拔嘅性格同百折不撓嘅毅力，佢仲係一位傑出嘅旅行家、思想家、文學家同翻譯家添。玄奘法師係河南人士，本身佢叫做陳禕，佢十一歲嘅時候開始誦讀經書，十三歲出家，“玄奘法師”就係佢做咗和尚之後嘅法號，佢雖然出家爲僧，但係好中意學習，敬惜寸陰，勵精無怠。唐朝初期，玄奘法師去過長安、成都、荊州、河南、河北等等嘅地方遊歷授學，佢每到一笪地方，佢都首先去登門請教有學問嘅僧人，同佢哋討論學術問題，亦都了解情況。經過廣泛嘅調查，佢發現全國嘅佛教宗派分歧，譯經唔能夠傳道，亦都唔能夠傳實，所以佢就下定決心要親自到佛教嘅發源地——印度，去學習同研究佛學。

玄奘法師喺二十五歲嗰一年就離開咗長安西行。一日，佢走到嘉峪關嘅路途之上，見到一位老人，老人聽講玄奘法師只一個人西行取經，就再三勸阻話：“西行嘅道路係極爲艱險，伊吾國（啫係現在新疆嘅一帶嘞）有八百里大沙漠，嗰度上無飛禽、下無行獸，成群結隊嘅人都迷失咗方向，唔識得往返而葬身響沙漠之中，更何況你一個人獨行呢？我勸你都係趁早返去啦！”玄奘法師聽完老人嘅說話之後，尋思咗片刻，佢就話：“我既然已經立志西行，就決唔會後退一步，縱然死喺路途之中，一定係冇悔恨嘅！”老人被玄奘法師堅定嘅意志所感動，唔再攔阻佢，於是仲將自己所騎嘅一匹赤色嘅馬送給俾玄奘。

玄奘法師騎住馬進入咗大沙漠之後，果然迷咗路，攜帶嘅一啲水亦都倒咗，真係進退兩難。面對呢種情況，玄奘法師曾經尋思過：仲係返去攞水定係西行呢？但係一諗到自己立下嘅不後退一步嘅誓言，於是又鼓足咗勇氣，繼續前進。佢一邊走一邊堅定自己嘅意念話：寧肯西行而死，不能東歸而生。喺滴水未進嘅情況之下，又西行咗四五日，佢曾經多次暈倒響地上，但係只要一甦醒過嚟，佢又接住向西行，咁樣，佢一路越過戈壁、翻越蔥嶺、經過碎葉城到阿母河、登帕米爾高原、闖鐵門關嘅偏遠，經歷近一年嘅時間，終於到達咗天竺國，成爲第一個周遊古印度嘅中國旅行家。

玄奘法師響印度留學咗十五年，遊歷咗七十多個城市。佢時時都係日頭去遊歷調查，夜晚就響油燈之下功讀佛教嘅各種經典、邏輯文法，同埋博覽佛教嘅群書，學業大有長進，成爲第一流嘅佛教學者。喺公元嘅六百四十二年，玄奘法師出席咗響印度戒日王都曲女城舉行嘅經術討論會，參加盛會嘅一共有十八個國王，數千名佛教僧侶同婆羅門教徒。喺呢個大會之上，玄奘法師以主講人嘅身份發表咗佢超衆嘅佛學論文《制惡見論》，喺大會舉辦咗十八日嘅討論會之中，冇一個人對玄奘法師嘅論文能夠提出反對嘅意見，由呢點可以睇得到，足以顯示玄奘法師嘅刻苦鑽研精神同高超嘅學術水平。取得咗驚人嘅學術成就之後，玄奘法師對自己嘅事業仍然係一片熱忱，毫不懈怠。

當佢由印度步行返去長安嘅時候，佢已經係四十四歲嘅中年了，但係征塵剛去，佢又開始咗對帶返嚟嘅六百五十七部佛經進行咗大規模嘅翻譯工作。法師翻譯嘅態度係好嚴肅、認真嘅，每次佢決定翻譯某一部經典之前，佢總係首先要搜集齊各種唔同嘅版本，自己親自精細去進行校勘比較之後，然後先開始動筆翻譯。由佢開始翻譯嘅嗰一日起，直到佢圓寂之前嘅第二十七日爲止，喺二十年之間，佢虔虔不懈，專思法務，喺依啲期間，佢除咗有一次返鄉下去探望佢同胞嘅姐姐之外，所有嘅時間，係冇離開過自己嘅崗位一步。玄奘法師一生，總共譯出佛經七十五部，一千三百三十五卷，大概一千三百多萬字，佢仲親筆寫出十二卷嘅《大唐西域記》，俾我哋後人留下一份極爲寶貴嘅文化遺產，更爲可貴嘅係玄奘法師俾後人仲留下咗艱苦卓越嘅求知同埋治學嘅精神態度。

喺中國古代嘅優秀散文裏便，有一篇膾炙人口嘅佳作，叫做《岳陽樓記》，依篇文章唔單止係寫景抒情動人，更加有“先天下之憂而憂，後天下之樂而樂”嘅不朽名句，激勵住人嘅宏大抱負。《岳陽樓記》嘅作者就係北宋時期一位有志之士，著名嘅學者、政治家、軍事家，范仲淹。范仲淹響佢一生嘅事業裏便，走咗艱苦曲折嘅道路，但係佢嘅治學精神，就是始終如一，而且被後人傳爲佳話添。范仲淹，雖然佢嘅出身於名門仕宦之家，但係事實係一個破落嘅世家，家境一年比一年艱難，尤其喺佢唔到兩歲嘅時候，爸爸去世，跟住母親亦都改嫁，生活更加係清苦孤寂。生活雖然艱苦，但係對於小小嘅范仲淹，仲唔算得係咩事情，最令佢傷心嘅係由於冇錢，冇書讀，由啱啱識事起，佢就開始希望能夠進學堂，能夠讀書，一直等咗四五年，年年都係落空。後來到咗范仲淹十歲嗰年，佢終於決定決心離開家庭，去長山醴泉寺裏便住，喺僧房裏便發奮用功苦讀。范仲淹集中咗精力，節省時間，一心讀書，佢每日只係煮一大碗稀粥，等到啲粥涼咗凝結之後，再攞嚟一把刀，將啲稀粥劃分爲四塊，早晨同埋晚上呢，就食兩塊，亦都唔燒火同埋炒菜，只係切幾條鹹菜就將稀粥混埋一齊食，食完之後又埋頭再讀書了。喺寺廟裏便有一個老火頭僧人，佢見到范仲淹呢種專心學習嘅精神，非常感動同埋佩服。有一日，呢個火頭僧當面稱讚范仲淹話：“你小小年紀，點解就識得咁發奮讀書？而且生活上又唔怕艱苦，真係好難得吖。”范仲淹於是回答佢話：“一個人如果唔讀書，只係貪圖享受、飽食終日、舒舒服服，呢種生活根本就毫無意義嘅。”

爲咗開拓眼界，廣泛攝取知識，十九歲嘅范仲淹辭別母親，孤身離開久居嘅江南，餐風露宿，千里迢迢去求師訪友，嚟到名師群集嘅應天府，即係現在嘅河南商丘地方。佢入咗當時全國赫赫有名嘅南都學社，范仲淹一踏進南都學社，一下子就被滿架嘅書籍吸引住，佢好貪婪咁晝夜苦讀，簡直達到廢寢忘食嘅地步。喺滴水成冰嘅冬夜，當佢讀得實在疲憊不堪嘅時候，佢就用冷水洗一洗面，清醒下自己嘅頭腦，然後繼續又就燈攻讀。每當肚餓嘅時候，佢只係飲一啲稀粥去充飢啫，老師、同學都好稱讚范仲淹嘅刻苦求學精神，亦都同情佢生活上嘅艱難境遇。喺同窗嘅好友之中，有一個係南都留守（即係相當於知府官位）嘅仔，佢見到范仲淹忘我攻讀，晝夜不息，而後只係食一啲稀粥，好感動。有一日，佢放學回家嘅時候，對爸爸講咗呢件事，於是留守聽咗之後就好有感慨話：“呢個范仲淹必定係一個胸懷大志、有出息嘅細蚊仔，你應該同咁樣嘅人做朋友，好好向佢學習。”於是留守仲吩咐咗自己個仔，要經常送一啲好嘢食俾范仲淹，唔好令到佢身體因爲讀書而讀垮咗，於是留守個仔就天天呢，去將啲食物送俾范仲淹食。咁過咗幾日，留守個仔喺范仲淹書房裏便就發現，原來佢每天送俾范仲淹嘅食物都原封不動，於是佢就責備范仲淹話：“你點解有好嘅食物唔食擺住呢？仲係飲啲稀粥？唔通你懷疑我爸爸嘅用心？”范仲淹於是回答同埋多謝話：“學友，唔係我唔領會令尊嘅厚意，只因爲我多年來一直食粥，已經成爲習慣了。再講吖，如果我每日食你送嚟嘅美食，如果唔再飲粥嘅話，恐怕會養成貪食嘅毛病，將來食唔到苦，咁樣追求事業嘅志向就會因爲懈怠落去了。”

由於范仲淹從小刻苦好學，佢又斷意磨練自己嘅意志，終於成爲一名堅強嘅憂國憂民嘅政治家，一位才學過人嘅學者。喺范仲淹成年之後，經過朋友嘅薦舉，受到朝廷嘅重用，曾經做過右司諫（即係向皇帝提建議嘅官）、吏部員外郎（吏部嘅助理官員啦）、知州（地方行政長官）、樞密副使（中央軍事機關嘅副長官），後嚟范仲淹仲陞到做副宰相嘅要位，成爲顯赫一時嘅朝中紅人。我哋都知道，宋朝曾經變法，舉行過，范仲淹佢變法失敗之後，就遭到貶責，甚至被朝廷清洗，但係，無論喺佢貧窮、倒霉嘅時候，定係佢富貴榮身、官運亨通嘅時候，佢都唔會動搖吖，堅持佢自己嘅意志同埋原則，爲政不忘以天下國家爲己任，爲事不忘廉潔勵志而求真嘅精神態度。范仲淹不僅自己嘅一生係咁，佢對自己嘅仔女吔、親屬亦都係時刻用呢種精神去教育同要求佢哋，喺范仲淹做咗朝廷大官之後，雖然家產萬千，身居顯貴，然而佢全家人嘅衣食住行吖，都係同普通人完全一樣個喎，佢規定佢屋企冇賓客嘅時候唔准食葷菜，妻，妻子兒女嘅衣服唔能夠用好嘅布料去做，即使普通嘅衣服，只係僅僅夠換洗就夠了，佢經常對妻子同埋兒女話：“一個人，特別喺青少年求知嘅時期，千萬唔能夠過分享受優裕嘅物質待遇，唔能夠貪圖安逸，否則喺事業上就缺乏進取心，喺學述上亦都難於探深治玄了。”

歐陽修係宋朝一位著名嘅大官、文學家，佢喺散文、詩詞、史傳同埋書法藝術等等各方面都有較高嘅成就，歐陽修嘅成就唔係天生嘅，而係佢苦心造就。歐陽修細個嘅時候就喪父，家境貧寒，連上學堂讀書都冇辦法實現，只係靠屋企，靠住媽媽教佢讀書認字。佢細個嘅時候就識得求知嘅重要，讀起書嚟，佢唔知道疲倦，亦都唔覺飢寒，佢連食飯、瞓覺都時時要媽媽提醒，一唔提醒，就會將乜嘢都忘記咗。歐陽修細個時候對書法抱有濃厚嘅興趣，佢暗暗羨慕嗰啲寫字寫得漂亮嘅書法家。歐陽修開始練字嘅時候，因爲冇錢買紙同筆，就去野地裏便攞一啲蘆葦杆嚟當筆，用地去當爲紙，一有時間，佢就跪喺地上刻苦去練字，大字、小字、椽書、隸書、楷書、草書，全部都熟練。佢先係照住名書法家嘅貼，一筆一畫練基本功，喺掌握基本書法要領之後，佢仲特別注意吸取各家嘅長處，避免短處，寫出具有自己特色嘅字體。唔知道經過咗幾多個日日夜夜嘅苦練，終於佢創造出獨具一格嘅書法藝術，人哋稱之爲“歐體”，係我國優秀書法藝術嘅大家之一。

歐陽修爲咗掌握作詩填詞同寫散文嘅學問，讀遍咗各朝典籍，而且吸取各家所長爲自己所用。歐陽修讀書惜時如金，無論嚴冬酷暑、走路食飯都係書不離身、眼不離書，就係一邊騎馬亦都一邊讀書。喺夜晚，佢好攰，攰到睜唔開眼，依喺枕頭上便都係要讀書，甚至連去洗手間嘅時，時間吖，咁短暫，佢都唔會白白放過，亦都用嚟讀書。由於自己嘅刻苦努力，歐陽修二十二歲就中咗進士，亦都擔任過翰林學士、樞密副史、副宰相、史館修撰等等重要嘅朝廷職務，歐陽修從事過《新唐詩》《新五代史》等等艱巨浩繁嘅修撰工作。佢，佢自己仲創作咗大量嘅散文、詩詞、傳史作品，現在嘅《歐陽文中公集》，一共有一百五十卷，喺呢啲作品裏便，尤其佢嘅散文具有平易流暢、委曲婉轉嘅獨特風格，對後世有住巨大嘅影響。

喺當時，人哋仲唔係好了解歐陽修平日嘅刻苦精神，對佢嘅成功，亦都有衆說紛紜，有啲人話佢只不過求係求咗好嘅老師，有啲人話歐陽修天生就與衆不同。一，一日，有人去問歐陽修：“你咁淵博嘅學識係點樣得嚟嘅呢？又點樣能夠喺事務繁忙嘅情況之下堅持創作而且能夠寫出咁精彩嘅文章呢？”歐陽修就回答話：“我嘅知識仲唔係能夠講到係淵博，仲要再加倍努力去獲得知識。”歐陽修後來再諗一諗，又話：“如果要問我現在嘅知識係由邊度得嚟？我可以毫不含糊去話俾大家聽，我個知識同埋時間主要來自於‘三上’，邊度‘三上’呢？就係響馬匹上便、響枕頭上便同埋響洗手間上便。”

“人生自古誰無死，留取丹心照汗青。”自古以嚟嘅英雄豪傑之所以能夠昭人千世，其實主要係喺佢哋嘅突出嘅犧牲精神上便，而且能夠由自我嘅犧牲之中去完成大我，去完成永恆不死嘅大我。古聖先賢有講過：“聖人不愛己，聖人不貴己，聖人不爲己。”大英雄、大豪傑對於時光都係一樣，主要係在於犧牲自我，以“成我”呢個思想喺千百世之後嘅犧牲精神，喺心中只係存有一個我見、我執，係絕對唔能夠有萬古不朽嘅大成嘅，無我見、我執先能夠捨去自己嘅身體去爲人，先能夠犧牲自我個人嘅名利、個人嘅生命，去做啲有益於他人、有益於國家民族、有益於世界人類嘅事情，咁樣當代人都會敬仰你，後世人亦都會追憶你。如果一個人一生只爲咗個人嘅升官發財、貪圖享樂，同爲自己嘅妻妾兒女著想，或者只係爲個人嘅富貴功名著想，呢種成就只係個人主義嘅成就，個人英雄主義嘅成就，係絕對有限嘅。喺我哋心目中，如果完全唔爲自己打算，只係爲人類同天地去著想，咁樣，有人類在就自有我在，有天地在都自有我在。確立犧牲自我，呢種犧牲觀，首先主要，要令到我哋心能夠忠直、平白，將我哋嘅心態恪清，唔被塵俗、惑障所染，對於外境，亦都唔好被外景所轉，去習慣……（註：接下文）

241.自古聖賢邁俗流（二）

（註：接上文）……去習慣俾外界嘅事事物物同化我哋個心。我哋做任何事，首先必須個動機要純良、要正確，對得住自己、對得住佛菩薩、對得住他人。

龔定庵嘅詩話：“百年心事歸平淡，刪盡蛾眉惜誓文。”聖賢嘅事業亦都係一樣，要將絢爛極光輝、極偉大嘅事業歸於平淡嘅心懷，咁佢嘅意義自然與其他急功近利嘅人唔同，我哋要以閒雲野鶴、飄然世外嘅心懷去從事救人救世嘅事業，就自然亦都同一啲貪戀權貴嘅巧宦亦都係唔同，所以先能夠“正其義不謀其利，明其道不計其功”，修到呢個效用，亦都可以使到“從政而不制於政，居官而不役於官”，隨時都可以解纜放船，本立而道生，古有明訓：“大者立則小者不立而自立”啦。我哋要做英雄豪傑嘅心理建設，一定要喺立本上便落功夫。

喺功利境界嘅人，佢嘅行爲係以佔有爲目的；喺道德境界嘅人，佢嘅行爲係以服務爲目的；喺英雄境界嘅人，佢嘅行爲係以自我嘅天才發展同個人利益、個人完成爲目的；而喺聖人境界嘅人呢，佢嘅行爲係以大衆嘅天才發展同人類利益、人類完成爲目的。所以如果有犧牲一個小我去完成大我嘅精神，先能夠躋身於英雄境界而進入道德境界、聖人境界嘅領域。我哋亦“不問收穫，但事耕耘”嘅心理基礎，咁政治之爭自可不禁而止，個人成就之緣亦都可以迎風而化，而道德同氣節亦都自然可以不想而自行。要完成一個大我，先係一個永恆不死嘅我，正如老子所講過“死而不亡者壽”，呢一，呢一點嘅精義就喺呢一度嘞。

如果要涵養一種無比嘅犧牲精神，首先要對生死嘅觀念有正確嘅了悟。人生從何來，死往何去呢？古詩講過：“人生無根蒂，飄如陌上塵。”莊子亦都話：“方生方死，方死方生。”如果能夠瞭然生死之義，就自然喺我哋心裏便無求，如果唔能夠把握住我哋嘅主人公，瞭然生死嘅道理，所以就唔能夠獨往獨來響天地之間了，同時亦都唔能夠放出生命嘅異彩，即使活一百歲，生亦輕如鴻毛，同禽獸無異。而生命嘅異彩，時常唔喺佢生嘅偉大，而喺死嘅偉大，如果能夠死重於泰山，就死如於生了，而雖死猶生，如果生係輕於鴻毛，咁就生不如死而雖生猶死。文天祥話：“人生自古誰無死，留取丹心照汗青。”意思係話俾我哋聽，一個人係適宜以死嘅價值去換取生嘅價值，以死嘅榮譽去換取生嘅榮譽，呢個意思，所以伯夷同埋叔齊寧願餓死響首陽山都仗義不食周粟；魯仲連情願自蹈東海而死，就義不帝秦；屈靈均、文天祥、史可法、方孝儒等等嘅賢聖，都學似文天祥《正氣歌》所講過嘅：“鼎鑊甘如飴，求之不可得。”佢哋做到視死如歸嘅境界。又比如楚項羽，垓下一敗吔，本應佢可以聽從亭長嘅勸告，返番江東，圖謀再舉，再可以稱王，捲土重來嘅，但係佢就婉拒亭長嘅意思，自己走到江東去自刎，其實楚項羽呢個氣概，視死如歸係足以氣蓋世。又用拿破崙去舉例吔，拿破崙係歐洲近代歷史上嘅大英雄，但係佢最後都俯首就擒，被拘於荒島之下，而唔能夠對海忘居，咁呢一點未始唔係拿破崙光輝生命之中最後嘅一個敗筆，如果佢同項羽相比的話呢，係其實比項羽稍遜一籌。希特拉同墨索里尼之所以有差別，其實就喺佢哋死嘅唔同地方啫。假使古代西方如果冇保羅嘅殉道精神，咁基督教絕對唔能夠代替羅馬而有西方。其實可以斷言，同時我哋如果係冇黃花崗七十二烈士嘅壯烈犧牲，就絕對唔會有辛亥革命嘅成功，最低限度滿清嘅生命將再延續一個更長嘅時期，呢一點亦都可以斷言。故此凡係創大業嘅超世偉人，絕對唔能夠有惡死而竊生嘅心情，而係必然具有超越一切嘅精神、涵蓋一切嘅風度同救人救世嘅胸懷嘅。

對生死觀念有咗正確嘅了悟，對名利觀念，又必須有正確嘅了悟，咁犧牲精神先唔會誤放喺名利觀念之上。有好多人對於名利觀念甚至重於生死嘅觀念，認爲“人死留名，豹死留皮”，能夠傳名響後代係一件好有價值嘅事，喺上便嚟講，時常爲名而生、爲名而死，喺下便嘅人亦都爲利而生、爲利而死。華盛頓名望嘅偉大，唔喺在於佢自己本身嘅偉大，而係喺美國二百幾年嘅歷史嘅偉大。林肯嘅不朽，唔喺在於總統嘅不朽，而係喺佢解放黑奴呢一件事上便嘅不朽。因爲華盛頓、林肯都堅除個人嘅私心去爲公衆，所以先能夠成其大我而能夠顯得自我更加偉大。

做英雄嘅事業，必須要有聖賢嘅懷抱，如果我哋係諗住去行佛法嘅事業利益衆生，必須要有聖賢嘅懷抱，最低限度就要打破名利嘅觀念，先能夠無爭而有得，否則自己終日身在於慾膠漆盤之中，永遠係唔能夠自拔，自己唔能夠自拔，又談何能夠救人呢？諸葛孔明話：“淡泊以明志，寧靜以致遠。”真係明言嚟嘅，呢個證明佢自己能夠跳得過名利關嘅說話。我哋如果能夠打破名利嘅觀念，自然容易做到富貴不淫、貧賤不移同埋威武不能屈嘅境界了。

不爲聖賢便爲禽獸，不爲英雄便爲凡夫。其實做聖賢、做禽獸，或者做英雄、做凡夫，呢兩者都喺我哋自己嘅手上，係我哋自己去揀擇。孟子話：“人之所以異於禽獸者幾希。”所以我哋如果唔想自己嘅一生無異於禽獸嘅一生，同草木同凋、同草木同朽，就必須要自強不息去鍛煉同埋創造自己，增潤我哋嘅本質，光大我哋做人嘅意義。聖人嘅性質、英雄嘅性質，其實人人本自具有，唔需要欠缺，只係能夠將佢培養、滋潤、灌溉，咁呢個潛藏嘅種子自然可以發芽生長、開花結果，所以我哋要做聖人，就可以做聖人，我哋要做英雄，就可以做英雄。孟子話“人皆可爲堯舜”，佛陀世尊亦都講過人人皆可成佛，換句話去講，即係就我哋本自具有嘅性質嚟講，人人都可以做聖人，人人都可以做英雄，培養就會生，養育就會長，我哋修行就會得到，我哋努力去做就會成功。如果唔培育就唔能夠修爲，唔修爲就點能夠生長？唔生長就點能夠成功呢？但喺另一方面，我哋去睇，人人都有凡俗嘅性質，人人都有禽獸嘅性質，如果你唔加以剋制同埋防治，縱容凡性、獸性，令到佢自然增長，咁就好容易湮滅咗英雄性質同聖人嘅性質了。

人嘅本性係善嘅，但係凡係有本性嘅動物就容易生情，情動就會生慾，慾動就好難同其他禽獸唔一樣了。如果我哋要做聖賢，就必須要剋制我哋嘅人慾以向上修行，一秒一分都唔可以放鬆，如果我哋想做凡夫，只須要順人慾而下流，無須用半點功夫，所以前者難而後者係好容易，做聖人係好難，而做凡夫就話都冇咁易。好易惡難係人之常情，所以聖人英雄，雖然人人都可以做，但係總係鳳毛麟角，係好少，林林總總，全部都係凡夫俗子同雞鳴狗盜、奸猾嘅小人之流啫。

所謂超人，係超於衆流之人，先佛聖人、英雄豪傑，全部都係出於衆流，但係又可以超於衆流，入凡而不斷凡，隨俗而不掩俗，形無以異於人而神異，貌無以異於人而則殊，所以堯、舜、禹、湯、文武、老、莊、孔、孟等等嘅古聖先賢，佢哋嘅形相其實同普通人都冇乜分別，但係點解佢能夠出類撥萃，有異於人嘅？內也，非外也，神也，非形也。除咗佢哋自然生命之外，其實佢哋仲有精神生命，除咗自然生死之外，佢哋尚有精神生死，因爲聖人能夠用修養功夫去成爲一個真正嘅人，去成爲一個超出衆流嘅人，所以能夠永生永存，享天地而萬古不朽。

天子生人而未生英雄豪傑，大家一齊開始都相同，點解最終係唔一樣呢結局？因爲聖人能夠涵蓋一切、超越一切、融通一切，自己掌握自己命運去主宰一切，所以同常人唔同，結果固然唔一樣啦。因爲聖人有個特點，佢哋能夠自剋、自制、自衛、自強，能夠自剋、自制、自強，咁人人都係一個王，人人都係領袖，人人都係英雄，人人都係聖人，如果唔能夠自衛、自強、自剋、自制，咁人人都係凡夫，人人都係奴隸。要將鐵去煉成鋼，須要經過千錘百煉，歷史上所有嘅英雄豪傑，全部都係由千辛萬苦、千錘百煉去出嚟，俗語講過啦：唔吃苦中苦，點能夠做人上人呢？世界上，凡係有成就嘅人，絕對唔係垂手得嚟。

孟子話：“堯人也，舜人也，有爲者亦若是。”聖人能夠做到，點解我哋唔能夠做呢？“非不能也，實不爲也。”其實唔係唔能夠，係我哋唔做啫，爲則是之，捨則失之，“我命由我不由天”呢句先係真理，《易經》講過：“天行健，君子以自強不息。”凡係能夠自強不息而無成就，未之有也。

俗語、諺語都講過：“帝王將相本無種，有志男兒自爲之。”所以千祈唔好自暴自棄，去蹂歪天命。自己甘於作爲奴隸，咁樣你就永遠都係奴隸，自己甘於凡夫，我哋永遠都係凡夫。如果唔自甘作爲奴隸、凡夫，就終有一日唔係奴隸、凡夫嘅。

本嚟人嘅天賦係有厚薄，資質有利鈍，但係天賦、資質絕對唔能夠限制人，限制人嘅發展同成就，時常都係我哋自己。如果資質稍不如人就自卑自餒、自暴自棄，自己安於渺小同平凡而唔去奮發圖強，喺渺小之中創造偉大，喺平凡之中創造神奇，咁永遠就唔會有咩成就。一個人嘅成就唔喺富貴功名之中見得到，歷史上嘅帝王將相同一生都係富貴功名之中嘅人，佢哋唔係聖人，唔係英雄，只係凡夫俗子啫，呢類嘅衆生比比皆是。但係如果無論喺任何一方面要有成就，就必須自艱難困苦之中去奮鬥出嚟。

世界上冇天生嘅聖人，亦冇天生嘅英雄，喺一切事業成功嘅條件之中，我哋否定“天才”呢一樣嘢。愛迪生話：“天才係百分之一嘅靈感加上百分之九十九嘅血汗！”佢又話世界上嘅人時常將佢嘅成功歸功於佢嘅天才，但係佢話，其實佢嘅天才只係刻苦奮鬥啫，所以奮鬥係偉人之母，血汗係成功之母。

喺世界上，係冇只有靠天才而能夠成功嘅偉人，所以悠閒係偉人嘅陷阱，安逸係英雄嘅墳墓，即使我哋天才唔如人，亦都可以努力奮鬥去彌補。《中庸》上便講過：“人一能之，已百之；人十能之，己千之。果能此道矣，雖愚必明，雖柔必強。”呢句說話就係成功嘅最大秘訣，亦都係成功嘅最高原則。自古以嚟，成功嘅天才只不過係埋沒咗嘅天才千萬分之一二啫，其餘都被自己嘅好逸惡勞，恆情所荒廢咗，就好似荒廢田一樣。喺人嘅潛能裏便，人人都有天才，人人都有英雄嘅本性，只係或多或少、或深或淺，潛伏住，猶如金玉埋藏喺泥土裏便一樣，淺就容易發掘，深就唔容易發掘。你如果唔怕艱苦險阻，能夠努力自我發掘，最後就可以證明你並非有乜嘢技不如人嘅地方。不但埋藏有深淺，而且成熟都有遲早，同時歷史上成功嘅人，絕對唔係全部都屬於嗰啲得天獨厚嘅人，而係十居其九屬於資質中庸，但係能夠奮鬥不懈嘅人。孔子講過：“或生而知之，或學而知之，或困而知之，及其知之，一也。或安而行之，或利而行之，或勉強而行之，及其成功，一也。”呢啲古聖先賢嘅說話，真係天經地義、千古不易嘅真理。世界上有不少自安響困頓同現實嘅人，對於佢未能夠有最高嘅成就或者全無成就，總係自己解釋俾自己聽，自己寬恕：“因爲冇適當嘅時勢同埋環境或者命運。”其實時勢唔能夠限制人，環境亦都唔能夠限制人，命運更加唔能夠限制人。

古人話時勢造英雄，英雄亦都造時勢。實質係時勢所造嘅英雄只係第二流嘅英雄人物，能夠造時勢嘅英雄先係第一流嘅英雄人物，凡係爲天生稟賦所限制、爲時勢所限制、爲環境所限制、被命運所控制作弄嘅人，絕對係凡夫，而非常嘅人物，就時常能夠改變自己嘅稟賦、改變時勢、改變環境，去創造把握自己嘅命運，甚至係改變天地、改變世界。“由有做有”並唔出奇，如果“從無做有”先係真正嘅神奇，英雄唔係時常創造歷史咩？如果只係俯伏響現實同歷史嘅腳下，因事而成事，因人而成事，因事成事嘅人絕對唔係英雄。突出嘅英雄，時常能夠呢，善於轉化，轉逆爲順、轉害爲利、轉異爲自、轉怯爲勇、轉柔爲剛、轉弱爲強，轉就會化，唔轉就唔化，無所不轉，就無所不化。儒家講涵養，佛家講修持，道家講鍛煉，呢個就係講轉化嘅功夫，功夫所到嘅地方，妙用就無窮，氣質隨之而慢慢變化，智愚亦都會變化，心性亦隨之變化，命運隨之變化，神氣隨之變化，形相亦都隨之變化，順逆與利害亦都隨之變化，甚至可以變化天地而旋轉乾坤。成功同失敗，完全係決定喺我哋自己手上，而唔係決定響時勢、環境或者命運之上，你能夠多流一分血汗，就多一分成功，多食一分苦頭，就多一分偉大，血汗係我哋事業嘅皇冠，亦都係我哋成功嘅唯一條件。

莎士比亞話：“呢一個唔係靠自己埋頭苦幹，唔係用自己嘅血汗功績去堆積成嘅位置，係唔牢固嘅，係毫無意義價值可言嘅。”佢又講：“金字塔嘅造成係由一方一方嘅石頭堆砌上去。”咁樣講法就係話，凡事係由一點一滴嘅血汗累積而成，無限嘅困苦環境，唔流大量嘅汗水、血汗，絕對唔能夠產生頂天立地嘅人物，順境同富裕只能夠使到你安於現實，去止於平凡，而唔能夠育成你成爲偉大嘅功績。

蕭伯納講過：“人，時常歸咎佢自己所處嘅環境。”但係佢話佢自己唔相信環境，因爲生於呢個世界上嘅人，要起嚟發掘佢哋所需要嘅環境，如果發掘唔到，咁就要去創造環境。世界上係冇嘢唔能夠改變，你可以改變環境，亦都可以改變天地，你可以創造環境，亦都可以創造天地。環境同天地唔能夠拘限人，但係人時常自己拘限響環境同天地裏便，凡係被環境同天地所拘限，一啲都轉變唔到嘅，就係凡夫；凡係唔被環境同天地所拘限，能夠唔被任何嘢去束縛，佢就係英雄。

我哋要想成功一番驚天動地、千古不朽嘅事業，絕對唔係一蹴而就、垂手可成，喺中間一定會經過好多艱難困苦、危險同失敗，但係你千祈唔好灰心，每一種困難係增益你偉大嘅資糧，每一次失敗係促成你成功嘅階乘。困難越大，偉大就越大；失敗越多，成功就越大。無論做任何事，失敗一次唔緊要，只要你能夠不屈不撓，跌倒一定要企番起身繼續奮鬥，不死不休，咁最後一次勝利都係屬於你，成功永遠都屬於你。決定平凡嘅條件，係喺你自己由於自認爲平凡，決定失敗嘅條件，由於自己自自認失敗，只要你唔氣餒，唔終止奮鬥，成敗總係冇確定嘅。

莎士比亞話：“千萬人嘅失敗，失敗係由於做事唔徹底，往往做到離成功仲爭一步吖，就停咗唔做了。”拿破崙都講過：“人生嘅光榮，唔在於永遠唔失敗，而能夠屢跌屢起。”凱撒大帝也都講過：“勝固不驕，敗亦不餒，二者均屬同樣光榮。”所以當我哋陷入失敗之中，千祈唔好灰心，唔好自己失望，唔好氣餒，非要達到目的唔好停止。易卜生講過：“灰心就係動搖嘅開端，動搖就係失敗嘅開端。”培根亦講過：“灰心生失望，失望生不信，不信生失敗。”如果你確定目的之後，你一定要有自信心，信心係一切事業成功嘅基礎，唔成功絕對唔可以半途而廢，所謂“掘井九軔而不及泉，猶廢井也。”柏拉圖嘅名言話：“成功嘅唯一秘訣係堅持到最後一分鐘。”富蘭克林亦曾經講過：“成功屬於嗰啲不屈不撓、百折不歿嘅人。”所以我哋要知道，凡事喺最艱苦、最困難、最冇希望嘅時候，就係可能離成功不遠嘅時候嘞，猶如黎明之前嘅黑暗一樣，要知道失敗真係成功嘅母親，凡事走到盡頭總會係成功，失敗只係中途嘅驛站啫，你唔可以驛站上行嚟行去，你就係成功，所以失敗嘅時候唔好灰心，喺絕望嘅時候千祈唔好氣餒，自然慢慢就會有“山窮水復疑無路，柳暗花明又一村”嘅境界。

歷史上任何一個人嘅成功、失敗，總會有佢原理、原則可以追尋，宇宙嘅萬事萬物亦都係一樣，呢個原理、原則，即係我哋做人做事嘅行動法則，同行爲軌範，亦都就係秘訣，守住呢個原則，如果離開就會失敗。但係構成原理、原則同埋秘訣，係有佢嘅條件，條件係唔可以取佢偶然性嘅，同埋獨特性，而係必須要必然性同埋普遍性，凡事喺此時此地可以成功，喺彼時彼地呢，就唔一定會成功，但係我哋遵從有啲法則去做事，可能我哋咁樣做可以成功，但係其他人做唔一定成功，咁呢種環境係屬於偶然性同埋獨特性嘅。但係如果相反，時間無論古今，地域無論中外，事情無論難易，人無論智愚，如果依住某一個法則，能夠人人做到成功，如果離開呢個法則就一定失敗，咁就屬於必然性同埋普遍性㗎喇，嗰依住呢個法則一定能夠令你成功，換句話講即係放之四海而皆準嘅法則。

一個人做人，先要有個主宰，我哋嘅主宰嚟講，就係我哋嘅心，如果立定呢個心，就係定咗主宰啦，如果亂咗呢個心，就係亂咗我哋個主宰，而一切嘅主宰存在於我，而唔喺人嘅手上，主宰存在於內，而唔喺外便。其實人生只有兩條路可以走，第一種係喺內便嘅發展，向內走嘅路，另外一條係向外發展，向外走嘅路，亦都可以係話一個係向內發展嘅人生，而另外一個係向外發展嘅人生。東方嘅聖哲每每教人儘量向內發展，而西方嘅聖哲就教人儘量向外發展。咁呢兩者無限發展嘅結果，我哋睇一下，前者就會產生優越嘅精神境界、理性境界同埋道德境界，慢慢慢慢嘅結果，有因有果，就可以見到一片天理流行嘅現象，人人信奉天理，人人信奉因果；但係後者嚟講，慢慢就會產生優越嘅物質文明同埋科學文明、事功文明，現在就係呢個社會，最後嘅結果就好容易導致一片人慾流行，呢個就係東西文化根本區別嘅地方。但係一個人，生命嘅自我完成嘅原動力，其實究竟係喺我哋生命自身之內，而唔係喺生命以外嘅東西，所以舉凡物理學問、科學嘅學問、事功嘅學問，今日雖然已經發展到太空時代嘞，但係我哋人生嘅知識，知識無限嘅發展同無限成就係絕對唔能夠完成我哋人生嘅，而且相反，可能會吞噬咗我哋呢個人生，絕對唔能夠完成一個人同埋完成一個“我”，可能會足以毀滅我哋嘅真正做人嘅根本同埋一個真我，因爲完成真人嘅條件，同完成一個真我嘅條件，知識係無關，都係我哋身外嘅事物、身外嘅東西嚟嘅啫。

無我嘅精神係一種超我嘅聖人境界，亦都係一種天地嘅境界。天地無私，固能夠成其大，日月無私，故能成其明，聖人無私，故能成其我。領袖嘅事業同聖人嘅事業，唔係一種爲我嘅事業，而係一種爲人嘅事業，唔係一種救己成己嘅事業，而係一種救人成人嘅事業、救世成世嘅事業。如果我哋因爲自己，咁樣我哋只能夠成爲一個有限嘅小我，如果我爲人人，我哋就能夠存響人人嘅心目中，如果能夠爲天下全人類、全衆生，咁我哋就能夠存在於天下全人類嘅心目中，如果我哋能夠做到與天地萬物同爲一體，嗰我哋就能夠同天地萬物永生不滅。還我於天地，咁天地永在，而我哋亦都永在，所以聖人無我，無我所以有我；聖人無私，無私所以成其私；聖人無能，無能所以有大能；聖，聖人無功，無功所以有大功。故此愈爲己者，愈不能有己；愈自私者，愈不能成其私，呢個係天地之間嘅至理。所以我哋無論想成爲聖人或者英雄，我哋總應該建立自己內心嘅無我觀作爲人生嘅大根本、大目標，將我念、我執、物念、物執，一概剝落淨盡，咁樣生命所發揮出嘅光輝同力量就可以無窮同埋無限，不但能夠鐵肩擔道義，白骨壯山河，亦都可以浩氣高今古、精忠貫鬥牛嘞。如果一個世人，認爲自己乜嘢都能夠擁有咗，通常呢類諗法嘅人可能係一無所有嘅人；一個人如果認爲自己一無所有，可能呢個人乜嘢都擁有咗。

釋迦牟尼佛自願放手王子嘅富貴尊榮而爲救渡衆生去說法；耶穌自願放棄人世間嘅萬有而爲人類去贖罪。講番我哋中國歷史吔，范蠡同埋張良能夠放手卿相之位而遨遊五湖；虯髯客同埋陳摶可以放棄同唐太宗、宋太祖爭帝位而去歸隱。呢啲聖人豪傑，佢哋放手，就係我哋凡夫看來，可能係乜嘢都冇，但係可能喺佢哋心目中係坦然，心目中已經係富貴，可能喺天地之間，呢啲聖人先係乜嘢都能夠擁有嘅人。因爲一個人嘅成……（註：此處錄音中斷）係多方面嘅，喺某一個角度放棄，可能喺某一個角度就係成就，故此一個人必須損我方能利我，無我方能有我，大損我方能大利我，大無我方能大有我，將我哋呢個小我能夠超化去歸於至簡至無，而千祈唔好喪己於物，失性於俗，先能夠遊心於天地之外，養氣於大化之中。

閒來無事不從容，睡覺東窗日已紅；

萬賴靜觀皆自得，四時佳興與人同。

道通天地有形外，思入浮雲變化中；

富貴不淫貧賤樂，男兒到此是豪雄。